ރިޔާސީ އިންތިހާބެއް 2023 ގައި އޮވެއްޖެ ނަމަ އެމްޑީޕީގެ ކެންޑިޑޭޓަކަށް ހުންނަވާނީ އެ މަނިކުފާނު ކަމަށް ކުރީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދު މިރޭ ވިދާޅުވެއްޖެ އެވެ.
ރައްޔިތުންގެ މަޖިލީހުގެ އިދާރާ އިން ކުރިއަށް ގެންދާ "އާސްކް ސްޕީކާ"ގެ މިރޭގެ ޕްރޮގްރާމްގައި ނަޝީދު ވިދާޅުވީ ރާއްޖެ އަށް އެންމެ ރަނގަޅު ވާނީ ބަރުލަމާނީ ނިޒާމު ކަމަށް އަދިވެސް ގަބޫލުފުޅު ކުރައްވާ ކަމަށާއި ނަމަވެސް ރިޔާސީ އިންތިހާބެއް އޮވެއްޖެ ނަމަ އެމްޑީޕީގެ ޕްރައިމަރީގައި އެ މަނިކުފާނު ވާދަކުރައްވާނެ ކަމަށެވެ.
އެ އިންތިހާބަށް ރައީސް އިބްރާހިމް މުހައްމަދު ސޯލިހު ވާދަކުރައްވައިފި ނަމަ ތާއީދު ކުރައްވާނެތޯ ސުވާލު ކުރުމުން ނަޝީދު ވިދާޅުވީ 2023 ގައި އެމްޑީޕީގެ ކެންޑިޑޭޓަކަށް ވާނީ އެ މަނިކުފާނު ކަމަށެވެ.
"ދެހާސް ތޭވީހުގައި ރިޔާސީ އިންތިހާބެއް އޮންނަ ނަމަ އަޅުގަނޑު ވާނީ އެމްޑީޕީގެ ކެނޑިޑޭޓަށް،" ބޮމުގެ ހަމަލާގައި ލިބުނު ޒަހަމްތަކަށް އިތުރު ފަރުވާ އަށް މިދިޔަ ހުކުރު ދުވަހުން ފެށިގެން އިނގިރޭސި ވިލާތުގައި ހުންނެވި ނަޝީދު ވަރަށް ކުރުކޮށް ވިދާޅުވި އެވެ.
އެމްޑީޕީގެ އަސާސީ ގަވައިދުގައި ބުނާ ގޮތުން، އެ ޕާޓީގެ ޓިކެޓުގައި ރިޔާސީ އިންތިހާބަށް ނުކުންނަވާ ބޭފުޅަކު ހޮވާނީ އެމްޑީޕީގެ އެތެރޭގައި ބާއްވާ އިންތިހާބަކުންނެވެ.
އެމްޑީޕީގެ ކެންޑިޑޭޓަކަށް ވެވަޑައިގަންނަވާނެ ކަން ނަޝީދު ފުރަތަމަ ފަހަރަށް ހާމަކުރެއްވި ނަމަވެސް އެ މަނިކުފާނު ވިދާޅުވިގޮތުގައި ވެރިކަމުގެ ނިޒާމު ބަރުލަމާނީ އަށް ބަދަލު ކުރުމުގެ މަސައްކަތް ފައްޓަވާނެ އެވެ. އަދި އެ މަސައްކަތަށް އިދިކޮޅު ޕީޕީއެމުން ވެސް ތާއީދުކުރާނެ ކަމަށާއި ކުރީގެ ރައީސް އަބްދުﷲ ޔާމީނުގެ ތާއީދު ވެސް އެ ކަމަށް އޮންނާނެ ކަމަށް ނަޝީދު ވިދާޅުވި އެވެ.
ބަރުލަމާނީ ނިޒާމް ގެންނާކަށް ރައީސް އިބްރާހިމް މުހައްމަދު ސޯލިހު ހުރަސް ނާޅުއްވާ ކަމަށް ވެސް ނަޝީދު ވިދާޅުވި އެވެ. ވެރިކަމުގެ ނިޒާމު ބަދަލުކުރުމަކީ ރައްޔިތުންގެ ނިންމުމެއް ކަމަށް ރައީސް އިބްރާހިމް މުހައްމަދު ސޯލިހު އަބަދުވެސް ވިދާޅުވާ ވިދާޅުވުމަށް ތާއީދު ކުރައްވައި ނަޝީދު ވިދާޅުވީ "އެއީ ތެދުފުޅެއް" ކަމަށެވެ.