މާލޭގެ ހަލަބޮލި މަގުތަކަށް އިރުއޮއްސެމުން ދިޔަ ވަގުތެވެ. "ބްލޫ ހޮރައިޒަން ރިސޯޓްސް" ގެ އެންމެ މަތީ ފަންގިފިލާގައި ހުރި ބިއްލޫރި ކޮޓަރިކޮޅުގައި ހުރެ، އިޔާން އަހްމަދު ބޭރަށް ނަޒަރު ހިންގާލިއެވެ. އުދަރެސް ފެންނަނީ ރަތްވިލާލައި، ރަން ކުލައިން ޖަރީވެފައިވާ މަންޒަރެވެ. ނަމަވެސް، އޭސީގެ ފިނިކަމުގެ ތެރޭގައި ހުރި އިޔާންގެ ހިތަށް އެ ރީތިކަމުން އެއްވެސް ހަމަޖެހުމެއް ނުލިބުނެވެ.
އުމުރުން ނަވާވީސް އަހަރުގެ އިޔާންއަކީ މުޅި މާލެ ދަންނަ މަޝްހޫރު ނަމެކެވެ. ރާއްޖޭގެ އެންމެ މުއްސަނދި ވިޔަފާރިވެރިޔާ ޒަޢީމްގެ ހުރި ހަމައެކަނި ފިރިހެން ދަރިފުޅެވެ. އިނގިރޭސިވިލާތުން މަތީ ތައުލީމު ހާސިލުކޮށްގެން އައިސް، ބައްޕަގެ ވިޔަފާރީގެ ޒިންމާތަކާ ހަވާލުވެ ހުރިއިރު، އޭނާގެ ދިރިއުޅުން ފެންނަނީ ވަރަށް ފުރިހަމަ ކޮށެވެ. އޭނާގެ އެކުވެރިންނާއި، އޭނާގެ ލޯބިވެރިޔާ އަދި ދެބެންގެދެދަރި ކޮއްކޮ، ސާރާއާ އެކު ހޭދަކުރާ އުފާވެރި ދުވަސްތަކެވެ.
ނަމަވެސް މިއަދު އޭނާގެ ބައްޕަ ގުޅާފައި "ވަގުތުން ގެއަށް އަންނަން" ބުނުމުން އިޔާންގެ ހިތުގައި ނޭނގޭ ބިރުވެރިކަމެއް އުފެދުނެވެ.
މާފަންނުގައި ހުންނަ ޒައީމްގެ ގެ، "ވައިޓް ރޯޒް" އަކީ މާލޭގައި ހުންނަ އެންމެ ފުރިހަމަ އެއް ގެއެވެ. އުސް ފާރުތަކުން އެތެރެ ނިވާކުރެވިފައިވާ އެ ގޭގެ ގޭޓުން އިޔާންގެ ކާރު ވަދެގެން ދިޔައިރު، ގޭގެ ބަގީޗާ ތެރޭގައިވާ ބޯގަންވިލާ ގަސްތަކުން މާބުރުތައް އުދުހޭ މަންޒަރު ފެނުނެވެ. އެހެން ދުވަސްދުވަހު ގޭތެރެއިން އިވޭ ޓީވީގެ އަޑާއި، ގޭގައި ގެންގުޅޭ މީހުންނަށް އިޔާންގެ މަންމަ، ޝިފާ ކުރާ އަމުރުތަކުގެ އަޑެއް މިއަދަކު ނީވެއެވެ. މުޅި ގޯތިތެރެއަށް ވެރިވެފައިވަނީ ބުނަން ނޭނގޭ ކަހަލަ ހަމަހިމޭންކަމެކެވެ.
އިޔާން ސިޓިންރޫމަށް ވަންއިރު، އެތަނުގައި ތިބީ ތިން މީހުންނެވެ. އޭނާގެ ބައްޕަ ޒައީމް އިނީ ބޮލުގައި އަތްއަޅައިގެންނެވެ. އޭނާގެ މޫނުމަތިން ފެންނަނީ މީގެ ކުރިން އިޔާން ދުވަހަކު ވެސް ނުދެކޭފަދަ ހިތާމަވެރި އަސަރެކެވެ. ބައްޕަގެ ކުރިމަތީގައި، ބަލިވެ އުޅޭހެން ހީވާ ދުވަސްވީ އަންހެނަކު އިނެވެ. އޭނާގެ ހަށިގަނޑު ވަނީ ހިކި އަނަރޫވެފައެވެ. ލޯ ވަނީ ވަޅުވަދެފައެވެ.
