އަލަމާ-5 ނަމަކަށް ކިޔާ ދޯނި: އަދިވެސް ނުފެނޭ--
04 ޖެނުއަރީ 2022 - 11:07
5 comments
ފ. އަތޮޅުން ފުރައިގެން މާލެ އަށް ތިން މީހުންނާ އެކު ދަތުރު ކުރަމުން ދިޔަ ދޯނިން އެންމެ ފަހުން ޚަބަރެއްވީ ރޭ 10 ޖަހަން އުޅެނިކޮށް ކަމަށާއި "އަޑިއަށް ދަނީއޭ" ބުނި ފަހުން ވީ ގޮތެއް ނޭނގޭ ކަމަށް ދޯނި ކައްޕީގެ ފޯން ކޯލް ލިބުނު މީހާ ބުނެފި އެވެ.
ވ. ފުއްސަރު ކައިރިން ގެއްލިގެން ކޯސްޓްގާޑުން ހޯދަމުން އަންނަނީ އަލަމާ-5 ކިޔާ 60 ފޫޓުގެ ދޯންޏެކެވެ. އެ ދޯނީގައި ތިބީ ދިވެހި ކައްޕިއަކާއި ބިދޭސީ ދެ ފަޅުވެރިއަކު ތިއްބެވެ. އެމްއެންޑީއެފުން ބުނީ ދޯނި އަޑިއަށްދާ ކަމަށް ރިޕޯޓްކުރުމާ އެކު، އެ ސަރަހައްދާ އެންމެ ކައިރީ އޮތް ސީއެމްބިއުލެންސެއް ބޭނުން ކޮށްގެން ބޮޑު ސަރަހައްދެއް ބަލަމުން އަންނަ ކަމަށެވެ.
ދޯނި އަޑިޔަށް ދާ ކަމަށް ކޯސްޓް ގާޑަށް ރިޕޯޓް ކުރީ އެ ދޯނި ކުއްޔަށް ހިފައިގެން އުޅޭ އަލީ ރަޝީދު ނަމަކަށް ކިޔާ މީހެކެވެ. އަދި ދޯންޏާ ބެހޭ މައުލޫމާތު ވެސް ސިފައިންނަށް ދިނީ އޭނާ އެވެ.
އަލީ ރަޝީދު "މިހާރު" އަށް ބުނި ގޮތުގައި ދޯނީގެ ކައްޕި އާދަމް ޝަފީގްގެ ފޯން ކޯލެއް އޭނާއަށް ލިބުނީ ރޭ 9:58 ގަ އެވެ.
އަދި "ދޯނި އަޑިޔަށް ދަނީ އޭ، ބަޔަކަށް ރިޕޯޓް ކުރާށޭ" ކައްޕި ބުނި ކަމަށާއި ދޯނި އޮތީ ފުއްސަރު ކައިރިން ހަތަރު މޭލު ދުރުގައި ކަމަށް ކައްޕިއާ ހަވާލާދީ އަލީ ރަޝީދު ބުންޏެވެ. އޭގެ ފަހުން ފޯނު ކެނޑި، ކައްޕިއާ ގުޅޭ ގޮތެއް ނުވި އެވެ.
"އެހާ ހިސާބުން ފޯނު ކެނޑުނީ. އޭގެ ފަހުން އެއްވެސް ޚަބަރެއް ނުވޭ. ގުޅޭ ގޮތެއް ނުވޭ. އަޅުގަނޑު ވަގުތުން ސިފައިންނަށް އަންގައިފިން،" ފާނަ ނަގައިގެން މާލެ ގެންދަން ބޭނުންކުރާ އެ ދޯނި ކުއްޔަށް ހިފާފައިވާ އަލީ ރަޝީދު ބުންޏެވެ.
އެމްއެންޑީއެފުން ބުނީ އެ ހާދިސާ ރިޕޯޓް ކުރުމާއެކު، އެ ސަރަހައްދު އެންމެ ކައިރީ އޮތް ކުޑަ ސީ އެމްބިއުލެންސެއް ފޮނުވައި ހޯދުމުގެ މަސައްކަތް ރޭ ފަށާފައިވާ ކަމަށެވެ. އޭގެ ފަހުން އެ ސަރަހައްދަށް ބޮޑު ސީ އެމްބިއުލެންސެއް ފޮނުވައި މިހާރު ކަނޑުމަތިން ބޮޑު ބައެއް ބަލާފައިވާ ކަމަށް އެމްއެންޑީއެފުން ބުންޏެވެ.
