އަހަރީ ފީ އާއި ޖޫރިމަނާގެ 197 މިލިއަން ރުފިޔާ ނުލިބޭ: މީރާ

މޯލްޑިވްސް އިންލޭންޑް ރެވެނިއު އޮތޯރިޓީގައި ޓެކްސް ދައްކާ ކައުންޓަރުތައް

ފާތިމަތު ޝަނާ މުހައްމަދު، މިހާރު

18 ޖެނުއަރީ 2019 - 20:02

އަހަރީ ފީ އާއި ޖޫރިމަނާގެ ގޮތުގައި އެކި ކުންފުނިތަކުން ދައުލަތަށް ލިބެންޖެހޭ 197.9 މިލިއަން ރުފިޔާ މިހާތަނަށް ދައްކާފައި ނުވާ ކަމަށް ދައުލަތުގެ ޓެކްސް އިދާރާ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން އިއްޔެ ބުނެފި އެވެ.

އެ އިދާރާ އިން ބުނީ މިދިޔަ އަހަރުގެ ނިޔަލަށް 7،089 ކުންފުންޏަކުން އަހަރީ ފީ އާއި ޖޫރިމަނާ ދައްކާފައި ނުވާ ކަމަށެވެ.

މީގެ ތެރޭގައި މިދިޔަ އަހަރު ރަޖިސްޓްރާ އޮފް ކޮމްޕެނީސް އިން އުވައިލުމަށް ނިންމާފައިވާ 5،772 ކުންފުންޏެއް ހިމެނެ އެވެ. އެ ކުންފުނިތަކުން ދައްކަންޖެހޭ 189.6 މިލިއަން ރުފިޔާ ހިމެނޭ ކަމަށް މީރާ އިން ބުނެ އެވެ. އަދި އުވައިލުމަށް ނިންމާފައި ނުވާ 1،317 ކުންފުންޏަކުން ދައްކަންޖެހޭ 8.2 މިލިއަން ރުފިޔާ ވެސް ނުލިބޭ ކަމަށް ޓެކްސް އިދާރާ އިން ބުންޏެވެ.

ކުންފުނީގެ އަހަރީ ފީގެ އިތުރުން، ވިޔަފާރީގެ ފައިދާ އިން ޓެކްސް ނެގުމުގެ ގާނޫނުގައި ވާ ގޮތުން، ކުންފުނިތަކުން އެއްވެސް ވިޔަފާރިއެއް ނުކުރި ނަމަވެސް ގާނޫނުގައި ބުނާ ޓެކްސް ބަޔާން ހުށަހަޅަން ޖެހެ އެވެ. އެކަން ނުކޮށްފި ނަމަ ގާނޫނުގެ ދަށުން ޖޫރިމަނާ ކުރާނެ އެވެ.

ޓެކްސް ނެގުމާ ބެހޭ އިދާރީ ގާނޫނުގައި ވާ ގޮތުން، ޓެކްސް ދައްކާ ފަރާތްތަކުގެ ރަޖިސްޓަރީން ކުންފުންޏެއް އުނި ކުރެވޭނީ ކުންފުނިތަކާ ބެހޭ ރަޖިސްޓްރާ އެ ކުންފުންޏެއް އުވައިލުމުންނެވެ.

ވިޔަފާރި ނުކުރާ، އުވައިލަން ބޭނުންވާ ކުންފުނިތައް، ކުންފުންޏާ ބެހޭ ގާނޫނުގައި ކަނޑައަޅައިފައިވާ އުސޫލުގެ މަތިން ރަޖިސްޓްރާ އޮފް ކޮންޕެނީޒަށް ހުށަހަޅައިގެން އެ ކަންކަން ކުރިއަށް ގެންދިއުމަށް މީރާ އިން އިލްތިމާސް ކުރެ އެވެ.

އަމިއްލަ ފަރުދުން މީރާ ގައި ރަޖިސްޓަރީ ކުރުމާއި ޓެކްސް ބަޔާން ހުށަހެޅުމާ ގުޅޭގޮތުން މިދިޔަ އަހަރު އެ އިދާރާ އިން ވަނީ ލުއިތަކެއް ދީފަ އެވެ. ނަމަވެސް، ޓެކްސްއާ ގުޅޭ ގާނޫނުގައި ވަކި ގޮތަކަށް ކަނޑައަޅާފައި ވާތީ، މި ލުއިތައް އެންމެ ފުރިހަމަ ގޮތުގައި ނުދެވެ އެވެ.

