އަބުރުގެ ބިލްގައި ދިފާއެއް ނެތް، ޖޫރިމަނާ އާއި އިސްތިއުނާފް ކުރެވޭ ގޮތް ކަމަކުނުދޭ: މީޑިއާ ކައުންސިލް
އަބުރުގެ ބިލް ދިރާސާ ކުރާ ވަގުތީ ކޮމެޓީގައި އާސިފް (ވ) ވާހަކަ ދައްކަވަނީ. ބިލު އޮތް ގޮތަށް ފާސް ކުރަން ތާއީދު ނުކުރައްވާ ކަމަށް އޭނާ ވިދާޅުވި. -- ފޮޓޯ: ނިޝާން އަލީ/ މިހާރު
03 އޯގަސްޓް 2016 - 15:07
9 comments
ރައްޔިތުންގެ މަޖިލީހަށް ހުށަހަޅާފައިވާ އަބުރު ރައްކާތެރި ކޮށްދިނުމާއި ހިޔާލު ފާޅު ކުރުމުގެ މިނިވަންކަމުގެ ބިލްގައި ހުރި ބޮޑެތި ކަންބޮޑުވުންތައް މޯލްޑިވްސް މީޑިއާ ކައުންސިލުން ވަގުތީ ކޮމެޓީއާ މިއަދު ހިއްސާކޮށްފި އެވެ.
އަބުރުގެ ބިލް ދިރާސާ ކުރުމަށް އެކުލަވަލާފައިވާ ކޮމެޓީގައި ވާހަކަ ދެއްކެވި މީޑީއާ ކައުންސިލްގެ މެމްބަރުން ވިދާޅުވީ ބިލްގެ ސަބަބުން ގާނޫނުއަސާސީގައި ހިޔާލު ފާޅު ކުރުމަށް ހުރި ހައްގުތައް ހަނި ކުރެވި، މިނިވަން މީޑީއާގެ ވެއްޓެއް ގާއިމު ކުރުމުގެ ފުރުސަތު އެއްކޮށް ނެތިގެންދާނެ ކަމަށެވެ.
އެގޮތުން ކައުންސިލުން ފާހަގަކުރި ކަންކަމުގެ ތެރޭގައި ނޫސްވެރިއަކަށް ދިފާއުވުމުގެ ބައި އެއްގޮތަކަށް ވެސް ދީފައި ނެތް ކަމާއި، ޖޫރިމަނާގެ އަދަދު ބޮޑުވުމާއި، ޖޫރިމަނާ ފައިސާ ދެއްކުމުން ނޫނީ މައްސަލައެއް އިސްތިއުނާފް ކުރުމަށް ކޯޓަށް ހުށަހެޅުމުގެ ފުރުސަތު ނެތުން ހިމެނެ އެވެ.
މީޑިއާ ކައުންސިލްގެ ރައީސް މުހައްމަދު އާސިފް (މޮންދު) ވިދާޅުވީ ބިލު މިހާރު އޮތް ގޮތަށް ފާސްކުރަން މީޑިއާ ކައުންސިލުން ތާއީދު ނުކުރާ ކަމަށެވެ. މީޑިއާގެ ގަވާއިދުތަކާއި އުސޫލުތަކެއް ހަދާފައި ހުރި އިރު، މީޑިއާ ރެގިއުލޭޓް ކުރުމުގެ ކަންކަން ކުރަމުންދާ ކަމަށެވެ.
އަބުރުގެ ބިލު ދިރާސާ ކުރާ ކޮމެޓީގެ މެމްބަރުން. މީޑިއާ ކައުންސިލްގެ ޝަކުވާތައް ވަނީ ކޮމެޓީއާ ހިއްސާކޮށްފައި. ފޮޓޯ: ނިޝާން އަލީ /މިހާރު
އާސިފް ވިދާޅުވި ގޮތުގައި ނޫސްވެރިންނަށް ވެސް ހަގީގަތާ ހިލާފު ދޮގު ވާހަކަތައް ފަތުރާކަށް ތާއީދެއް ނުކުރެވޭނެ އެވެ. އެކަމަކު ނޫސްވެރިންނަށް އަދަބެއް ކަނޑައެޅުމުގެ ކުރިން ދައުލަތުގެ ހަރަދުގައި ނޫސްވެރިން ތަމްރީނުކުރަން ޖެހޭނެ ކަމަށް ވެސް އޭނާ ވިދާޅުވި އެވެ.