އަދި އެ އަންހެން މީހާގެ ގޮނޑީގެ ފަހަތުގައި، ހިޔަންޏެއްހެން ހުއްޓިހުރި ޒުވާން އަންހެން ކުއްޖެއް އިޔާންގެ ލޮލުގައި އަޅައިގަތެވެ. އެ ކުއްޖާ ހުރީ އިސްޖަހައިގެންނެވެ. ލައިގެން ހުރީ ފަނޑު ނޫކުލައިގެ ދިގު ހެދުމެކެވެ. ބޮލުގައި އަޅާފައިވާ ފޮތިކޮޅު އޮތީ ކޮނޑުމައްޗަށް ވެއްޓިފައެވެ. އޭނާގެ އަތްތިލަ ވަނީ ގޮނޑީގެ އަތްގަނޑުގައި ބާރަށް ހިފަހައްޓާލެވިފައެވެ. އެ އަތްތިލައިގެ ހުދުކަމުން، އެ ކުއްޖާ ބިރުން ހުރި މިންވަރު އިޔާންއަށް އަންދާޒާ ކުރެވުނެވެ.
"އިޔާން، މިއީ މައިމޫނާ ދައްތަ. ދެން އެހުރީ ދައްތަގެ ދަރިފުޅު ލީނާ،" ޒައީމް ތައާރަފްކޮށްދިނެވެ.
އިޔާންގެ ހަނދާނަށް އައީ އޭނާގެ ކުޑައިރުގެ ވާހަކަތަކެވެ. މައިމޫނާއަކީ ޒައީމްގެ ހުރި ހަމައެކަނި ކޮއްކޮއެވެ. ނަމަވެސް އާއިލާގެ ނުގަބޫލުގައި، ތާ އަތޮޅު ވޭމަންޑޫގެ ފަގީރު ޓީޗަރަކާ ކައިވެނި ކުރުމުން، ޒައީމް ވަނީ ކޮއްކޮއާ ގުޅުން ކަނޑާލާފައެވެ. މިއަދު މައިމޫނާ އެ އިނީ ކެންސަރު ބަލީގެ އެންމެ ފަހު ދުވަސްކޮޅު ގުނާށެވެ. ވޭމަންޑޫ ހޮސްޕިޓަލުން ކުރެވޭނެ ކަމެއް ނެތުމުން މާލެ އައީއެވެ.
"ދައްތަގެ ފަހު އެދުމަކީ މިއީ، އިޔާން،" މައިމޫނާ ވާހަކަދެއްކީ ވަރަށް އުނދަގުލުންނެވެ. "އަހަރެން މަރުވުމުން ލީނާ ވާނީ ޔަތީމަކަށް. އޭނާގެ ބައްޕަ ވެސް ވަނީ ނިޔާވެފައި. މި ދުނިޔޭގައި އޭނާގެ ތިބި ހަމައެކަނި ބަޔަކީ ތިއީ. އަހަރެން ބޭނުންވަނީ ލީނާއަށް ރައްކާތެރިކަން."
ޒައީމް ކޮޅަށް ތެދުވިއެވެ. "އިޔާން! ބައްޕަ ބޭނުންވަނީ ދަރިފުޅު ލީނާއާ ކައިވެނިކުރަން."
މި ޖުމްލައާ އެކު އިޔާންގެ ފައިދަށުން ބިންގަނޑު ދެމިގެން ދިޔަ ކަހަލައެވެ.
"ކީކޭ؟" އިޔާން ހަޅޭއްލަވައިގަތެވެ. "ބައްޕާ، އަހަންނަކަށް ނުވާނެ. އޭނާ އެއީ ރާއްޖެތެރޭ ކުއްޖެއް. އަހަރެމެންގެ ދެމެދުގައި އެއްވެސް ގުޅުމެއް ނެތް. އަދި އަމުދުން އަހަރެން ސާރާއާ އިންނަން ގަސްތުކޮށްގެން ހުއްޓާ…"
"ސާރާގެ ވާހަކަ ނުދައްކާ!" ޒަޢީމް ރުޅިއައެވެ. "މިއީ ބައްޕަގެ އަމުރެއް. ދަރިފުޅު ޖެހޭނީ އިންނަން."
