އާރިޔާއަކީ، ވަރަށް ރީތިކޮށް ކުރަހާ ކުއްޖެކެވެ. ރަށުގެ އެންމެންވެސް އާރިޔާގެ ކުރެހުންތައް ރީތިކަމުން ތިބެނީ އެކަމާ އާޝޯހުވެފަ އެވެ. އާރިޔާ ގިނައިން ކުރަހާ އުޅެނީ، ރަށުގެ ގުދުރަތީ ރީތި މަންޒަރުތަކެވެ.
މިއަދު ވެސް އާރިޔާ އެދަނީ އޭނާ އެންމެ ގަޔާވާ ގުދުރަތީ މަންޒަރެއްގައި ކުލަޖައްސަމުންނެވެ. ރަށުގެ ގޮނޑުދޮށުގެ ގަހެއްގެ ހިޔަލުގައި އިނދެ، ސިފަ ކުރަމުން އެދަނީ އާރިޔާގެ ލޯކުރިމަތިން ފެންނަމުންދާ މޫދާއި ކަނޑުގެ ރީތި މަންޒަރެވެ.
އާރިޔާ ވެސް އޭނާގެ ކުރެހުންތަކާ މެދު ފަޚުރުވެރިވެ އެވެ. މި ކުރެހުންތަކަކީ، އާރިޔާގެ ދިރިއުޅުމުގެ އެއް ހިއްސާދާރެވެ. ކުރެހުންތަކާ މެދު ހިތްއުފާވާ ކަމުގައި ވިޔަސް އަބަދުވެސް އާރިޔާގެ ހިތުގައި ކޮންމެވެސް ވަރެއްގެ ނުތަނަވަސްކަމެއް ފޮރުވިފައިވެ އެވެ. އާރިޔާގެ ކުރެހުންތަކަކީ، ތަފާތު ރީތި ކުލަތަކުން ފުރިފައިވީ ކުރެހުންތަކެއް ކަމުގައިވީ ނަމަވެސް، އާރިޔާގެ ހަގީގީ ދިރިއުޅުމުގެ ކުލަވަރު ވަރަށް ފަނޑެވެ.
އެ ފަނޑުކަމާއި، އެ ނުތަނަވަސްކަން މެދުވެރިވާ ސަބަބެއް ނުވަތަ އެ ކަމުގެ އަސްލެއް، އާރިޔާ އަށް ވެސް ދެނެގަންނަން އުނދަގުލެވެ. ކޮންމެވެސް ކަމެއް ބޭނުންވަނީ އެވެ. އެއީ ކޮން ކަމެއް ބާވަ އެވެ؟ ދިރިއުޅުމުގެ ކޮންމެވެސް ކަމެއް މަދުކަމުގެ އިހްސާސެކެވެ. ކަންކަމާ މެދު މާޔޫސްވެވެނީ އެވެ. މާބޮޑަށް ކަންކަމާ މެދު އުންމީދު ކުރެވި އެކަމެއް ހާސިލު ނުވުމުން، މާޔޫސްވަނީ އެވެ. އެކަމާ ހިތްދަތިވަނީ އެވެ. އެކަނިވެރިންކަން އިހްސާސްވަނީ އެވެ. ހަޔާތުގެ ކުރިމަގު ބައްޓަންކުރަން ޖެހިލުންވަނީ އެވެ.
އެހެން އެކަން އާރިޔާ އަށް ދިމާނުވާންވީ ސަބަބެއްވެސް ނެތެވެ. ކުޑައިރު މަންމަ އާއި ބައްޕަގެ އެންމެ ފުރިހަމަ ލޯތްބާއި އަޅާލުން ލިބި، އެއްވެސް ކަމަކަށް ދަތިނުވެ ބޮޑުވަމުން އައި ކުއްޖެއްގެ، ހަޔާތުގެ ނައު ބަންޑުން ޖަހާލައި، ބައްޕައާ އުމުރަށް ވަކިވާން ޖެހުނީ އެވެ. މަންމަ އުފުލަމުން ދިޔަ ހިތްދަތިކަމާއި އެކަނިވެރިކަން އަދި އާރިޔާގެ މުސްތަގުބަލް އުޖާލާކުރުމަށްޓަކައި ދިއްލަމުން ދިޔަ ހުޅުކޮޅުތައް ނިވިގެން ދިޔައީ ވެސް އާރިޔާގެ ލޯ ކުރިމަތީގައެވެ.
ވީއިރު، ހިތުގައި އެ އަސަރުތައް ތާއަބަދަށް ދެމިހުންނާނެ ނޫން ހެއްޔެވެ؟ އެހެނަސް، އާރިޔާއަކީ ހިތްވަރުކުރާ ކުއްޖެކެވެ. ގާތް ތިމާގެ މީހުންނާއި ރަށުގެ ރައްޔިތުން އާރިޔާ އަށް ހިތްވަރުދެ އެވެ. އާރިޔާ ދެކެ އިންތިހާއަށް ލޯބިވެއެވެ. އަޅާލަ އެވެ.
