23 ޖެނުއަރީ 2019 - 16:04
13 comments
އެއްމާބަނޑު ދެ ކުދިންނަށް ބަލިވެ އިން ރަޝްފާ އަހުމަދު ކުއްލި ގޮތަކަށް ނިޔާވި ހާދިސާއާ ގުޅިގެން އޭނާގެ އާއިލާގެ ބަޔަކު ބިރު ދައްކާ ކަމަށް ބުނެ މާފުށީ ހެލްތު ސެންޓަރުގެ ދިފާއުގައި އެ ރަށު އަންހެނުން މުޒާހަރާ ކުރަން ފަށައިފި އެވެ.
މާފުށިން ވާހަކަ ދެއްކި މީހަކު ބުނީ ރަޝްފާގެ ދައްތަޔަކު ފޮނުވައިގެން ކަމަށް ބުނެ ބަޔަކު އެރަށުގެ ހެލްތު ސެންޓަރަށް ރޭ ވަދެ، ނަރުހުންނަށް ހަމަލާދޭން މަސައްކަތް ކުރި ކަމަށެވެ. ރަށުގެ އަންހެނުން މިއަދު ހެލްތު ސެންޓަރުގެ ކައިރިއަށް އެއްވެ ހިމޭން މުޒާހަރާއެއް ފެށީ އެ މައްސަލަ ހައްލުކޮށްދިނުން އެދި ކަމަށް ވެސް އޭނާ ބުންޏެވެ.
ފުލުހުން ބުނީ މާފުށީ ހެލްތު ސެންޓަރުގެ ނަރުހުންނަށް ބަޔަކު ބިރު ދެއްކި ކަމުގެ ދެ ރިޕޯޓެއް ލިބިފައިވާ ކަމަށާއި އެ މައްސަލަ މިހާރު ތަހުގީގުކުރަމުން އަންނަ ކަމަށެވެ.
މާފުށި ހެލްތު ސެންޓަރުގެ ދިފާއުގައި ނުކުތް އަންހެނުން ހިފައިގެން ތިބި ބޯޑުތަކުގައި ލިޔެފައިވާ ލިއުންތަކުގެ ތެރޭގައި "ބިރު ދެއްކުން ހުއްޓާލާ، މާފުށީ މީހުންނަކީ އަމާންކަމަށް ލޯބިކުރާ ބައެއް،" މިފަދަ އިބާރާތްތައް ހިމެނެ އެވެ.
މާފުށިން ވާހަކަ ދެއްކި މީހާ ބުނީ، ފުވައްމުލަކު ހޯދަޑު، އޯޝަންވިލާ، ރަޝްފާ، 20، ނިޔާވި އިރު ހެލްތު ސެންޓަރުގައި ހުންނެވީ ވަރަށް ރަނގަޅު ޑޮކްޓަރެއް ކަމަށާއި އޭނާ އިސްތިއުފާދެއްވައި އެނބުރި ގައުމަށް ވަޑައިގެންނެވީ ސޯޝަލް މީޑިއާގައި އޭނާގެ ވަނަވަރު ހާމަކޮށް "ސައިބާ ބުލީ ކުރަން ފެށުމުން" ކަމަށެވެ.
"ރޭގައި ހެލްތު ސެންޓަރަށް އައި ބަޔަކު ނަރުހެއްގެ ގައިގައި ޖަހަން އުޅުނު. އެމީހުން ބުނީ އެމީހުން އައީ ރަޝްފާގެ ދައްތަ ފޮނުވައިގެންނޭ. އަދިވެސް އަންނާނަމޭ،" މާފުށިން ވާހަކަ ދެއްކި މީހާ ބުންޏެވެ.
މާފުށީ އަންހެނުންނާއި ހެލްތު ސެންޓަރުގެ މުވައްޒަފުންގެ ކަންބޮޑުވުންތައް އަޑުއަހަން ހެލްތު މިނިސްޓްރީގެ ޓީމެއް އެ ރަށަށް މިހާރު ވަނީ ގޮސްފަ އެވެ.
ސިއްހީ ގޮތުން ރާއްޖެ އަށް ލިބިފައިވާ ކުރިއެރުމާ އެކު ޒުވާން އުމުރުގައި މާބަނޑު އަންހެނުން މަރުވުމަކީ ވަރަށް މަދުން ނޫނީ ދިމާވާ ކަމެއް ނޫނެވެ. އެހެންވެ ބަނޑަށް އަށް މަހުގައި ރަޝްފާ މަރުވި ހާދިސާއިން ގިނަ ބަޔަކަށް ވަނީ ސިހުން ލިބިފަ އެވެ.
ހެލްތު މިނިސްޓްރީން ކުރިން ބުނެފައި ވަނީ މާބަނޑު އަންހެނަކު މަރުވި ހާދިސާއެއް ބަލަމުން އަންނަ ކަމަށެވެ. އެހެންވެ އެކަމާ ގުޅޭ އެއްވެސް މައުލޫމާތެއް މާފުށީ ސިއްހީ މަރުކަޒުންނާއި މިނިސްޓްރީއަކުން ވެސް ނުދެ އެވެ.
