މަހްލޫފް މަޖިލީހަށް ވަދެވަޑައިގަންނަވަން އުޅުއްވުމުން ފުލުހުން ހުރަސް އަޅަނީ--. ފޮޓޯ:ނިޝާން އަލީ/މިހާރު
17 ފެބުރުއަރީ 2018 - 11:24
33 comments
އިދިކޮޅު ފަރާތްތަކުން މާލޭގައި އިއްޔެ ބޭއްވި މުޒާހަރާގައި ފުލުހުންގެ ދައުރު އަދާކުރަން ހުރަސް އެޅުމުގެ ތުހުމަތުގައި ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފް ފުލުހުންގެ އިދާރާ އަށް ހާޒިރުވާން އަންގައިފި އެވެ.
ފުލުހުންގެ ދައުރު އަދާކުރުމަށް ހުރަސް އެޅިކަމުގެ ދެ މައްސަލައެއް ސާބިތުވި ކަމަށް ކްރިމިނަލް ކޯޓުން ކަނޑައެޅުމާ ގުޅިގެން 10 މަހާއި 24 ދުވަސް ވަންދެން މަހްލޫފް ވަނީ ޖަލުގައި ކުރިން ހޭދަކުރައްވައިފަ އެވެ. އޭނާ މިދިޔަ އަހަރުގެ ޖޫން 8 ގައި މިނިވަންވެ، ސިޔާސީ ކަންކަމުގައި އަލުން ބައިވެރިވެވަޑައިގަންނަވަން ފެއްޓެވީ އޭގެ ފަހުންނެވެ.
އެހެންކަމުން، މިއީ މަހްލޫފްގެ މައްޗަށް އެފަދަ ތުހުމަތެއް ކުރާ ތިން ވަނަ ފަހަރެވެ. އަދި މި ކުށް ކޯޓުގައި ސާބިތުވެއްޖެ ނަމަ، ޖަލު ހުކުމެއް އަންނާނެ ކަމަށް ބެލެވެ އެވެ.
އިދިކޮޅު ފަރާތްތަކުން މާލޭގައި އިއްޔެ ހަވީރާއި ރޭ ބޭއްވި މުޒާހަރާގައި މަހްލޫފްގެ އިތުރުން އިހަވަންދޫ ދާއިރާގެ މެމްބަރު މުހައްމަދު އަބްދުﷲ (މުހައްމާ) ވެސް ފުލުހުންގެ އިދާރާ އަށް ހާޒިރުވާން ވަނީ އަންގައިފަ އެވެ. އެ ދެ މެމްބަރުން ރޭ ހައްޔަރު ކުރުމަށް ފަހު، ފުލުހުން ވަނީ ދޫކޮށްލައިފަ އެވެ.
މަހްލޫފަށް ފޮނުވި ޗިޓުގައި ބުނީ ބަޔަކު އިސް ނަގައިގެން މާލޭގެ އަމަންއަމާންކަން އިއްޔެ ނަގާލައި، ހަމަނުޖެހުން އުފެއްދުމަށް މަސައްކަތް ކޮށް، މާލޭގެ ޓްރެފިކަށް ދަތިވާ ގޮތަށް އެއްވުމާއި ފުލުހުންގެ ދައުރު އަދާކުރުމަށް ހުރަސްއެޅި ކަމުގެ ތުހުމަތުގައި ސުވާލުކޮށް ބަޔާން ނެގުމަށް ބޭނުންވާ ކަމަށެވެ.
އެހެންވެ، މަހްލޫފް ފުލުހުންގެ އިދާރާއަށް ހާޒިރުވާން އެންގީ މިރޭ 8:00 އަށެވެ.
މާލޭގައި ހަމަނުޖެހުން އުފައްދަން މަސައްކަތް ކުރި ކަމަށް ތުހުމަތު ކުރެވޭ މައްސަލައިގައި މުހައްމާ ފުލުހުންގެ އިދާރާ އަށް ހާޒިރުވާން އަންގާފައި ވަނީ މިއަދު މެންދުރު ފަހު 2:00 އަށެވެ.
މީގެ އިތުރުން މަހްލޫފް މި މަހުގެ 20 ގައި ކުރި ޓުވީޓަކާ ގުޅިގެން ސުވާލު ކުރުމަށް މިއަދު ހަވީރު 5:00 އަށް ފުލުހުންގެ އިދާރާއަށް ހާޒިރުވާން ވަނީ އަންގައިފަ އެވެ. މަހްލޫފް މީގެ ކުރިން ކުރެއްވި ބައެއް ޓުވީޓުތަކާ ގުޅިގެން އިއްޔެ ވެސް ފުލުހުންގެ އިދާރާ އަށް ހާޒިރުކޮށް ސުވާލުކޮށްފައިވެ އެވެ.