އާރިޔާ ދިރިއުޅެމުންދާ ރަށަކީ، ވަރަށް ކުޑަ އެހެން ނަމަވެސް ގުދުރަތީ ރީތިކަމުން ފުރިގެންވާ ރަށެކެވެ. މީރުވަސްދުވާ މާގަސްތަކާއި، މޭވާގަސްތަކާއި ފެހިކަމުން ފުރިގެންވާ ހިތްގައިމު ރީތި ރަށެކެވެ. ސާފު ނަލަ ދޮންވެލި ގޮނޑުދޮށަކާއި ރީތި މޫދެއް އޮންނަ މި ރަށަކީ، އެ ރަށަށް ޒިޔާރަތްކުރާ ކޮންމެ މީހެއްގެ ވެސް ހިތް، އެ ރަށަކަށް ފިދާވެގެންދާ ފަދަ ގުދުރަތީ ރީތިކަމެއް ލިބިފައިވާ ރަށެކެވެ. ރަށުގެ މަގުތަކާއި ގޮނޑުދޮށުގައިވި ސާފުކަމަކީ، ރަށުގެ އަންހެންވެރިންގެ ހީވާގި ކަމެވެ. ކޮންމެ ދުވަހަކު ފަތިހު ނުކުމެ މަގުތައް ކުނި ކެހުމަކީ އެ ރައްޔިތުންގެ އާދައެކެވެ. އެކުވެރި އުޚްވަތްތެރި ގުޅުމަކުން ގުޅިފައިވި ކުޑަކުޑަ އާބާދީ އެކެވެ. ރަށުގެ ގުދުރަތީ ރީތިކަމުގެ އިތުރުން، ރަށުގައި ދިރިއުޅޭ މަދުމީސްކޮޅުގެ ހީވާގި މުރާލި މަސައްކަތްތެރިކަމާއި، ފަންނުވެރިކަން ރަށުގެ އެކި ދިމަދިމާލުން ފެނެ އެވެ. ހިތްހެޔޮ އޯގާތެރި އެކުވެރި ރައްޔިތުންތަކެކެވެ.
އެބައިމީހުންގެ ސާދާ ރީތި ދިރިއުޅުން ފެންނަ ކޮންމެ ބަޔަކު ވެސް، އުފަލުން މަރުވާ ފަދަ އުފާވެރިކަމެއް ލިބިފައިވި ރިވެތި ރަށެކެވެ. ހިތްގައިމު ދިރިއުޅުމެއް ބިނާވެފައިވާ މި ރަށުގެ ރީތިކަން ބަލައިލަން އަންނަ ފަތުރުވެރިންގެ ނުސިޔާނު ޢަމަލުތަކުން، ރަށް ތަގައްޔަރުވިޔަ ނުދިނުމަށް ރަށުގެ އެންމެހައި ރައްޔިތުން ތިބީ އަތުކުރި އޮޅާލައިގެންނެވެ. މިއީ ނަމޫނާ ރަށެކެވެ.
އާރިޔާގެ ސާނަވީ ތަޢުލީމުގެ އިމްތިޙާން ނިންމައި މުދައްރިސްކަމުގެ ތަމްރީނު ހަދަމުން ދިޔަ ދުވަސްވަރު، އާރިޔާގެ މަންމަ، އާޝިޔާ ވަނީ މި ދުނިޔެއާ އަލްވަދާއު ކިޔާފަ އެވެ. އާޝިޔާގެ ފިރިމީހާ ކެންސަރުގެ ވޭނީ ބަލީގައި ދުނިޔެ ދޫކުރުމުން، ތަހައްމަލު ކުރަން ޖެހުނީ ވަރަށް ވެސް އެކަނިވެރި ހަޔާތެކެވެ. އެ ހިތްދަތިކަން ވެރިވި ދުވަހުން ފެށިގެން އާޝިޔާގެ އުފަލެއްކަމުގައި އޭނާގެ ދަރިފުޅު، އާރިޔާގެ މުސްތަގްބަލު ބިނާކުރުމައިގެން ކުރިއަށް ދިޔަ އެވެ.
އާޝިޔާއަކީ، ކެތްތެރި، ހިވާގި، ޚުލްގު ރަނގަޅު އަންހެނެކެވެ. އާޝިޔާގެ އެ މާތް އަޚްލާގީ ރިވެތި ސިފަތައް އާރިޔާގެ ކިބައިން ވެސް ފެންނާން އެބަހުއްޓެވެ. މިއަދު، އާރިޔާއަކީ ވަރަށް ހިތްވަރުގަދަ ކެތްތެރި އަޚްލާގު ރަނގަޅު ޒުވާނެކެވެ. އެއީ އޭނާގެ މަންމަގެ ހެޔޮލަފާ ތަރުބަވީ ތަރުބިއްޔަތެވެ. އާރިޔާއަކީ ތުއްތު ކުދިންނަށް އުނގަންނައިދޭ މުދައްރިސެކެވެ. ތުއްތު ކުދީންގެ "އާރިޔާ އާންޓީ" އެވެ.
