ބޭރުގައި ޖަހަމުންދިޔަ ގަދަ ހޮނުގުގުރީގެ އަޑަށްވުރެ، ގޭގެ ސިޓިންރޫމްގައި ހިފާލާފައި އޮތް ހަމަހިމޭންކަން މާ ބިރުވެރިއެވެ. ވާރޭގެ ތިކިތައް ފުރާޅުގައި ތަޅަމުންދިޔަ އަޑު ފިޔަވައި އިތުރު އަޑެއް ނީވެއެވެ. މަންމަ އިނީ ސޯފާގެ އެއްކަނެއްގައި، ބޯމަތިން ފައިބައިފައި އޮތް ބުރުގާއިން މޫނު ނިވާކޮށްގެންނެވެ. ބައްޕަ އިނީ އަތުގައި އޮތް ހުސް ސައިތަށި އަނބުރާލަ އަނބުރާލައެވެ. އެ މޫނުމަތިން ފެންނަމުންދިޔަ މާޔޫސްކަމާއި ލަދުވެތިކަމުގެ ކުލަވަރުން އަހަރެންގެ ހިތް ކުދިކުދިވަމުން ދިޔައެވެ.
"ނުހާ! މުޅި އިންޓަނެޓްގަ، މުޅި ޓެލެގްރާމްގަ އެހެރީ ކަލޭގެ ފޮޓޯތައް. މުޅި ރަށު އެންމެން އެއަށް އެބަ ބަލާ."
އަހަރެންގެ ބޭބެ، ނަސީމްގެ އަޑު ފަޅައިގެން ދިޔައީ ވިހަގަދަ ހަތިޔާރެއް ފަދައިންނެވެ. އެ އަޑުގައި ވަނީ ރުޅިވެރިކަމާއި ނަފްރަތެވެ. ބޭބެގެ އެ ޖުމުލައާ އެކު، ބައްޕަގެ އަތުގައި އޮތް ސައިތަށި ތުރުތުރުލާން ފެށިތަން އަހަންނަށް ފެނުނެވެ. ތަށި މޭޒުމަތީގައި ބެހެއްޓިއިރު، ތަށި ޖެހުނު އަޑު މުޅި ގޭތެރޭގައި ގުގުމާލިއެވެ. މަންމަގެ ދެލޯ ބޮޑުވެ، އެ ލޮލުން ކަރުނަ ފާއްދާލިއެވެ. އެވަގުތު، މުޅި ދުނިޔެ އަހަރެންގެ ފައިދަށުން ދެމިގެން ދިޔަ ކަހަލަ އިހުސާސެއް އަހަންނަށް ކުރެވުނެވެ.
މުޅި ރަށުގައި އެ ދައްކަނީ އެ ފޮޓޯތަކުގެ ވާހަކަކަން އަހަންނަށް ކުރިން ވެސް ކޮންމެވެސް ވަރަކަށް އެނގެއެވެ. މަގުމަތިން ދާއިރު މީހުންގެ ބެލުންތަކާއި، ފޯނުތަކަށް ބަލަބަލާފައި ހީނލާ ގޮތުން ކޮންމެވެސް ގޯހެއް އުޅޭކަން އަހަރެންގެ ޒަމީރު ބުނެދެމުން ދިޔައެވެ. ނަމަވެސް، އަމިއްލަ ގޭގެ ހަތަރު ފާރުގެ ތެރޭގައި، އެންމެ ލޯބިވާ އާއިލާގެ ކުރިމަތީގައި އެ ބިރުވެރި ހަގީގަތް ތިލަވުމުން، އަހަރެންގެ ނޭވާ ހާސްވިއެވެ. މިއީ އަހަރެންގެ ހިމާޔަތުގެ ފަހު ކިއްލާއެވެ. އެ ކިއްލާ ފުނޑުފުނޑުވެއްޖެކަމުގެ އިހުސާސް އަހަންނަށް ކުރެވުނެވެ.
