ހުޅުމާލޭގައި ހުންނަ ފިތުރޯނު މަގު: ރޭގަނޑު މި މަގުގައި އެކަށީގެންވާ އަލިކަމެއް ނުހުރޭ
22 ސެޕްޓެމްބަރ 2017 - 08:39
19 comments
ހުޅުމާލޭގެ ފުރަތަމަ ފިޔަވަހީގެ ދަށުން ހަދާފައި ހުރި ގިނަ މަގުތައް ޖާގައިގެ ގޮތުން ތަނަވަސްވެފައި ރީއްޗެވެ. އެކަމަކު ހުޅުމާލޭގައި ދިރިއުޅޭ މީހުންނާއި އެ ރަށަށް ދާ ގިނަ ބައެއްގެ ޝަކުވާއަކަށް އަބަދުވެސް ވެފައި އޮންނަނީ އިރުއޮއްސި އަނދިރިވުމުން އެ ހިތްގައިމު މަގުތައް "ނުފެންނަ" މައްސަލައިގަ އެވެ. ބޮޑެތި މަގުތަކުން ފެށިގެން ކުދި ގޯޅިތަކުގައި ޖަހާފައި ހުރި ލައިޓްތަކުގެ މާ ބޮޑު އަލިކަމެއް ނުހުރެ އެވެ. އެ ފަނޑު އަލީގައި މަގުމަތީގެ ނިޝާންތައް އެއްގޮތަކަށް ވެސް ނުފެނެ އެވެ.
ގިނަ ބައެއްގެ ނަޒަރުގައި ހުޅުމާލޭގައި ރޭގަނޑު އެކްސިޑެންޓުތައް ހިނގަން މެދުވެރިވާ އެއް ސަބަބަކީ ހަމައެކަނި ބާރު ސްޕީޑްގައި ދުއްވުމެއް ނޫނެވެ. މަގުތަކުގައި އެކަށީގެންވާ އަލިކަމެއް ނެތުމަކީ ވެސް އެކްސިޑެންޓުތައް ގިނަވާ ސަބަބެއް ކަމަށް ބެލެވެ އެވެ. ބައެއް މަގުތަކުގައި އެއްވެސް އަލިކަމެއް ނުހުރެ އެވެ. އެންމެ ލައިޓެއް ނެތް މަގުތައް ވެސް އެބަ ހުއްޓެވެ.
ހުޅުމާލޭގައި ހިނގި އެކްސިޑެންޓަކާ ގުޅިގެން ފުލުހުން ހަރަކާތްތެރިވަނީ.---ފޮޓޯ: ނިޝާން އަލީ/މިހާރު
ހުޅުމާލޭގައި އަނދިރި ކަމަށް ފާހަގަވާ ބޮޑު ބައެއް މަގުތައް:
- ކުރެދިމާ ހިނގުން (އެސްޓީއޯ ހޮޓަލުން ފެށިގެން ދިރާގު އޮފީސް)
- ފިތުރޯނު މަގު (އެސްޓީއޯ ހޮޓަލާއި އެމްޕީއެލް ކައިރި)
- މިދިލި މަގު (ޕެޓްރޯލް ޝެޑުން ފެށިގެން އެމްއެންޑީއެފް ކޮއްޓާ ހަމައަށް)
- އިންޑަސްޓްރިއަލް ޒޯންގެ ގުޅިފައިވާ ބައެއް މަގުތައް
- ސެންޓްރަލް ޕާކް ކައިރީގައި އޮންނަ މޫނިމާ ހިނގުން
ދުނިޔޭގެ ބޮޑެތި ސިޓީތަކުގައި މަގުތައް ހަދާއިރު، ލައިޓް ހަރުކުރަން ހޮޅި ދަނޑި ޖަހަނީ 25 މީޓަރުގެ ދުރުމިނެއްގަ އެވެ. އެކަމަކު، ޔޫތު ސިޓީއެއްގެ ގޮތުގައި ތަރައްގީ ވަމުން އަންނަ ހުޅުމާލޭގައި ލައިޓްތައް ޖަހާފައި ހުރީ އެއާ މުޅިން ހިލާފަށެވެ.