"ނޫސްވެރިން ތަރައްގީ ކުރުމަށް އެއްވެސް މަސައްކަތެއް ނުކުރޭ. ދައުލަތުގެ ބަޖެޓުން އެކަމެއް ނުކުރޭ. އަދަބުތަކެއް ކަނޑައަޅާ ނަމަ، ނޫސްވެރިން ތަރައްގީ ކުރަން ޖެހޭ،" އޭނާ ވިދާޅުވި އެވެ.
އޭނާ ވިދާޅުވި ގޮތުގައި ބިލް ފަރުމާކޮށްފައި އޮތީ މީގެ ކުރިން ވިލިމާލެ ދާއިރާގެ މެމްބަރު އަހުމަދު ނިހާން ހުށަހެޅުއްވި ބިލާ މާ ބޮޑު ތަފާތެއް ނެތި އެވެ. ނަމަވެސް ބިލުގައި ކޮންމެވެސް ވަރަކަށް ލުއިތަކެއް ދީފައި ހުރި ކަމަށާއި ބިލަށް ގެނައީ އެންމެ އެކަށީގެންވާ ބަދަލުތަކެއް ނޫން ކަމަށް އޭނާ ވިދާޅުވި އެވެ.
މީޑިއާ ކައުންސިލްގެ މެމްބަރު އަހުމަދު ހަމްދޫން ވިދާޅުވީ ބިލްގެ ސަބަބުން މިނިވަންކަމާ އެކު ހަބަރުތައް ރައްޔިތުންނާ ހަމަ އަށް ގެނެސްދިނުމުގެ ދޮރު އެއްކޮށްހެން ބަންދުވާނެ ކަމަށެވެ. ދިފާއުވުމުގެ ހައްގު ބޭރުގެ ގައުމުތަކުގައި ދީފައި އޮތަސް، ބިލް ފަރުމާކޮށްފައި އޮތީ ދިފާއު ނުވެވޭ ގޮތަށް ކަމަށް އޭނާ ވިދާޅުވި އެވެ.
މީޑިއާ ކައުންސިލްގެ މެމްބަރު ހަމްދޫން ވާހަކަ ދައްކަވަނީ. އަބުރުގެ ބިލުގެ ސަބަބުން ބައެއް ހަބަރުތައް ރައްޔިތުންނާ ހަމައަށް ގެނެސްދިނުމުގެ ފުރުސަތު ބަންދުވާނެ ކަމަށް އޭނާ ވިދާޅުވި. - ފޮޓޯ: ނިޝާން އަލީ/ މިހާރު
ހަމްދޫން ވިދާޅުވީ ކޮންމެ މީހެއްގެ އަބުރު ރައްކާތެރިކުރެވެން ޖެހޭނެ ކަމަށާއި އަބުރާ ބެހިއްޖެ ނަމަ، ނޫސްވެރިޔާ ނުވަތަ މީޑިއާ ދިފާއުވުމުގެ ފުރުސަތު ވެސް އޮންނަން ޖެހޭނެ ކަމަށެވެ.
މީޑިއާ ކައުންސިލްގެ މެމްބަރު އަހުމަދު އާމިރު ވިދާޅުވީ ބިލް އޮތް ގޮތަށް ފާސްވެއްޖެ ނަމަ، ރައްދުވާ ފަރާތުގެ ބަހެއް ހޯދަން މަޖުބޫރުވާނެ ކަމަށާއި އެކަމުގެ ސަބަބުން މީޑިއާ އަށް ދެ ގެއްލުމެއް ލިބޭނެ ކަމަށެވެ.
އެގޮތުން އެ އަށް ޖަވާބު ދޭން ބޭނުންނުވާ މީހުންގެ ހަބަރުތައް ރިޕޯޓު ނުކުރެވުމާއި ޖަވާބުދާރީ ނުވުމުގެ ސަބަބުން ވަގުތުން ވަގުތަށް ހަބަރު ފޮނުވުމުގެ ދޮރު ބަންދުވާނެ ކަމަށް އޭނާ ވިދާޅުވި އެވެ.