"މިހާރު ސާފޭސް ވަރަށް ބޮޑު ބައެއް ބަލައިފިން. އިރުކޮޅެއް ތެރޭގައި ޑޯނިއާ ނައްޓާލާނެ. އެ އަށް ފަހު ވައިގެ މަގުން ސާޗް ކުރަން ފަށާނަން،" އެމްއެންޑީއެފްގެ އިންފޮމޭޝަން އޮފިސަރު އަލިމަނިކު ވިދާޅުވި އެވެ.
ބޯވަ ނަގަން ފީނ މީހަކު ގެއްލިގެން ވެސް އެމްއެންޑީއެފުން އަންނަނީ އޭނާ ހޯދުމުގެ މަސައްކަތް ކުރަމުންނެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ދޮންހޮނުމޮ
04 January 2022
ކަނޑުމަތީ ހާދިސާތަކަށް ރާއްޖެ ތައްޔާރެއްނޫން. މުޅި ރާއްޖޭއެއް ނުބެލެހެއްޓޭނެ 3 ކޯސްޓުގާޑަކުންނެއް. ކަމެއް ޖެހުނީމައި މަދުފަހަރަކު ނޫނީ އެހީދެވޭލެއް އޮންނަނީ ލަސްވެފައި. މިކަން ރަނގަޅު ގޮތުގައި ފުޅާކޮށް ހިދުމަތް އަވަސްކުރަން ގޮވާލަން. ހެޔޮ ބޭކާރު ޕޮލިޓިކުސް މަގާމުތަކަަަށް ފައިސާ އިސްރާފުނުކުރިޔަސް.
ސަލާމަތީ
04 January 2022
ސަލާމަތީ ސެޓްފިކެޓް ކިޔާ އެއްޗެއްގެ ވާހަކައެއް އަޑުއިވޭ. ދުވަހަކުވެސް އެބުނާ ސަލާމަތީ ސެޓްފިކެޓް އޮވެގެން ބަޔަކު ކަމަކުން ސަލާމަތްވި ވާހަކައެއް އަޑެއް ނީވޭ. މިވަނީ ކިހިނެތްބާ؟ އެންމެ ކުޑަ މިނުން ލައިޓް ޖެކެޓް އަޅާލާނެ ފުރުޞަތު ލިބޭ ނަމަ މީހުން އޮޔާދާތަން ފެންނާނެ ދޯ.
ކޮރަލް
04 January 2022
މިފަދަ ހާދިސާ ތަކުގަ ޑޯނިއާ އާ އަދި ހެލިކޮޕްޓަރު ދާން ޖެހެނީ ހާދިސާ ހިނގައިގެން ރިޕޯޓް ކުރާ ވަގުތު އެވެ. އަނެއް ދުވަހު ދިޔައީމަ ކަމަކު ނުދާނެ އެވެ. ވައިގެ މަގުން ބެލީމަ ފަސޭހައިން ފެންނާނެ އެވެ. ދެން ކައްޕީންގެ އަތުގަ ނޫނީ އުޅަނދުގަ ވޯޓަޕްރޫފް ފޯން އެއް އޮތުން މަޖްބޫރު ކުރަން ވީ އެވެ.
ރައްޔިތެއް
04 January 2022
ރައްކާވެ ތިބިއްޔާ ދަތުރު
ރަދީފްއޮފިޝިއަލް
04 January 2022
ރޭޑިޔޯ ކޮމިޔުނިކޭޝަންގެ ވަރުގަދަ ސިސްޓަމެއް ކޮންމެ ދޯންޏެއްގަ ހުންނަން ޖެހޭގޮތަށް ހަދަންފެނޭ.މޮބައިލް ފޯނު އެއީ ގެރެންޓީއެއްޗެއް ނޫން.ސެޓުން މެއިޑޭ ސިގްނަލް ފޮނުވާލީމަ ކާރީގަ ހުންނަ ހުރިހާ އުޅަނދުތަކަށް ލިބި އަވަހަށް ރިއެކްޓް ކުރެވޭނެ. ދުއާ އަކީ 03 މީހުންވެސް ހެޔޮ ހާލުގަ ހިކިފަސްތަނަކުން ފެނުން.ބުޅާ ނުވަތަ ގުޑް ގުޑް ދޫންޏެއް ގެއްލިގެން އުޅޭނަމަ ކަންބޮޑުވާމީހުން މިކަމުގަ ވެސް އެއްޗެއް ބުނާނެކަން ޔަގީން ކުރަން.ވ.ވެދުން