ހުޅުމާލެ ނިރޮޅު މަގު. ބައެއް މަގުތަކުގައި ރޭގަނޑު އެކަށީގެންވާ އަލިކަމެއް ނެތް މައްސަލަ ބޮޑު. - ފޮޓޯ: މިހާރު
ފުރަތަމަ ފިޔަވަހީގެ ދަށުން ހުޅުމާލޭގައި ހެދި މަގުތަކުގައި ޖަހާފައި ހުރި ކޮންމެ ދެ ހޮޅިދަނޑިއެއްގެ ދުރުމިނުގައި 50 މީޓަރު ހުރެ އެވެ. އެހެންވެ ގިނަ މަގުތަކުގައި ލައިޓްތައް ދިއްލި ކަމަށް ވިޔަސް، އެކަށީގެންވާ އަލިކަމެއް ނުހުރެ އެވެ.
ހުޅުމާލެ ތަރައްގީކޮށް ބަލަހައްޓަމުން އަންނަ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރު މުހައްމަދު ސައިމަން "މިހާރު" އަށް ވިދާޅުވީ ފުރަތަމަ ފިޔަވަހީގެ ދަށުން ހުޅުމާލޭ މަގުތަކުގައި ލައިޓްތައް ހަރުކޮށްފައި ހުރީ ބައިނަލްއަގުވާމީ ފެންވަރަށް ނޫނެވެ. އެހެންވެ، ބައިނަލްއަގުވާމީ ސްޓޭންޑެޑަށް ގެނައުމަށް ގިނަ މަސައްކަތްތަކެއް މިހާރު ކުރަމުން އަންނަ ކަމަށް އޭނާ ވިދާޅުވި އެވެ.
އެކަމަށް ހައްލެއް ގެނައުމުގެ ގޮތުން އެޗްޑީސީން އެޅި ފުރަތަމަ ފިޔަވަޅަކީ 140 ޑިގްރީއަށް އަލިކަން ފެތުރޭ ގޮތަށް ބޮކިތައް ބަދަލުކުރުމެވެ. ކުރިން ނަމަ، ލައިޓްތައް ޖަހާފައި ހުރީ 90 ޑިގްރީއަށް ވާ ގޮތަށެވެ. ސައިމަން ވިދާޅުވި ގޮތުގައި އެ ބަދަލު ގެނައި ފަހުން ކުރިއަށް ވުރެ ބޮޑަށް މަގުތައް އަލިވި އެވެ. ނަމަވެސް އެއީ ވެސް އާންމުން ފާހަގަކުރެވޭ ވަރުގެ ބަދަލަކަށް ނުވި އެވެ.
އެހެންވެ ހުޅުމާލޭގެ މަގުތައް އިތުރަށް އަލިކުރަން ބޭނުން ނަމަ، އިތުރު ހޮޅިދަނޑިތައް ޖެހުން ނޫން ގޮތެއް މިހާރު ނެތް ކަމަށް ސައިމަން ވިދާޅުވި އެވެ. އެކަމަކު ބައިނަލްއަގުވާމީ މިންގަނޑަށް އެކަން ކުރެވޭނީ އަލުން މަގުތައް ކޮނެ، ނަރުތައް އަޅައިގެންނެވެ.
ރައީސް އަބްދުﷲ ޔާމީން، އެޗްޑީސީގެ އެމްޑީ ސައިމަންއާ ސަލާމް ކުރައްވަނީ.
"މިކަން ހައްލު ކުރުމަށް ސިންގަޕޫރުގެ އެކްސްޕާޓުންނާ މަޝްވަރާ ކުރިން. އެކްސްޕާޓުންގެ ލަފަޔަކީ ވެސް އިތުރު ހޮޅިދަނޑިތަކެއް ޖަހައިގެން ނޫނީ މައްސަލައަށް ހައްލެއް ނުލިބޭނެ ކަމަށް،" ސައިމަން ވިދާޅުވި އެވެ.
އެޗްޑީސީން ނިންމާފައި ވަނީ މިހާރު ހުރި ހޮޅިދަނޑިތައް ބެހެއްޓުމަށް ފަހު، މުޅި ހުޅުމާލޭގައި އިތުރު ހޮޅިދަނޑިތަކެއް ޖަހައި ލައިޓްތަކެއް ހަރު ކުރުމަށެވެ. މިކަމުގެ އަމަލީ މަސައްކަތް މި އަހަރު ފަށާނެ ކަމަށާއި އެކަމަށް ބޭނުންވާ ބައެއް ސާމާނު މިހާރު ގެނެސްފައިވާ ކަމަށް ސައިމަން ވިދާޅުވި އެވެ.
