މާލެ ސަރަހައްދުގައި 118,000 އަށް ވުރެ ގިނަ ވެހިކަލް ރަޖިސްޓްރީ ކޮށްފައިވޭ. އެކަކުގެ ނަމުގައި ވެސް އެކަކަށް ވުރެ ގިނަ ވެހިކަލް ރަޖިސްޓްރީ ކޮށްފައިވޭ.
މާލެ މަޖީދީމަގުގައި ޓްރެފިކް ބާރުބޮޑުވެފައި: މާލެ އާއި ހުޅުމާލޭގެ މަގުތަކުގައި 1،000 އަށް ވުރެ ގިނަ ރަޖިސްޓްރީ ނުކުރާ ވެހިކަލްތައް އެބަހުރި.-- ފޮޓޯ: މިހާރު
25 ޖުލައި 2024 - 11:22
48 comments
ރަޖިސްޓަރީ ނުކުރާ 1،000 އަށް ވުރެ ގިނަ ވެހިކަލް މާލެ އާއި ހުޅުމާލޭގެ މަގުތަކުގައި އެބަހުރި ކަމަށް ޓްރާންސްޕޯޓް މިނިސްޓްރީން އިއްޔެ ބުނެފި އެވެ.
މާލެ ސަރަހައްދުގެ ތޮއްޖެހުން ކުޑަކުރުމަށްޓަކައި އަޅާނެ ފިޔަވަޅުތައް ކަނޑައަޅައި ޓްރާންސްޕޯޓް މިނިސްޓްރީން ރޭ އިފުތިތާހުކުރި "މާލެ ފަހި" ޕްރޮގްރާމްގެ ރިޕޯޓުގައި ބުނެފައިވާ ގޮތުގައި، ގިނަ ވެހިކަލްތަކެއް ވިއްކާލެވެންދެން ނުވަތަ ރަޖިސްޓަރީ ކުރެވެންދެން މަގުމަތީގައި ގުދަން ކޮށްފައި ބަހައްޓާކަން ފާހަގަކުރެވެ އެވެ.
އެ ރިޕޯޓުގައި ބުނީ ވެހިކަލްތައް ހުރި އަދަދު ދެނެގަތުމަށްޓަކައި ކުރި ސާވޭތަކުން ދައްކާ ގޮތުގައި، މާލެ އާއި ހުޅުމާލޭގެ މަގުތަކުގައި، ރަޖިސްޓަރީ ނުކުރާ 1،100 އަށް ވުރެ ގިނަ ހަތަރު ފުރޮޅުލީ ވެހިކަލްތައް ޕާކުކޮށްފައިވެ އެވެ.
އެއީ ގަވާއިދާއި ހިލާފަށް ހިގަމުންދާ އަދި ވިޔަފާރި ކުރުމުގެ އުސޫލުތަކާ ވެސް ހިލާފު ކަމެކެވެ.
މި މައްސަލަ ހައްލުކުރުމަށްޓަކައި ވިޔަފާރި އުސޫލުން ވިއްކުމަށް ގެންނަ ވެހިކަލްތައް މަގުމަތީގައި ގުދަންކުރުމުގެ ބަދަލުގައި، ވިޔަފާރިކުރާ ފަރާތްތަކަށް ހާއްސަ ވަކި ސަރަހައްދަކުން ބިން ކަނޑައަޅައި، ވިޔަފާރި އުސޫލުން އެ ފަރާތްތަކަށް ޖާގަ ދޫކުރުމަށް ވަނީ ނިންމައިފަ އެވެ. މިއީ، އެހެން ވިޔަފާރިތަކެކޭ އެއްފަދައިން ކަނޑައަޅާފައިވާ ގަވާއިދުތަކާ އެއްގޮތަށް ކުރެވޭ ވިޔަފާރިއަކަށް ހަދާނެ ކަމަށް ޓްރާންސްޕޯޓް މިނިސްޓްރީން ބުންޏެވެ.
ރިޕޯޓުގައި ބުނެފައިވާ ގޮތުގައި، މާލެ ސަރަހައްދުގައި 118,000 އަށް ވުރެ ގިނަ ވެހިކަލް ރަޖިސްޓަރީ ކޮށްފައިވެ އެވެ. އެކަކުގެ ނަމުގައި ވެސް އެކަކަށް ވުރެ ގިނަ ވެހިކަލް ރަޖިސްޓްރީ ކޮށްފައި އެބަހުއްޓެވެ.
ތަފާތު ލޯން ސްކީމްތައް މެދުވެރިކޮށް ނަގައި، އެ ފަރާތްތަކަށް ފައިސާ ދެއްކުމަށް ދަތިވެފައިވާ ގިނަ އަދަދެއްގެ ވެހިކަލްތައް ވެސް މަގުތައް މަތީގައި އެބަހުރި ކަމަށާއި އެގޮތަށް ހުރި ބައެއް ވެހިކަލްތަކަކީ އޭގެ ހަމަ އަގުގައި ފަސޭހައިން ވިއްކާލެވޭނެ ރަނގަޅު ފުރުސަތެއް ނެތުމުގެ ސަބަބުން މަގުމަތީގައި ބަހައްޓާފައި ހުރި ވެހިކަލްތައް ކަމަށް ރިޕޯޓުގައި ބުންޏެވެ.
