މިއަދުގެ ހަފްލާގައި އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ އާއި ކްރިމިނަލް ކޯޓުގެ އިސް ގާޒީ އަހުމަދު ހައިލަމް ސަލާމް ކުރައްވަނީ: ޝަރުއީ ދާއިރާ އިސްލާހު ކުރުމަށް ސަރުކާރުގެ އެއްބާރުލުން ބޭނުންވާ ކަމަށް އުއްތަމަ ފަނޑިޔާރު ވިދާޅުވި.---ފޮޓޯ: ހުސައިން ވަހީދު/މިހާރު
19 ފެބުރުއަރީ 2019 - 12:24
20 comments
މިނިވަން އިންސާފުވެރި ފަނޑިޔާރުގެއެއް ބޭނުން ނަމަ ކޯޓުތަކާއި ފަނޑިޔާރުންނަށް އެކި ގޮތްގޮތުން ނުފޫޒު ފޯރުވަން އުޅޭ ފަރާތްތަކާ މެދު ފިޔަވަޅު އަޅަންޖެހޭ ކަމަށް އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ މިއަދު ވިދާޅުވެއްޖެ އެވެ.
"ޖުޑީޝަލް ކޮންފަރެންސް އޮން ޖުޑީޝަލް އިންޑެޕެންޑެންސް އެންޑް ރިފޯމް" އިފްތިތާހު ކޮށްދެއްވަމުން އުއްތަމަ ފަނޑިޔާރު ވިދާޅުވީ "މިނިވަން ފަނޑިޔާރުގެއެއް ގާއިމުކުރަން ބޭނުން ނަމަ" ސިޔާސީ ޕާޓީތަކާއި ނުފޫޒު ފޯރުވަން އުޅޭ ފަރާތްތަކަށް ފިޔަވަޅު އަަޅަންޖެހޭ ކަމަށެވެ.
"... މިނިވަން ފަނޑިޔާރުގެއެއް ގާއިމުކުރަން ބޭނުން ނަމަ މި ދެންނެވި ފަދަ ފަރާތްތަކުން ފަނޑިޔާރުންނަށް ނުފޫޒު ފޯރުވަން ކުރާ މަސައްކަތްތައް ޗެކް ކުރެވި އެފަދަ ކަންކަން ކުރާ ފަރާތްތަކާމެދު ތަފާތު ކުރުމެއް، އިސްތިސްނާ ކުރުމެއް ނެތި، ގާނޫނުގެ ތެރެއިން އަދުލުވެރި ފިޔަވަޅުތައް ވެސް އެޅޭނެ،" އުއްތަމަ ފަނޑިޔާރު ވިދާޅުވި އެވެ.
ބައިނަލްއަގްވާމީ ފެންވަރަށް، ފަނޑިޔާރުންނަށް ވެސް ރައްކާތެރިކަން ލިބިގެންވާ ޝަރުއީ ނިޒާމެއް ބިނާކޮށްފައި އޮތް ނަމަ ނުފޫޒުތަކުން ފަނޑިޔާރުން ސަލާމަތްވާނެ ކަމަށް ވެސް އުއްތަމަ ފަނޑިޔާރު ވިދާޅުވި އެވެ.
"މި ދެންނެވި ގޮތުގެ މަތިން މިނިވަން ފަނޑިޔާރުގެއެއް ގާއިމުކުރެވިފައި އޮންނަ ނިޒާމެއްގައި ނަމަ އެކިއެކި ނުފޫޒުތަކާއި ފިއްތުންތަކާއި ބިރުދެއްކުންތަކުން ފަނޑިޔާރުންނަށް ރައްކާތެރިކަމާއި ހިމާޔަތް ލިބިދެވޭނެ،" އެމަނިކުފާނު ވިދާޅުވި އެވެ.
ޝަރުއީ ދާއިރާ އިސްލާހު ކުރުމަށް އެ ދާއިރާއަށް މާއްދީ އަދި މާލީ ވަސީލަތްތައް ވެސް ބޭނުންވާކަން އުއްމަތަ ފަނޑިޔާރު ފާހަގަކުރެއްވި އެވެ.
މިއަދުގެ ހަފްލާގައި ނައިބު ރައީސް ފައިސަލް ނަސީމާއި އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ އަދި ރައްޔިތުންގެ މަޖިލިހުގެ ރައީސް ގާސިމް އިބްރާހިމް ބައިވެރިވެވަޑައިގަންނަވަނީ.---ފޮޓޯ: ހުސައިން ވަހީދު/މިހާރު
"މާއްދީ އަދި މާލީ ވަސީލަތްތައް ހޯދުމަށްޓަކައި ފަނޑިޔާރުގެއިން ސަލާންޖަހަން ޖެހޭ އުސޫލެއް އޮންނަހައި ހިނދަކު ވެސް" މިނިވަން ފަނޑިޔާރުގެއެއް ބިނާކުރަން އުނދަގޫވާނެ ކަމަށް ވިދާޅުވި އެވެ.