"މިހާރު 50 މީޓަރު ދުރުމިނުގައި ކޮންމެ ލައިޓެއް މި ހުންނަނީ. އޭގެ މެދަށް ވާ ގޮތަށް ދަނޑިއެއް ޖަހާފައި ލައިޓްތައް ހަރު ކުރާ ގޮތަށް އޮތީ ނިންމާފައި. އެ ނޫން ހައްލެއް ނެތް،" ސައިމަން ވިދާޅުވި އެވެ.
އޭނާ ދެއްވި ޔަގީންކަމެއް އެބަ އޮތެވެ: ހުޅުމާލެ ދެވަނަ ފިޔަވަހީގެ ދަށުން ހިއްކި 240 ހެކްޓަރުގެ ބިމުގައި މަގުތައް ހެދުމުގެ މަސައްކަތް ބާރަށް ކުރިއަށް ދާއިރު، ދުނިޔޭގެ ބޮޑެތި ސިޓީތައް މިސާލަކަށް ނަގައިގެން ލައިޓްތައް ޖެހުމެވެ. އެހެންވެ އެ މަގުތައް އަނދިރި ނުވާނެ ކަމުގެ ޔަގީންކަން ސައިމަން ދެއްވި އެވެ.
އެކަމަކު އޭނާ ވިދާޅުވި ގޮތުގައި ފުރަތަމަ ފިޔަވަހީގެ މަގުތައް ރައްކާތެރިތެރި ފެންވަރަކަށް އަލިކުރުމުގެ މަސައްކަތަކީ ގޮންޖެހުން ބޮޑު ވެސް ކަމެކެވެ. ނަމަވެސް މިހާރު ރާވާފައި އޮތް ގޮތަށް ކުރިއަށް ގެންގޮސް ކާމިޔާބު ކުރެވޭނެ ކަމަށް ވިދާޅުވި އެވެ.
ހުޅުމާލޭގައި އެކްސިޑެންޓުތައް ހިނގުން އާންމެވެ. ބައެއް އެކްސިޑެންޓުތަކުގައި މީހުން މަރުވެފައިވެ އެވެ. އަނެއް ބަޔަކު ތިބީ އުމުރަށް ނުކުޅެދުންތެރި ހާލަތެއްގަ އެވެ. އެކްސިޑެންޓުތައް ހިނގުމުގެ އެއް ސަބަބަކީ މަގުތައް އަނދިރިވުން ކަމަށް ވާ ނަމަ އެކަމަށް އަވަސް ހައްލެއް މިހާރު ބޭނުމެވެ. ހުޅުމާލޭގެ ރައްޔިތުންނާއި އެހެން ކަންކަމުގައި ޒިޔާރަތްކުރާ މީހުންގެ ރައްކާތެރިކަން އެއީ ކުޑަ މަސްއޫލިއްޔަތެއް ނޫނެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ސަރުކާނު
24 September 2017
މުޅި ހުޅުމާލެ ދިއްލާކަށް ނުޖެހޭ. މިހާރަށް ކަމުދާ އެއްވެސް ކަމެއް ނެތެއްނު.
ރަޝާ
23 September 2017
ކީކުރަން އަލީ ކުރަންވީ.. ބުރީޖުއެޅުނީމަ ނީމުނީ..
ކޮއްކޮް
23 September 2017
ހުޅުމާލެ އެއީ އަދި މާފަހުގެ ތަނެއް. މާލެއަށް ބާލާލިއަސް އަލިކުރަން ޖެހޭވަރު ވިސްނެންވާނެ.
ައަހަންމާ
22 September 2017
ހުޅުމާލެއަކީ އުޅެންކަމުދާ، އަމުދުން ކުޑަކުދިން ގޮވައިގެން އުޅޭ އާއިލާއަކަށް ދިރިއުޅެން ކަމުދާތަނެކެވެ. ރަނގަޅު ކުރަންޖެހޭ ދެކަމަކީ މަގުތައް އަލި ކުރުމާއި ބާރުބާރަށް ދުއްވާ ސައިކަލުތަކާއި ކާރުތަކުގެ ސްޕީޑް ލިމިޓް ކުރުމެވެ. ތަނަކީ ހަމައެކަނި ކެމެރާތަކެއްގެ އެހީގައިވެސް 24 ގަޑިއިރު ބެލެހެއްޓިދާނެ ވަރުގެ ތަނެކެވެ.