ޓްރާސްންޕޯޓް މިނިސްޓްރީން ބުނީ، އެ ފަދަ ވެހިކަލްތައް ވިއްކާލަން ބޭނުންވާ ފަރާތްތަކަށް ފަސޭހަކަމާ އެކު، ވިއްކާލެވޭނެ ފުރުސަތު ހުޅުވާލުމުގެ ގޮތުން އެކަށޭނެ ފަންޑެއް (ބައިބެކް ޕްރޮގްރާމެއް) އެކުލަވައިލާނެ ކަމަށެވެ. އޭރަށް ވެހިކަލުގެ އިވެލުއޭޝަން ހެދުމަށް ފަހު، ވެރިފަރާތުގެ އަތުން ވެހިކަލްތައް ގަނެ ރީސައިކަލްކުރުން، ރީއެކްސްޕޯޓު ކުރުން ނުވަތަ ބައުދަގަނޑުގެ ގޮތުގައި އެކްސްޕޯޓް ކުރުމުގެ ނިޒާމެއް ގާއިމުކުރާނެ އެވެ.
"އިވެލުއޭޝަނަށް ފަހު ވަގުތުން ފައިސާ ދީފައި ގަންނަ ކަމުގައިވަނީ ނަމަ 18 ޕަސެންޓާއި 21 ޕަސެންޓާ ދެމެދު އަދަދެއްގެ އުޅަނދު ދޫކޮށްލާނެކަން ކުރެވިފައިވާ ސާވޭއިން އެނގެ އެވެ،" ރިޕޯޓުގައި ވެ އެވެ.
ސަރުކާރުގެ ވިސްނުމަކީ ކުރިއަށް އޮތް ތިން އަހަރުގެ ބަޖެޓުގައި ހިމަނައިގެން މާލެ ސަރަހައްދުން މިގޮތަށް ހުރި ވެހިކަލްތައް މަދުކުރުމަށްޓަކައި ބައިބެކް ޕްރޮގްރާމެއް ތައާރަފު ކުރުމެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މިނިމަލް
27 July 2024
ތިޔަކުރައްވާ މަސައްކަތައް ވަރަށް ސާބަސް! އެހެން ނަމަވެސް ނުގަވާއިދުން ކޮށްފަ ހުންނަ ކަންތައް އޯކޭ ވާގޮތަށް ސަރުކާރު ޕޮލިސީ ހެދީމަ ނަތީޖާ ގޯސްވާނީ، މިހާރު ތިދެވޭ މެސެޖްއަކީ ނުހައްގު ގޮތުގަވެސް އެބަޔަކު ބޭނުން ކަމެއް ކުރަންވީއޭ، އެއީ މަގުމަތިވިޔަސް، ދުވާރުމަތީގަވެސް، ނިމޭއިރު އޮންނަނީ އާންމު މީހުން ދިރިއުޅުމަށް ކުރާ ވިޔަފާރިއަކަށްވެ ދައުލަތުން ބަދަލު ދޭން ޖެހިފަ.
ޢިބޫ
25 July 2024
މާލޭގެ ވެހިކަލް މަރާމާތުކުރާ ގަރާޖްތަށް ކައިރީ މަގުމަތީގަ ބަހައްޓާފަ ހުންނަ ވެހިކަލްތަށް ނަގާނީ ކޮންދުވަހަކުންތޯ؟
ބިލާލް
25 July 2024
މައްސަލަ އަކީ ކުރިން މިކަންތައް އެއްގޮތަކަށްވެސް މޮނިޓަރ ކުރެވިފައި ނެތުން، ނަޔިއްޖާ ފެންނާނެ ކަމަށް އުއްމީދުކުރަން
ބެންޖަމީނު
25 July 2024
ރަޖިސްޓްރީނުކޮށް މަގުމަތީ ބަހައްޓާފަ ހުންނަތާ އެތައް މަހެއްވީ ވެހިކަލް ކީއްކުރަން ގަވާއިދަށް ފައްތަން ފުރުސަތު ދޭންވީ؟ ވެހިކަލްތައް ޓޯކޮށްފައި ބާދަގަނޑަށް ކިރާލީމާ ސަރުކާރަށް އާމްދަނީ ލިބޭނެ. މިނޫނީ ގަވާއިދާ ހިލާފަށް ކަންތައްތައް ކުރަން މިގޮތަށް ހިތްވަރުދޭ ގައުމެއް ނުދެކެން
ހިތަދޫ
25 July 2024
އަމިއްލާ ފަރުދަކު ނަގާ ލޯނެއް ނަގާނީ ނުވަތަ ގެންނަ ކާރެއް ގެންނާނީ ހުރިހާ ރިސްކެއް އިވެލުއޭޓް ކޮއްފަ ނޫންތޯ؟ ރެޖިސްޓްރީ އިށޫ އަކީ އާ ކަމެއްތަ؟ ސަރުކާރުން ހުރިހާ ކަމެއް އިނޓަވީން ކުރަން ޖެހޭތަ؟އަޖައިބެއް. ރައްޔިތުންގެ ލޯން ތަކާވެސް ހަވާލް ވާންވީނޫންތޯ؟
ކޮރަލް
25 July 2024
ޓްރާންސޕޯޓް އިން ކޮރަޕްޝަން ހިންގި މީހުން ވަކި ނުކޮށް ދާއިމީ ހައްލެއް ނެތެވެ. 5 އަހަރު ވެ ވެރިކަން ބަދަލު ވާއިރަށް އެމީހުން އެކަން ކުރަން ފަށާނެ އެވެ.