އުއްތަމަ ފަނޑިޔާރު ވިދާޅުވީ، ޝަރުއީ ދާއިރާ އިސްލާހު ކުރުމަށް ޖުޑިޝަރީން ކުރާ މަސައްކަތުގައި ސަރުކާރުގެ ފުރިހަމަ އެއްބާރުލުން ލިބޭނެ ކަމަށް އުއްމީދު ކުރައްވާ ކަމަށެވެ.
"އަދި ޝަރުއީ ދާއިރާގެ ފަރާތުން މި ދާއިރާ އިސްލާހުކޮށް ފަނޑިޔާރުންގެ މިނިވަންކަން ރައްކާތެރި ކުރުމަށް ކުރާ މަސައްކަތުގައި ސަރުކާރުގެ ފުރިހަމަ އެއްބާރުލުމާއި އެހީތެރިކަން ލިބޭނެކަމުގެ އުއްމީދުގައި އަޅުގަނޑުމެން އެންމެން ތިބި ވާހަކަ މި ފުރުސަތުގައި ދަންނަވަން،" އުއްތަމަ ފަނޑިޔާރު ވިދާޅުވި އެވެ.
މީގެ އިތުރުން އެމަނިކުފާނުގެ ވިސްނުމުގައި މިނިވަން ފަނޑިޔާރުގެއަކީ ކޮބައިކަން ވެސް އުއްތަމަ ފަނޑިޔާރު ވަނީ ވިދާޅުވެދެއްވައިފަ އެވެ.
"ފަނޑިޔާރުގެ މިނިވަންވުމަކީ ފަނޑިޔާރުގެ ކުރިމައްޗަށް ހުށަހެޅޭ އަދި ފަޑިޔާރު ބަލާ ކޮންމެ މައްސަލައެއްގައިމެ ހަސްމުން ހުށަހަޅާ ހެކިތަކާއި ގަރީނާތަކަށް ބުރަވެ އެ މައްސަލައެއްގެ ވާގިއާތަކާއި އެ މައްސަލައާ ގުޅޭ ގާނޫނުތަކާއި ގަވާއިދުތަކާއި އުސޫލުތަކަށް ފުރިހަމައަށް ރިއާޔަތްކޮށްގެން ފަނޑިޔާރުގެ އަމިއްލަ އަދި ފުރިހަމަ އިހްތިޔާރުގައި އޭނާގެ އިލްމާއި އިޖްތިހާދުން އޭނާގެ ބުއްދި އާއި ޒަމީރު މަގު ދައްކާ ގޮތެއްގެ މަތިން އަދުލުވެރިކަމާއި އިންސާފާއެކު ނިންމުންތައް ނިންމައި ފިޔަވަޅު އެޅުން،" އެމަނިކުފާނު ވިދާޅުވި އެވެ.
ޖުޑީޝަލް ރިފޯމާ ގުޅޭ ކޮންފަރެންސް މިއަދާއި މާދަމާ ކުރިއަށްދާނެ އެވެ. މި ކޮންފަރެންސްގައި ރާއްޖޭގެ ގިނަ އަދަދެއްގެ ފަނޑިޔާރުންނާއި ކަމާ ގުޅޭ ދާއިރާތަކުގެ ތަޖުރިބާކާރުން ބައިވެރިވެވަޑައިގަންނަވާނެ އެވެ. މީގެ އިތުރުން ޖުޑީޝަލް އިޔާ 2019 އިފްތިތާހު ކުރުމަށް ރޭ ވެސް ވަނީ ހަފްލާއެއް ބާއްވައިފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ތައްޚާނު
19 February 2019
ނުފޫޒުން ކަމެއް ކުރެވޭނަަމަ އަންނި ވެރިކަމުގައި އަންނި އަށް ކުރެވުނީސް ފަނޑިޔާރުންނާ ދެކޮޅަށް އަންނި އަތުގަ ނެތީ ރުފިޔާ.. ރައީސް ވިދާޅުވިހެން ގެއްލިގެން މިއުޅެނީ ނަޒާހަތްތެރިކަން
މަންސޫރު
19 February 2019
ފިޔަވަޅުއަޅަން ނިކުންނަންވީ އަހަރުންތަ؟ ބޮޑު މުސާރަޔާ އެލަވަންސްތައް ދީފައި ތިޔަ ތިބީ ރިޝްވަތު ކާންތަ؟
އީދުކަޅުބެ
19 February 2019
ސަރުކާރު ކަމުގައިވިޔަސް، ސިޔާސީ ޕާޓީތައްވިޔަސް، އާންމު ފަރުދަކުވިޔަސް، ފަނޑިޔާރުންނަށް ނުފޫޒު ފޯރުވައިގެން ނުވާނެކަމަށް ޤާނޫނުއަސާސީގައި ބަޔާންކޮށްފައިވެއެވެ. އެކަމަކު ފަނޑިޔާރުންގެ ކިބައިގައިވެސް ނަޒާހަތްތެރިކަމާއި، ތެދުވެރިކަމާއި، ޢަދުލުވެރިކަން ހުންނަންޖެހެއެވެ. މިއިންކަމެއް އުނިވެއްޖެނަމަ އެވާހަަކަ ސަރުކާރުން ނުދެއްކިޔަސް، ރައްޔިތުންނާއި ސިޔާސީ ޕާޓީތަކުން އެވާހަކަ ދައްކާނެއެވެ.
