ވާރިސުން މާފު ދީފި ނަމަ، އަދުހަމް އެއްބަސްވީ 17 އަހަރުގެ ޖަލު ހުކުމަކަށް: ޕީޖީ

ޓެކްސީ ޑްރައިވަރުގެ ގާސިމް ހަސަން މަރާލި ކަމުގެ ދައުވާ ލިބޭ އަދުހަމް މުހައްމަދާ އެކު އެކުލަވާލާފައިވާ އިއުތިރާފްގެ އެއްބަސްވުމުގައިވާ ގޮތުން ވާރިސުން މާފު ދީފި ނަމަ އޭނާ އަށް އަންނާނީ 17 އަހަރާއި ހަ މަސް ދުވަހުގެ ޖަލު ހުކުމެއް ކަމަށް ޕްރޮސިކިއުޓަ ޖެނެރަލް ހުސެއިން ޝަމީމް މިއަދު ވިދާޅުވެއްޖެ އެވެ.

މިދިޔަ އަހަރުގެ ޑިސެމްބަރު މަހު ހުޅުމާލެއަށް ގެންގޮސް ގާސިމްގެ ކަރަށް ތޫނު އެއްޗަކުން ހަމަލާދީ އޭނާ މަރައިލި މައްސަލައިގައި ޅ. ހިންނަވަރު ބޮޑުހިޔާގޭ އަދުހަމްގެ މައްޗަށް ކުރަނީ ތޫނު އެއްޗެއް ބޭނުން ކޮށްގެން ގަސްދުގައި މީހަކު މެރުމުގެ ދައުވާ އެވެ. އޭނާ ވަނީ ގާސިމް މަރާލި ކަމަށް ތަހުގީގާއި މިއަދު އޮތް ޝަރީއަތުގައި ވެސް އެއްބަސްވެފަ އެވެ.

Gasim maraali kamah Adhuham shareeathugai ves ebbas vejje

The most trusted news source in the Maldives

Mihaaru

ކްރިމިނަލް ކޯޓުގައި މިއަދު ޝަރީއަތް ފެށި މައްސަލައާ ގުޅޭ ގޮތުން ޕްރޮސިކިއުޓަ ޖެނެރަލް ޝަމީމް ނޫސްވެރިންނާ ބައްދަލުކުރައްވައި ވިދާޅުވީ އަދުހަމް ވަނީ ކުށަށް އިއުތިރާފްވެފައި ކަމަށެވެ. ކޯޓުގައި އެކަން ހިނގައިދިޔަ ގޮތް ކިޔައިދޭން އެއްބަސްވުމުން އޭނާއާ އެކު ޕީޖީ އޮފީހުން އިއުތިރާފްގެ އެއްބަސްވުމެއް އެކުލަވާލާފައިވާ ކަމަށް ވެސް ވިދާޅުވި އެވެ.

އިއުތިރާފް އެއްބަސްވުމަކާ އެކު ދައުވާ އުފުލި ނަމަވެސް އެ މައްސަލަ ސާބިތުކުރެވޭ ވަރަށް ތަހުގީގުގައި ފުލުހުން ހެކި ހޯދާފައިވާ ކަން ވެސް ޕީޖީ ފާހަގަކުރެއްވި އެވެ.

މަރުގެ މައްސަލަތަކުގައި އެންމެ ބޮޑު އަދަބަކީ މަރުގެ އަދަބު ނުވަަަތަ 25 އަހަރުގެ ޖަލު ހުކުމެއް ކަން ފާހަގަކުރައްވައި އޭނާ ވިދާޅުވީ އަދުހަމާ އެކު ޖިނާއީ އިޖުރާއަތުގެ ގާނޫނުގެ 104 ވަނަ މާއްދާގެ ދަށުން އެއްބަސްވުމެއް ހެދީ އިއުތިރާފްވުމާ އެކު ޝަރީއަތުގައި ކަން ހިނގި ގޮތް ކިޔައިދޭން އެއްބަސްވުމުން ކަމަށެވެ.

"މި އެއްބަސްވުން ހެދީމަ އަޅުގަނޑުމެންނަށް ވާ ފައިދާއަކީ ވަރަށް ގިނަ ވަގުތު އެބަ ސަލާމަތްކުރެވޭ، ވަރަށް ގިނަ ޚަރަދު އެބަ ސަލާމަތް ކުރެވޭ،" ޝަމީމް ވިދާޅުވި އެވެ.

PG Shameem ge visnun Plea bargain aa dhimaa ah

The most trusted news source in the Maldives

Mihaaru

އޭނާ ވިދާޅުވި ގޮތުގައި މިދިޔަ އަހަރު ކޯޓުތަކުގައި ތާވަލްކުރި 20،000 އަށް ވުރެ ގިނަ މައްސަލަތަކުގެ ތެރެއިން 13،000 މައްސަލަ ބޭއްވި އިރު ކޮންމެ މައްސަލައަކަށް ވަރަށް ބޮޑު ހޭދައެއް ހިނގި އެވެ. މާލެ އާއި އަތޮޅުތަކުގެ ކޯޓުތަކުގައި ކުރިއަށް ގެންދާ މައްސަލަތަކުގައި އެއްބަސްވުމެއް އެކުލަވާލުމުން ޚަރަދުގެ ގޮތުން ވަރަށް ބޮޑު ލުޔެއް ލިބޭ ކަން ޕީޖީ ފާހަގަކުރެއްވި އެވެ.

"މިގޮތަށް އެއްބަސްވުން އެކުލަވާލީމަ ޝަރީއަތެއް ނުހިނގާނެ. ޝަރީއަތް އޮންނާނީ އިއުތިރާފް ކަށަވަރުކުރަން. މި މައްސަލައިގައި އޭނާ [އަދުހަމް] އެ ގޮތަށް ކުރިއަށް ދާން ބޭނުންވާތީ އެއްބަސްވުމެއް ހެދީ،" ޝަމީމް ވިދާޅުވި އެވެ.

އަދުހަމަށް ވާރިސުން މާފު ދޭނެތޯ ނުވަތަ ނޫންތޯ ބަލާނީ ޝަރީއަތުގަ އެވެ.

އަދުހަމާ އެކު ޕްލީ ބާގެއިން ނުވަތަ އިއުތިރާފްގެ އެއްބަސްވުމެއް ހެދިއިރު ކުށްކުރާ މީހާ އެ ކުށަށް އިއުތިރާފްވާން އެއްބަސްވުމުން ދައުލަތުން ދެވެން އޮންނަ ލުޔެއް ދިނުމަކީ ޕީޖީ ގެންގުޅުއްވާ ވިސްނުމެކެވެ. ބަންޑާރަ ނައިބާ ވެސް ވާހަކަ ދައްކައިގެން ޕްލީ ބާގެއިނިން ސިސްޓަމެއް ހެދޭނެ ގޮތެއް ހޯއްދަވާނެ ކަމަށް ވެސް ޝަމީމް ކުރިން ވަނީ ވިދާޅުވެފަ އެވެ.