މާލޭ ސިޓީ ކައުންސިލުގެ މެމްބަރުން ބައްދަލުވުމެއްގަައި ބައިވެރިވެވަޑައިގަންނަވަނީ. ކައުންސިލްތަކުން ލޯނު ނެގޭ ގޮތަށް ގާނޫނަށް ގެނައި ބަދަލު މިއަދު ތަސްދީގުކޮށްފި. ފޮޓޯ: މާލެ ސިޓީ ކައުންސިލް
13 ޑިސެމްބަރ 2021 - 21:16
ލޯކަލް ކައުންސިލްތަކަށް އަހަރަކަށް ލިބޭ އާމްދަނީގެ ތެރެއިން ހަރަދު ކަނޑައި ބާކީ ހުންނަ ފައިސާ އެހެން ކައުންސިލްތަކަށް ލޯނުގެ ގޮތުގައި ދޫކުރެވޭ ގޮތަށް މާލިއްޔަތު ގާނޫނު ބަދަލުކުރަން، ރައްޔިތުންގެ މަޖިލީހުން ފާސްކޮށްފައިވާ ބިލު ރައީސް އިބްރާހިމް މުހައްމަދު ސޯލިހު މިއަދު ތަސްދީގު ކުރައްވައިފި އެވެ.
ސަރުކާރުގެ ގެޒެޓްގައި ޝާއިއުކުރި ގާނޫނުގައިވާ ގޮތުން، ކައުންސިލަކުން އެހެން ކައުންސިލަކަށް ލޯނުގެ ގޮތުގައި ދޫކުރާ ފައިސާ އަނބުރާ ނުދައްކައިފި ނަމަ، ދައުލަތުން ކައުންސިލްތަކަށް ދޫކުރާ ފައިސާ، ލޯނު ނެގި ކައުންސިލަށްް ދޫކުރާނީ ލޯނަށް ދައްކަން ޖެހޭ އަދަދު އުނިކުރުމަށް ފަހު އެވެ. ސަރުކާރުން އެ ފައިސާ ދޭނީ ގާނޫނުގައިވާ ގޮތުން ލޯނު ދޫކުރި ކައުންސިލަށެވެ.
ލޯނު ދޫކުރުމުގެ ހުއްދަ އާއި އެކަމާ ބެހޭ އުސޫލުތައް މާލިއްޔަތު ގާނޫނުގައި ހިމެނީ،، މާލިއްޔަތު ގާނޫނަށް އިތުރުކުރި އަކުރު ތަކަކުންނެވެ. އެއީ މާލިއްޔަތު ގާނޫނުގެ (4) ވަނަ މާއްދާގެ (ޅ)ގެ ފަަހަތަށް އިތުރުކުރި، އަކުރުތަކަކުންނެވެ.
މިއަދު ތަސްދީގުކުރި ގާނޫނުން މާލިއްޔަތު ގާނޫނަށް އިތުރުކުރި އެންމެ މުހިއްމު އެއް ބަޔަކީ ކައުންސިލްތަކުން ދަރަންޏަށް ފައިސާ ނެގުމުގެ އުސޫލުތަކެވެ. އެކަމަށްޓަކަައި މާލިއްޔަތު ގާނޫނަށް ތިން މާއްދާއެއް ތަސްދީގުކުރި އިސްލާހުން ވަނީ އިތުރުކޮށްފަ އެވެ.
އިތުރުކުރި މާއްދާތަކުގައިވާ އުސޫލުގައިވާ ގޮތުން ކައުންސިލްތަކުން ދަރަންޏަށް ފައިސާ ނެގޭނީ، އެ ކައުންސިލެއް ނިސްބަތްވާ ރަށެއް ނުވަތަ ސިޓީއެއްގެ ތަރައްގީގެ ޕްލޭންގައި ހިމަނާފައިވާ މަޝްރޫއުތަކަށެވެ. އެފަދަ މަޝްރޫއަކަަށް ދަަރަަންޏަށް ފަައިސާ ނެގުމަށްޓަކައި ކައުންސިލްގެ މެމްބަރުންގެ އަޣުލަބިއްޔަތުން އެކަން ފާސްކޮށްފައިވާ ގަރާރު ފިނޭންސް މިނިސްޓަރަށް ހުށަހަޅައި ހުއްދަ ވެސް ހޯދަން ޖެހޭނެ އެވެ.
ދަރަންޏަށް ފައިސާ ނަގަން ކައުންސިލްތަކުން ފިނޭންސް މިނިސްޓަރަށް ހުށަހަޅާ ގަރާރުގައި ގިނަ ތަފްސީލުތަކެއް ހިމަނަން ޖެހޭނެ އެވެ. އެ މައުލޫމާތުތަކުގެ ތެރޭގައި ދަރަންޏަށް ފައިސާ ނަގައިގެން ހިންގަން އުޅޭ މަޝްރޫއުން އެރަށަކަށް ނުވަތަ ސިޓީއަކަށް ވާނެ ފައިދާއާއި އެކަމުން ކައުންސިލްގެ މާލިއްޔަތަށްް ކުރާނެ އަސަަރުގެ ތަފްސީލު ހިމެނެ އެވެ.