އެ ރޭ، ކޮޓަރީގެ އަނދިރިކަމުގެ ތެރޭގައި އޮވެ، ތުރުތުރުލާ އިނގިލިތަކުން އަހަރެން އެ ފޮޓޯތައް ހުޅުވާލީމެވެ. ޓެލެގްރާމްގެ ވަގު ގްރޫޕްތަކުގައި ދައުރުވަމުންދިޔަ އެ ތަސްވީރުތައް ފެނުމުން އަހަރެންގެ ހޭނުނެތުނީ ކިރިޔާއެވެ. އެއީ ޝައްކެއް ވެސް ނެތް މިންވަރަށް އަހަރެންގެ މޫނެވެ. އަހަރެންގެ އެ މަޑު ހިނިތުންވުމެވެ. އަހަރެންގެ ކަނާތު ލޮލުގެ ތިރީގައި އިންނަ ކުޑަ ކަޅުތިއްކެވެ. އެކަމަކު... އެ ހަށިގަނޑަކީ އަހަރެންގެ ހަށިގަނޑެއް ނޫނެވެ. އެއީ ފާހިޝް އަމަލުތަކެއް ހިންގަމުންދާ ބީރައްޓެހި ހަށިގަނޑެކެވެ. މިއީ ކޮންފަދަ ބޮޑު އޮޅުވާލުމެއް ހެއްޔެވެ؟ ޓެކްނޮލޮޖީގެ ނަމުގައި، 'އާޓިފިޝަލް އިންޓެލިޖެންސް' ނުވަތަ 'ޑީޕްފޭކް' ބޭނުންކޮށްގެން މީހަކު އެވަނީ އަހަރެންގެ އަބުރު ކަތިލާފައެވެ. އަހަރެންގެ ރޫހު މަރާލާފައެވެ.
"ބައްޕާ، މަންމާ... އެއީ އަހަރެން ނޫން. ﷲ ގަންދީ ބުނަން، އަހަރެން ދުވަހަކުވެސް އެކަހަލަ ކަމެއް ނުކުރަން،" އަހަރެން ގިސްލާފައި ރޮމުން ބުނީމެވެ.
އަހަރެންގެ އަޑު ވަނީ ކުރެހިފައެވެ. އެކަމަކު، ލޮލަށް ފެންނަ ކޮންމެ އެއްޗަކީ ހަގީގަތް ކަމަށް ގަބޫލުކުރާ، ޓެކްނޮލޮޖީގެ ކަޅު ފަރާތް ނޭނގޭ މުޖުތަމައެއްގައި، އަހަރެންގެ ބަސް ވީ ކަނޑަށް އުކާލެވޭ ހިލަގަނޑަކަށެވެ. ބައްޕަ ތެދުވެގެން ކޮޓަރިއަށް ވަން ގޮތަށް ދޮރު ޖަހައި ތަޅުލިއެވެ. މަންމަ ރޮމުންރޮމުން ގޮސް ބަދިގެއަށް ވަދެ ފިލިއެވެ. އަހަރެންގެ މައުސޫމުކަން ސާބިތުކޮށްދޭނީ ކިހިނެއް ހެއްޔެވެ؟ އަމިއްލަ ހަށިގަނޑު ހާމަކޮށް، އެއީ އަހަރެން ނޫންކަން މުޅި ދުނިޔެއަށް ދައްކަންވީ ހެއްޔެވެ؟ އެއީ ކުރެވޭނެ ކަމެއް ހެއްޔެވެ؟
އަހަރެން ދިރިއުޅޭ ރަށަކީ ގުދުރަތީ ގޮތުން ރީތި، ހިތްގައިމު ރަށެކެވެ. އެކަމަކު އެ ރީތިކަމުގެ ފަރުދާގެ ފުރަގަހުގައި ވަނީ ހަސަދަވެރިކަމާއި ޣީބަ ބުނުމުގެ ނުބައި އާދައެވެ. ރަށުގެ ޒުވާނުންނަކީ ޓެކްނޮލޮޖީއަށް ލޯހުޅުވިފައި ތިބި ބައެކެވެ. ކޮންމެ މީހެއްގެ އަތުގައި ފަހުގެ ފޯނެއް އޮވެއެވެ. ނަމަވެސް އެ ވަސީލަތްތައް ބޭނުންކުރަމުން ދިޔައީ އެހެން މީހުންގެ މަސްކައި، އަބުރު ނަގާލުމަށެވެ.
ޓެލެގްރާމް ގްރޫޕްތަކުގައި އަހަރެންގެ ފޮޓޯތައް ދައުރުވަމުން ދިޔައީ ޖަންގަލީގައި ރޯވެފައިވާ އަލިފާންގަނޑެއް ފަދައިންނެވެ. ހަމައެކަނި ފޮޓޯއެއް ނޫނެވެ. އެއާއެކު ހަޑިހުތުރު ވާހަކަތަކާއި، އަހަރެންގެ އަގުވައްޓާލުމަށް ހަދާފައިވާ ދޮގު ވާހަކަތައް ވެސް ފެތުރެމުން ދިޔައެވެ.