ހުސޭނުބެ
22 September 2017
ވަރަށް ރަގަނޅު ވާހަކައެއް!!! ހުޅުމާލެ އަސްލުވެސް ވަރަށް އަނދިރި!!! މަގުތަކުގެ ބައްތިތަށް ވަރަށްމަދު!!! ހުޅުމާލެ މިހާރަށްވުރެން އަލިކޮށް އެރަށަށް ރޭގަނޑު ދިރުން ގެންނަންޖެހޭ!!! ރޭގަނޑުވީމަ ހުޅުމާލެ މަގުތައްމަތީގަ ހިނގާފަ އުޅެން ޖެހިލުންވޭ!! ރިޞްވާންވެސް ވަގަށްނެގީ ހުޅުމާލޭގެ މަގެއްގެމަތިންނޯ މީހުންކިޔާތީ އަޑުއިވޭ!!! ޔޫތުސިޓީ މިހާރަށްވުރެން އަލިކޮށް އާރޯކަން ގެނަސްދޭން އެބަޖެހޭ!!! ސައިމަންގެ ޓީމުން މިކަން ޕޮޒިޓިވްކޮށް ނަގައިގެން އަވަސް ޙައްލެއް ގެންނާނެކަމަށް އުންމީދުކުރަން!!! ވަރަށްވެދުން!!
ކަމަނަބޭ
22 September 2017
ތީ އަހަރެމެން ވިސްނުމުގެ ކޮށިކަން.. ބޭރުގައުމުތަކުގަ ކަރަންޓު ހަރަދުކޮށް ގިނައަލިކުރުންތަކެއްގެ ބަދަލުގައި ރިފްލެކްޓިވް ސްޓިކާ ބޭނުންކޮށް ޓުރެފިކަށް މަގުދައްކުވާ... ހުރިހާ ކަމެއްވެސް ގުޅިފައިވަނީ އަހްލާގު އަދި އިޖްތިމާއީ ފޭރާމާ
ހުސޭނުބެ
22 September 2017
ރިފްލެކްޓިވް ސްޓިކާ ބޭނުންކުރީމަ ދުއްވާ އުޅަނދުތަކަށް ފަސޭހަވާނެ!!! ދެން މަގުމަތީގަ ހިނގާފަ އުޅޭ މީހުން ކިހިނެތްތޯ ހަދަންވީ!!! އެމީހުންގެ ނިތްކުރީގައި ރެފްލެކްޓިވް ސްޓިކާ ހަރުކުރަންވީ!! އޭރުންވެސް ފަސޭހަވާނީ ދުއްވާ އެއްޗިއްސަށް!!! މަގުމަތީގަ ހިނގާ މީހުނަށްވެސް މަގުމަތި އަލިވާންޖެހޭ!!! ކަރަންޓް ޚަރަދު ބޮޑުވިޔަސްބމަގުމަތީ ލައިޓް އިތުރުކުރަންޖެހޭ!!
މެންޓަލިސްޓް
22 September 2017
ހުޅުމާލޭގައި ވަރަށް ގިނަސަރަހައްދާޢި މަގުތަކުގައިވެސް އެކަށީގެންވާވަރަށް އަލިކަން ނުހުންނާތީވެ ރޭގަނޑު އުދަނގޫތަކެށް އިހްސާސް ކުރެވޭ ،،،، ނަމަވެސް އޭގެ މާނައަކީ ހުރިހާ މަގެއްގައި ފްލަޑްލައިޓް ދިއްލާށެކޭނޫން ،،، ، ނޫނީ ފްލޮރަސަންޓް ޓިއުބްލައިޓް ދިއްލާށެކޭވެސް ނޫން ،، އާދައިގެ ދިގުހޮޅިބުރީގެ އަލިދަތުރުކުރާގޮތާއި އެހެންވައްތަރުތަކުގެ ލައިޓްތަކުގައި އަލިދަތުރުކުރާގޮތް ތަފާތުވާނެ ،، އެކަންބޮޑަށް އެނގޭނީ ބާރަށްދުއްވާފައި ދާއިރުއާޢި ކުއްލިކުއްލިއަކަށް އެހެންވެހިކަލް ތަކާޢި ދިމާވާއިރު ،،، ވީމާ މިކަހަލަ މައްސަލަތަށް ވިމާނުވާނެ ޒާތުގެ ލައިޓް ހަރުކުރުން ބުއްދިވެރީ ،،،، ވަރަށްވެދުން
ޢަލީމްބެ
22 September 2017
މަގުނުކޮނެ ވާނެގޮތެއް ހަމަ ނެތީތޯ.
