ޓިކެޓް ނުލިބުނަސް އަޅުގަނޑުގެ ތާއީދު ރައީސަށް އޮންނާނެ: ނަޝީދު

ރާއްޖޭގައި 2023 ވަނަ އަހަރު ބާއްވާ ރިޔާސީ އިންތިހާބުގައި ވާދަކުރައްވަން އެމްޑީޕީގެ ޓިކެޓް ލިބިވަޑައިނުގެންފި ނަމަ، ރައީސް އިބްރާހީމް މުހައްމަދު ސޯލިހަށް އެ އިންތިހާބުގައި ވެސް ތާއީދު ކުރައްވާނެ ކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ވެސް ރައީސް މުހައްމަދު ނަޝީދު ރޭ ވިދާޅުވެއްޖެ އެވެ.

"އާސްކް ސްޕީކާ" ޕްރޮގްރާމްގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ނަޝީދު ވިދާޅުވީ، އެމްޑީޕީގެ ޓިކެޓުގައި އިންތިހާބެއްގައި ވާދަކުރައްވާ ބޭފުޅަކަށް އެ މަނިކުފާނު ތާއީދު ނުކުރައްވާ ދުވަހެއް ނާންނާނެ ކަމަށެވެ.

ނަޝީދު މި ގޮތަށް ޖަވާބު ދެއްވީ "އެމްޑީޕީގެ ގައުމީ މަޖިލީހުގެ އަޣުލަބިއްޔަތު ލިބިވަޑައިނުގެން، ރިޔާސީ ޓިކެޓް ލިބިވަޑައި ނުގެންފި ހާލަތެއްގައި އަމަލު ކުރައްވާނީ ކޮން ގޮތަކަށްތޯ؟" ސުވާލު ކުރުމުންނެވެ.

"...އަޅުގަނޑު ދެކޭ ގޮތުގައި އެމްޑީޕީގެ ކެންޑިޑޭޓަކަށް އަޅުގަނޑު ތާއީދު ނުކުރާނެ ދުވަހެއް ނާންނާނެ،" ޖަވާބުގައި ނަޝީދު ވިދާޅުވި އެވެ.

އޭގެ ފަހުން ކުރިމަތިވި އެހެނިހެން ސުވާލުތަކަށް ޖަވާބު ދެއްވަމުން ނަޝީދު ވިދާޅުވީ، ރައީސް އިބްރާހީމް މުހައްމަދު ސޯލިހު ވެރިކަމަށް ވަޑައިގަަންނަވަން އެންމެ ބޮޑަށް ތާއީދުކުރެއްވިި އެއް ބޭފުޅަކީ އެ މަނިކުފާނު ކަމަށެވެ. ކުޑައިރުއްސުރެ އެންމެ ގާތް އެކުވެރިޔާ ރައީސް އިބްރާހިމް މުހައްމަދު ސޯލިހު 2018 ގައި ވެރިކަމަށް ގެންނަން ތާއީދު ހޯދައިދޭން އެންމެ ބޮޑަށް މަސައްކަތްޕުޅު ކުރެއްވީ ވެސް ނަޝީދު ވިދާޅުވި ގޮތުގައި ސީދާ އެ މަނިކުފާނެވެ.

"އަދި މި ވަގުތު ވެސް ރައީސް އިބްރާހީމް މުހައްމަދު ސޯލިހަށް އެންމެ އިހުލާސްތެރި މީހަކީ ވެސް އެއްވެސް ޝައްކެއް ނެތް ގޮތުގައި އަޅުގަނޑު،" ނަޝީދު ވިދާޅުވި އެވެ.

2023 gai MDP ge riyaasee candidate akee alhugandu: Nasheed

The most trusted news source in the Maldives

Mihaaru

އެމްޑީޕީގެ ރިޔާސީ ޓިކެޓް ލިބިވަޑައިނުގެންފި ނަމަ ރައީސް އިބްރާހިމް މުހައްމަދު ސޯލިހުގެ ފަހަތްޕުޅުގައި ހުންނަވާނެ ކަމަށް ނަޝީދު ވިދާޅުވިއިރު، ރޭގެ ޕްރޮގްރާމްގައި ނަޝީދު ވަނީ 2023 ގެ އިންތިހާބުގައި އެމްޑީޕީގެ ކެންޑިޑޭޓަކީ އެ މަނިކުފާނުކަން އިއުލާން ކުރައްވައިފަ އެވެ. ނަޝީދު އެހެން ވިދާޅުވީ، އެ އިންތިހާބުގައި ރައީސް އިބްރާހިމް މުހައްމަދު ސޯލިހު ވާދަކުރައްވާ ނަމަ އެ މަގާމަށް ވާދަކުރައްވާނެތޯ ސުވާލު ކުރުމުންނެވެ.