އޭގެ އަނެއް ދުވަހު އަހަރެން މަގުމައްޗަށް ނުކުތީމެވެ. ފިހާރައަށް ދާން މަޖުބޫރުވީމައެވެ. މަގުމަތިން ދާއިރު، ޖޯލިފަތިތަކުގައާއި ފިހާރަތަކުގެ ކުރިމަތީގައި ތިބޭ މީހުންގެ ނަޒަރު ހުއްޓިފައި ހުރީ ސީދާ އަހަންނަށެވެ. އެ ބެލުންތަކުގައި ވަނީ ޝަހުވަތްތެރިކަމާއި މަލާމާތެވެ. ބައެއް މީހުން ފޯނު ދައްކާލާފައި އެކަކު އަނެކަކަށް ކޮއްޓާލައެވެ. އެމީހުންގެ ހީނލުމުގެ އަޑު އިވުމުން އަހަރެންގެ ކަންފަތުގައި އަތްއަޅަން ބޭނުންވިއެވެ. ދުވަސްވީ މީހުންވެސް ވައްބަހުން ޖަހައެވެ.
"މިހާރުގެ ކުދިންގެ ލަދެއް ހަޔާތެއް ނުހުންނާނެ،" މާމައެއް ބުނެލި އަޑު އަހަންނަށް ސާފުކޮށް އިވުނެވެ.
އަހަރެން ހުރީ ކަޅުކުލައިގެ ބޮޑު އަބާޔާއަކާއި ބުރުގާއެއް އަޅައިގެން، ވީހާވެސް ބޮޑަށް ނިވާވެގެންނެވެ. އެކަމަކު، އެމީހުންގެ ލޮލަށް ފެންނަނީ އެ ސުންޕާ ފޮޓޯތަކެވެ. އަހަރެންގެ ހަގީގީ ސޫރައެއް ނޫނެވެ.
އެ ހާދިސާއަށް މަހެއް ވެގެން ދިޔައިރު، އަހަރެންގެ ދިރިއުޅުން ވަނީ ބިރުވެރި ހުވަފެނަކަށް، ނުވަތަ ނިމުމެއް ނެތް ވޭނަކަށް ބަދަލުވެފައެވެ. އަހަރެން ވަޒީފާ އަދާކުރާ "މިނީމާޓް" ޝޮޕިން ސެންޓަރަކީ ކުރިން އަހަންނަށް ވަރަށް އުފާވެރި މާހައުލެކެވެ. އެކަމަކު މިހާރު އެތަނަށް ވަނުމަކީ ނަރަކައަށް ވަނުން ފަދަ ކަމެކެވެ. ކުރިން އަހަންނަށް ހިނިތުންވުމަކާއެކު ސަލާމް ގޮވާލާ މީހުން، މިހާރު ބަލަނީ ފާޑެއްގެ ފަކުރުގަނޑެއް ހެންނެވެ. އޮފީހުގެ މަސައްކަތުގައި އަހަރެން ބުނާ ބަސް މިހާރު އެކައްޗަކަށް ވެސް ނުވެއެވެ. އަހަރެން ފައިލެއް ހިފައިގެން ދާއިރު، ފަހަތުން މުވައްޒިފުން ކޮންމެވެސް އެއްޗެކޭ ކިޔާފައި ހީނގަންނަ އަޑު އިވެއެވެ.
އެންމެ ބޮޑު ބިރަކީ މެނޭޖަރު ސޯލިހެވެ. އޭނާއަކީ ކުރިން ވަރަށް ހަރުދަނާ، އޯގާތެރި ވެރިއެކެވެ. ނަމަވެސް މިހާރު އޭނާ އަހަންނާ ދިމާލަށް ބަލާ ގޮތް ތަފާތެވެ. އެ ބެލުމުގައި ވަނީ ނޭދެވޭ އެދުންތަކެއްކަން އަހަންނަށް ފާހަގަވިއެވެ. "މިހާރު މުޅި ދުނިޔެއަށް ބޭޒާރުވެފައިވާ ކުއްޖެކޭ، އަހަރެން ގާތު ވެސް ކަމެއް ކޮށްލަފާނެޔޭ" އޭނާގެ ހިތަށް އަރަނީ ކަންނޭނގެއެވެ. މެނޭޖަރުގެ ކޮޓަރިއަށް ވަންނަން ޖެހޭ ކޮންމެ ފަހަރަކު އަހަރެންގެ ހިތް ތެޅެނީ ބިރުންނެވެ.