މަންމަގެ ވަކިވެދިޔުމުން ލިބުނު ހިތްދަތިކަމާއި އެކަނިވެރިކަން ފިލުވުމަށް އާރިޔާ ވަގުތު ހުސްކުރީ ކުރެހުމަށެވެ. ކުރެހުމަކީ، އޭނާ ކުޑައިރުއްސުރެ ވެސް ވަރަށް ޝައުގުވެރިކަން ހުންނަ ކަމަކެވެ. މުދައްރިސްކަމުގެ ތަޢްލީމު ހާސިލުކުރަމުން ދިޔަ ދުވަސްވަރު، ކުރެހުމުގެ ރޮނގުން ވެސް ކުރު ކޯސްތައް ހެދިއެވެ. ރަށަށް ޒިޔާރަތްކުރާ ފަތުރުވެރިން، އާރިޔާގެ ކުރުހުންތަކަށް ޝައުގުވެރިކަން ފާޅުކޮށް، އެތަކެތި ގަނެހަދައެވެ. އެހެންކަމުން، މިކަމުން ވެސް އާރިޔާއަށް ކޮންމެވެސް ވަރެއްގެ އާމްދަނީއެއް ލިބެ އެވެ.
ދުވަސްވަރަކީ، ސްކޫލްގެ ޗުއްޓީ ދުވަސްވަރެވެ. ފޫހިކަންފިލުވައިލުމަށްޓަކައި އެއްދުވަހެއްގެ މެންދުރުގެ ވަގުތު، އާރިޔާ ރަށުގެ މާރުކޭޓު ސަރަހައްދު ބަލައިލަން ދިޔަ އެވެ. އެ ކުޑަކުޑަ މަރުކޭޓުގެ ހަލަބޮލިކަމުގެ ތެރެއިން އާރިޔާގެ ލޮލުގައި އަޅައިގަތީ، ފެންއަރުވާވަޑާމުގެ ކައިރީގައި ހުއްޓި ހުރި ޒުވާނާއަށެވެ. އެއީ އެ ރަށު ކުއްޖެއް ނޫންކަން އާރިޔާއަށް ޔަގީންވި އެވެ. ދުވަހަކު ވެސް މީގެ ކުރިން ދުށް ޒުވާނެއް ނޫނެވެ. އެ ހޫނުގަދަ ވަގުތުގެ ހޫނުކަން ވެސް އާރިޔާއަށް އިހްސާސްނުވާ ކަހަލަ އެވެ. އެހެނީ، އާރިޔާ އެ ޒުވާނާއަށް ބަލަން އެތައް އިރެއް ވަންދެން ހުއްޓި ހުރެވުމުންނެވެ. އިރުކޮޅަކުން އެ ޒުވާނާއަށް ވެސް އާރިޔާ ފެނިއްޖެ އެވެ. އެ ރަށަށް މި އައި ބީރައްޓެހި ޒުވާނާގެ ސަބަބުން އާރިޔާގެ ހިތަށް ވެރިވެފައިވާ ނުތަނަވަސްކަން ކުޑަ ހިނދުކޮޅަކަށް ނަމަވެސް ނެތިގެން ދިޔަ ކަހަލަ އެވެ. ލަސް ފިޔަވަޅުތަކެއް އަޅަމުން އާރިޔާ، އެ ޒުވާނާގެ ގާތަށް ދިޔަ އެވެ. އެ ޒުވާނާ ވެސް އާރިޔާ، އޭނާގެ ގާތަށް އަންނަ މަންޒަރު ބަލަން ހުއްޓި ހުރީ ރަކި ހިނުތުންވުމެއްގަ އެވެ. އާރިޔާ، އެ ޒުވާނާއާ އަރާހަމަވުމުން، ޒުވާނާ ބުނެލި އެވެ.
"އަހަރެންނަކީ ޒިޔާން. އަހަރެންނަކީ ދަތުރުވެރިއެއް. އެކި ރަށްތަކުގެ ތަފާތު ވާހަކަތައް ހޯދުމަށް ދަތުރުކުރަމުންދާ މުސާފިރެއް." މިހެން ބުނުމުން އާރިޔާ ވެސް ހިނިތުންވެލަމުން، އެ ޒުވާނާ ގާތުން އެހެން ރަށްރަށުގެ ވާހަކަ އޮޅުންފިލުވަން ބޭނުން ކަމަށް ބުންޏެވެ.
"އަހަރެންގެ ކުރެހުންތަކުގެ އަމާޒު އެހެން ރަށްތަކަށް ވެސް ގެންދަން ބޭނުން. އަހަރެން ތިބާގެ ވާހަކަތައް އަޑުއަހާލަން ބޭނުން." ބޭއިޚްތިޔާރުގައި އާރިޔާއަށް ބުނެލެވުނެވެ.