އިދިކޮޅު ސިޔާސީ ބައެއް ބޭފުޅުން ދޫކުރުމަށް އަންގައި ސުޕްރީމް ކޯޓުން މި މަހުގެ އެއްވަނަ ދުވަހުގެ ރޭ ނެރުނު އަމުރު ތަންފީޒު ކުރުމަށް ގޮވާލައި އޭގެ ފަހުން ކޮންމެ ރެއަކު ވެސް އެމްޑީޕީގެ ހަރުގެ ކައިރީގައި އިދިކޮޅު ހަރަކާތުން އެއްވުން ބާއްވަ އެވެ. އެކަމަކު، އިއްޔެ ހަވީރު ބާއްވަން އެއްވުން ނުފެށެނީސް، ފުލުހުން ވަނީ މުޒާހަރާ ރޫޅާލައިފަ އެވެ. މުޒާހަރާ ރޫޅާލުމުގެ ތެރޭގައި ބައެއް އާންމުންނާއި ބައެއް ނޫސްވެރިންނަށް ވަނީ ބޮޑެތި އަނިޔާތަކެއް ވެފަ އެވެ.
ފުލުހުން މުޒާހަރާ ރޫޅާލުމުގެ ތެރޭގައި ހާލަތާ ނުބައްދަލު ބާރުގެ ބޭނުން ކުރި ކަމަށް ބުނެ، އިދިކޮޅު ފަރާތްތަކުން އަންނަނީ ފުލުހުންނަށް ވަރަށް ބޮޑަށް ފާޑު ކިޔަމުންނެވެ. އެކަމަކު، މިކަމާ ގުޅިގެން ފުލުހުންގެ ބަހެއް އަދި ވަނީ ލިބޭ ގޮތް ނުވެފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ހަސަނު
17 February 2018
ފުރަތަމަ ބަލަން މިޖެހެނީ ފުލުހުންގެ ދައުރަކީ ކޮބައިތޯ؟؟ މިހާރު ފުލުހުން އެ އަދާކުރާ ދައުރަކީ ގާނޫނުގާ އޮންނަ ދައުރެއް ނޫން.. ފުލުހުންގެ ނުކަސިޔާރު ދައުރަށް ހުރަސް އަޅާ ރަނގަޅު ދައުރަށް ރުޖޫއަ ކުރުމަކީ ކުރާންވެސް ޖެހޭ ކަމެކޭ މަމި ހިތަށް އަރަނީ...
ކާޖާ
17 February 2018
ފުލުހުން ނޫން މީހުންވެސް މި ގައުމުގައި އުޅެން ޖެހެއެވެ. ފުލުހުން އެހެން މީހުންގެ ދައުރަށާއި މަސައްކަތަށް ހުރަސް އެޅުމުގެ މައްސަަލަތައް ބަލަނީ ކޮންއިރަކުންތޯއެވެ. ދެބޯ ގެރި ނުދުއްވާށެެެވެ. ފަޑިޔާރުން މިކަންކަމަށް ސަމާލުވާންޖެހެވެ. ދައުރަށް ހުރަސް އެޅިއޭ ކިޔާފައި ބޭނުން މީހަކު ހުރަގެއަށް ލުމުގެ ފުރުޝަތު ނުދެއްވާށެވެ.
އެމްސް
17 February 2018
ފުލުހުންނަށް އެއްވެސް މީހެއްގެ އެއްވެސް ކަމަކަށް އެބަ ހުރަސް އެޅޭ ބާ؟
ފަހު ކަބީލަ
17 February 2018
ދައުރެއް އޮންނަނީ ހަމަ އެކަނި ފުލުހުންގެތަ؟ ދައުލަތުގެ އެންމެ މުހިއްމު ދެބާރު ހިސޯރު ކޮއްގެންތިބެ މިކިޔަނީ ކީކޭތަ؟ ކޮބާ، އަދުލް އިންސާފުގެ ދައުރު. ކޮބާ، ރައްޔިތުންގެ މަޖިލީހުގެ ދައުރު. ކޮބާ، ސިޔާސީ ޕާރޓީތަކުގެ ދައުރު. ކޮބާ، ނޫސްވެރިންގެ ދައުރު. ފުލުހުންގެ ދައުރު އަދާކުރާގޮތައް ރައްޔިތުންގެ ދައުރު އަދާކުރަން ނުކުތީމަ މާ ތާހިރެއްނުވާނެ.
މަންސޫރު
17 February 2018
ފުލުހުންގެ ވާޖިބު ފުލުހުންނަށް އިނގިގެންތާ އެޔަށް ހުރަސް އެޅި ކަމަށް ނިންމޭނީ! ޓެކްސް ދައްކަނީކީ އެފައިސާއިން މުސާރަ ނަގައިގެން ފުލުހުން ނިކުމެ ބޮޑެތި ކުއްވެރިންގެ ދިފާއުގައި އަހަރުންނަށް އަނިޔާ ކުރާކަށް ނޫން!