ހުސޭނުބެ
22 September 2017
ނެތީމަތާ ކޮންނާނީ!! އިރުއިރުކޮޅާ މަގުމަތި ކޮނެނަގާ އެފުށްމިފުށެއްޖެހުމަކީ ފަސޭހަކަމެއްނޫން!! ދެން ދިވެހިންނަކީ އަބަދުވެސް ކޮންނަހިތުން އުޅޭބައެއް!! އެހެންވީމަ މަގުތައްވެސް ހަދާފަ އެހުންނަނީ އެކަން އަބަދުވެސް ރިޕީޓްވާގޮތަށް!!
ދަވޭ
22 September 2017
އަނދިރިކަމުގައި އޮތް ހުޅުމާލެ އަލިކުރަން ޖެހިފައި އޮތް އިރު މިހާރު އެތަނުގެ މަގުމަތީގައި ޖަހާފައިވަނީ އެއީ ކޮމްޕެކްޓް ފްލޮރިސެންޓް ލޭމްޕްސް އެވެ. މަގުމަތީގައި ދުނިޔޭގެ ތަރައްގީ ވެފައިވާ ގައުމު ތައް ކަމަށްވާ ސިންގަޕޯރ އަދި ޗައިނާ ފަދަ ގައުމު ތަކުގައި ޖަހަނީ އެއީ ލޯ ޕްރެޝަރ ސޯޑިއަމް ލޭމްޕްސް އެވެ. ލޯ ޕްރެޝަރ ސޯޑިއަމް ލޭމްޕްސް ތަކަކީ އެއީ ވަރަށް އަލިގަދަ ވޯމް ވައިޓް ކަލަރ ހުންނަ އަދި 10 ހާސް އިން 20 ހާސް ގަޑިއިރަށް ދެމި ހުންނަ ލޭމްޕްސް ތަކެވެ. މިލައިޓްސް ތައް 10 މީޓަރު ދުރުމިނުން 5 މީޓަރު އުސް މިނުގައި ޖަހާފައިވާ ނަމަ ހުޅުމާލޭގެ މަގުމަތި އަލިވާނެ އަލި ކުރަން ޖެހޭ ވަރަށް. އެކަމަކު ހުޅުމާލެ މަގުމަތީގައި ޖަހާފައިވާ ލައިޓްސް ތަކުގައި ހަރުކޮށްފައިވަނީ ކޮމްޕެކްޓް ފްލޮރިސެންޓް ލޭމްޕްސް އެވެ. އެއިން ދުރަށް އަލި ފޮނުވާ ނުދޭނެއެވެ. ލޯ ޕްރެޝަރ ސޯޑިއަމް ލޭމްޕްސް އިން ނޫން ގޮތަކަށް ކުޅަދާނަ އެއް ނޫން ހުޅުމާލޭގެ މަގުތައް އަލި ކުރަން އެކްސިޑެންޓްސް ތަކުން ސަލާމަތް ވާ ވަރަށް.
އިބޫ ހުޅުމާލެ
22 September 2017
ހާއްސަކޮށް އަޅުގަނޑު ފާހަގަ ކޮށްލަން އެންސިސްއިން މިހާރު އަލަށް ހަދާ ފެކްޓުރީ ހުންނަ މަގާއި ސަހަރާމަގުގެ ހުޅަނގުން އެއޮންނަ ގަރާޖުތަށް ހުންނަމަގު ހަމަ ވ ވ އަނދިރި، ޒުވާން ކުދިން ރޭގަނޑު ގައިގޯޅިވެ އުޅޭތަންވެސް ވަރަށް ގިނައިންފެނޭ... އަދި އެންސިސްގެ އެ އަލަށް ހަދާ ފެއްކްޓްރީގެ ބައެއް ދަނގަޑު ތަކާއި ބައެއެއް ސާމާނު މަގުގެ އެއްފަޅީ އެއްކޮށް ބަހައްޓާފައި ހުރޭ ސައިކަލުގެ އަލިން ކިރިޔާވެސް ފެންނަނީ، މީ ވަރަށް ނުރައްކާތެރިކަމެއް..