"މިކަންކުރަން (ނޫސްވެރިން) މީޑިއާގައި ތިބި މުވައްޒަފުންގެ ވަޒީފާ ގެއްލޭނީ،" އޭނާ ވިދާޅުވި އެވެ.
ހަމްދޫން ވިދާޅުވީ މުއައްސަސާއެއް ގާނޫނާ ހިލާފުކަމެއް ކުރާ ނަމަ، އެ މުއައްސަސާއެއްގެ ވާހަކަ ދެއްކުމުގެ ފުރުސަތު އެބައޮތް ކަމަށާއި މުއައްސަސާގެ ހުރި މީހާގެ ވާހަކަ ދެއްކުމުގެ ފުރުސަތު ނެތް ކަމަށެވެ.
"މުއައްސަސާއެއްގައި ހުރި މީހަކު ކޮރަޕްޝަނެއް ހިންގަފާނެ. އެ މީހަކާ ދޭތެރޭ ފާޑު ކިޔެން ޖެހޭނެ. އަޅުގަނޑުމެންނަށް އެ މީހާ އަށް ފާޑެއް ނުކިޔޭ ބިލުގައި އޮތް ގޮތުން،" ހަމްދޫން ވިދާޅުވި އެވެ.
އަބުރުގެ ބިލު ދިރާސާ ކުރާ ކޮމެޓީގެ މިއަދުގެ ބައްދަލުވުމުގައި މަޖިލިސް މެމްބަރުންނާއި މީޑިއާ ކައުންސިލްގެ މެމްބަރުން. ފޮޓޯ: ނިޝާން އަލީ/ މިހާރު
މީގެ އިތުރުން މުއައްސަސާއެއް ނުވަތަ މުއައްސަސާއެއްގައި ހުރި މީހެއްގެ ވާހަކަ ރިޕޯޓު ކުރުމުގެ ހައްގު ނޫސްވެރިޔާ އަށް ލިބޭ ގޮތަށް އޮތުމަކީ މީޑިއާ ކައުންސިލުން އެދޭ ގޮތް ކަމަށް އޭނާ ވިދާޅުވި އެވެ.
މީޑިއާ ކައުންސިލުން ބުނީ އަބުރާ ބެހިގެން ޖޫރިމަނާގެ ގޮތުގައި ބައި ލައްކަ ރުފިޔާ އިން ފެށިގެން ދެ މިލިއަން ރުފިޔާގެ އަދަދެއް ކަނޑައަޅާފައި ވުމަކީ ކަންބޮޑުވާ ކަމެއް ކަމަށެވެ. އަދި ބިލްގެ ވަކިވަކި މާއްދާތަކަށް އިސްލާހު ހުށަހަޅަން ތާއީދު ކުރައްވާ ކަމަށް ވެސް އޭނާ ވިދާޅުވި އެވެ.
އެހެންވެ، މީޑިއާ ކައުންސިލުން އެދުނީ ސިވިލް ސާވަންޓެއްގެ އަހަރު ދުވަހުގެ މުސާރަ އަށް ވުރެ ބޮޑު ނުވާ އަދަދަކަށް ޖޫރިމަނާ އަދަދު ކަނޑައަޅައި ދިނުމަށެވެ.
"އަބުރާ ބެހިގެން މިހާރު 5000ރ. އޮންނާނީ ދައްކަން. އަޅުގަނޑުމެންނަށް މައްސަލައެއް ނެތް އަދަދު ބޮޑު ކުރަމަކުން، އެކަމަކު ބިލުގައި އޮތީ މާ ބޮޑު އަދަދެއް، އެ އަށް ބަދަލު ގެންނަން ޖެހޭ،" ހަމްދޫން ވިދާޅުވި އެވެ.
މީގެ އިތުރުން އަބުރާ ބެހުމަކީ ތިން ވަނަ ފަރާތެއްގެ ނަޒަރުގައި މުޖުތަމައުގެ ކުރިމަތީގައި މީހެއްގެ ނަމަށް ނުވަތަ ގަދަރަށް ނުވަތަ އިއްޒަތަށް އުނިކަން ލިބިގެންދާނެ ފަދަ އެއްޗެއް ސިފަ ކުރެވިގެން ނުވަތަ ވިސްނިގެން ނުވަތަ ދޭހަ ކުރެވުން ކަމަށް ބިލުގައި އޮތުމުން މީޑިއާ ކައުންސިލުން ވަނީ ކަންބޮޑުވުން ފާޅުކޮށްފަ އެވެ.