ސައީދުގެބޭބެ
17 February 2018
ދިވެހިރާއްޖޭގެ ޤާނޫނު އަސާސީން ހަމަޖެހިފައިވާ އުސޫލާއި ޤާނޫނުގެ ތަރަހައިގެ ތެރޭގައި ޚިޔާލު ފާޅުކުރުމަކީ ހުއްދަކަމެއް. އެއާި ޚިލާފަށް އުޅެފިނަމަ އެކަން ހަމަމަގަށް އެޅުވުމަކީ ފުލުހުންގެ ވާޖިބެއް. މިހާރު އިއުލާނުކޮށްފައިވާ ކުއްލި ނުރައްކަލަކީ ޞައްޙަ އަދި ޤައުމުގެ ޙައްޤުގައި އެޅިގެންދިޔަ ފިޔަވަޅެއް. މިޤައުމު މިނޫން ދުވަހެއް ދެކޭނީ ކެނެރީގޭ ނަޝީދު މާތްﷲ ގެ ޙަޟްރަތަށް ދަތުރުކުރުމުން.
ފަގީރު ކޮއި
17 February 2018
ފެހި ގާނޫނު އަސާސީގައި ގައިރު ގާނޫނީ އަމުރަކަށް ތަބާނުވާން އޮވޭ. މަ ކުރިން ދަންނަ ގޮތުގައި ވާޖިބަށްވާނީ ގާނޫނާ އެއްގޮތަށް ހިންގާ ހަރަކާތަކަށް އެއްބާރުލުން ނުފިނުމުން. މިހާރު ހީވޭ މަނާ ސަރަހައްދެއްގައި ފުލުހަކު ސިގިރޭޓް ބޯން ހުއްޓާ ތީ މަނާ ކަމެކޭ ބުނުންވެސް، ފުހުންގެ ވާޖިބަށް ހުރަސް އެޅީ ކަމަށް ބަލާނެހެން.
ަބަސް
17 February 2018
ފުލުހުން ފަރުދުންގެ ވާޖިބަށް ހުރަސް އަޅާނަމަ ފުލުހުންވެސް ކުއްވެރިވާނެތާދޯ؟ ފަރުދުން ފުލުހުންގެ ވާޖިބަށް ހުރަސް އެޅޭނަމަ ފުލުހުންގެ ވާޖިބަކީ ކޮބައިކަން ފަރުދުންނަށް އަންގައި ދިނުމަށްފަހު ނޫނީ ފިޔަވަޅު އަޅައިގެން ނުވާނެނޫންތޯ. ފުލުހުން މިހާރު ފިޔަވަޅު އަޅާ ބާރުގެ ބޭނުން ކުރަނީ އެއްވެސް އިންޒާރެއް ދެއްވާފަތޯއެވެ. އެންމެ އިސްވާންޖެހޭނީ ރައްޔިތުންގެ ހައްގެއްނޫންތޯއެވެ.
ައަލިހޮއްކޮ
17 February 2018
ފުލުހުންގެ ވާޖިބަކީ ކޮބައިކަމެއް ފުލުހުންނަކަށްނޭގެނީބާ. ގައުމުގައި ކަރަފުސަނާއި ވައްކަމާއި ފަސާދަޔާއި މީހުންމެރުމާއި މީހުން ވަގަށްނެގުން އާއްމުވެގެންދާއިރު ހުއްޓުވޭތަނެއްނުފެނޭ. ސިޔާސީކަމެއްގަ ވެއްޖެއިޔާމު ހީވަނީ ފަޔަށް ހިނިއަރައިގެން އުޅޭހެން. މީހުންތަޅާސުންނާފަތިކުރަމުން ތިޔަދަނީ. ހީވަނީ ކުލީބައެއްހެން. ބަލަ ކޮންމެކަމަކަށްވެސް ނިމުމެއްއަންނާނެ ކޮންމެމީހެއްގެވެސް ނިމުމެއް އޮންނާނެ. މީހުންނަށް ތިކުރާއަނިޔާގެ ބަދަލު މާދަމާ ދޭންޖެހޭއިރު ނިކަމެތިވާނީ ކޮންގޮތަކަށްކަން ވިސްނޭބާ. ތިޔަފާދާސް އިހަކަށްދުވަހު އުޅުނުބަޔަކު މިހާރު އެތިބެނީ އިބުރަތަކަށްވެފައި ނޫންބާ
ހުރިހާކަމެއްއެފުށްމިފުށަށް
17 February 2018
އިދިކޮޅު އެއްވުމަށް ހުރަސް އެޅީ ފުލުހުންތޯ? މަހުލޫފަށް ހުރަސްއެޅީ ކޮންބައެއްތޯ? މަޖިލީސް މެމްބަރުން މަޖިލީހަށް ވަނުމަށް ހުރަސްއެޅީ ފުލުހުންތޯ? މަޖިލީސް މެމްބަރުން މަޖިލީހަށް ވަނަނުދީ ފުލުހުން ހުރަސް އެޅުން. ކޮބާތޯ ފުލުހުންގެ ވާޖިބަށް ހުރަސްއެޅުމަކީ? މިވެރިކަމުގައި ގާނޫނު މާނަކުރުންވެސް, ވާޖިބަށް ހުރަސްއެޅުންވެސް މިއޮތީ އިދިކީއްޔަށް, ބަދަލުވެފައިތޯ?