މިކަމާ ދެކޮޅަށް އިޔާންގެ މަންމަ ޝިފާ ވެސް ވަރަށް ވާހަކަދެއްކިއެވެ. ނަމަވެސް ޒައީމް ހުރީ ގޮތް ދޫކުރާ ގޮތަކަށް ނޫނެވެ. އޭނާ ބުނީ ލީނާއާ ނުއިންނަ ނަމަ އިޔާންއަށް މުދަލުންވާ ބައި ނުލިބޭނެ ކަމަށެވެ. އެންމެފަހުން މަޖުބޫރުވެގެން، ހިތާ ދެކޮޅަށް އިޔާން ލީނާއާ ކައިވެނި ކުރިއެވެ.
ކައިވެނި ކުރެވުނުތާ ތިން ދުވަސް ފަހުން މައިމޫނާ ނިޔާވިއެވެ. ލީނާ މުޅިން އެކަނިވެރިވިއެވެ. އޭނާ ހުރީ ބޮޑު ގަނޑުވަރެއް ފަދަ ގެއެއްގައި ނަމަވެސް، އެގޭގައި އޭނާއަށް ލިބުނީ ނޯކަރެއްގެ ދަރަޖައެވެ.
ޝިފާގެ އަނިޔާވެރިކަން އިންތިހާއަށް ދިޔައެވެ. "ކަލޭ ތިއީ މިގޭގެ ޅީދަރިއެއް ނޫން. ކަލޭ ތިއީ މިގެއަށް ޖެހުނު މުސީބާތެއް." މިއީ ކޮންމެ ދުވަހަކު ޝިފާ ކިޔާ އެއްޗެކެވެ. ލީނާ ލައްވާ ގޭގެ ހުރިހާ މަސައްކަތެއް ކުރުވައެވެ. ބަދިގޭގައި ކެއްކުމާއި، ގޭތެރެ ސާފުކުރުމަކީ ލީނާގެ ޒިންމާއެވެ.
އިޔާން އުޅެނީ އޭނާގެ އަމިއްލަ ދުނިޔެއެއްގައެވެ. އޭނާ ލީނާދެކެ ފޫހިވެއެވެ. އޭނާގެ ނަޒަރުގައި ލީނާއަކީ، އޭނާގެ މިނިވަންކަން ނަގާލި މީހާއެވެ. އޭނާ ލީނާއާ އަނގައިން ވެސް ނުބުނެއެވެ.
ނަމަވެސް، ވަގުތާ އެކު ކަންކަން ބަދަލުވާން ފެށިއެވެ. ލީނާގެ ކެތްތެރިކަމާއި، އޭނާގެ ރިވެތި އަޚްލާގު އިޔާންއަށް ފާހަގަވާން ފެށިއެވެ. އިޔާން ހީކުރި ގޮތާ ހިލާފަށް ލީނާއަކީ ކިޔަވައިގެން ހުރި، ހޭލުންތެރި ކުއްޖެކެވެ.
އެއް ރެއަކު ދަންވަރު، އިޔާންއަށް ފެނުނީ ލީނާ ސިޓިންރޫމްގައި އިނދެ ހިސާބު ފިލާވަޅެއް ހަދަން އުޅުނު ތަނެވެ. ލީނާ ކޮލެޖަށް ދާން ފެށީ ޒައީމްގެ އެދުމަށެވެ. އެރޭ އިޔާން ލީނާއަށް އެހީވެދިނެވެ. އެއީ އެދެމެދުގައި އުފެދުނު ގުޅުމުގެ ފެށުމެވެ. އެ ކުޑަ ވަގުތުކޮޅު، ލީނާގެ މޫނުމަތިން ފެނުނު މައުސޫމުކަމާއި، އޭނާގެ ލޮލުގައިވާ ތޫނުކަން އިޔާންގެ ހިތުގައި ބިންވަޅު ނެގުނެވެ.