ގޭގެ ހާލަތު އޮތީ އެއަށްވުރެ ދަށު ދަރަޖައިގައެވެ. ބައްޕައަކީ އުމުރުން ދުވަސްވެ، ބަލިހާލު ހުރި ގޮތުން މަސައްކަތެއް ކުރެވޭ މީހެއް ނޫނެވެ. މުޅި އުމުރު މިސްކިތުގެ ޖަމާއަތް ދޫނުކުރި، އަޅުވެރި ބައްޕަ، މިއަދު ގޭގެ ގިފިލިތެރޭގައި ކުނާމަތީ އިންނަނީ މީހުންގެ މަލާމާތާ ކުރިމަތިލާނެ ހިތްވަރު ނެތީމައެވެ. ބައްޕަގެ މޫނުމަތިން ފެންނަ މާޔޫސްކަމާއި، ލޮލުން ފައިބާ ކަރުނަތައް ފެނުމުން އަހަރެންގެ އަމިއްލަ ނަފްސު ކުށްވެރި ކުރެވޭ ވަރު ބޮޑުވެއެވެ. އަހަރެންގެ ކުށަކާ ނުލައި، ބައްޕަގެ އިއްޒަތް ވެއްޔާ މޮޑެވިއްޖެއެވެ. ގޭގެ ހުރިހާ ޚަރަދެއް ބަލަހައްޓަނީ އަހަންނާއި ބޭބެއެވެ. ނަމަވެސް ބޭބެ މިހާރު އަހަންނާ އަނގައިންވެސް ނުބުނެއެވެ. ކާން އަރާ ގަޑީގައިވެސް ބޭބެ އަހަންނާ ދިމާލަށް ބަލާވެސް ނުލައެވެ. އެ ހިމޭންކަމަކީ ހަޅޭކެެއް ފަދަ އެއްޗެކެވެ.
އެއްދުވަހަކު އޮފީހަށް ދިޔައިރު، މެނޭޖަރު ސޯލިހު އަހަރެން އޭނާގެ ކެބިންއަށް ގެންދިޔައެވެ. އޭނާގެ މޫނުމަތިން ފެނުނީ އާދަޔާޚިލާފު، މަކަރުވެރި ހިނިތުންވުމެކެވެ. "ނުހާވެސް ހާދަ މަޝްހޫރުވެއްޖެޔޭ ދޯ،" އޭނާ ބުންޏެވެ. "ކުރިން ހިޔެއް ނުކުރަން ނުހާގެ ތިހާ ކުޅަދާނަ، ފޮރުވިފައިވާ ހުނަރުތަކެއް ހުންނާނެ ކަމަކަށް."
އަހަރެން އިސްޖަހާލީމެވެ. ލަދުންނާއި ރުޅިން އަހަރެންގެ މުޅި ހަށިގަނޑު ރަތްވިއެވެ. އަހަރެންގެ ލޮލުން އައި ކަރުނަތިކިތައް ފޮރުވޭތޯ މަސައްކަތް ކުރީމެވެ. އޭނާ ގޮނޑިން ތެދުވެ، މޭޒުމަތީގައި އަތް ވިއްދާލަމުން އިތުރަށް ބުންޏެވެ، "އަހަންނަކަށްވެސް ނުހާ މިތާ ބައިންދައިގެން ދެން ނޫޅެވޭނެ. މީހުންގެ މަލާމާތް އިންތިހާއަށް ބޮޑުވެއްޖެ. ކަސްޓަމަރުންވެސް ޝަކުވާ ކުރޭ. އަހަރެންގެ އަންހެނުން ގާތުވެސް މީހުން އެބަ ކިޔާ އަހަންނާއި ނުހާއާ ދެމެދު ގުޅުމެއް އޮވެއޭ. މިތަނުގެ އަގު ހިފަހައްޓަން އަހަރެން ބޭނުން. ވަޒީފާއިން ވަކިވާން ތައްޔާރުވޭ."
