މާލޭ ސިޓީ ކައުންސިލްގެ މިއަދުގެ ބައްދަލުވުމުގައި މެމްބަރުން ވޯޓު ދެއްވަނީ.---ފޮޓޯ: މާލޭ ސިޓީ ކައުންސިލް
04 ފެބުރުއަރީ 2020 - 19:13
27 comments
ހިޔާ މަޝްރޫއުގެ ފްލެޓްތައް ކުރީގެ ސަރުކާރުން ދޭން ނިންމި ގޮތް ބެލުމަށާއި އެކަމުގައި ޖިނާއީ ތަހުގީގު ހިންގަން ފުލުހުންނަށް ހުށަހަޅަން ސިޓީ ކައުންސިލުން މިއަދު ނިންމައިފި އެވެ.
ކުރީގެ ސަރުކާރުގައި ފެށި ހިޔާ މަޝްރޫއުގެ ދަށުން ދޭން ނިންމި 7،000 ފްލެޓްގެ މަސައްކަތް އަދިވެސް ދަނީ ކުރިއަށެވެ. އޭރު ފްލެޓްތައް ދޭން ނިންމި ގޮތް ބެލުމަށް މި ސަރުކާރުން ވެސް ކުރިން އޮތީ ޚާއްސަ ކޮމެޓީއެއް އެކުލަވާލައިފަ އެވެ.
އާންމުކޮށް ހުޅުވާލައިގެން އަދި ޓީވީން ލައިވްކޮށް ސިޓީ ކައުންސިލުން މިއަދު ދެއްކި ބައްދަލުވުމަށް ފަހު އެ ކައުންސިލުން ނެރުނު ބަޔާނުގައި ބުނީ ހިޔާ މަޝްރޫއުގެ ފްލެޓްތައް ދޭން ނިންމީ ހައްގުވެރި ފަރާތްތަކަށްތޯ ކަށަވަރުކުރުމަށާއި އެކަމުގައި ސަރުކާރުން މިހާތަނަށް ކުރި މަސައްކަތަކީ ކޮބައިތޯ ބަލަން ނިންމާފައިވާ ކަމަށެވެ. އަދި ކުރީގެ ހައުސިން މިނިސްޓަރު ޑރ. މުހައްމަދު މުއިއްޒާއި އެކަމުގައި އިސްކޮށް ހަރަކާތްތެރިވި ފަރާތްތަކުން އަމަލުކުރި ގޮތް ބެލުމަށާއި ޖިނާއީ ތަހުގީގެއް ހިންގަން އެދުމަށް ނިންމާފައިވާ ކަމަށް ވެސް އެ ބަޔާނުގައިވެ އެވެ.
އެ ބަޔާނުގައިވާ ގޮތުން ހުޅުމާލޭ ބިމުގެ މައްޗަށް މާލޭ ސިޓީ ކައުންސިލްގެ އިހްތިސާސް ހިނގާނެ ކަމާ މެދު ގާނޫނީ ލަފާ ހޯދަން ވެސް އެ ބައްދަލުވުމުގައި ވަނީ ނިންމައިފަ އެވެ. އަދި ހުޅުމާލެ ހިމަނައިގެން ގުޅީފަޅާއި ތިލަފަޅު ހިމެނޭ ގޮތުން މާލޭގެ ބިން ބޭނުންކުރާނެ ގޮތުގެ ޕްލޭން އެކުލަވާލުމަށާއި ގާނޫނުން ލާޒިމްކުރާ ބައްދަލުވުންތައް ބާއްވާނެ ތާރީޚުތައް ދުރާލާ އިއުލާން ކުރަން އިދާރީ ގޮތުން މަސައްކަތްތައް ފަށަން ނިންމާފައިވާ ކަމަށް އެ ބަޔާނުގައިވެ އެވެ.
މީގެ އިތުރުން މާލޭގައި ހިންގާ މަޝްރޫއުތަކާ ގުޅިގެން ކައުންސިލަށް ފަންނީ މުވައްޒަފުން ބޭނުންވާނެ މިންވަރު ދެނެގަތުމަށް އެސެސްމަންޓް ހެދުމަށާއި އިތުރު ޕާކިން ޒޯންތައް ހެދުމަށް ކުރަންޖެހޭ ދިރާސާތައް 30 ދުވަސް ތެރޭގައި ނިންމައި، އަންނަ މަސް ނިމުމުގެ ކުރިން އެ މަޝްރޫއު ފެށުމަށް ނިންމާފައިވާ ކަމަށް ވެސް އެ ބަޔާނުގައިވެ އެވެ.
