ވެލާނާ އިންޓަނޭޝަނަލް އެއާޕޯޓުގެ ރަންވޭ މައްޗަށް ބިޔަ މަތިންދާބޯޓު ތިރިކޮށްލުމާ އެކު، ކޮކްޕިޓް ތެރޭގައި އިން ކެޕްޓަން ޝިޔާން ފުން ނޭވާއެއް ދޫކޮށްލިއެވެ. މިއީ އޭނާގެ ކެރިއަރުގައި ކެޕްޓަނެއްގެ ގޮތުގައި ރާއްޖެއަށް އުދުހުނު ފުރަތަމަ ފަހަރެވެ. ބޯޓުގެ ފުރޮޅުތައް ރަންވޭގައި ޖެހުނު ވަގުތު އުފެދުނު އަޑާއެކު، ޝިޔާންގެ ހިތުގައިވެސް ބަޔާންކުރަން ދަތި ރިހުމެއް އުފެދިގެން ދިޔައެވެ. ކޮކްޕިޓްގެ ބިއްލޫރިގަނޑުން ބޭރުގައިވާ މާލޭގެ މަންޒަރަށް ބަލާލުމާ އެކު، އޭނާގެ ހިތުގައި އުފެދުނީ އުފާވެރިކަމަށްވުރެ ބޮޑަށް ވޭނެކެވެ. މިއީ އޭނާގެ އުފަން ބިމެވެ. އެކަމަކު، މިއީ އޭނާ ދެކެން ބޭނުންނުވާ ރަށެކެވެ. މިއީ އޭނާގެ ހިތް މަރާލި ރަށެވެ. އުމުރުން ތިރީސް އަހަރުގެ ޝިޔާންއަކީ މިއަދު ބައިނަލްއަޤްވާމީ އެއާލައިނެއްގެ ޒުވާން ކެޕްޓަނެކެވެ. އޭނާގެ ޔުނިފޯމުގައި ހުރި ރަންކުލައިގެ ފަށްތަކާއި، ބޮލުގައި އަޅާފައިވާ ތާކިހާއިން އޭނާގެ ހައިބަތު ދައްކުވައިދެއެވެ. ނަމަވެސް އެ ހައިބަތުގެ ފަހަތުގައި ވަނީ ފޫނުބެއްދޭނެ ވަރުގެ ހުސްކަމެކެވެ.
ބޯޓު ޕާކުކުރުމަށްފަހު، ލިޔެކިޔުންތައް ނިންމާލައި ޝިޔާން ޓާމިނަލް ތެރެއަށް ނުކުތެވެ. އޭނާގެ ފިޔަވަޅުތައް ބާރެވެ. ބޭނުންވަނީ ވީހާވެސް އަވަހަކަށް އެއާޕޯޓުން ނުކުމެ، ހޮޓެލް ރޫމަށް ވަދެ ދުނިޔެއާ އެކަހެރިވެލާށެވެ. މީހުންގެ ލޯތަކުން އޭނާއަށް ފެންނަނީ ހަމައެކަނި ސުވާލުތަކެވެ. އެންމެންވެސް ދެކެނީ އޭނާގެ ކާމިޔާބީއެވެ. އެކަކަށްވެސް އޭނާގެ ހިތުގެ ޒަޚަމެއް ނުފެނެއެވެ. އެރައިވަލް ގޭޓުން ނުކުމެގެން ދިޔައިރު، ޝިޔާންގެ ހަނދާނަށް އަންނަމުން ދިޔައީ މީގެ ހަތް އަހަރު ކުރީގެ ހަނދާންތަކެވެ. އޭރު އޭނާއަކީ އާދައިގެ ފަގީރު އާއިލާއަކަށް ނިސްބަތްވާ، ޕައިލެޓަކަށް ވުމުގެ ހުވަފެން ދެކެމުންދިޔަ ނިކަމެތި ކުއްޖެކެވެ. އަތުގައި ލާރިއެއް ނުހުރެއެވެ. އެކުވެރިންނާއެކު ކޮފީއަކަށް އަރާލާނެ ފެންވަރެއް ނުހުރެއެވެ. ނަމަވެސް އޭރު އޭނާގެ ހިތް މުއްސަންޖެވެ. ސަބަބަކީ "ޝިފްނާ" އެވެ. ޝިފްނާއަކީ އޭނާގެ ދުނިޔެއެވެ. އޭނާގެ އުއްމީދެވެ. ނަމަވެސް ޝިފްނާ އޭނާ ދޫކޮށްލީ އެންމެ ރަހުމުކުޑަ ގޮތަށެވެ. މުއްސަނދިކަން ހޯދަންށޭ ކިޔާފައި ޝިޔާންގެ ލޯބީގައި ކޮޅުފައިން ޖަހާފައި ދިޔަ ދުވަހު، ޝިޔާންގެ ހިތުގައި އުފެދުނު ނަފްރަތަކީ މިއަދު އޭނާ މި ހިސާބަށް ގެނެސްދިން ހަކަތައެވެ.