އެކަމަކު، ކުދި ވިޔަފާރިތަކުން ހިސާބުތައް ތައްޔާރު ކުރުމާއި އޮޑިޓް ކުރުމާ ގުޅޭގޮތުން ދީފައިވާ ލުއިތަކަކީ ކުންފުނިތަކަށް ވެސް ރައްދުވާ ލުއިތަކެއް ކަމަށް މީރާ އިން ބުނެފައިވެ އެވެ.

މި ސަރުކާރުން ވަނީ ކުރިއަށް އޮތްތަނުގައި ކުދި އަދި މެދު ފަންތީގެ ވިޔަފާރިތަކަށް ޓެކްސް ދެއްކުމުގައި އެކަށީގެންވާ ލުއިތަކެއް ހަމަޖައްސާނެ ކަމަށް ވައުދުވެފަ އެވެ. ކުންފުނީގެ އަހަރީ ފީ ނުދައްކައި ގިނަ ކުންފުނިތަކެއް ހިމެނޭ އިރު އިކޮނޮމިކް މިނިސްޓަރު ފައްޔާޒް އިސްމާއިލް އަންނަނީ ފާޅުގައި މީރާ އަށް ފާޑު ވިދާޅުވަމުންނެވެ.

I have created a committee comprising of Gov officials and private sector auditors/ lawyers to identify issues arising in the implementation of the current tax laws and necessary amendments to the tax regime. Gov is firm on creating a just and strong tax regime @EconDevMv
— Fayyaz Ismail (@faya_i) January 17, 2019

އިކޮނޮމިކް މިނިސްޓަ ފައްޔާޒު އިސްމާިލް ކުރައްވާފައިވާ ޓްވީޓް

އެގޮތުން، ޓެކްސް ދެއްކުމަށް ރަޖިސްޓަރީ ކުރަން ނުޖެހޭ ތަންތަން ރަޖިސްޓަރީ ކޮށްފައިވަނީ މީރާ އިން އަމިއްލަ އަށް އެ ތަންތަނަށް ގޮސް އެފަދަ ފަރާތްތަކަށް ނުރަނގަޅު ތަސައްވުރެއް ދައްކައިގެން ކަމަށް ފައްޔާޒް ވިދާޅުވެފައި ވެ އެވެ. މީގެ އިތުރުން، ވިޔަފާރިތަކަށް އޮތް އެންމެ ބޮޑު ގެއްލުމަކީ މީރާ ކަމަށް ވެސް އޭނާ ވިދާޅުވެފައި ވެ އެވެ.

ޓެކްސް ނިޒާމު ހަރުދަނާ ކުރުމަށްޓަކައި ސަރުކާރުގެ އިސްވެރިންނާއި އަމިއްލަ ފަރާތްތަކާއި ގާނޫނީ ވަކީލުންގެ އިތުރުން އޮޑިޓަރުން ހިމެނޭ ކޮމިޓީއެއް އިކޮނޮމިކް މިނިސްޓްރީން މިހާރު ވަނީ އެކުލަވައިލައިފަ އެވެ.

މީރާ ޓެކްސް އިކޮނޮމިކް މިނިސްޓްރީ ފައްޔާޒު އިސްމާއިލް (ކުރީގެ މިނިސްޓަރު) ރެޖިސްޓްރާ އޮފް ކޮމްޕެނީސް ޕްރައިވެޓް ކުންފުނިތައް

3 ކޮމެންޓް, 1 ރިއެކްޝަންސް

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ކޮމެންޓްތައް

އެންމެ ފަސް މަގުބޫލް

ޢަލީފު

19 January 2019

ފައްޔާޒު-ޔަޒީދު ގެ ކުރިމަތިލުމެއްހެން ހާދަހީވެޔޭ. ގަދަޔަށް ޖައްސާފަބަހައްޓާ.

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ބައިން

19 January 2019

ޔަޒީދޫ، އަދިވެސް އިސްތިއުފާދީފަ ޔާމީނުގެ ޕާޓީއާ އޮފިޝަލީ ގުޅޭކަށްނުވޭތަ. ދެކޮޅުގަ ދެފައިބަހައްޓައިގެން ނުހުރެ ކެރިގެން އުޅެބަ. ސިޔާސީ ކެމްޕެއިންގަ އުޅެންބެނުން މިނިވަން މުއައްސަސާއެއްގެ ވެރިއަކަށްވެސް ހުންނަންބޭނުން، ކިހިނެއް ދެކަންވާނީ. ބޭރުނުކުރަނީސް އިސްތިއުފާދިނުން ރީތިގޮތަކަށްވާނީ.