އެ ބަސްތައް އިވުމާ އެކު، އަހަރެންގެ ފައިދަށުން ބިންގަނޑު ކެހިގެން ދިޔަ ކަހަލައެވެ. ވަޒީފާ ގެއްލުމާ އެކު، އަހަރެންގެ ހުރިހާ އުންމީދެއް ފެނަށްވީއެވެ. ކާނެ އެއްޗެއް ލިބޭނެ ގޮތެއް، ބައްޕަގެ ބޭހަށް ފައިސާ ހޯދާނެ ގޮތެއް ދެން ނޯންނާނެއެވެ. މި ދުނިޔޭގައި ދިރިހުރުމުގެ އެއްވެސް މާނައެއް އަހަންނަކަށް ނުފެނުނެވެ. މުޖުތަމައު އަހަރެން ބަލައިގަންނާކަށް ބޭނުމެއް ނޫނެވެ. އާއިލާއަށް އަހަންނަކީ ބުރައެކެވެ. އެންމެ ފަސޭހައިން މަރުވެވޭނެ ގޮތްތަކާ މެދު އަހަރެން ވިސްނަން ފެށީމެވެ. އެކަމަކު އަމިއްލައަށް މަރުވުމަކީ ދީނީ ގޮތުން އޮތް ބޮޑު ފާފައެއްކަން އެނގޭތީ، އެ ހިތްވަރެއް ވެސް ނުލިބުނެވެ.
އަހަރެންގެ ހިތުގައި އޮތް އެންމެ ފަހު އުންމީދަކީ އަހަރެންގެ ލޯބިވެރިޔާ އާމިރެވެ. އޭނާ އަހަރެން ދޫކޮށް ނުލާނެކަމުގެ ކުޑަ ނަމަވެސް ޔަގީންކަމެއް ހިތުގައި އޮތެވެ. އަހަރެން އާމިރަށް ގުޅައި، ރަށުގެ އެންމެ ހިމޭން އެއް ސަރަހައްދު ކަމުގައިވާ 'ކުޑަ ފަންނު' އަށް އައުމަށް އެދުނީމެވެ. އޭނާ އައީ ލަސްލަހުންނެވެ. އޭނާގެ މޫނުމަތިން ފެންނަނީ ފޫހިކަމާއި ދުރުހިލޭކަމެވެ.
"އާމިރު، އަހަރެން ގޮވައިގެން އެހެން ރަށަކަށް ދާށޭ. މިއީ އަހަރެންގެ ފޮޓޯތަކެއް ނޫނޭ. އަހަރެން އާމިރު ނޫން މީހަކަށް އަހަރެންގެ ހަށިގަނޑު ދައްކާފައެއް ނޯންނާނެ،" އަހަރެން އޭނާގެ ފައިބުޑަށް ވެއްޓި ރޮއި އާދޭސް ކުރީމެވެ. "އަހަރެން ސަލާމަތްކޮށްދީ. މި ނަރަކައިން އަހަރެން ގެންދޭ."
ނަމަވެސް އާމިރުގެ ހިތް ވަނީ ހިލައަށް ވެފައެވެ. އޭނާ ފަހަތަށް ޖެހިލިއެވެ. "ނުހާ، ހަގީގަތަށް ވާހަކަ ދައްކަމާ. އަހަރެން ނުހާގެ ވާހަކަ ގަބޫލުކުރަން ބޭނުންވިޔަސް، މީހުންގެ ދުލެއް ނުހިފޭނެ. ކޮންމެ ރަށަކަށް ދިޔަޔަސް އިންޓަނެޓް އޮންނާނެ. އެ ފޮޓޯތައް ހުރިހާ ތަނެއްގައި އެބަހުރި. އަހަރެންގެ ރައްޓެހިންވެސް އެބަ ފޮނުވާ އެ ފޮޓޯތައް. އަހަންނަކަށް ނުކެރޭނެ ނުހާއާ އެކު އުޅޭކަށް. އަހަރެންގެ މައިންބަފައިންވެސް ގަބޫލެއް ނުވާނެ."
އެއީ އަހަރެންގެ ހަޔާތުގެ ފަހު އުންމީދުގެ ވާފަށް ބުރިވި ވަގުތެވެ. އާމިރު އެނބުރި ބެލުމެއްނެތި ހިނގައިގަތެވެ. އަހަރެން އެކަނިވީއެވެ. މުޅިން އެކަނިވީއެވެ.
އިރުއޮއްސެމުން ދިޔަ ވަގުތެވެ. އުދަރެސްމަތި ވަނީ ރަތްވިލާތަކުން ޖަރީވެފައެވެ. އެކަމަކު އަހަންނަށް ފެންނަނީ އަނދިރިކަމެވެ. ކެތްނުކުރެވޭ ވަރުގެ ވޭނަކާ އެކު، އަހަރެން މޫދަށް އެރުނީމެވެ. މަރުވާކަށް ނޫނެވެ. އެކަމަކު މި މުޖުތަމައުގެ ބެލުންތަކާ ދުރަށް، މި ދުނިޔޭގެ އަޑުގަދަ އަޑުތަކާ ދުރަށް ދިއުމަށެވެ.