"ޝިޔާން!"
ކުއްލިއަކަށް އިވުނު އަޑަކަށް ޝިޔާންގެ ފިޔަވަޅުތައް ހުއްޓުނެވެ. އެއީ ޝިފްނާގެ އަޑެއް ނޫނެވެ. އެކަމަކު އެ އަޑުގައި ވަނީ ޝިފްނާގެ އަޑާ އެއްގޮތް ގޮތެކެވެ. ވޭނާއި ރިހުން އެކުލެވިގެންވާ އަޑެކެވެ. ޝިޔާން އެނބުރި ބަލާލިއިރު، މީހުންގަނޑުގެ ތެރޭގައި ހުރީ ޒުވާން އަންހެން ކުއްޖެކެވެ. އެއީ ޝިފްނާގެ ކޮއްކޮ، ޝިމްނާއެވެ. ޝިމްނާގެ މޫނުމަތިން ފެންނަނީ އިންތިހާ ދަރަޖައިގެ ހިތާމަ އާއި ރުޅިވެރިކަމެވެ. އޭނާގެ ލޯ ވަނީ ރޮއިރޮއި ދުޅަވެ، ރަތްވެފައެވެ. ޝިޔާންގެ މޭގަނޑު ތެޅިގަތެވެ. ޝިފްނާ ކޮބައި ހެއްޔެވެ؟ ކީއްވެގެން އޭނާ ނައީ ހެއްޔެވެ؟ ނޫނެކެވެ. އޭނާ ނާންނާނެއެވެ. އޭނާ ވީ އޭނާގެ މުއްސަނދި ފިރިމީހާ ގާތުގައެވެ.
ޝިޔާން މަލާމާތުގެ ހިނިތުންވުމަކާ އެކު ޝިމްނާއާ ގާތަށް ޖެހިލިއެވެ. "ޝިމްނާ؟ ކިހިނެއްވީ؟ ދައްތަ ކޮބާ؟ އޭނާގެ މުއްސަނދި ފިރިމީހާއާ އެކު ބޭރު ގައުމެއްގައި ޗުއްޓީ ހޭދަކުރަނީތަ؟ ނޫނީ އަހަރެން މިއަދު ކެޕްޓަނަކަށް ވެގެން އައީމަ، އަހަރެންގެ ފުށުން ކަމަކު ކިޔަން ފޮނުވީތަ؟"
ޝިޔާންގެ މި ވިހަގަދަ ބަސްތަކާ އެކު ޝިމްނާގެ ލޮލުން ކަރުނަ ފުންމައިގެން އައެވެ. އޭނާ ރުޅިވެރިކަމާއެކު ޝިޔާންއާ ދިމާއަށް ބަލާލިއެވެ. އަދި އަތުގައި އޮތް ބާވެފައިވާ ކަޅު ކުލައިގެ ފޮތެއް ޝިޔާންގެ މޭމަތީގައި ޖެއްސިއެވެ.