އޭގެ ފަހުން، އިޔާން ގެއަށް އައުން އަވަސްވިއެވެ. ހަވީރު ސައިބޯން އިންނައިރު ލީނާ ގާތުގައި އިނުމަށް އިޔާން އެދެން ފެށިއެވެ. އެދެމެދުގައި ވާހަކަ ދެކެވި، އެކަކު އަނެކަކު ދަސްވާން ފެށިއެވެ. އިޔާންގެ ހިތުގައި އޮތް ނަފްރަތު މަޑުމަޑުން ލޯތްބަށް ބަދަލުވަމުން ދިޔައެވެ. ލީނާ ވެސް، ފުރަތަމަ ފަހަރަށް އޭނާގެ ފިރިމީހާގެ ފަރާތުން އޯގާތެރިކަން އިހުސާސްކުރިއެވެ.
އިޔާންގެ އުފަންދުވަހު، ލީނާ އޭނާއަށްޓަކައި ހާއްސަ ކޭކެއް އެޅިއެވެ. އެރޭ އިޔާން ލީނާއަށް ރަން ފަށެއް ހަދިޔާކުރަން ގަސްތުކޮށްގެން ގެއަށް އައީ ވަރަށް ފޮނި އުއްމީދަކާ އެކުގައެވެ. އޭނާ ބޭނުންވީ ލީނާ ދެކެ ލޯބިވާ ވާހަކަ ބުނާށެވެ. އެހެނަސް، އުފާވެރިކަމުގެ މި ދުވަސްތަކަކީ ތޫފާނެއްގެ ކުރިން އަންނަ ހަމަހިމޭންކަން ކަމެއް އެމީހުންނަކަށް ނޭނގެއެވެ.
އިޔާންއާއި ލީނާގެ ގުޅުން ބަދަހިވަމުންދާތަން ފެނި، ޝިފާއާއި ސާރާގެ ހިތުގައި ހަސަދަވެރިކަން އުފެދުނެވެ. ސާރާ ބޭނުންވީ އިޔާންއާ ކައިވެނިކުރާށެވެ. ޝިފާ ބޭނުންވީ އޭނާގެ މުދާގަނޑު "ރާއްޖެތެރޭ މީހަކަށް" ނުދިނުމަށެވެ. އެހެންކަމުން އެމީހުން ނުބައި ރޭވުމެއް ރޭވިއެވެ.
އިޔާން ގެއަށް އައިއިރު ޝިފާ އިނީ ރޯށެވެ. "ދަރިފުޅާ! މަންމަ މިހުރިހާ ދުވަހު ކެތްކުރީ. އެކަމަކު ދެން ނުވާނެ. ލީނާ ދަރިފުޅަށް ތެދުވެރިއެއް ނޫން."
އިޔާން އެކަން ގަބޫލެއް ނުކުރިއެވެ. ނަމަވެސް ޝިފާ ބުނީ ލީނާގެ "ލޯބިވެރިޔާ" މިވަގުތުވެސް ގޭގައި، ލީނާގެ ކޮޓަރީގައި ހުރި ކަމަށެވެ. އިޔާން ދުވެފައި މައްޗަށް އެރިއިރު، ލީނާގެ ކޮޓަރިން ނުކުތީ ނުދަންނަ ފިރިހެނެކެވެ.
"މިއީ ކާކު؟" އިޔާން ހަޅޭއްލަވައިގަތެވެ.
ލީނާ ރޮއިރޮއިފައި އެއީ އޭނާ ދަންނަ މީހެއް ނޫންކަމަށް ބުންޏެވެ. ނަމަވެސް ހެކިތައް ހުރީ ލީނާއާ ދެކޮޅަށެވެ. ޝިފާގެ މޮޅު އެކްޓިން އާއި، އެ ފިރިހެން މީހާ ދެއްކި ވާހަކަތަކުން އިޔާންގެ ބުއްދި ފިލައިދިޔައެވެ. ރުޅިވެރިކަމުގެ ތެރޭގައި އިޔާން ލީނާގެ މޫނުމަތީގައި ޖެހިއެވެ.
އެވަގުތު ލީނާ ބުންޏެވެ. "އިޔާން، އަހަރެން ބަނޑުބޮޑު."