މޫދުގެ ލޮނުގަނޑުގައި ޖެހުމުން، އަހަރެންގެ ހަށިގަނޑުގައިވާ "ނަޖިސްކަން" ފިލުވާލެވޭތޯއެވެ. ފެނުގެ ފިނިކަން އިހުސާސްވުމުން ކުޑަ ހަމަޖެހުމެއް ލިބުނެވެ. އަހަރެން ފަތަމުން ދިޔައީ ފުން ހިސާބަކަށެވެ. އެވަގުތު ނަގައިޖަހާލި ބިޔަ ރާޅެއްގެ އޮއިވަރުގައި ޖެހި އަހަރެންގެ ކޮންޓްރޯލް ގެއްލުނެވެ. ގަލެއްގައި ބޯ ޖެހި، އަނދިރިކަމުގެ ތެރެއަށް ގެނބިގެން ދިޔަ ވަގުތު، މިއީ ނިމުން ކަމުގައި ހީކުރެވުނެވެ.
ހޭއެރިއިރު އަހަރެން އޮތީ ހެލްތު ސެންޓަރުގެ އެނދުމަތީގައެވެ. މުޅި ގައިގައި ރިއްސައެވެ. އަހަރެން ސަލާމަތްކުރީ ރަށަށް އައި ރިސޯޓް ދޯންޏެއްގެ ފަޅުވެރިންނެވެ. ލޯ ހުޅުވާލި ވަގުތު ފެނުނީ ހުދުކުލައިގެ ސީލިންގެވެ. ކައިރީގައި ހުރީ ބޭރުގެ އަންހެން ޑޮކްޓަރެކެވެ. އޭނާގެ މޫނުމަތިން ފެންނަނީ ހަމްދަރުދީއެވެ.
އޭރު މުޅި ރަށަށް އޮތީ އާ ޚަބަރެއް ފެތުރިފައެވެ. އަހަރެން ހޭނެތިފައި އޮއްވައި، ހެލްތު ސެންޓަރުގައި ހުރި އެ ޑޮކްޓަރާއި ނަރުހުން ވަނީ އަހަރެންގެ ހަށިގަނޑު ބަލާފައެވެ. ޑޮކްޓަރަކީ އިންސާނާގެ ހަށިގަނޑުގެ އޮނިގަނޑު ދަންނަ މީހެކެވެ. އެ ފޮޓޯތަކުގައިވާ ސިފަތަކާއި ހަށިގަނޑުގައި ހުރި ލަކުނުތަކާއި، ބައްޓަން އަހަރެންގެ ހަށިގަނޑާ އެއްވެސް ގުޅުމެއް ނެތްކަން ޑޮކްޓަރު ވަނީ ސާބިތުކޮށްދީފައެވެ. އަދި އެކަން ކައުންސިލް އޮފީހަށްވެސް ރަސްމީކޮށް އެންގިއެވެ.
"ނުހާ، އެއީ ނުހާގެ ހަށިގަނޑެއް ނޫންކަން އަހަރެމެންނަށް ސަތޭކަ ޕަސެންޓް ޔަގީން. އެ ފޮޓޯތަކުގައި އެހުރީ އެހެން މީހެއްގެ ހަށިގަނޑު. ނުހާގެ ހަށިގަނޑުގައި އެފަދަ ނިޝާންތަކެއް ނެތް. އެކަން ކުރި މީހަކު ހޯދަން ޖެހޭނެ،" ނަރުހަކު އަހަރެންގެ ބޮލުގައި ފިރުމާލަމުން ބުންޏެވެ. އެވަގުތު އަހަރެންގެ ލޮލުން ފޭބީ އުފާވެރިކަމުގެ ކަރުނައެވެ. މިއޮތް ހުރިހާ ދުވަހު އަހަރެން ދެއްކި ވާހަކަ ގަބޫލުކުރި ހަމައެކަނި ބަޔަކީ މި ބީރައްޓެހި ޑޮކްޓަރުންނެވެ.