"ހުއްޓާލާ ޝިޔާން! ހަމަ މިހާރު ހުއްޓާލާ!" ޝިމްނާ ރޮމުން ހަޅޭއްލަވައިގަތެވެ. "ޝިޔާންއަށް ހީވަނީ ޝިޔާން ތީ ވަރަށް މާތް މީހެއް ކަމަށްދޯ؟ މުއްސަނދި ދިރިއުޅުމެއް ހޯދަންށޭ ކިޔާފައި އޭނާ ޝިޔާންއާ ވަކިވީ، ޝިޔާންގެ މުސްތަގުބަލު ހަލާކު ނުކުރަންވެގެން. މިއަދު އޭނާ މި ދުނިޔެއަކު ނެތް. މީގެ ތިން ދުވަސް ކުރިން އޭނާ އަހަރެމެންނާ ވަކިވެއްޖެ. ޝިޔާން އަންނާނެ ދުވަހަކަށް އިންތިޒާރުކޮށްކޮށް އޮވެ، އޭނާގެ ފުރާނަ ދިޔައީ."
ޝިމްނާގެ ޖުމްލަތައް ޝިޔާންގެ ކަންފަތުގައި ޖެހުމާ އެކު، މުޅި އެއާޕޯޓު އެނބުރިގަތްހެން އޭނާއަށް ހީވިއެވެ. "މި ދުނިޔެއަކު ނެތޭ؟" އެ ބަސްތައް އޭނާގެ ސިކުނޑީގައި ގުގުމަމުން ދިޔައެވެ.
"މިއޮތީ އޭނާގެ ޑައިރީ. މީތި ޝިޔާންއާ ހަވާލުކުރަން ވަސިއްޔަތް ކުރީތީ މި އައީ. ނޫން ނަމަ އަހަރެން ޝިޔާންގެ މޫނު ދެކޭކަށް ވެސް ނައިސް. މި ފޮތް ކިޔާފައި ޝިޔާން އަމިއްލަ ނަފްސާ ސުވާލުކުރޭ، ހަގީގަތުގައިވެސް ލޯބިވީ ކާކުތޯ!" ޝިމްނާ ދުވެފައި އެތަނުން ދިޔައެވެ. ޝިޔާން ހުރީ ގަބުވެފައެވެ. އަތުގައި އޮތް ބާ ޑައިަރީގައި ބާރަށް ހިފަހައްޓާލެވުނެވެ. ވަށައިގެންވާ މީހުންނާއި އަޑުތައް ގެއްލި، އޭނާ އެކަނިވެރިވިއެވެ.
ޝިޔާން ހުޅުމާލޭގައި ހުންނަ އޭނާގެ ހޮޓެލް ރޫމަށް ވަންއިރު މުޅި މީހާ ހުރީ ޝޮކެއްގައެވެ. ބޭރުގައި ގަދަޔަށް ވިއްސާރަ ކުރަމުން ދިޔައެވެ. އުޑުމަތި ބަނަވެ، ގުގުރަމުންދިޔަ އަޑަކީ ޝިޔާންގެ ހިތުގައި އުފެދިފައިވާ ތޫފާނުގެ އަޑެވެ. ކުޑަދޮރުގައި ޖަހަމުންދިޔަ ވާރޭގެ ތިކިތައް ފެންނަނީ ޝިފްނާގެ ކަރުނަތައް ހެންނެވެ. އޭނާ ސޯފާގައި އިށީނދެ، ތުރުތުރުއަޅާ އަތަކުން ޑައިރީ ހުޅުވާލިއެވެ. ފޮތުގެ ގަނޑުތައް ވަނީ ރީނދޫވެފައެވެ. އަދި ބައެއް ތަންތަނުގައި ކަރުނައިގެ ނިޝާންތައް ހުއްޓެވެ.
ފުރަތަމަ ސަފްހާގައި ލިޔެފައިވަނީ މީގެ ހަތް އަހަރު ކުރީގެ ތާރީޚެކެވެ. އެއީ ޝިފްނާ ޝިޔާންއާ ރުޅިވި ދުވަހުގެ ކުރީ ދުވަހެވެ.