އެ އަށް ފަހު އާރިޔާ އެކަމާ ލަދުގަތެވެ. އެއްވެސް ޖެހިލުމެއް ނެތި އަދި އިޒުނައެއް ނެތި އެ ވަހާކަތައް ހިއްސާކުރުމަށް އެދެވުނީތީ އެވެ. ޒިޔާން ހިނިތުންވެލާފައި އެތާ ކައިރީހުރި ކުޑަކެފޭއަށް އިޝާރާތްކޮށްލި އެވެ. އަދި ބުނެލި އެވެ. "ހިނގާ ދަމާ!". އަރިޔާ ކުޑަކޮށް ފަސްޖެހިލުމަށްފަހު ބުނެލި އެވެ.
"މަޢާފުކުރައްވާ!" ޒިޔާން އަހާލި އެވެ.
"ކޮންކަމަކަށްތޯ؟" އާރިޔާ ވާހަކަ ދައްކަންފެށި އެވެ.
"އަޅުގަނޑުގެ އެއްވެސް ތަޢާރަފެއް ނެތި ތިބާގެ އަގުހުރި ވަގުތުން، އެއްވެސް އިޒުނައެއް ނެތި ކަމަކަށް އެދެވުނީތީ." ޒިޔާން ހީލާފައި ބުންޏެވެ.
"އަހަރެން މި ރަށަށް އައި އަސްލު ބޭނުން މިހާރު ފުއްދައިފިން. އަހަރެންގެ ދަތުރު ނިންމާލަން އަދި ވަގުތު އެބައޮތް. އެހެންވީމާ އަހަރެންގެ ވާހަކަތައް ހިއްސާ ކުރުމަށް އެއްވެސް ހުރަހެއް ނެތް." މިހެން ބުނުމުން އާރިޔާ ހިނިތުންވެލަމުން، ހިންގަވާށޭ ބުނެ، ކެފޭ އާ ދިމާއަށް ހިނގައިގަތެވެ.
އެ ކެފޭއަކީ، ރަށުގައި ހުރި ހަމައެކަނި ކެފޭ އެވެ. އަދި އާރިޔާ ވަރަށް ގިނަ ވަގުތު ހޭދަކުރާ ތަނެކެވެ. އެ ދުވަހުގެ ފަހުބައި އާރިޔާ އާއި ޒިޔާން ހޭދަކުރީ ތަފާތު އެކި ވާހަކަތައް ހިއްސާކުރަމުން، ބައެއް ފަހަރު ހެމުން، ހަމަހިމޭންކަމުގެ ސޫކުތުކޮޅުތަކާ އެކު އެވެ. ރަށުގެ ހަރުފުރައިގެ މީހުންނާއި އަދި ބައެއް ޒުވާންކުދިން ކެފޭތެރޭގައި ހޭލަމޭލިވެ އުޅެ އެވެ.
ދުވަސްވަރަކީ ޗުއްޓީ ދުވަސްވަރުކަމުން ހަވީރުގެ ވަގުތުގައި ބައެއް ކުޑަކުދިން ވެސް އާއިލާއާ އެކު ކެފޭއަށް އައިސް ތިއްބެވެ. އެހެންކަމުން، ކެފޭއޮތީ ފުރިފަ އެވެ. އެ ރަށުގެ އާބާދީގެ ގިނަ ބަޔަކު ކެފޭގައި ތިއްބޭ ބުންޏަސް ދޮގަކަށް ނުވާނެ އެވެ. ރާއްޖޭގެ ސަގާފީ ވަންތަކަން ސިފަވާގޮތަށް ފަރުމާކޮށްފައިވާ، އެ ކެފޭގެ ކަނެއްގައި ހުރި މޭޒެއްގެ ދޮށުގައި އިށީނދެލައިގެން ތިބި އާރިޔާ އާއި ޒިޔާނަކީ ކުޑައިރުކޮޅެއް ކުރިން ދެ ބީރައްޓެހިން ކަމުގައިވީ ނަމަވެސް، ކުޑަވަގުތުކޮޅެއްގެ ތެރޭގައި ދެ ރަހުމަތްތެރިންނަށް ވެއްޖެ އެވެ. އެ މީހުން އޮލަ ވާހަކަތަކުގެ ތެރޭގައި ގެނބިފައިވާ މަންޒަރު ފެނުނު ބަޔަކަށް ވެސް އުފާވެރިކަމުގެ އިހްސާސެއް ގެނުވައިދޭނެ އެވެ. އަދި އެއީ ޒަމާންވީ ދެ އެކުވެރިންނޭ ވެސް ހީވާނެ އެވެ.
ޒިޔާނަކީ، ވަރަށް މަޢުލޫމާތު މުއްސަނދި ޒުވާނެކެވެ. އޭނާގެ ޝައުގުވެރިކަން ހުންނަ ގިނަ ކަންކަމުގެ ތެރެއިން އާރިޔާގެ ރަށަށް ކުރި ޒިޔާރަތަކީ، އެ ރަށުގެ ނަލަނަލަ މަންޒަރުތަކުގެ ތަސްވީރުތައް އޭނާގެ ކެމެރާގެ ޒަރީއާއިން ދުނިޔެއަށް ދައްކާލުމެވެ. އޭނާ ޒިޔާރަތްކުރި އެހެން ރަށްތަކެކޭ އެއްފަދައިން އެ ރަށުގެ ވާހަކަތައް ދުނިޔެއަށް ކިޔައިދިނުމަކީ އޭނާގެ އެ ދަތުރުގެ މަގުސަދެވެ.
