ހެލްތު މިނިސްޓަރު އަމީން ނޫސްވެރިންނާ ވާހަކަ ދައްކަވަނީ: ކޮރޯނާވައިރަސް އިން ރައްކާތެރިވުމުގެ ފިޔަވަޅު އަޅާފައިވާ ކަމަށް ވިދާޅުވި.---ފޮޓޯ: މިހާރު
26 ޖެނުއަރީ 2020 - 20:26
ޗައިނާގެ ވޫހާން ސިޓީން ފެނުނު ނުރައްކާތެރި ކޮރޯނާވައިރަސް އަށް ޝައްކު ކުރެވިގެން ރާއްޖޭގައި އެއްވެސް މީހަކު ޓެސްޓް ކޮށްފި ނަމަ އެކަން ވަގުތުން ވަގުތަށް އާންމު ކުރައްވާނެ ކަމަށް ހެލްތު މިނިސްޓަރު އަބްދުﷲ އަމީން މިރޭ ވިދާޅުވެއްޖެ އެވެ.
"މީހަކަށް ޝައްކު ކުރެވިއްޖެ ކަމަށް ވާ ނަމަ ނުވަތަ ކޭސްއެއް ފެނިއްޖެ ކަމަށް ވާ ނަމަ، މިއިން ކޭސް އަކަށް ޓެސްޓް ކުރެވިއްޖެ ކަމަށް ވާ ނަމަ އަޅުގަނޑުމެން ވަގުތުން ވަގުތަށް އެ މައުލޫމާތު އާންމު ރައްޔިތުންނާ ހިއްސާ ކުރާނަން،" ހެލްތު މިނިސްޓްރީގައި ދެންމެ ބޭއްވި ޕްރެސް ބްރީފިންގައި މިނިސްޓަރު އަމީން ވިދާޅުވި އެވެ.
އޭނާ ވިދާޅުވީ، ރާއްޖެ އިން ކޮރޯނާވައިރަސް އަށް ޝައްކު ކުރެވޭ މީހަކު އަދި އަލާމާތްތައް ހުރި މީހަކު ވެސް މިހާތަނަށް ފެނިފައި ނެތް ކަމަށެވެ. އަމީން ވިދާޅުވި ގޮތުގައި އެ ވައިރަސްގެ އަލާމާތްތައް ހުރި މީހަކު ދެނެގަތުމަށް ރާއްޖެ އިން ވެސް އަމަލު ކުރަނީ ޑަބްލިއުއެޗްއޯ އާއި އެހެން ގައުމުތަކުގައި ވެސް ކަނޑައަޅާފައިވާ އުސޫލެވެ.
ކޮރޯނާވައިރަސްގައި އެތައް ބަޔަކު މަރުވެ، އެތައް ސަތޭކަ ބައެއްގެ ގައިން އެ ވައިރަސް ވަނީ ފެނިފަ އެވެ. ރާއްޖެ އައި ބޭރުގެ މީހެއްގެ ގައިން ވެސް އެ ވައިރަސް ފެނުނު ކަމަށް އަޑު ފެތުރުނަސް، އެކަން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ކުރިން ވެސް އޮތީ ދޮގުކޮށްފަ އެވެ.
ހެލްތު މިނިސްޓަރު އަމީން މިރޭ ބޭއްވެވި ނިއުސް ބްރީފިންގައި ވެސް އެ ވާހަކަތައް ދޮގުކުރެއްވި އެވެ.
އަމީން ވިދާޅުވި ގޮތުގައި، ކޮރޯނާވައިރަސްގެ ސްކްރީނިން އިތުރުވާ ވަރަކަށް ސިއްހީ ދާއިރާގެ މީހުންގެ ސުވާލުތައް ގިނ ވާނެ އެވެ. އެކަމަކު، އެއިން ކޮންމެ ފަހަރަކީ އެ ރޯގާ އަށް ޝައްކު ކުރެވިގެން ކުރާ ސުވާލެއް ނޫން ކަަމަށް އޭނާ ވިދާޅުވި އެވެ.