މި ޚަބަރުން އިޔާންގެ ހިތް މަޑުވުމުގެ ބަދަލުގައި އިތުރަށް ހަރުވިއެވެ. "ކާކުގެ ދަރިއެއް؟ މަގޭ ދަރިއެއްތަ؟ ނޫނީ އެ ނުކުތް މީހާގެ ދަރިއެއްތަ؟"
މިއީ އަންހެން ކުއްޖަކަށް ދެވޭނެ އެންމެ ބޮޑު އަނިޔާއެވެ. ލީނާގެ ހިތް ކުދިކުދިވިއެވެ. އަމިއްލަ ފިރިމީހާ އޭނާގެ އިއްފަތްތެރިކަމާ މެދު ސުވާލު އުފެއްދީއެވެ.
އިޔާން ލީނާގެ އަތުގައި ހިފައި ދަމަމުން ގެންގޮސް ގެއިން ބޭރަށް ލިއެވެ. ބޯކޮށް ވެހެމުންދިޔަ ވާރޭގެ ތެރޭގައި ލީނާ އެކަނިވިއެވެ.
"ކޮންމެވެސް އެއް ދުވަހަކުން ހަގީގަތް އެނގޭނެ އިޔާން. އެދުވަހަކުން ތިބާ ރޯނެ."
ހަތަރު އަހަރު ފާއިތުވެގެން ދިޔައީއެވެ.
އިޔާން އުޅުނީ ހިތާމަޔާއި ރުޅިވެރިކަމުގެ ތެރޭގައެވެ. އޭނާ މުޅިން ބަދަލުވިއެވެ. ހިނިތުންވުން ގެއްލި، ހަރުކަށި މީހަކަށް ވިއެވެ. އޭނާ ހީކުރީ ލީނާ އުޅެނީ އޭނާގެ "ލޯބިވެރިޔާ" އާއެކު އުފަލުގައި ކަމަށެވެ.
ނަމަވެސް ހަގީގަތަކީ، ލީނާ އުޅުނީ އިންތިހާއަށް ނިކަމެތި ހާލުގައި، ހުޅުމާލޭގެ ދެވަނަ ފިޔަވަހީގެ ކުޑަ އެޕާޓްމަންޓެއްގައެވެ. އޭނާގެ އާއިލާގެ ދުރު މީހެއްގެ އެހީގައި، ލީނާ ވަނީ ދަރިފުޅު ވިހައި، ބަލައި ބޮޑުކޮށްފައެވެ. އޭނާ ސްކޫލް ޓީޗަރެއްގެ ވަޒީފާ އަދާކުރަމުން ދިޔައީ ދަރިފުޅަށްޓަކައެވެ.
އެ ދަރިފުޅު، އާނީ އަކީ އިޔާންގެ ސިފަ ލިބިފައިވާ ލޯބި ކުއްޖެކެވެ. ނަމަވެސް އާނީ އަކީ އުފެދުމުގައި ވެސް ހިތުގެ ބަލި ހުންނަ ކުއްޖެކެވެ.
އެއްދުވަހަކު އާނީގެ ހާލު ދެރަވެ، ހޮސްޕިޓަލަށް ގެންދެވުނެވެ. ޑޮކްޓަރުން ބުނީ ވަގުތުން ހިތުގެ އޮޕަރޭޝަނެއް ކުރަން ޖެހޭ ކަމަށާއި، އެކަމަށް ފަސް ލައްކަ ރުފިޔާ ބޭނުންވާނެ ކަމަށެވެ. ލީނާގެ އަތުގައި އެވަރެއް ނެތެވެ. ގޮތް ހުސްވެ، މަޖުބޫރުވެގެން ލީނާ ގުޅީ އިޔާންއަށެވެ.
އިޔާން ފޯނު ނެގީ ފޫހިކަމާއެކުގައެވެ. އޭނާ ލީނާ އޮފީހަށް ގެނައެވެ. އޮފީހުގައި، އިޔާން ލީނާއަށް މަލާމާތްކުރިއެވެ.
"ހަތަރު އަހަރު ފަހުން ފައިސާ ހުސްވީމަ ތި އައީ ދޯ؟ ކާކަށް ބޭސްކުރަން؟ ކަލޭގެ ލޯބިވެރިޔާއަށްތަ؟"
ލީނާގެ ހިތް ފަޅައިގެން ދިޔަ ނަމަވެސް، ދަރިފުޅަށްޓަކައި އޭނާ ކެތްކުރިއެވެ. "މިއީ މައުސޫމު ފުރާނައެއް ސަލާމަތް ކުރަން." ލީނާ އާދޭސްކުރިއެވެ.