ޒިޔާންގެ ޝައުގުވެރިކަން މިކަމަށް ހުރިކަމުގައިވީ ނަމަވެސް އޭނާއަކީ، ނަފްސާނީ ޢިލްމު އުނގެނިގެން ހުރި ޒުވާނެކެވެ. އޭނާގެ ރަސްމީ މަސައްކަތެއްކަމުގައި ނަފްސާނީ ދުޅަހެޔޮ މުޖުތަމައެއް ބިނާކުރުން ހިމެނެ އެވެ. ކުރިއަށް ދާންވީ މަގު ނޭނގި، ނުވަތަ ގޮތް ހުސްވެ، ކަންބޮޑުވެ، ދިރިއުޅުމައިގެން ކުރިއަށްދިއުމަށް ދަތިވެފައިވާ މީހުންނަށް މަގުދައްކައިދީ ހެދުމަކީ، އޭނާ ނުހަނު އުފަލުން ކުރާކަމެކެވެ. އިންސާނާގެ ސިކުނޑިއަކީ، ވަރަށް ބާރުގަދަ އަދި ﷲ ގެ ކުޅަދުންވަތަކަން ހާމަވާ، އެކަލާނގެ އަހަރެމެންނަށް ދެއްވާފައިވާ ވަރަށް އަގުބޮޑު ހަދިޔާއެއް އަދި އަމާނާތެއްކަން އޭނާ ދަނީ ނަފްސާނީ މައްސަލަތައް ކުރިމަތިވެފައިވާ މީހުންނަށް ކިޔައިދީ ވިސްނައިދެމުންނެވެ. ހަޔާތުގައި ދިމާވާ ކޮންމެ ކަމަކާ ކުރިމަތިލާނެ ގޮތްތަކާއި، ތިމާ އެކަމުގައި އަމަލުކުރާނެގޮތްތައް އެހެންމީހުންގެ އަމިއްލަ ނަފްސަށް ވިސްނައިދިނުމަށް މަގުފަހިކޮށްދިނުމަކީ އޭނާގެ ހިތްހަމަޖެހުމެވެ.
ޒިޔާން އާއި އާރިޔާއާ ދެމެދު ދެކެވުނު ވާހަކަތަކުގެ ތެރެއިން ޒިޔާނަށް އާރިޔާގެ ހިތުގައިވާ ނުތަނަވަސްކަމާއި ދިރިއުޅުމައިގެން ކުރިއަށްދިއުމަށް އާރިޔާގެ ވިސްނުމަށް ބަދަލުތަކެއް ގެންނަންޖެހޭކަން ފާހަގަވިއެވެ. އެހެންކަމުން، ޒިޔާންގެ ވާހަކަތައް ބައްޓަންކުރީ، އާރިޔާގެ ނަފްސަށް އަމިއްލައަށް އިތުބާރު އުފައްދަން މަގުފަހިވާ ގޮތަށެވެ. މިއީ ޒިޔާނަށް ލިބިފައިވާ ކުޅަދާނަކަމެކެވެ. އެކަމަށް އޭނާ ހޯދައިފައިވާ ޢިލްމު ފުރިހަމައަށް އެހީތެރިވެދިނެވެ. އާރިޔާގެ އަމިއްލަ ނަފްސަށް އިތުބާރުކުރުމަށާއި ގޮތްނޭނގޭ ޚިޔާލުތަކާއި ހިތްނުތަވަސް ކުރުވާފަދަ ކަންކަމާ ދުރުހެލިވެވޭނެ ބައެއް އުކުޅުތައް ކިޔައިދިނެވެ. އަދި އަމިއްލަ ނަފްސާއި ސިކުނޑީގެ މައްޗަށް ބާރުފޯރުވުމަށް ހިތްވަރުދިނެވެ. ދިރިއުޅުމާއިގެން ކުރިއަށްދިއުމަށް ހިތްވަރުދިނެވެ. ފަސްވަގުތު ނަމާދުކުރުމަށާއި އަބަދުވެސް ﷲ އަށް ވަކީލުކުރުމަށް ނަޞޭހަތްތެރިވިއެވެ.
އާރިޔާއަކީ ތުއްތު ކުދިންގެ މުދައްރިސަކަށްވާތީ، އޭނާގެ ކިބައިން ޒިޔާން ވަރަށް ބޮޑު ކަމަކު އެދެން ބޭނުންވާހަކަ ބުންޏެވެ. ޒިޔާން އޭނާގެ ވާހަކަ ފެށިއެވެ.