"ޝިޔާން... މިއަދަކީ އަހަރެންގެ ހަޔާތުގެ އެންމެ ބިރުވެރި ދުވަސް. ޑޮކްޓަރު ބުނީ އަހަރެންގެ ސިކުނޑީގައި ޓިއުމަރެއް އުފެދިފައިވާ ކަމަށް. ބަލި ހުރީ ވަރަށް ބޮޑުވެފައި. އޮޕަރޭޝަން ކުރިޔަސް ސަލާމަތްވުމުގެ ފުރުސަތު ކުޑަ. އަހަރެންގެ ބޮލުގައި ރިއްސާވަރުން ކެތްނުވަނީ މިހެންވެކަން މިއަދު އެނގިއްޖެ. އެކަމަކު އަހަރެންނަށް މިއަށްވުރެ ބޮޑު ވޭނަކީ، މިކަން ޝިޔާންއަށް އެނގިއްޖެ ނަމަ ވާނެ ގޮތް. އަހަރެންނަށް އެނގޭ، އަހަރެން ބަލިކަން އެނގިއްޖެ ނަމަ، ޝިޔާން ކިޔެވުން ދޫކޮށްލާނެ. ޕައިލެޓަކަށް ވުމަށްޓަކައި ޝިޔާން އެއްކުރި ފައިސާކޮޅު އަހަރެންގެ ބޭހަށް ޚަރަދުކުރާނެ. ޝިޔާންގެ ހުވަފެން ގުރުބާންކޮށްލާނެ. ނޫން. އަހަރެން އެކަން ވިޔަކަ ނުދޭނަން. ޝިޔާންގެ މުސްތަގުބަލު ބަރުބާދުކޮށްލާކަށް އަހަރެން ބޭނުމެއް ނޫން."
ޝިޔާންގެ ލޯ ބޮޑުވިއެވެ. އޭނާގެ ހިތް ތެޅޭވަރުން މޭފަޅާފައި ނުކުމެދާނެހެން ހީވިއެވެ. އޭނާ އަވަސް އަވަހަށް ޖެހިގެން އޮތް ގަނޑު އުކާލިއެވެ.
"މިއަދު އަހަރެން ނިންމައިފިން. ޝިޔާން އަހަރެން މަތިން ހަނދާން ނައްތާލާނީ އަހަރެން ދެކެ ނަފްރަތުކޮށްގެން. އަހަރެން ޖެހޭނީ ޝިޔާންގެ ހިތް މަރާލަން. އަހަރެން ބުނާނަން އަހަރެން ބޭނުމީ މުއްސަނދިކަމޭ. ޝިޔާން ކަހަލަ ފަގީރު ކުއްޖަކާއެކު އުޅޭކަށް ބޭނުމެއް ނޫނޭ. މިހެން ބުނަން ޖެހުމުން އަހަރެންގެ ހިތް ކުދިކުދިވޭ. އެކަމަކު ޝިޔާންއަށްޓަކައި އަހަރެން ނަރަކައަށް ދާންވެސް ތައްޔާރު. މިއީ އަހަރެންގެ ލޯބި. ކަފުން ނުކުރެވުނު، ފޮރުވިފައިވާ ލޯބި."
ޝިޔާންގެ ލޮލުން ކަރުނަ ފައިބަން ފެށީ ހިފެހެއްޓުމެއް ނެތިއެވެ. އޭނާގެ ހިތަށް ލިބުނު ސިހުން ބަޔާންކުރާނެ ގޮތެއްވެސް ނޭނގުނެވެ. މީގެ ހަތް އަހަރު ކުރިން، ހުޅުމާލޭގެ ރާޅުގަނޑު ސަރަހައްދުގައި ޝިފްނާ ދެއްކި ވާހަކަތައް އޭނާގެ ކަންފަތުގައި ގުގުމާލިއެވެ. އެރޭ ހަނދުވަރުދޭ ރީތި ރެއެކެވެ. ނަމަވެސް އެރޭ ޝިޔާންގެ ދުނިޔެ އަނދިރިވިއެވެ.
"ޝިޔާން، އަހަރެމެންގެ ގުޅުން މިހިސާބުން ނިމުނީ." ޝިފްނާ ހުރީ ޝިޔާންއަށް ފުރަގަސްދީގެންނެވެ.
"ކީއްވެ؟ ޝިފްނާ، އަހަރެން ޝިފްނާ ދެކެ އިންތިހާއަށް ލޯބިވޭ. އަހަރެން ވަރަށް އަވަހަށް ކިޔަވައި ނިންމާނަން. އޭރުން އަހަރެމެންނަށް ރަނގަޅު ދިރިއުޅުމެއް އުޅެވޭނެ." ޝިޔާން އާދޭހާ އެކު ޝިފްނާގެ އަތުގައި ހިފަން އުޅުނެވެ.
ޝިފްނާ އެނބުރި ބަލާލިއެވެ. އޭނާގެ މޫނުމަތިން އޭރު ފެނުނީ ގޮތްދޫނުކުރުމާއި ކިބުރުވެރިކަމެވެ. ނަމަވެސް، މިއަދު ޝިޔާންއަށް އެނގިއްޖެއެވެ. ހަގީގަތުގައި އެއީ އޭނާގެ ކަރުނަތައް ފޮރުވަން އެޅި މާސްކެކެވެ. އެރޭ ޝިފްނާ ބުންޏެވެ.
"ލޯތްބަކުން ބަނޑެއް ނުފުރޭނެ ޝިޔާން. އަހަރެން ބޭނުމީ އަރާމު ދިރިއުޅުމެއް. ޝިޔާން ކައިރީގައި ހުރެގެން އަހަރެންނަށް ލިބޭނީ ކޮން އެއްޗެއް؟ ދަރަނި؟ އަހަރެންނަށް ރަނގަޅު މީހަކު ލިބިއްޖެ. މުއްސަނދި ވިޔަފާރިވެރިއެއް. އޭނާ އަހަރެން ބޭނުންވާ ހުރިހާ އުފަލެއް ހޯދައިދޭނެ. ދެން ދުވަހަކުވެސް އަހަރެން ހޯދަން ނުއުޅޭތި."
ޝިފްނާ ދުވެފައި ގޮސް ޓެކްސީއަކަށް އެރިއެވެ. ޓެކްސީ ނައްޓާލުމާ އެކު، ޝިޔާން ބިންމައްޗަށް ތިރިވިއެވެ. އެރޭ އޭނާގެ ހިތުގައި އުފެދުނު ނަފްރަތަކީ، އޭނާ ކިޔަވައިގެން މޮޅު މީހަކަށް ވުމަށް ބޭނުންކުރި ހަކަތައެވެ. އޭނާ ބޭނުންވީ ޝިފްނާއަށް ދައްކާލާށެވެ. އޭނާއަށްވެސް މުއްސަނދި ވެވިދާނެކަމެވެ. އެކަމަކު އޭރު ޝިފްނާ އެ ޓެކްސީ ތެރޭގައި އިނދެ، އަޑުން އަޑުނަގާ ރޯނެކަން ޝިޔާންއަށް އިހުސާސް ނުވީ ކީއްވެ ހެއްޔެވެ؟
ޝިޔާން އަނެއްކާވެސް ޑައިރީއަށް ނަޒަރު ހުއްޓާލިއެވެ. އޭގެ ފަހު ގަނޑުތަކުގައި ވަނީ ޝިފްނާގެ ބަލި ހާލަތު ދުވަހެއް ދުވަހަކަށް ގޯސްވަމުން ދިޔަ ގޮތް ބަޔާންކޮށްފައެވެ.
"މިއަދު އަހަރެންގެ ބޯ ވަރަށް ބޮޑަށް އެނބުރޭ. ލޮލުގެ ފެނުން ވެސް ދަނީ ކޮށިވަމުން. އެކަމަކު އަހަރެން ވަރަށް އުފާވޭ. 'މިހާރު' ނޫހުން ދުށިން ޝިޔާން ޕައިލެޓްކަން ފުރިހަމަކޮށްގެން އައި ޚަބަރު. ފޮޓޯގައި ޝިޔާން ހާދަ ރީއްޗެވެ. ޔުނިފޯމުގައި ހުރިއިރު ހީވަނީ ހަމަ ބަތަލެއް ހެން. އަހަރެންގެ ގުރުބާނީ ބޭކާރެއް ނުވޭ. ޝިޔާން ކާމިޔާބު ވެއްޖެ. އަހަރެން މި އޮންނަނީ ހޮސްޕިޓަލުގެ ކުޑަ އެނދެއްގައެވެ. އަހަރެން ކައިވެންޏެއް ނުކުރަން. އެ މުއްސަނދި މީހާގެ ވާހަކައަކީ ޝިޔާން ދުރުކުރަން ހެދި ދޮގެއް. އަހަރެންގެ ބޮލުގެ އިސްތަށިތައް ވަނީ ފައިބާފައެވެ. ސިފަ ވަނީ ގެއްލިފައެވެ. މަންމަމެން ގާތު ވެސް އަހަރެން ބުނިން ޝިޔާންއަށް ނާންގަން. ޝިޔާން އުދުހެން ވާނީ އުޑުމަތީގައި. މި ހޮސްޕިޓަލުގެ ބަލި އެނދެއް ކައިރީގައި ރޯކަށް ނޫން."