އެވަގުތު އަހަރެންގެ ހަނދާނަށް އައީ ޖީހާންއެވެ. މީގެ ހަތަރު މަސް ކުރިން ޖީހާން އަހަންނާ ރައްޓެހިވާން އުޅުނެވެ. އޭނާއަކީ ރަށުގައި އުޅޭ، ކޮމްޕިއުޓަރަށް ވަރަށް މޮޅު، އެކަމަކު އަޚްލާގީ ގޮތުން ދަށުދަރަޖައިގެ ޒުވާނެކެވެ. އަހަރެން އޭނާއަށް އިންކާރު ކުރުމުން، އޭނާ އަހަންނަށް ބިރުދެއްކިއެވެ. "އަހަންނަކާ ކުޅިވަރެއް ނުކުޅެވޭނެ. ބަލަން ހުންނާތި. މުޅި އުމުރު ކަލޭ ކަރުނަ އަޅަން ޖެހޭނެ. ރަށު ތެރޭގަ ކަލޭގެ އަގު ވެއްޔާ މޮޑެލާނަން." އޭރު އަހަރެން ހީކުރީ އެއީ ހަމައެކަނި ރުޅިވެރި ބަސްތަކެއް ކަމަށެވެ. އެކަމަކު އޭނާ އެކަން އެކުރީ، ޒަމާނީ ޓެކްނޮލޮޖީގެ ނާޖާއިޒު ފައިދާ ނަގައިގެންނެވެ.
ފުލުހުންގެ ތަހުގީގަށް މި މައުލޫމާތު ދިނުމުން، ޖީހާންގެ ގެ ބަލައި ފާސްކުރިއެވެ. އޭނާގެ ލެޕްޓޮޕުން ފެނުނީ އަހަރެން ސިއްސައިގެންދާ ފަދަ ހެކިތަކެކެވެ. އޭނާ ވަނީ އަހަރެންގެ މޫނު ބޭނުންކޮށްގެން އެތައް ސަތޭކަ ފޮޓޯއެއް ހަދާފައެވެ. ޓެލެގްރާމް ގްރޫޕްތައް ހިންގަނީ ވެސް ސީދާ އޭނާއެވެ. އެކަން ފަޅާއަރައި، ޖީހާން ހައްޔަރު ކުރެވުނެވެ.
ރަށުގެ އެންމެންނަށް ހަގީގަތް އެނގުމުން، ކަންތައް ބަދަލުވެގެން ދިޔައީ ހީނުކުރާހާ އަވަހަށެވެ. މީގެ ދެދުވަސް ކުރިން އަހަންނަށް މަލާމާތްކުރި މީހުން، މިހާރު އަހަރެމެންގެ ގެޔަށް އައިސް މާފަށް އެދެން ފެށިއެވެ. ބޭބެ، ނަސީމް، ހޮސްޕިޓަލަށް އައިސް އަހަރެންގެ ފައިބުޑަށް ވެއްޓި ރޮއި މާފަށް އެދުނެވެ.
"ކޮއްކޯ، ބޭބެއަށް މާފުކުރޭ. ބޭބެއަށް ހަގީގަތް ނުބަލައި ގަބޫލުކުރެވުނީ." ބައްޕަ އައިސް އަހަރެންގެ ނިތްކުރީގައި ބޮސްދިނެވެ. "ދަރިފުޅާ، ބައްޕަގެ އިތުބާރު ދުވަހަކުވެސް ގެއްލުމެއް ނުވޭ. އެކަމަކު މީހުންގެ ބަހަށް ކެތްނުކުރެވުނީ. ބައްޕަ މިއީ ފިނޑިއެއް."
އަހަރެން އެންމެންނަށް މާފުކުރީމެވެ. އެކަމަކު ހިތުގައި ލެވިފައިވާ ޒަޚަމްތައް ފިލުވޭނީ ކިހިނެއް ހެއްޔެވެ؟
މެނޭޖަރު ސޯލިހު އަހަންނަށް ގުޅައި، އަލުން ވަޒީފާ ދޭން އުޅުނެވެ. އަދި މުސާރަ ބޮޑުކޮށްދޭނެ ކަމަށް ވެސް ބުންޏެވެ. ނަމަވެސް އަހަރެން އެކަން ގަބޫލެއް ނުކުރީމެވެ. އަހަރެން އެންމެ ބޮޑަށް އެހީއަށް ބޭނުންވި ދުވަހު، އަހަރެންގެ ކަރުނައިގެ އަގު ވަޒަންނުކުރި، އަހަރެންގެ އަބުރާ ބެހޭގޮތުން ޝައްކުކުރި މީހެއްގެ ދަށުގައި މަސައްކަތް ކުރާކަށް އަހަރެން ބޭނުމެއް ނޫނެވެ. އޭނާގެ އެ މަކަރުވެރި ހިނިތުންވުން އަދިވެސް އަހަރެންގެ ހަނދާނުގައި އެބަހުއްޓެވެ. އަހަރެން މާލޭގެ ބޮޑު ކުންފުންޏަކަށް ސިޓީލައި، އެތަނުން ރަނގަޅު ވަޒީފާއެއް ހަމަޖެހިއްޖެއެވެ.