އެގޮތުން އެ ބިލުގައި ތިން ވަނަ ފަރާތަކީ ޒިންމާދާރު މީހަކަށް ވާން ޖެހޭނެ ކަމަށް އޭނާ ވިދާޅުވި އެވެ. މީޑިއާ ކައުންސިލްގެ މެމްބަރު ހުސައިން ހަސަން ވިދާޅުވީ ބިލް ފަރުމާކޮށްފައި އޮތީ ވަރަށް ފަސޭހަ އިން ކުށްވެރިވާ ގޮތަށް ކަމަށާއި ބިލުގައި މާ ބޮޑު ތަފްސީލެއް ނެތް ކަމަށެވެ. އެހެންވެ، ބިލު ފާސް ކުރާ އިރު، ތަފްސީލް ކޮށްދީ ބިލުގައި ބުނާ ފިޔަވަޅުތައް ލުއި ކުރަން ޖެހޭ ކަމަށް އޭނާ ވިދާޅުވި އެވެ.
މީޑިއާ ކައުންސިލުން ބުނީ ބިލު ފަރުމާކޮށްފައި އޮތް ގޮތުން ފަސޭހަ އިން ކުށްވެރިވާ އިރު، ހަމަހަމަކަމާ އެކު އަމަލު ކޮށްފާނެ ކަމާ މެދު ސުވާލު އުފެދޭ ކަމަށެވެ. އެހެންވެ، ބިލް ބަލައި ނުގަންނާނެ ކަމަށާއި ބިލް އިސްލާހު ކުރަން ފުރުސަތު ދޭނެ ކަމަށް އުންމީދު ކުރާ ކަމަށް ވެސް އެ ކައުންސިލުން ބުންޏެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ލިވްއިން
03 August 2016
އަބުރުގެ ބިލް ގައި ހުރި ބޮޑެތި މައްސަލަ ތައް މޯލްޑިވްސް މީޑިއާ ކައުންސިލް އަށް ފެންނަނަމަ އެކަން ކަން ހައްލު ކޮށްދެއްވަންވީ ރައްޔިތުންގެ މަޖްލީހުން އެ ކައުންސިލުން އެ އެދޭ ގޮތަކަށް. މޯލްޑިވްސް މީޑިއާ ކައުންސިލު މެމްބަރުންގެ ޓްރެކް ރިކޯރޑްސް ތަކަށް ބަލާއިރު އެތަނުގައި ތިބީ މުޅިން ވެސް ކްލީން އަދި ބުރަ މަސައްކަތް ކޮށްގެން ލައިފް މޭކް ކުރާ އޮރިޖިނަލް ދިވެހި ޑީއެންއޭ ހުންނަ ދިވެހިންނެވެ. ވަކިން ޚާއްސަ ކޮށް އެ ކައުންސިލުގެ ރައީސް އަކީ އަޅުގަނޑުމެން ޅަ އިރުއްސުރެން ދަންނަ ބޭފުޅެކެވެ. ވަރަށް ނުކުރާނެ ގޯސް ކޮށްކަމެއް އަދި ވަޒީފާ އަށް ކަމޭ ހިތައިގެން އަމިއްލަ ކަމެއްގެ ގޮތުގައި ވަޒީފާ އަދާ ކުރާނެއެވެ. އަދި ގިނަ ތަންތަނަށް މޮޅު ގޮތް ހޯދަން ޒުވާން އުމުރުގައި ވެެސް އަދި މިހާރު ވެސް ނުގޮސް އެއް ތަނެއްގައި ދިގު ޒަމާން ތަކެއް ވަން ދެން ވަޒީފާ ގައި ދެމިއެހުންނަނީ އެއީ ކޮލިޓީ އެއް ހުރެފައި އަދި ކެތްތެރި ވެސް ވުމުންނެވެ. އެބޭފުޅުން ބޭނުންވާ ގޮތަށް އަބުރާއި ބެހޭ ބިލްގައި ހިމެނޭ ރަޖިސްޓާރޑް މީޑިއާ ތަކަށް ދެވެން އޮތް ހުރިހާ ލުޔެއް މަޖްލީހުން ވެސް އަދި ސަރުކާރުން ވެސް ދޭންވީއެވެ. ސަރުކާރުން ނަގަންވީ ސީރިއަސް ކޮށް ސޯޝަލް މީޑިއާ އަނބުރާ ސޯޝަލް ކަންކަމަށް ރުޖޫއަ ކުރާނެ ގޮތުގެ ތިއަރީ އެވެ. އެއިރުން މިރާއްޖެ ބެޓަރ ކަންޓްރީ އަކަށް ބަދަލު ވެގެން ދާނެއެވެ. ދެއާރ ވޭޒް ޓު ގެޓް ދެއަރ އިފް ޔޫ ކެއަރ އިނަފް ފޯރ ދަ ލިވިންގް.. ވީ ކުޑް ސްޓޮޕް އެގްޒިސްޓިންގް އެން ސްޓާރޓް ލިވިންގް..