މާފުށީ ފިރިހެނަކާ ކައިވެނިކޮށްގެން ރަޝްފާ އެ ރަށަށް ދިރިއުޅުން ބަދަލުކުރީ އަހަރެއްހާ ދުވަސް ކުރިން ކަމަށްވެ އެވެ. އޭނާ ކުއްލިއަކަށް ނިޔާވީ ހުމާ އުޅޭތާ ދެތިން ދުވަސް ފަހުން، ޑިސެމްބަރު 29 ގެ ފަތިހު ވަގުތެއްގަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ހައްގުތައް
24 January 2019
މިއޮތީވާ ރާއްޖެއެކެވެ. ކޮންމެ މީހަކު ހައްގުތަކާއި ނުކުންނައިރު ހީވަނީ އެހެން ކަމެއް ހެންނެވެ. ހައްގަކީ ކޮބައިކަމެއް ނޭނގެއެވެ. ކުށްވެރިންނަކަށް ކުށްކުރާ މީހުންނަކަށް ހައްގެއް ނޯންނާނެއެވެ. މީސްމީހުންނަށް ބިރު ދައްކާ މީހުން ހިފައި ހައްޔަރުކުރާށެވެ. ކުށްވެރިންނަށް ކުށްކުރާ މީހުންނަށް ހައްގު ހޯދައިދޭން މަސައްކަތްކުރާ މީހުންވެސް ހިފައި ހައްޔަރުކުރާށެވެ. މިނޫން ގޮތަކަށް މިކަން ހައްލެއް ނުވާނެ.
އަބްދޫ
23 January 2019
ހުން އެއީ ކޮންމެވެސް ބައްޔެއްގެ ނުވަތަ ހަށިގަނޑުގާ ޖަރާސީމެއް އުޅޭކަމުގެ ނިސާނެއް . ވީ އިރު މާލެ ކައިރީގަ ހުރި އިރު މާލެ އައިސް ޓެސްޓް ހަދާ ނުބެލުމަކީ ހެލްތު ސެންޓަރުގެ ޒިންމާ އެއްތަ ؟
ހުސޭނުބ
24 January 2019
ހެލްތު ސެންޓަރު ގެ ޒިންމާ އެއް އެއީ އެތަނުގެ ކެޕޭސިޓީ ނެތީ އާ ބަލި މީހާ އަށް މާލެ ދާން ލަފާ ދިނުން..
ޥަތަނަބޭ
23 January 2019
މަރުވުމާ ދެމެދުގައި ވަކި އުމުރެއް ވަކިހާލަތެއް ނުވޭ ދެން ބިރުދެއްކިޔަސް މުޒާހިރާ ކުރިޔަސް ބަދަލުވުމެއްނެއް
ސުއުދު
23 January 2019
ބިރު ދެއްކި މީހުންނައް ގާނޫނީ ފިޔަވަޅު އަޅަން ފެނޭ އެކަމު ނޭޅޭނެދޯ.
ތިމާވެށި
23 January 2019
ގްރީން ޒޯން އަށް ވަދެ ބިރުދައްކާފަ ދިޔަ އިރު ފުލުހުންނަށް ނޭނގުނެވެ.
ރަދީފް
23 January 2019
އެއްވެސް ކަމެއްގަ ވަޔަލެންސަށް މަގުފަހިވާ ގޮތަށް އަމަލު ބެހެއްޓުން އެއީ ދެރަކަމެއް.އޮންނަ އުސޫލުތަކުގެ ތެރެއިން ކޮންމެ ކަމެއްގެ ހައްލު ހޯދަން މަސައްކަތްކުރުން އެއީ ރީތި ގޮތް.ކޮންމެ ބަޔަކުވެސް ހިތާމަކުރާނެ އެމީހެއްގެ އާއިލާގެ މީހަކު ނިޔާވުމުން،އަދި ކުއްލިމަރެއް ނަމަ ހިތާމައިގެ ލެވެލް މަތިވާނެ.ނަމަވެސް އިންޒާރު ދީ ބިރުދެއްކުން ކުއްވެރިކުރަން.ހަބަރުގަވެސް އޮތީ ކަމުގެ އެއްފަރާތުގެ ބަސްގެނެސްދީފަ.މިކަމުގަ 02 ފަރާތުގެ ބަސްވެސް މުހިންުމު.ވ.ވެދުން
ރޮކެޓް ސައިންސް
23 January 2019
މާރާމާރީ ހިންގާ ހަމަނުޖެހުން އުފެއްދިޔަސް މަރު ނުވާކަމަކަށް ނުވާނެ. މަރާ ދޭތެރޭ ޝައްކު އުފެދެންޏާ ޕޮލިހަށް މައްސަލަ ހުށަހަޅައިގެ ކުރިއަށް ގެންދަންވީއެވެ. ކޮންމެހެން ބިރުދައްކާ ގައްޑާވާން އުޅޭނެކަމެއްނެތެވެ
ސިޔާސީ
23 January 2019
ޑޮކްޓަރ ނެތް ބާރުގަދަ ބޭހެއް ދީފައެއް. ބޮޑައް ބެލެވެނީ ހުން ގަދަވެގެން ފިޓް ޖެހުނީ ކަމައް.
ގަމާރ
23 January 2019
ބިރުދެއްކުމުގެ ބޭނުމެއް ނެތެވެ. ތަނުގައި ވަސީލަތްތައް ނެތުމަކީ އެތަނުގައި ވަޒީފާ އަދާކުރާ މީހުންގެ މައްސަލަ އެއްނޫނެވެ. އެހެންނޫނަސް ގަސްތުގައި އެވަރުގެ ކަމެއް އެއްވެސްމީހަކު ނުކުރާނެކަން ގައިމެވެ.
މާފުށިމީހާ
23 January 2019
ބިރު ދެއްކުމެއް ބަލައެއް ނުގަނެވޭ. މީ 80 ގެ އަހަރުތަކެއްނޫން. މާފުށީގަ އުޅޭ ފުވައްމުލަކު 2 ތިން މީހަކު ގައްޑާވާން މިކުރި ފިނޑި އަމަލު ހަރުކަށި އިބާރާތުން ކުއްވެރިކުރަން.