އެމްޑީޕީގެ އަސާސީ ގަވައިދުގައިވާ ގޮތުން އެ ޕާޓީގެ ރިޔާސީ ކެންޑިޑޭޓަކު ކަނޑައަޅާނީ އެ ޕާޓީގެ އެތެރޭގެ އިންތިހާބަކުންނެވެ.

ކުރިއަށް އޮތް ރިޔާސީ އިންތިހާބަށް ނުކުންނަވާނެ ކަމަށް ރައީސް އިބްރާހިމް މުހައްމަދު ސޯލިހު އަދި އިއުލާނެއް ނުކުރައްވަ އެވެ.

ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކުރައްވައި، ބޮޑުވަޒީރަކަށް ވެވަޑައިގަންނަވަަން އެދިވަޑައިގަަންނަވާ ކަމަށް ނަޝީދު ގެންދަވަނީ ތަކުރާރުކޮށް ވިދާޅުވަމުންނެވެ. އެކަމާ ރައީސް އިބްރާހީމް މުހައްމަދު ސޯލިހު ދެކޮޅު ހައްދަވާ ކަމަށާއި އެހެންވެ، އެ ދެބޭފުޅުންގެ ދެމެދުގައި ނުތަނަވަސްކަން އުފެދިފައިވާ ކަމަށް ވާހަކަ ދެއްކެވެ އެވެ.

ރޭގެ "އާސްކް ސްޕީކާ" ގައި އިނގިރޭސި ވިލާތުގައި ހުންނަވައިގެން ނަޝީދު ބައެއް ސުވާލުތަކަށް ޖަވާބު ދެއްވަނީ.---ފޮޓޯ: މަޖިލިސް

އެ ސުވާލު އައުމުން ނަޝީދު ވަނީ އެ ވާހަކަތައް ދޮގުކުރައްވައިފަ އެވެ.

"އަޅުގަނޑު ކުރާ އެއްވެސް ކަމަކަށް ރައީސް އިބްރާހީމް މުހައްމަދު ސޯލިހު ފާޅުގައި ދެކޮޅެއް ނުވެސް ހައްދަވާނެ. ދެން އަޅުގަނޑަކަށް ނުވިސްނޭ ހަގީގަތުގައި އަޅުގަނޑުމެން ދެ މީހުން މިއީ މާ ބޮޑެތި ހަސަދަވެރިންގެ ގޮތުގައި މި ވިސްނަވާ ވިސްނުމެއް،" އެ މަނިކުފާނު ވިދާޅުވި އެވެ.

ދެ ބޭފުޅުންގެ ދެމެދުަގައި މިހާރު ހިޔާލު ތަފާތުވުންތަކެއް ހުރީ މިހާރު އޮތް އުނދަގޫ ހާލަތުގެ ސަބަބުން ކަމަށާއި މިއީ ރައީސް އިބްރާހީމް މުހައްމަދު ސޯލިހަށް ފަސޭހަ ހާލަތެއް ނޫން ކަމަށް ވެސް ނަޝީދު ވިދާޅުވި އެވެ.

ބޮޑުވަޒީރަކަށް ވެވަޑައިގަތުމަށް ނަޝީދު ކުރައްވާ މަސައްކަތްޕުޅާ ދެކޮޅު ހައްދަވައި އަނެއްކޮޅަށް ނުކުމެވަޑައިގެން ކެމްޕޭން ކުރައްވާނެ ވާހަކަ ރައީސް އިބްރާހީމް މުހައްމަދު ސޯޯލިހު ވިދާޅުނުވާ ކަމަށް ވެސް ނަޝީދު ވިދާޅުވި އެވެ.