ރާއްޖެ އަންނަ މީހުން ސްކްރީން ކުރުމަށް ވެލާނާ އިންޓަނޭޝަނަލް އެއާޕޯޓުގެ ޓާމިނަލް އޭރިއާގައި ބަހައްޓާފައިވާ ތާމަލް ކެމެރާ.---ފޮޓޯ: އެޗްޕީއޭ
"އަޅުގަނޑުމެން ވަރަށް ބޮޑަށް ސްކްރީނިން ކަންކަން ރަނގަޅު ކުރުމަށް މި ވިސްނަނީ. ޚާއްސަކޮށް އެއާޕޯޓުގައި ބެހެއްޓިފައި ހުރި ކެމެރާ އިން ދެނެގަންނާނެ މީހާގެ ބޮޑީ ޓެމްޕަރޭޗަރު. ބޮޑީ ޓެމްޕަރޭޗާ އަށް ބަލާފައި ފުރަތަމަ ކުރަންޖެހޭ ސުވާލުތައް އަދި ފުރަތަމަ އިންވެސްޓިގޭޝަންގެ ތެރެއިން އަޅުގަނޑުމެން އައިޑެންޓިފައި ކުރާނެ މި ބައްޔަށް ތުހުމަތު ކޮށްގެން ކުރަންޖެހޭ ސުވާލުތައް، ކުރަންޖެހޭ ޓެސްޓުތައް ކުރަން ޖެހޭތޯ،" އަމީން ވިދާޅުވި އެވެ.
އެކަމަކު ވައިރަސް ހުރިކަން ޔަގީން ކުރާނީ ބައިނަލްއަގްވާމީ މިންގަނޑުތަކާ އެއްގޮތަށް، ރާއްޖެ އިން ބޭރު ލެބޯރެޓަރީތަކަށް ފޮނުވައިގެން ބަލަންޖެހޭ ކަންކަން ބެލުމަށް ފަހު ކަމަށް އޭނާ ވިދާޅުވި އެވެ.
"މީހަކަށް ޝައްކު ކުރެވިއްޖެ ކަމަށް ވާ ނަމަ ނުވަތަ ކޭސްއެއް ފެނިއްޖެ ކަމަށް ވާ ނަމަ، މިއިން ކޭސް އަކަށް ޓެސްޓް ކުރެވިއްޖެ ކަމަށް ވާ ނަމަ އަޅުގަނޑުމެން ވަގުތުން ވަގުތަށް އެ މައުލޫމާތު އާންމު ރައްޔިތުންނާ ހިއްސާ ކުރާނަން،" އަމީން
އަމީން ވިދާޅުވި ގޮތުގައި، ކޮރޯނާވައިރަސްގެ ހާލަތު ރާއްޖޭގައި އޮތީ އާންމުން ކަންބޮޑުވާންޖެހޭ ދަރަޖައިގައެއް ނޫނެވެ. އެކަމަކު، އެ ވައިރަސްގެ ނުރައްކާތެރިކަން ބޮޑުކަމުން މި ވަގުތު ރައްކާތެރިކަމުގެ ފިޔަވަޅުތައް އާންމުން އަޅަމުން ގެންދިއުމަށް އޭނާ އެދިވަޑައިގަތެވެ. އެގޮތުން، ޑޮކްޓަރުންނާއި ސިއްހީ އިދާރާތަކުން ދޭ ލަފައާ އެއްގޮތަށް އަމަލު ކުރަމުން ދިއުމާއި ރަނގަޅު މައުލޫމާތު ހޯދަމުން ދިއުމަށް މިނިސްޓަރު ގޮވާލެއްވި އެވެ.
"ބަލީގެ ސިފަތަކަކީ އާންމު ރޯގާއެއްގެ ސިފަތައް. މި ބަލި ފެތުރެނީ އެކަކު ގައިން އަނެކަކު ގަޔަށް. އަޅުގަނޑަށް ޑޮކްޓަރުންނާއި ފަންނީ ބޭފުޅުން މައުލޫމާތު ދޭ ގޮތުގައި މިއީ އެއް ގައުމުން އަނެއް ގައުމަށް ޕާރުސަލްގެ ޒަރީއާ އިން އަނެއް ގައުމަށް ދާއިރު އަންނަ ބައްޔެއް ކަމަށް އަދި މައުލޫމާތު ލިބިފައެއް ނެތް،" އަމީން ވިދާޅުވި އެވެ.