"އަހަރެން ވަރަށް ބޭނުން ނަފްސާނީ ދުޅަހެޔޮ ޖީލެއް ބިނާވެގެންދާތަން ދެކެން. އަމިއްލަ ނަފްސަށް އިތުބާރުކުރާ، އަމިއްލަ ނަފްސު ހިމާޔަތްކުރަން އެނގޭ، ކަންކަމާ ކުރިމަތިލާ ހިތްވަރުގަދަ ކުދިންތަކެއް އުފެދިގެން އަންނަތަން ދެކެން ވަރަށް ބޭނުން." އާރިޔާ ކުޑަކޮށް ހައިރާންވެފައި އިނދެ ބުންޏެވެ.
"ތިކަމުގައި އަހަރެންނަށް ކުރެވޭނީ ކޮންކަމެއް؟ އަހަރެންނަކީ އެކަނި ނަފްސެއް. ޖީލެއް ބިނާކުރުމުގެ ޒިންމާ..." އާރިޔާގެ ވާހަކަ ނުނިމެނީސް ޒިޔާން ފެށިއެވެ.
"އާން! އާރިޔަކީ އެންމެ ނަފްސެއް. ތިކަހަލަ އެތައް ނަފްސެއް އެކުވީމާ ޖީލެއް ބިނާކުރެވޭނެ!"، ވަރަށް ސާބިތުކަމާއެކު ޒިޔާން ބުނެލިއެވެ.
އާރިޔާ ހިނިތުންވެލިއެވެ.
"މިހާރު ވިސްނިއްޖެ. އަހަރެންގެ ތުއްތު ދަރިވަރުންނަކީ ހިތްވަރުގަދަ، އަދި އެކުދިންގެ އަމިއްލަ ނަފްސާމެދު ފަޚުރުވެރިވާ ކުދިބައެއްގެ ގޮތުގައި ކުރިއަށްދާން ދަސްކޮށްދޭނަން. ކަންކަމާ މެދު މާޔޫސްނުވެ ފައްސި ނަޒަރިއްޔާއަކުން ވިސްނުމަށް ކިޔައިދޭނަން." އާރިޔާ އުފަލާއި ޖޯޝާއެކު ބުނެލިއެވެ.
ހިތްހަމަޖެހުމުގެ ފުންނޭވާއެއް ލަމުން ޒިޔާން ހިތަށްއެރިއެވެ.
"އަލްޙަމްދުﷲ! އަހަރެންގެ މިދަތުރުގެ މަޤްޞަދުގެ އިތުރުން ބައެއްގެ ދިރިއުޅުމަށް ހެޔޮގޮތްތަކެއް މިންވަރުކޮށްދެއްވުމަށް މެދުވެރިކޮށްދެއްވި ﷲގެ ކުޅަދުންވަންތަކަމާއެވެ."
އިރޮއޮއްސުމުގެ ކުލަވަރުތައް ފަޒާގެ ތެރޭގައި ފެތުރެންފަށައިފިއެވެ. އާރިޔާގެ ހިތަށް މިވީހާ ދުވަހު ވެރިވެފައިވީ ނުތަނަސްވަކަން ފިލާދިޔަ ކަހަލައެވެ. އާރިޔާގެ ހިތަށް އެވަގުތު އެރިއެވެ. އޮއްސެން އެދާ އިރު ފަދައިން އަހަރެންގެ ކުރިމަތީގައި މިއިން ޒުވާނާވެސް އޮއްސިގެންދާނެއެވެ. ތަފާތު އެތައް މަޢުޟޫތަކަށް އިންސާފުކުރުމަށްފަހު އިރުއޮއްސި މަޢްރިބު ނަމާދު ވަގުތު ޖެހުމުން، ޒިޔާނަށް އަލްވަދާއު ކިޔުމަށްފަހު އާރިޔާ އެ ކެފޭއިން ނިކުމެގެންދަމުން ހިތާހިތުން ބުނެލެވުނެވެ. ތިބާ ދިޔުމުން، އަހަރެންގެ ކިބައިން ބައެއް އުނިވެގެންދާނެއެވެ. އަދި ތިބާގެ ސަބަބުން އަހަރެންގެ ހަޔާތަށް އިތުރުކަމެއް ވެސް އަންނާނެއެވެ.
ޖެހިގެން އައި ދުވަހުގެ ހެނދުނު އާރިޔާ ކެފޭއަށް ދިޔައެވެ. ޒިޔާންއާ ބައްދަލުވުމުގެ އުންމީދުގައެވެ. ކެފޭއިގައި މަސައްކަތްކުރާ ހަސަންބެ، އާރިޔާއަށް އެޑްރެސްކޮށްފައިވާ ނޯޓެއް ދިއްކޮށްލިއެވެ. އޭގައި އޮތެވެ.
"އިއްޔެގެ އުފާވެރި ވަގުތުކޮޅަށައީ އަދި ހިއްސާކުރި ވާހަކަތަކަށް ޝުކުރިއްޔާ! އަދި ނަފްސާނީ ދުޅަހެޔޮ ޖީލެއް ބިނާކުރަން މަސައްކަތް ކުރާނެކަމަށް އުންމީދު ކުރަން. އަހަރެންގެ މިދަތުރުތަކުގެ ތޭރޭގައި، ފަހަރުގައި އަދި ބައްދަލުވެދާނެ!" މިނޯޓު ކިޔާލުމުން، އާރިޔާއަށް މޮޅިވެރިކަން އިހްސާސްވިއެވެ.
