އެފްޑަބްލިއު ކޮންސްޓްރަކްޝަނުން މާލޭގައި އިމާރާތްކުރި "ރެހެންދި-6" އިން ޕީޕީއެމްގެ ނައިބު ރައީސް އަދި ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲގެ ދެކަނބަލުން 9 މިލިއަން ރުފިޔާ އަށް ދެ ފްލެޓް ބަައްލަވައިގެންފި ކަން ހާމަވެއްޖެ އެވެ.
އެފްޑަބްލިއު ކޮންސްޓްރަކްޝަނުން އެންމެ ފަހުން ހެދި ރެހެންދި-6 އިން އަަބްދުއްރަހީމާއި އަނބިކަނބަލުން ދިޔާނާ ހުސެއިން ބައްލަވައިގެންނެވި، ފެންވަރު މަތީ ފްލެޓެއްގެ އަގު އުޅެނީ 4.5 މިލިއަން ރުފިޔާގަ އެވެ.
ދެ ބޭފުޅުންގެ ނަމުގައި ފްލެޓްތައް ރަޖިސްޓްރީކުރަން ފޮނުވާފައިވާ ދެ ސިޓީ މިހާރު ވަނީ އާންމުވެފަ އެވެ. އެ ސިޓީގައިވާ ގޮތުން ދެ ފްލެޓަށް އެއްކޮށް ފައިސާ ދައްކާ ވަނީ ހަލާސްކޮށްފަ އެވެ. އެ ދެ ބޭފުޅުންނަށް ވިއްކާފައި ވަނީ ފުރަތަމަ ފްލޯގެ އެއްވަނަ ފްލެޓާއި ދެ ވަނަ ފްލެޓެވެ.
"މިހާރު"އާ ވާހަކަ ދައްކަވަމުން އަބްދުއްރަހީމް ވިދާޅުވީ ރެހެންދި-6 އިން ދެ ފްލެޓް ބައްލަވައިގެންނެވި ކަމަށެވެ. އަދި އޭގެ ތެރެއިން އެއް ފްލެޓް ބައްލަވައިގަތީ އަނބިކަނބަލުންގެ ނަމުގައި ކަމަށް ވެސް އޭނާ ވިދާޅުވި އެވެ.
"މިހާރު"އާ ވާހަކަ ދެއްކެވުމުގެ ކުރިން ޕީޕީއެމްގެ ޕްރެސް ކޮންފަރެންސްގައި އަބްދުއްރަހީމް ވިދާޅުވީ އުއްތަމަ ފަނޑިޔާރު އަބްދުﷲ ސައީދު ފްލެޓެއް ބައްލަވައިގެންނެވި ވާހަކަ ދެއްކެވުމުން މިހާރު އުޅެނީ އޭނާގެ ފްލެޓްތަކުގެ ވާހަކަ ދައްކަން ކަމަށެވެ.
"އަޅުގަނޑުގެ ފްލެޓް ހުންނާނެ،" ވަރަށް ކެރިގެން އިންނަވައި އޭނާ ވިދާޅުވި އެވެ.
"އަޅުގަނޑު ރައްޔިތުންގެ މަޖިލިހުގެ މެމްބަރުކަން ދެ ވަނަ ދައުރުގައި ކުރަމުން މިގެންދަނީ. އަޅުގަނޑު މި ހުރީ މައުލޫމާތު ދޭން ތައްޔާރަށް. އަޅުގަނޑުގެ ފޮރުވިފައިވާ އެޖެންޑާއެއް ނެތް."
ރޭ ޕީޕީއެމުން ބޭއްވި ޖަލްސާގައި ވެސް އޭނާ ވަނީ ފްލެޓް ގަނެފި ނަމަ އެ ފައިސާ ހޯދި ގޮތެއް ސާފުކޮށްދޭން ޖެހޭނެ ކަމަށް ވިދާޅުވެ، ޖުޑީޝަލް އެޑްމިނިސްޓްރޭޓަރު ހަސަން ސައީދަށް ރައްދު ދެއްވައި ވާހަކަ ދައްކައިފަ އެވެ.
"އަޅުގަނޑު ކަމަށް ވިޔަސް، ސިޔާމް ކަމަށް ވިޔަސް، މޫސާ މަނިކު ކަމަށް ވިޔަސް، ނިހާނު ކަމަށް ވިޔަސް އެބަޖެހޭ އަޅުގަނޑުމެން ފްލެޓު ގަތީމަ އެއީ ކޮންތާކުން ހޯދި ފައިސާއެއްތޯ ބަލަން،" އެ ޖަލްސާގައި އަބްދުއްރަހީމް ވިދާޅުވެފައި ވެ އެވެ.
އޭނާ ވިދާޅުވި ގޮތުގައި އޭނާއާ ބެހޭ ގޮތުން ވާހަކަތައް ފެތުރިޔަސް ރައީސް އަބްދުﷲ ޔާމީންގެ އަރިހުގައި ކުރާ މަސައްކަތަށް ބަދަލެއް ނާންނާނެ އެވެ.
"ހުއްޓާލާފައި ގެޔަށް ވަންނަ ވަރުގެ އެއްޗެއް މީޑިއާއަކަށް ހިއްސާއެއް ނުކުރެވޭނެ،" އަބްދުއްރަހީމް ވިދާޅުވި އެވެ.