ވައިރަސް ހުރި މީހަކު ފެނިއްޖެ ނަމަ އެ މީހަކު ކަރަންޓީން ކުރުމަށްޓަކައި، ހުޅުމާލޭގެ އޯޓިޒަމް ސެންޓަރު ކައިރީގައި ހުންނަ 10 ކްލާސްރޫމުގެ ޕްރީ ސްކޫލް ހަމަޖައްސާފައިވާއިރު، ސާޖިކަލް މާސްކް ވެސް އިތުރަށް ގެނައުމުގެ މަސައްކަތް ކުރަމުންދާ ކަމަށް އަމީން ވިދާޅުވި އެވެ. އަދި އަންނަ ބުދަ ދުވަހާ ހަމައަށް 400،000 މާސްކް ރާއްޖޭގައި ހުންނާނެ ކަމަށް އޭނާ ވިދާޅުވި އެވެ.
ހެލްތު މިނިސްޓަރ އަބްދުﷲ އަމީން ހުޅުމާލޭގައި ގާއިމްކުރެވިފައިވާ އައިސޮލޭޝަން ފެސިލިޓީ ބައްލަވާލެއްވުން pic.twitter.com/9bDwfoFXfv
— Ministry of Health (@MoHmv) January 26, 2020
ހުޅުމާލޭގައި ގާއިމް ކޮށްފައިވާ އައިސޮލޭޝަން ފެސިލިޓީ، މިނިސްޓަރު އަމީން ބައްލަވައިލައްވަނީ
އަމީން ވިދާޅުވި ގޮތުގައި، ކޮރޯނާވައިރަސްއާ ގުޅިގެން ޚާއްސަ ހޮޓްލައިނެއް ގާއިމްކޮށް، މައުލޫމާތު ދިނުމުގެ މަސައްކަތް ވެސް ވަނީ ފަށައިފަ އެވެ.
އެޗްޕީއޭގެ މެޑިކަލް އޮފިސަރު ޑރ. ފާތިމަތު ނަޒްލާ މިރޭގެ ނިއުސް ބްރީފިންގައި ވިދާޅުވީ، ސްކްރީން ކުރުމުގެ ތެރެއިން ހުން އައިސްފައި ތިބޭ މީހުންނާ ސުވާލު ކުރުމުގެ ތެރޭގައި ދަތުރުކުރި މަންޒިލާއި ތާރީޚުތައް ފަދަ މައުލޫމާތު ސާފުކުރުމަށް ސުވާލު ކުރުމަކީ އެކަށީގެންވާ ކަމެއް ކަމަށެވެ. އަދި ވައިރަސް ހުރި ކަމަށް ޝައްކު ކުރެވޭ މީހުން ކަމަށް ބަލާނީ އެކަމަށް ކަނޑައެޅިފައި ހުރި މިންގަނޑުތަކަށް ފެތުމުން ކަމަށް ވެސް ވިދާޅުވި އެވެ
"ވަޑައިގަންނަވާނެ ބޭފުޅުން ހުން އައިސްފައި ހުރި ނަމަ އެ މީހަކު ޕުލްކޮށްގެން ސުވާލުކޮށް، އަޅުގަނޑުމެންގެ ކްރައިޓީރިއާއަށް ފިޓްވޭތޯ މި ބަލަނީ. އަޅުގަނޑަށް ހީވަނީ މީޑިއާތަކުގައި އެގޮތަށް މި ދެއްކެވޭ ވާހަކަތަކަކީ ކްރައިޓީރިއާ އަށް ފިޓް ވޭތޯ ބަލަން މީހުންނާ ސުވާލުތައް ކުރީމަހެން ސަސްޕެކްޓް ކޭސްއޭ މި ކިޔަނީ. އެކަމަކު އެއީ އަދި ސަސްޕެކްޓް ކޭސްއެއް ނޫން،" ނަޒްލާ ވިދާޅުވި އެވެ.
އޭނާ ވިދާޅުވި ގޮތުގައި، ކޯރާނާވައިރަސް އަކީ އިންޒްލުއެންޒާ އާއި މީސްލްސް ފަދައިން ގައިން ގަޔަށް އަރާ ބައްޔެކެވެ. އެކަމަކު މިއީ އާންމުން ކަންބޮޑުވާންޖެހޭ ހާލަތެއް ނޫން ކަމަށް އޭނާ ވިދާޅުވި އެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
އިބްރާހީމް ހާއިލް
27 January 2020
ނެތީމަ އުފާ ކުރުމުގެ ބަދަލުގައި މި ދިވެހިންތެރޭން ބައެއް މީހުން މި ކިޔަނީ.. ހުޅުމާލޭގަ 2 މީހުން އެބަތިއްބޭ ދޮގު ހަދަނީއޭ. އަޅެ ނެތްކަމަށްޓަކާ ﷲ އަށް ޙަމްދު ކޮށްބަލަ..