ހުޅުމާލެ ވެރިޔާ
25 July 2024
ރާއްޖޭގެ ގާނޫނާއި ގަވާޢިދާ ޚިލާފަށް އެތެރެކޮށް މަގުމަތީގައި ބެހެއްޓުމުގެ އިނާމެއްގެ ގޮތުން އެމީހުންނަށް އެއްވެސް ބިޑުކުރުމެއްނެތި ހުޅުމާލެއިން ވިޔަފާރިކުރާނެ ބިން ދިނުމަކީ ގަބޫލު ކުރެވޭ ކަމެއްނޫން. އަހަރެމެންނަށްވެސް ވެހިކަލްއެއް ގެނެވިދާނެ، ނަމަވެސް ނުގެނެވިގެން މިއުޅެނީ ބާއްވާނެ ތަނެއް ނެތީމަ، ސަރުކާރުން ތިގޮތަށް މަގުމަތީގައި ވިޔަފާރި ކުރާމީހުންނަށް ބިން ހަމަޖައްސަން ވެއްޖެއްޔާ ދުވަހަކުވެސް ސަލާމަތެއް ނުވާނެ.
އަފްރާސިޔާބު
25 July 2024
ތިޔަކަންވެސް ހައްލުވެދާނެ ވިޔަފާރީގެ ގޮތުގައި ތިކަންކުރާނަމަ. ވެހިކަލް އެތެރެކުރާ މީހުންގެ ރަޖިސްޓަރީއެއް އެކުލަވާލައި އެމީހުންނަށް ހުޅުމާލޭން ވަކިތަނެއް ކުއްޔަށްދީ އެތަންތަނުގައި ވެހިކަލް ބޭއްވޭނެ އިންތިޒާމު ހަމަޖައްސަވައި ދެއްވާންވީ. މިހާރު ތިހުރި ވެހިކަލްތަކުގެ ރެކޯޑެއް ކަސްޓަމްގައި ނުހުންނާނެ އެތެރެކުރިކަމުގެ. އެވެސް ދާނީ ލަކުޑި ނުވަތަ ފޮތި ނުވަތަ ފްލައިވުޑް ކޮންޓިނަރ ގެގޮތުގައި ސައިޓަށް. ދެން ނުކުންނާނީ ސުންބޯޑު އަޅުވައިގެން ވެހިކަލް.
ބުރަންމީ
25 July 2024
މާލޭ ސަރަހައްދަށް މީހުން ތޮއްޖެއްސުން ހުއްޓުވަބަލަ. މިތަނަށް މީހުން ތޮއްޖައްސަންޏާ، އެމީހުންނަށ ސަވާރީ ބޭނުންވާނެ. މި ތާގައި ކުރަންވީ ކަމަކީ ޕާކިންގ ބބިލްޑިންގތައް ހަދައި ޕާކު ކުރެވޭނެ ޖާގަ ހޯދައި ދިނުން. ކާރެއް ގެންގުޅެންޏާ 2 ސައިކަލު ބޭނުންވޭ. މި 3 ވެހިކަލް ބޭނުމެއް ނުވާނެ ޖާގަ ހަދައިދިނީމާ. މަޝްވަރާކުރަން ރާޢްޖޭން ބޭރުގެ ގައުމުތަކަށް ޓީމުތައް ދިޔައިމާ ކޮންމެ ދަތުރަކަށް ހިނގާ ޚަރަދުން ވެސް ޕާކިންއަށް ހައްލެއް ހޯދައިދެވޭނެ.
ޑޮކްޓާރ. ބަނާނާ
25 July 2024
ޓްރާންސްޕޯޓްގައި ރަޖިސްޓްރީ ނުކުރާ ބޯޑްޖަހައިގެން ދުއްވާ އަދަދުވެސް ހާމަ ކޮށްލިނަމަ؟