ދަރަނީގެ އިންޓަރެސްޓާއި ދަރަނި އަދާކުރުމަށް ކުރަން ޖެހޭ ހަރަދުތަކުގެ ތަފްސީލު ވެސް މިއަދު ތަސްދީގުކުރި ގާނޫނު ބުނާ ގޮތުން ކައުންސިލްތަކުން ފިނޭންސް މިނިސްޓަރަށް ހުށަހަޅަން ޖެހޭނެ އެވެ. ދަރަންޏަށް ފައިސާ ނަަގަން ކައުންސިލުން އިޚުތިޔާރުކުރާ ބޭންކް، އިޚުތިޔާރުކުރާ ސަބަބު ވެސް މިނިސްޓަރަށްދޭ މައުލޫމާތުގެ ތެރޭގައި ހިމަނަން ޖެހޭނެ އެވެ.
ކައުންސިލަކުން ބޭންކް ގެރެންޓީ ދޭ ނަމަ ވެސް އަމަލުކުރަން އެގާނޫނުގައި އޮތީ ހަމަ މި ގޮތެވެ. އެކަމަކު ގެރެންޓީ ދިނުމާ ބެހޭ ތަފްސީލީ ގަވައިދެއް ވެސް މިއަދު ފާސްކުރި ގާނޫނުގެ ދަށުން ހަދަން ޖެހެ އެވެ.
މާލިއްޔަތު ގާނޫނަށް ގެނައި މި ބަދަލުތަކަކީ ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް އެންމެ ފަހުން ގެނައި ބަދަލުތަކާ އެއްގޮތް ކުރުމަށް އެހެން ގާނޫނުތަކަށް ގެނައި ބަދަލުތަކުގެ ތެރެއިން ބަދަލެކެވެ. ލޯކަލް ކައުންސިލްތައް ބާރުވެރިކުރުވަން ލާމަރުކަޒީ ގާނޫނަށް ގެނައި ބޮޑެތި ބަދަލުތަކާ އެއްގޮތަށް މީގެ ކުރިން އެހެން ބައެއް ގާނޫނުތައް ވެސް ވަނީ އިސްލާހުކޮށްފަ އެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
ނުދޭތި
14 December 2021
ޙެޔޮ ނުވާނެ ތިމީހުނަށް ފައިސާ ތަކެއް ހަވާލުކުރަން ތިހަބަރާއެކު ކޭއްތިމެން މިހާރު ތިބޭނީ ބަޑުގަ އަތް ކާއްތަކާއްތަ..
ގުދުގުދާބެއްޔާ
14 December 2021
އިސްތިސްނާ ވާނީ މާލޭ ސިޓީކައުންސިލް އެކަނި! މިހާރުވެސް ލާމަރުކަޒީ ޤާނޫނު ނަމަކަށް މާލޭސިޓީ ކައުންސިލަށް އޮންނަނީ! މާލޭ ސަރަހައްދުގެ ބިންތައް އޮންނަނީ އެޗްޑީސީއޭ ކިޔާ ބިންކާ ކޯޕަރޭޝަންގެ ދަށުގައި! ރަށްރަށުގެ ކައުންސިލްތަކުގެ ބާރު އޮންނަނީ އެރަށްރަށުގެ ބިމުގެވެސް! އެތަންތަން ބޮޑުކުރަން އެމްޓީސީސީ އިން އަހަރުމެން ދައްކާ ޓެކްސްފައިސާއިން ހިއްކާފައި ހިލޭދެނީ! ވޯޓުން މިކަންދައްކާނަން!# ނޯވޯޓް ނޯ ގޯތި
ސަޑުހަސަނު
14 December 2021
ކައުންސިލޭ ލާމަރުކަޒީއޭ ރައްޔިތުންގެ ވޯޓުން ހޮވާ ވެރިން ވެރިކަން ކުރުމޭ ކިޔައިގެން ދެބޯގެރި ދުއްވުން ހުއްޓާލާށެވެ. އެއްވެސް ކުރުމުގެ އިޚްތިޔާރެއް ބާރެއް ތިކައުންސިލަކަށް ނޯވެއެވެ. އަބަދުވެސް ކަންކަން ކުރަން ނިންމުމަށްފަހު މިނިސްޓަރަށާއި އަދި ދެންވެސް ހުރިއްޔާ ހުރިތާކުން ހުއްދަ ހޯދަންޖެހޭ. ހުއްދަ ނުދީފިއްޔާ އެކަމަށް ހޭދަވީ ވަގުތާއި ދެންކުރި ހުރިހާކަމެއް ވެސް އެދިޔައީ ފެނަށް.
ފަލަމަޑިބެ
13 December 2021
އެއްކަމެއް ނުކުރިއަސް ހެސްކިޔާފަ ތަސްދީގުކުރޭ…
ސީޒަން ޖެކުހަން
13 December 2021
މޮޔައިން އަތަށް ކަނޑިނުދޭށޭ. މިވަރަށްކިޔާއިރުވެސް ހަމަ ދެނިއްޔޭ.