ރީތި މޫސަ
27 January 2020
ޔާﷲ އަޅަމެން މިފަދަ ނުރައްކާބަލިތަކުން ސަލާމަތްކުރައްވާފާދޭވެ އަދި އަޅަމެންނަކީކަންކަމުގައި ބޭކާރު އަނގަނުތަޅާ ކިޔަމަންތެރި ބަޔަކުކަމުގައި ލައްވާފާދޭވެ. އާމީން
ޕްލީޒް
26 January 2020
އަމީން ހެޔޮ ނުވާނެ ތި ކަމެއް ނެތަސް މި ދިވެހިން އުފާކުރަން ބުނެބަލަ ކޮރު ވައުރަސް ފެތުރެނީއޭ. ހެޔޮނުވާނެ ޕްލީޒް.
ާއުނިމާ
26 January 2020
ޗައިނާއިން މީހުން އެެތެރެވުން މިވަގުތަށް ހުއްޓުވަން ޖެހޭ،
ކިނބޫ
26 January 2020
ސިިއްރު ކޮށްގެން ތިބެ މިކިޔަނީ ސިއްރެއް ނުކުރާނޭ.
އާދަންބެ
26 January 2020
މި ރާއްޖޭގައި ކަމެއް ސިއްރު ކުރެވޭނެތަ ކޮއިފުޅާ.. ފުރަތަމަ ތިކަމުގެ ސައިންސު ދަސްކުރަން އާދަންބެ ބޭނުން
ާއުނިމާ
27 January 2020
ސިއްރުނުކުރާނެކަމަށް ވިދާޅުވާއިރު މީގެން ދޭހަވނީ ކުރިން ބައެއް ރޯގާތައް ކޮންމެވެސް ބޭނުމަކަށް ސިއްރުކޮށްފިކަން
ސަމާހަތު
26 January 2020
އަލްހަމްދުލިއްލާހި. މިހާރު މީހުން ބަންދުކުރާ ރަށަކަށް ފޮނަދޫ ހަމަޖައްސައިފި. ޝުކުރިއްޔާ ވަޒީރު
ފިތުނަ
26 January 2020
ފެތުރޭ ފެތުރޭ ފެތުރޭ މި އުޅެނީ ނުފެތުރިގެންތަ ހަމަ ބޯހަލާކުވެދާނެ
ޖާބިރު
26 January 2020
ދާދި ދެންމެއަކީ އަޑުއިވިއްޖެ މި ވައިރަސްއަށް މީހަކު ޕޮޒިޓިވް ވެއްޖިއްޔާ ބަންދު ކޮށްފައި ބަހައްޓާނީ ފުނަދޫގައޭ.. ޝުކުރިއްޔާ ވަޒީރު. ތިއީ ރައްޔިތުންގެ އަޑު އަހާ ވެރިއެއް
އަހުމަދްު
26 January 2020
މިއީ ކޮންގައުމެއް؟ 100 މީހުން ކުރިމަތީ ވަޅިޖަހާފަ 50ހަކަށް ކެމެރާއަށް އަރާފަ، 40 މަގުން ލައިސެންސް ޕްލޭޓް ފެނަނަގޮތަށް ދުއްވާފަ ގޮސް ގޭގަ ފިލާއޮށްވާ ހައްޔަރު ކުރަން އައީމަ، މަ އޮތީ މިސްކިތުގަ ރޭއަޅުކަމޭ ބުނެފިއްޔާ ކޯޓުން ގަބޫލު ކޮށް މީހުން ދޫ ކުރާގައުމެއް މީ.
ކިނބޫ
26 January 2020
ދާދިފަހުންވެސް ރަށެއްގަ ކޮންމެސް ނުރައްކާތެރި ބައްޔެއް ފެތުރޭ ކަމަށް އެޗް.ޕީ.އޭ އިން އިއުލާނު ކުރުމަށްފަހު ކޮންމެސް ދިމާއަކުން އޯޑަރު ގޮސްގެން، އެއީ އޮޅިގެން ކުރެވުނު އިއުލާނެކޭވެސް ބުންޏެއްނު. އިތުބާރެއް ނުކުރެވޭ ތިދައްކާ ވާހަކައަކަށް.