ހޭކެނޑޭ
19 February 2019
2018 ގައި އުއްތަމަ ފަނޑިޔާރު އޭ ކިޔާ މީހަކު ރާއްޖޭގެ އެއްވެސް ރަށަކަށް ވަޑައިގެންނެވިންތޯ ޔާމީންގެ ރިޔާސީ ކެމްޕޭނުގައި ކެމްޕޭނު ކޮއްދޭން! މިކަން ސާފު ކޮއްލަދެއްވުން މަނިކުފާނުގެ ކިނބައިން ރައްޔިތުން ވަރަށްއެދޭ.
އަމީނު
19 February 2019
ކޯޓަށް ބާރު ފޮރުވަނީ ގާސިމް . ނިކަން ގޮތެއް ހަދާބަލަ. ވަރަށް ސާފު . ގާސިމު ހުންނަކޮޅަކަށް މައްސަލަތައް ނިމޭނީ.
ދަތްނެތްކުއްޖާ
19 February 2019
ބަޔަކު ހޭބައްޔެއް ނުވާނެތަ! ތިބުނާ ނުފޫޒެއް ފޯރު ވެވޭނީ ތިޔަ ބުނާ ފަނޑިޔާރުންވެސް ތިޔަ ބުނާ ކަމަކަށް ޝައުގު ވެރިކަން ހުންނާތީ ކަމަށް މަމެން ދެކެން! ތިމާމެން ކޮއްފައިވާ ހުވަ އާއި ޙިލާފުވެ އަމިއްލަ އެދުން ކަންކަމުގައި އިސްކުރާ ފަނޑިޔާރުން ވަކި މަދެއް ނޫން ކަމުގައި މަމެން ދެކެނީ. މިހެން ކަމުން އެފަދަ ފަނޑިޔާރުން ނަށް ފާރަލައި އެވެރިން ހޯދާ އެވެރިންނަށްވެސް ޙައްޤު އަދަބު ދެވޭ ދުވަހަކުން ތިޔަ ތަންތަން އިސްލާޙި ވާނެކަމަށް ދެކެން.
ޢަޖައިބ
19 February 2019
ބަަލަގަ ކޮންމެ ސަރުކާރު އެއް އޮތަސް ކަން ކުރަނީ ސަރުކާރު ބޭނުންވާ ގޮތަށް؟ ނުފޫޒުން އެއްކިބާ ނުވެވޭނެ
މިރުފަތު
19 February 2019
ޑރ. އަހުމަދު އަބްދުﷲ ދީދީ އަށް ކެރިލައްވާނެތޯ އަލްހާން ފަހުމީއާއި ގެން ފިޔަވަޅުއަޅަން، ގާސިމްގެ މައްސަލަތަށް ނިންމުމުގައި ރިޝްވަތުގެ އަމަލު ހުއްޓާލަން
ބޮކި ބޮކި
19 February 2019
އުއްތަމަ ފަނޑިޔާރު މަނިކުފާނަށް ޔާމީން ސަރުކާރުން ނުފޫޒް ފޯރުވާދޯ......
ބާރަށުން އަހްމަދު
19 February 2019
އެންމެ ފުރަތަމަ އުއްތަމަ ފަނޑިޔާރާށާއި އަލްހާނަށް ފިޔަވަޅު އަޅާދީ. މިދެމީހުން ބައި އަޅައިގެން މައްސަލަތައް ހައްލުކުރާ ހަބަރެއް ގައުމުގައި އެބަފެތުރޭ.