ހަމައެއާއެކު އާދަޔާ ޚިލާފު ހިތްހަމަޖެހުމެއްވެސް ލިބިގެންދިޔައެވެ. އާރިޔާގެ ހިތަށްވެރިވެފައިވާ ނުތަނަވަސްކަން ފިލާނެ ހަނދާންތަކެއް ލިބިއްޖެއެވެ. އެއީ އަބަދަށްވެސް ހިތުގައި ހަރުލާފައި ހުންނާނެ އުފާވެރި ހަނދާންތަކެކެވެ. އެއީ އުންމީދީ ބަސްތަކެކެވެ.
ދުވަސްތައް ހަފްތާތަކަކަށް ބަދަލުވަމުން ދިޔައެވެ. މިހާރު އާރިޔާއަށް އަބަދުވެސް ހުރެވެނީ ހިނިތުންވުމަކާއެކުގައެވެ. ކުރީގައި ހިތަށްވެރިވެފައިވީ ނުތަނަވަސްކަމެއް ނެތެވެ. އުންމީދުގެ ހުޅުކޮޅުވަނީ ދިއްލިފައެވެ. އެކަނިވެރިކަމުގެ އިހްސާސެއް ނުކުރެވެއެވެ. އާރިޔާ ހިތަށްއަރައެވެ. އަހަންނަށް ކުއްލިއަކަށް މިހާ ބޮޑު ބަދަލެއް މިއައީ ކީއްވެ ހެއްޔެވެ. އަހަރެންގެ ހިތުގައި ނުތަނަވަސްކަމެއް ނެތެވެ. އެ ނުތަނަވަސްކަން ދިޔައީ ކޮންތާކަށް ހެއްޔެވެ؟ ހަގީގަތަކީ، އާރިޔާއަކީ ކުރިއެކޭ ވެސް އެއްފަދައިން ފަސްވަގުތު ބަރާބަރަށް ނަމާދު ގާއިމު ކުރާ ޒުވާނަކަށް ވުމެވެ. އަދި ދީނީ އެކި ކަންކަމުން ހިތްހަމަޖެހުން ހޯދާ ޒުވާނަކަށްވިއެވެ. ގިނަވަގުތު ޤުރްއާން ކިޔެވުމަށް ހޭދަކުރުމާއި އާދަކޮށް ޒިކުރުކުރުން މަތީ ދެމިހުންނަން ފެށިއެވެ. ދަމުނަމާދު ކުރުން އާދައަކަށް ހެދިއެވެ. ހަގީގީ ބަދަލަކީ މިއެވެ. އަދި ހަގީގީ ހިތްހަމަޖެހުންވެސް އިތުރުވެގެންދިޔައީ މިކަންކަމުންނެވެ. ޒިޔާންގެ ބަސްތަކާއި، ދިން ނަޞޭހަތް އަބަދުގެ އަބަދަށް އާރިޔާ ހަނދާނުގައި ބަހައްޓާނެއެވެ. ޒިޔާން އެދުނު ފަދައިން، އޭނާގެ ޒިންމާއެއް ކަމުގައި ނަފްސާނީ ދުޅަހެޔޮ ޖީލެއް ބިނާކުރުމަށް މަސައްކަތްކުރުމަށް އާރިޔާވަނީ އެދުވަހުން ފެށިގެން އަޒުމް ކަނޑައަޅާފައެވެ. ސްކޫލް ޗުއްޓީ ނިމި ސްކޫލް ހުޅުވެންވާއިރަށް އާރިޔާގެ މަސައްކަތަކަށްވެފައިވަނީ އޭނާގެ ތުއްތު ދަރިވަރުންނަކީ، އަމިއްލަ ނަފްސަށް އިތުބާރުކުރާ ކުދިންތަކަކަށް ހެދުމަށް ކުރެވިދާނެ ކަންކަން ދެނެގަތުމެވެ. އެކަމަށް އޭނާ ތައްޔާރުވުމެވެ. އެކަމަށް ބޭނުންވާ ފުރިހަމަ ޢިލްމު ހޯދުމަށް މަސައްކަތްކުރުމެވެ. ނަފްސާނީ ދުޅަހެޔޮ ޖީލެއް ބިނާކުރުމަށް މުދައްރިސެއްގެ ހައިސިއްޔަތުން ކުރެވެން ހުރިކަންކަން ދެނެގަތުމެވެ.