އަހަރެން ރަށުން ފުރަން ތައްޔާރުވެފައި ހުއްޓައި، އާމިރު އައެވެ. އޭނާގެ މޫނުމަތިން ފެންނަނީ ދެރަވުމާއި ލަދުވެތިކަމެވެ. އޭނާ އައިސް އަހަރެމެންގެ ގުޅުން އަލުން ފަށަން އެދުނެވެ. "ނުހާ، އަހަންނަށް ކުށްހީއެއް ކުރެވުނީ. އަހަރެން ދެން ދުވަހަކުވެސް އެހެނެއް ނުހަދާނަން."
އަހަރެން ފުން ނޭވާއެއް ލުމަށްފަހު އޭނާއަށް ބަލާލީމެވެ. އަހަރެންގެ ހިތުގައި އޭނާއަށްޓަކައި ވީ ލޯބި، މީގެ ދެދުވަސް ކުރިން އޮތް 'ކުޑަ ފަންނު' ގެ ގޮނޑުދޮށަށް ވަނީ އޮއްސާލެވިފައެވެ.
"އާމިރު، އިތުބާރަކީ ބިއްލޫރިގަނޑެއް ފަދަ އެއްޗެއް. އެ އެއްފަހަރު ތަޅައިގެން ދިޔުމުން، ކިތަންމެ ވަރަކަށް ތަތްކުރިޔަސް އޭގެ ރެނދުތައް ފެންނަން ހުންނާނެ. އަހަރެން އެންމެ ބޭނުންވި ވަގުތު އާމިރު އަހަރެން ދޫކޮށްލީ. މީހުން ދައްކާ ވާހަކަ ގަބޫލުކޮށް، އަހަރެންގެ މައުސޫމުކަމަށް ޝައްކުކުރީ. އަހަންނަށް އިތުބާރު ނުކުރާ މީހަކާއެކު މުޅި އުމުރު ހޭދައެއް ނުކުރެވޭނެ. ވަގުތު ފާއިތުވެއްޖެ."
އަހަރެން ފޮށި ހިފައިގެން ބަނދަރާ ދިމާލަށް ހިނގައިގަތީމެވެ. މިއަދު އަހަރެން މިދަނީ އާ ދިރިއުޅުމަކަށެވެ. މުޖުތަމައުގެ މަލާމާތާއި، ދޮގު ވާހަކަތަކުން އަހަރެންގެ ނަފްސު ވަނީ ވަރުގަދަވެފައެވެ. ނަމަވެސް، އަދިވެސް އަހަރެންގެ ހިތުގެ ކޮންމެވެސް ކަނެއްގައި އެ ވޭން އެބަހުއްޓެވެ. އެއީ ޓެކްނޮލޮޖީގެ ނަމުގައި، 'ޑީޕްފޭކް' ފަދަ ވަސީލަތްތައް ބޭނުންކޮށްގެން އިންސާނުންގެ އަބުރާ ކުޅެލާ މީހުންނާ މެދު އޮތް ބިރުވެރިކަމެވެ. އަދި ހަގީގަތް ނުބަލައި، ފެންނަ ކޮންމެ އެއްޗެއް ގަބޫލުކުރާ މުޖުތަމައެއްގައި އަންހެން ކުއްޖަކަށް ލިބިދާނެ ނިކަމެތިކަމުގެ ބިރެވެ.
އަހަރެން ލޯންޗަށް އެރީމެވެ. ލޯންޗު ދުއްވާލުމާއެކު، ރަށް ފަހަތަށް ދުރަށްދަމުން ދިޔައެވެ. އަހަރެންގެ ލޮލުން ވެއްޓުނު ކަރުނައިގެ ތިއްކެއް ކޯތާފަތް މައްޗަށް ފައިބައިގެން ދިޔައެވެ. އެއީ ހިތާމައިގެ ކަރުނައެއް ނޫނެވެ. އެއީ އިތުބާރުގެ އާ ފާލަމެއް އެޅުމަށްޓަކައި، މާޒީއަށް އަލްވަދާއު ކިޔުމުގެ ކަރުނައެކެވެ. (ނިމުނީ)
ނޯޓް: މިއީ މި ރޯދަ މަހު "މިހާރު" އިން ބާއްވާ ކުރުވާހަކަ މުބާރާތަށް ހޮވިފައިވާ ވާހަކައެކެވެ.