ހިޔާ މަޝްރޫއުގެ ފްލެޓްތަކުގެ މައްސަލަ ބަލަން ސިޓީ ކައުންސިލުން ނިންމިއިރު، ކުރީގެ ސަރުކާރުގައި އެ ފްލެޓްތަކަށް ކުރިމަތިލާން ހުޅުވާލުމުން އޭރު އެކަމަށް 22،000 އަށް ވުރެ ގިނަ މީހުން ކުރިމަތިލި އެވެ. އޭރު ސަރުކާރުން ފްލެޓް ދޭން ނިންމި ގޮތް ބެލުމަށް މި ސަރުކާރުން އެކުލަވާލި ކޮމެޓީން އެކަން ބެލުމަށް ފަހު، ފްލެޓް ލިބޭނެ މީހުންގެ ލިސްޓް އާންމު ކުރަން ތައްޔާރުވެފައިވާ ކަމަށް ރައީސް އިބްރާހިމް މުހައްމަދު ސޯލިހް އިއްޔެ ވަނީ ވިދާޅުވެފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ދޮންއަލީ
05 February 2020
ސާބަހޭ. ކުޅިސަމާ ފެށެނީތާ. ތިޔަ ހާސަރުތަކެއް ނުދަމައި ތިޔަބައި ޢިއްޒަތްތެރިންނަށްް ފެނިވަޑައިގަންނަވާ ބަޔަކަށް ދެއްވަންވީ ނޫންތޯ؟ ދެންވެސް ވޯޓް ގާތްވީމަ ކޮންމެވެސް އެއްޗެއް ކިޔާލަންވާނެ. މިއޮތީވާ ޤައުމެއް. ކޮންމެ ބަޔަކުވެސް އެބަޔަކު ބޭނުން ގޮތެއް. އަހަރެމެން އަތްޖަހަން
ޝިން
05 February 2020
ވޭތުވެދިޔަ ހުރިހާ މަޝްރޫޢެއް ބަލަންވާނެ. ވެށިފަހި ވެސް. އޭގެއިންވެސް ލައްލަ ގިނަމީހުންނަށް އިންސާފު ބޭނުންވޭ އެބަ
އެކުލަނެތީ
05 February 2020
މޭޔަރުކަމަށް ކުރިމަތިލާނަމަ އެއީ ވަރަށް ބިރުވެރިކަމެއް. ކޮންމެހެންވެސް ތަހުގީގެއް ހިންގާ އެކަން ހުއްޓުވަންޖެހޭނެ. ވާދަވެރި މައިދާނަކަށް ނިކުމެދާނެ އިދިކޮޅު ސިޔާސީ ނަންހިނގާ މީހުން ޖަލަށްލެވޭނެ ގޮތެއް ހެދުމަކީ އަނިޔާވެރި ސަރުކާރުން ކުރިކަމެއްކަމަށް ނަންވާނީ.
ދޮންހިޔަލަ
05 February 2020
ތި އުލެނީ މިއަހަރު ދޭން ހުރި ފްލެޓްތައް ނުދީ ހިފަހައްޓަން،. އިބޫގެ ދައުރު ނިމެން ކައިރިވީމަ ދިނީމަ ބުނާނެތާ، ތިމަންނަ ސަރުކާރުގެ ފްލެޓްވެސް ދިނީމޭ. ތީ ހުރިހާ ސަރުކާރަކުންވެސް ކުޅޭ ކުޅިވަރެއް. އަހަރުތައް ފާއިތުވާ ވަރަކަށް މީހުންގެ ދިރިއުޅުމަށްވެސް ބަދަލު އާދޭ، ތި ފްލެޓްތައް ފްލެޓް ކޮމިޓީއިން ބަލާފަ ދޭންވީނު. މުއައްސަސާތައް ގިނަވި ގިނަވިހެން ރައްޔިތުންނަށް ލިބެންޖެހޭ ޙައްޤުތައް ލިބުމަށްވެސް ދުވަސްނަގާ. ކިހާ ބޮޑުކަމެއްދެން މީ.
އާދަނު، މާލެ
05 February 2020
ކައުންސިލްގެ ދައުރު ހަމަވާން ކައިރިވެފަ އޮއްވާ މިފަދަ މައްސަލަތައް ކުރިއަށް ގެންދިއުން ރަނގަޅެއްނޫން. ކުރީ ސަރުކާރުން ފްލެޓްސް ދިން އިރު ކީ އެއްޗިހި އަލުން ކިޔަން ޖެހޭނީ
އެމްޑީޕީމީހާ
05 February 2020
ރައިސް ޔާމިންގެ ސަރުކާރު މާބޮޑައްވެސް ރަގަޅު. އިބޫ ސަރުކާރައްވުރެ.
ޝޮކްތެރަޕީ
05 February 2020
ކައުންސިލުން ލައިގެން ކީއްތަ މިކުރަނީ.؟ އުމަރުޒާހިރުވެސް މިމީހުންނައްވުރެ މާ ރަގަޅު.
ބޮނބި އޮޑި
05 February 2020
މުއިއްޒަކީ ވިއްލިފަ ހުންނަންޖެހޭ މީހެއް ނޫން އޭނަ ކުޅަ ކަންތައް ބަލަން ޖެހޭ
ގޯސް
05 February 2020
ވެށިފަހި ވެސް ބިންތިޔަދެނީ އެންމެ ހައްގުވެރިންނަކަށްނޫން. ޢަދި ކުރިން ނަޝީދު ދުވަސްވަރު އެކުލަވާލި ލިސްޓްގެ މައްޗަށް ގޯތި ދިނީ އެންމެ ހައްގުވެރިންނަކަށްނޫން. މިމައްސަލަތައްވެސް ބަލާތި.
ގޯސް
05 February 2020
ވެށިފަހި ވެސް ބިންތިޔަދެނީ އެންމެ ހައްގުވެރިންނަކަށްނޫން. ޢަދި ކުރިން ނަޝީދު ދުވަސްވަރު އެކުލަވާލި ލިސްޓްގެ މައްޗަށް ގޯތި ދިނީ އެންމެ ހައްގުވެރިންނަކަށްނޫން. މިމައްސަލަތައްވެސް ބަލާތި.