އިޔާން ފަސް ލައްކަ ރުފިޔާގެ ޗެކެއް ލިޔެފައި، ލީނާގެ މޫނުމައްޗަށް އެއްލާލިއެވެ. "މި ހިފައިގެން ދޭ. ދެން ދުވަހަކު ވެސް މަގޭ ކުރިމައްޗަށް ނާންނާތި."
ލީނާ އެ ޗެކް ހިފައިގެން ދިޔައީ ކަރުނަ އަޅަމުންނެވެ. އޭނާ އިންޑިޔާއަށް ގޮސް އާނީގެ އޮޕަރޭޝަން ކުރިއެވެ.
މިކަން ވީތާ ހަފްތާއެއް ފަހުން، އިޔާން ގެއަށް އައި ވަގުތެއްގައި، ބަދިގެ ފަރާތުން މީހުން ވާހަކަދައްކާ އަޑު އިވުނެވެ. އެއީ މަންމަ އާއި ފިރިހެނެކެވެ.
"އަހަރެން ބުނީމެއްނު ދެން ނާންނާށޭ!" ޝިފާ ބުނަމުން ދިޔައެވެ.
"މެޑަމް، އަހަރެން ހަމައެކަނި ލީނާގެ ކޮޓަރިއަށް ވަދެ، ލޯބިވެރިޔާގެ އެކްޓް ކޮށްދިނީމަ ދިން ފައިސާ ކުޑަ. އަހަރެންގެ އަނގަ ބަންދުކުރަން ބޭނުން ނަމަ އިތުރު ފައިސާ ދީ." އެ ފިރިހެން މީހާ ބުންޏެވެ.
އިޔާންއަށް ހުރިހާކަމެއް ވިސްނުނެވެ. އޭނާގެ މަންމަ... އަމިއްލަ މަންމަ އޭނާގެ ދިރިއުޅުން ބަރުބާދުކޮށްލީއެވެ. ލީނާއަކީ ކުށެއް ނެތް މައުސޫމު އިންސާނެކެވެ. އަދި އޭނާ އެދުވަހު އޮފީހަށް އައިސް ފައިސާއަށް އެދުނީ ހިލޭ މީހަކަށް ނޫނެވެ. އިޔާންގެ އަމިއްލަ ދަރިފުޅަށެވެ.
އިޔާންގެ ރުޅިގަނޑު ފަޅައިގެން ދިޔައެވެ. އޭނާ އެ ފިރިހެން މީހާގެ ގައިގައި ތަޅައިގަތެވެ. އަދި މަންމައާ ކުރިމަތިލިއެވެ.
"މަންމާ! މަންމަ ތި ހަލާކުކޮށްލީ އަހަރެންގެ ދުނިޔެ. އަހަރެން ދެން ދުވަހަކުވެސް މަންމައަށް މައާފެއް ނުކުރާނަން."
އިޔާން ވަގުތުން އެއާޕޯޓަށް ގޮސް އިންޑިޔާއަށް ފުރިއެވެ.
ކޮޗިންގެ އަމްރިތާ ހޮސްޕިޓަލުގެ އައިސީޔޫ ބޭރުގައި ހުރެ، އިޔާން ލީނާގެ ފައިބުޑަށް ވެއްޓި ރޮއި އާދޭސްކުރިއެވެ.
"ލީނާ... އަހަންނަށް މައާފުކުރޭ. އަހަރެން މިއީ ކުށްވެރިއެއް."
ލީނާ ހުރީ ހިލަވެފައެވެ. ހަތަރު އަހަރުގެ ވޭން އެއް ދުވަހަކުން ފޮހެވޭނެ ހެއްޔެވެ؟ "އިޔާން، އަހަރެންގެ ދަރިފުޅު މަރުވާން ދޫކޮށްލީ އިޔާން. އަހަރެންގެ އިއްޒަތް ނަގާލީ އިޔާން. މިއަދު މައާފަށް އެދުނަސް، އެ ޒަހަމްތައް ފަސޭހައެއް ނުވާނެ."