ކިޔުންތެރިޔާ 767
03 August 2016
މީހަކާމެދު ހިތުގައި ޝައްކެއް މިންވަރުވެސް އުފެދުނަސް އެވީ އަބުރުގެ ދައުވާ ކުރަން
ވާގޮތް
03 August 2016
މޯލްޑިވްސް މީޑިއާ ކައުންސިލުން ކަން ބޮޑުވާ ކަންކަން އަބުރުގެ ބިލް ގައި ހުރި ނަމަ އެފަދަ ކަންކަން މަޖްލީހުގެ ވަގުތީ ކޮމެޓީ އާއި ގުޅިގެން ހައްލު ކޮށް އަދި އެބިލަށް އިސްލާހު ގެންނަންވީ އެވެ. އެމަކަކު އެމްއެމްސީ ވެސް ދަންނަން ޖެހޭނެ ރާއްޖެ ފަދަ ވައިލްޑް މުޖުތަމައެއް އޮންނަ ގައުމަކަށް ކޮންމެހެން ބޭނުން ކަން އަބުރާއި ބެހޭ ބިލް. އެއީ ބޭނުން އެއްޗެކެވެ. އެބިލަށް ބަދަލު ގެނެސްގެން ނަމަވެސް ޖެހޭނެ އަބުރާއި ބެހޭ ބިލެއް ރާއްޖޭގެ މަޖްލީހުން ފާސް ކޮށް ގާނޫނަކަށް ހަދާފައި. އެއީ އޭގައި އެންމެ ރަނގަޅު ގޮތަކީ. ގާނޫނު އަސާސީ އޭ ކޮންމެ މީހަކު ކިޔަނީ އަނެއްހެން މާ ބޮޑު އެއްޗެއް އޮޅުން ފިލާތީ އެެއް ނޫނެވެ. އެއީ އެކަކު ކީމާ އަޑު ދަށުން އަނެކަކު މައުލޫދު ކިޔާ ގޮތަށް ކިޔަނީ އެވެ. އެއީ އެ ވާގޮތަކީ.
ކިޔުންތެރިޔާ 767
03 August 2016
އަބުރާ ބެހޭ ބިލެއް އޮވޭ މިހާރުވެސް. އެކަމަކު މިހާރު ސަރުކާރުން އުޅެނީ ސަރުކާރުންކުރާ ގޯސް ކަންކަން ރައްޔިތުން ނުވަތަ ނޫސްވެރިން ދައްކާނެތީ، އެކަން ނުކުރެވޭނެ ބިލެއް ފާސްކުރަން އަބުރާއި ބެހޭ ބިލުގެ ނަމުގަ
ނައު
03 August 2016
މޯލްޑިވްސް މީޑިއާ ކައުންސިލުގެ މެމްބަރުން ދައްކަނީ އެއީ ރަޖިސްޓަރޑް މީޑިއާ އަކުން ޚަބަރު ތަކާއި ރިޕޯރޓް ތައް ގެނެސްދެވޭނެ އެންމެ ރަނގަޅު ތިއަރީއެވެ. އެކަމަށް ފުރިހަމަ އަށް ތާއީދު އަޅުގަނޑުމެން ކުރަމެވެ. އެއީ ރަޖިސްޓަރޑް މީޑިއާ. މިރާއްޖޭގައި މީހުންގެ އަބުރާއި ބެހެނީ ރަޖިސްޓަރޑް މީޑިއާގެ ނޫސްވެރިން ނޫނެވެ. މިރާއްޖޭގައި މީހުންގެ އަބުރާއި ބެހެނީ އެއީ ސޯޝަލް މީޑިއާގެ އަހުލުވެރިންނެވެ. ސޯޝަލް މީޑިއާ އަކީ ވެސް އެމީޑިއާ އުފެއްދި މަގްސަދާއި ޚިލާފަށް މިހާރު ބޭނުން ކުރަމުން އަންނަ އެއްޗަކަށް ވާތީވެ އެ މިހާރު ވެއްޖެ ގައުމު ތަކުގެ ސަލާމަތަށް ހުރި ބޮޑު ނުރައްކަލަކަށް ވެސް. އެ އެބަޖެހޭ ސްޓްރީމް ލައިން ކުރަން. މިހާރުވެސް ނޫސްވެރިން ކުރާ ޖޫރީމަނާގެ އަދަދު 5000 ރުފިޔާ ވެސް ބޮޑެވެ. އެއަދަދު ބާއްވަންވީ 10 ރުފިޔާ އިން ދަށުގައި. ނޫސްވެރިއެއްތަ. ޖޫރީމަނާ އެއްފަހަރު ކޮށްފިނަމަ ދެން ނުކުރާނެ އުމުރުގައި ވެސް ޖޫރީމަނާ ކުރެވޭނެ ކަމެއް. އެކަން އެއީ އަޅުގަނޑުމެންނަށް ޔަގީން ކަމެކެވެ. އެކަމަކު ސޯޝަލް މީޑިއާގެ އަހުލުން ނުވާނެ އެހެންނެއް. އެމީހުން އެދަނީ ހައްދުން ނެއްޓިގެން. ރާއްޖޭގެ ސޯޝަލް މީޑިއާ އިން ނޫންތޯ ޓެރެރިސްޓް ވީޑިއޯސް ތައް ވެސް އަޕްލޯޑް އެކުރަނީ. އެހެން ކަމަށްވާނަމަ ސޯޝަލް މީޑިއާ އިން ސިޔާސީ ކަންކަން ހިންގާ މީހުންވެސް އެކަން ކުރަން ޖެހޭނީ މޯލްޑިވްސް މީޑިއާ ކައުންސިލުގައި ރަޖިސްޓްރީ ކޮށްގެން ގައިޑް ލައިންސް ތަކަށް އެއްބަސްވެވިގެންނެވެ. މިއުސޫލުން މިކަން ކޮށް ދިނުމުގައި މޯލްޑިވްސް މީޑިއާ ކައުންސިލް ވެސް އޯޕަން މައިންޑަކުން ގައުމުގެ ހައްގުގައި ވަކި ފަރާތަކަށް ނުޖެހި ތެދުވެރި ކަމާއި އެކު ކުޑަ ނަމަވެސް ޚިދްމަތެއް ކޮށދެއްވަންވީއެވެ. މިރާއްޖޭގެ ފަހުގެ އަންހެން ކަނބަލުން ގެ ކަލްޗަރ އެއް އެއީ އެމީހުން ކްރެޑިޓް ހޯދަންވުމުން އެހެން މީހުން ކުށްވެރި ކުރުން. އެއީ އޮރިޖިނަލް ކުރީގެ ދިވެހި އަންހެން ކަނބަލުންގެ ގޮތެއް ނޫނެވެ. މިފަަދަ ކަންކަން މިއަންނަނީ ސޯޝަލް މީޑިއާ ތެރޭންނެވެ. މީ ވަރަށް ނުބައި އާދައެކެވެ. ޔޫ ބެޓަރ ވޭކް އަޕް ނައު.. ވަޓް އެބައުޓް ނައު.. ނައު ދެޓް ޔޫއާރ ހިއަރ...