އެއް ދުވަހެއްގެ ހަވީރެއްގެ ވަގުތެކެވެ. ކެފޭއާ ދިމާ ކުރިމަތީގައިވާ މާބަގިޗާގެ ތެރޭގައި ހަވީރުގެ އެހިތްގައިމު މަންޒަރު ކުރަހަމުން ދިޔަ ވަގުތު، އާރިޔާގެ ހިތަށާއި ސިކުނޑިއަށް އެތަކެއް ޚިޔާލުތަކެއް އަރާ ފައިބަމުން ދިޔަ އެވެ. އާރިޔާއަށް ހަމަ ޔަގީނުން ވެސް ގައިމުވާ އެއްކަމެއް އެބައޮތެވެ. ޒިޔާންއާ ބައްދަލުވުމަކީ އިއްތިފާގެކެވެ. އެހެނަސް އެއީ އާރިޔާގެ ހަޔާތަށް ލިބުނު އަގުބޮޑު ހަދިޔާއެކެވެ. ކުރު، އެހެނަސް ފޮނި، އެ ބައްދަލުވުމުގެ ސަބަބުން އާރިޔާގެ ހިތުގައި އުންމީދުގެ ހުޅުކޮޅު ދިއްލިއްޖެ އެވެ. އެކަނިވެރިވެ މާޔޫސްވެފައިވީ އެހިތަށް އާރޯކަން ގެނުވި އެވެ. އާރިޔާގެ ކުރެހުންތަކުގައި ތަފާތު އެކި ކުލަތައް ހިމެނޭ ފަދައިން، ދިރިއުޅުމަކީ، ތަފާތު އެތައް ކުލަތައް ހަގީގަތުގައިވެސް އެކުލެވޭ އެއްޗެއްކަން އިހްސާސްވެއްޖެ އެވެ. ހިތުގައިވާ މާޔޫސްކަމުގެ މައްޗަށް އަމިއްލަ ބާރު ފޯރުވޭކަން އިހްސާސްވެއްޖެ އެވެ. ދިރިއުޅުމާ މެދު ނުވިސްނޭ އެތައް ގޮތަކަށް ވިސްނުމަށް މަގުފަހިވި އެވެ. އަމިއްލަ ސިކުނޑީގެ ބޭނުން އެންމެ ފުރިހަމަ ގޮތުގައި ބޭނުންކުރަން އެނގިއްޖެ އެވެ. މީގެ ކުރިން ޚިޔާލަށް ވެސް އަދި ވިސްނުމަށް ވެސް ނާންނަ އެތައް ކަމަކާމެދު ވިސްނެން ފެށި އެވެ. ފައްސި ނަޒަރަކުންނެވެ. ކޮންމެ ކަމަކާ މެދު ދެކޭގޮތް ބަދަލުކުރުމުގެ އިޚްތިޔާރު އަމިއްލަ ނަފްސަށް ލިބިގެންވާކަން ޔަގީންވި އެވެ.
އަހަރެމެންގެ ބޮލުގެ ނާށިގަނޑުގެ ތެރޭގައި ފޮރުވިފައިވާ ސިކުނޑީގެ ބާރުގަދަ ކަމާ އެވެ. އެ ސިކުނޑި އަހަރެމެންނަށް ދެއްވި ﷲގެ ކުޅަދުންވަންތަކަމާ އެވެ. މިކަމާ މެދު ވިސްނާލެވޭ ކޮންމެ ފަހަރަކު ވެސް އާރިޔާގެ ލޮލުން ކަރުނަ ހިލެ އެވެ. އެއީ ޝުކުރުވެރިކަމުގެ ކަރުނަ އެވެ. އާނއެކެވެ. ހަޔާތުން ވަގުތުކޮޅެއް ގެއްލިއްޖެ އެވެ. އެހެނަސް މުޅި ދިރިއުޅުން އަނބުރާ ލިބުންފަދަ އެވެ. އާރިޔާ ފުންނޭވާއެއްލި އެވެ. އަދި ވަށައިގެންވާ މާހައުލަށް ބަލައިލަމުން ހިނިތުންވެލި އެވެ. އަދި އުފަލުން ފުރިފައިވީ ނަޒަރަކުން އޭނަގެ ކުރިމަތީގައިވާ ކުރެހުމަށް ބަލައިލި އެވެ. ކުރެހުމުގައި ވަނީ އުޖާލާކަން ގެނެސްދޭ ކުލަތަކެކެވެ. ރީތި ނަލަ ކުލަތަކެކެވެ. އާރިޔާގެ ހިތަށް އެރިއެވެ.
"މި ކުރެހުމުގައި މި ވަނީ އަހަރެންގެ ހަޔާތުގެ ކުލަތަކެވެ. އަހަރެންގެ އެކުވެރި ކުލަތަކެވެ. އަހަރެން ބޭނުންވާ ކުލަތަކެވެ. ކުރިން ވެސް ހަމަ މި ކުލަތަކެވެ. އެހެނަސް އަހަރެންގެ ނަޒަރިއްޔާ ތަފާތީ އެވެ."
(ނިމުނީ)
ނޯޓް: މިއީ މި ރޯދަ މަހު "މިހާރު" އިން ބާއްވާ ކުރުވާހަކަ މުބާރާތަށް ހޮވިފައިވާ ވާހަކައެކެވެ.