ނަމަވެސް އިޔާން ގޮތް ދުލެއް ނުކުރިއެވެ. އޭނާ ހޮސްޕިޓަލުގައި މަޑުކުރިއެވެ. ރެ އާއި ދުވާލު ކޮރިޑޯގައި އިނދެ، އާނީ ރަނގަޅުވަންދެން އިންތިޒާރުކުރިއެވެ. އާނީއަށް ހޭވެރިކަންވުމާ އެކު، އިޔާން ދަރިފުޅާ ބައްދަލުކުރިއެވެ. އަމިއްލަ ދަރިފުޅު ފުރަތަމަ ފަހަރަށް އުރާލުމުން އިޔާންއަށް ލިބުނު އުފާވެރިކަން ބަޔާންކުރަންވެސް ދަތިވިއެވެ.
އިޔާންގެ އިހްލާސްތެރިކަން ފެނި، ލީނާގެ ހިތް މަޑުވާން ފެށިއެވެ. އޭނާ ދުށީ އިޔާންގެ ކިބައިގައިވާ ބޮޑާކަން ފިލައި، ހިތްތިރި އިންސާނަކަށް ބަދަލުވެފައިވާތަނެވެ.
އާނީ ހޮސްޕިޓަލުން ދޫކޮށްލުމުން، އިޔާން އެމީހުން ގޮވައިގެން މާލެ އައެވެ. އެކަމަކު "ވައިޓް ރޯޒް" އަކަށް ނޫނެވެ. އިޔާން ވަނީ މަންމަ ދޫކޮށްލާފައެވެ. މަންމަގެ މުއްސަނދިކަމާއި ގަނޑުވަރުގައި މަންމަ އެކަނިވެރިވީއެވެ. އެއީ އޭނާ ކުރި ކުށުގެ ސަޒާއެވެ.
އިޔާން ލީނާ އާއި އާނީ ގޮވައިގެން ދިޔައީ ހުޅުމާލޭގެ އަތިރިމަތީގައި ހުރި އަމިއްލަ އެޕާޓްމަންޓަކަށެވެ. އެތަނުގައި، ކަނޑުގެ އައްސޭރީގައި އެ މީހުންގެ އާ ދިރިއުޅުން ފެށިއެވެ.
އެއް ރެއެއްގެ ހަނދުވަރުދިން ރީތި ރެއެއްގައި، ބެލްކަނީގައި ތިބެ ލީނާ އިޔާންގެ އަތުގައި ހިފިއެވެ.
"އިންސާނުންނަށް ކުށް ކުރެވޭނެ. މުހިންމީ އެކަން އިސްލާހުކުރުން. އިޔާން، އަހަރެން އިޔާންއަށް މައާފުކޮށްފިން."
އިޔާންގެ ލޮލުން އުފާވެރިކަމުގެ ކަރުނަ އައެވެ. އޭނާ ލީނާ ގެނެސް މޭގައި ޖައްސާލިއެވެ.
"ލީނާއަކީ އަހަރެންގެ ހަމްސަފަރް. އަހަރެންގެ ދިރިއުޅުމުގެ ބައިވެރިޔާ. ދެން ދުވަހަކުވެސް ވަތްކެއް ނުވާނަން."
މިހާރު އެމީހުންގެ މެދުގައި އޮތް ނަފްރަތުގެ ކަނޑު ވަނީ ހިކިފައެވެ. ތާ އަތޮޅުން އައި ނިކަމެތި އަންހެން ކުއްޖާ، މިއަދު އެ ވަނީ ލޯތްބާއި ކެތްތެރިކަމުން އޭނާގެ ފިރިމީހާގެ ހިތް ފަތަހަކޮށްފައެވެ. އެމީހުންގެ ވާހަކައަކީ، ލޯބި، އިތުބާރު، ހިޔާނާތް އަދި ތައުބާގެ ފުރިހަމަ މިސާލެކެވެ. (ނިމުނީ)
ނޯޓް: މިއީ މި ރޯދަ މަހު "މިހާރު" އިން ބާއްވާ ކުރުވާހަކަ މުބާރާތަށް ހޮވިފައިވާ ވާހަކައެކެވެ.