މާލޭބެއްޔާ
03 August 2016
އެނގޭތަ އެންމެ ގަދަޔަށް އަބުރަށް އަރައިގަންނަ މީހަކަށް ތިޔަ މީހާ ވާނެ ކަމާއި މެދު ޝައްކެއްނެތް އެއީ ކަލޯވެސްތީ ހަމަ އެވެރިންގެ ތެރެއިން ވާ މީހަކަށް ވާތީ އަދި އަބުރުކަތިލަނީ މިސަރުކާރުން ކަމަށް ކޮންމެ މީހަކުވެސް ގަބޫލުކުރާނެ ކަން ކަށަވަރަށް އެންގޭ....ދެން ކޮންވާހަކަ އެއް އެންމެ ގަދަޔަށް މީހުންގެ އަބުރު ކަތިލާމީހުން މިއަދު ތިޔަ ބިލަކައިގެން އުޅޭތީ އުފާކުރަން މާދަމާވެސް ތިޔަ މަޅީގައި ޖެހޭނީ ހަމަ ކަލޯމެން ހެހެހެ
ދޭ
03 August 2016
"މާލޭ ބެއްޔާ" ޑިމޮކްރަސީ އާއި ޚިޔާލު ފާޅުކުރުމުގެ ބިލާއި ބެހޭ ގޮތުން ތިމާގެ ވާހަކަ ދެއްކުން ކަމަކު ނުދޭދޯ. އެހެން މީހުންގެ މަސްކާންވީ ހަމަ މުޅަ މަހަށް ދަންދެން ދޯ. އެއްވެސް ފަރުދަކަށް ސަރުކާރަކީ ވަގު ސަރުކާރެކޭ ނުގޮވޭނެ ބައިނަލް އަގްވާމީ އުސޫލު ތަކުގެ ތެރޭން ސަރުކާރުގެ ވަޒީފާ އަދާ ކުރާ ހުރިހާ މީހުންނަކީ އެއީ ވަގުން ކަމަށް ކޯޓުން ހުކުމް ނުކުރާހާ ހިނދަކު. މާލޭގައި ނުހުންނާނެ މަސްތުވާތަކެތީގެ ވަބާގައި ނުޖެހޭ އެކަކު ވެސް ހުރި އެންމެ ފެމިލީ އެއްވެސް. އެކަމަކު އެއާއިލާ އަކީ އެއީ ޕާރޓޭ އާއިލާ އެކޭ ނުބުނެވޭނެއެވެ. ތިމާމެންގެ ކުށް ތައް ފުރަތަމަ ގަބޫލުކޮށް އުމުރުން ދުވަސް ނުވަނީސް އެކަން އިސްލާހު ކުރަންވީއެވެ. އެނޫންނަމަ ޖެލަސީ އެން އެންގަރ އަކީ އެއީ ސިންޑްރޯމް އަކަށް ބަދަލުވެދާނެއެވެ. އެހެން ވެފައި މިއޮތީ ރާއްޖޭގެ ކަންޓްރީ ސައިޑަށް. ޑިމޮކްރަސީ އިޒް ސޯ ސްވީޓް ވާނަމަ އޭގެ ޓޮލެރެންސް ރޭޓް އެކްސްޓްރީމްލީ ހައިވާން ޖެހޭނެއެވެ. ވީވިލް ޑިބޭޓް އޮން އިންފިނިޓިވް ލައިންސް.
ކިޔުންތެރިޔާ 767
03 August 2016
ސޯޝަލް ސައިޓުތަކުގައި ހުރި މީހުންގެ ސިޔާސީ ގުރޫޕުތަކާއި، ބުލޮގުތަކާއި، އަމިއްލަ ސިޔާސީ ޗެޓުލޮގުތައް ރެޖިސްޓަރ ކުރުމެކޭ އިނދެގެން ތިބި ދެމީހުން ދެމަފިރިކަމުގެ ގުޅުން ހިންގަން ބައެއްގެ ހުއްދަ ހޯދުމެކޭ ވަކި ތަފާތެއް ނެތް. އަމިއްލަ ކޮޓަރީގައި އެކަނި ހުރެ މީހަކުކޮށްފަ ހުރި ގޯސްކަމެއްގެ ވާހަކަ ކަންފަތައް އިވޭ ވަރަށް ކިޔަސް އެއީ ހަމަ އަބުރާއި ބެހެވެނީ ދެއްތޯ؟ މީދެން ބޮޑުވަރު ނޫންތޯ.
އަލީ ނަސީރު
03 August 2016
އަމިއްލަ ސިކުޑީގެ ބޭނުން ކުރަން މަނާ ބަޔަކައް، ކޮން ބިލެއްގެ ވާހަކަ އެއް ދައްކާކައްތަ؟