ޝިޔާންގެ ރުއިމުގެ އަޑު ގަދަވިއެވެ. އޭނާ ފޮތުގައި ބޮސްދިނެވެ. "ޝިފްނާ... ތީ ކޮންކަހަލަ އިންސާނެއް؟ ކީއްވެ އަހަރެންނަށް ތިހެން ތި ހެދީ؟ އަހަރެން ބޭނުންވީ ޕައިލެޓަކަށް ވާކަށް ނޫނޭ. އަހަރެން ބޭނުންވީ ޝިފްނާއާ އެކު ވާން. ޝިފްނާ ބަލި އެނދުގައި އޮތްއިރު، އަހަރެންނަށް ހުރެވުނީ ޝިފްނާ ދެކެ ނަފްރަތުކުރަން. އަހަރެން އެހެން އަންހެން ކުދިންނާއެކު މަޖާކުރަމުން ދިޔައިރު، ޝިފްނާ އޮތީ މަރުގެ ތުންފަތްމަތީގައި. މިއީ ކޮންފަދަ ބޮޑު ކުށެއް. މިއީ އަހަރެންނަށް ދުވަހަކު ވެސް މައާފު ނުކުރެވޭނެ ކުށެއް."
ފަހު ސަފްހާގައި ވަނީ ވަރަށް އުނދަގުލުން، ތުރުތުރުއަޅާ އަތަކުން ލިޔެފައިވާ ކުރު ލިޔުންކޮޅެކެވެ.
"ޝިޔާން... މި ފޮތް ޝިޔާންއަށް ލިބޭއިރު އަހަރެން މި ދުނިޔެއަކު ނުހުންނާނެ. އަހަރެންނަށް މައާފުކުރޭ. އަހަރެން ޝިޔާންއަށް ދޮގުހެދީ ޝިޔާން ދެކެ ލޯބިވާވަރުން. އަހަރެންގެ ހަށިގަނޑު ބަލިކަށިވިޔަސް، އަހަރެންގެ ހިތުގައި ޝިޔާންއަށް އޮތް ލޯބި ދުވަހަކުވެސް ބައްޔެއް ނުވޭ. އަހަރެން އިންތިޒާރު ކުރާނަން. އުޑުމަތިން ޝިޔާން އުދުހިފައި ދާއިރު، ވިލާތަކުގެ ތެރެއިން އަހަރެން ބަލަން ހުންނާނަން. ސުވަރުގޭގައި އަހަރެމެން ބައްދަލުވާނެ ކަމުގެ އުއްމީދުގައި... ވަދާޢު، އަހަރެންގެ ކެޕްޓަން."
ޑައިރީ ލައްޕާލިއިރު ޝިޔާންގެ ގިސްލުމުގެ އަޑު މުޅި ކޮޓަރީގައި ހިފާލާފައި ހުއްޓެވެ. އޭނާ ހީކުރީ ޝިފްނާއަކީ މަކަރުވެރިއެއް ކަމަށެވެ. އެކަމަކު އަމިއްލަ އުފަލާއި، ލޯބިވެރިޔާގެ އެހީތެރިކަމަށް އެންމެ ބޭނުންވި ވަގުތު، އެކަން ގުރުބާންކޮށްލީ ޝިޔާންގެ ހުވަފެން ހަގީގަތަކަށް ހެދުމަށެވެ. މިއީ އިންސާނަކަށް ވެވޭނެ އެންމެ މަތިވެރި ގުރުބާނީއެވެ.
އަނެއް ދުވަހުގެ ހެނދުނެވެ. ޝިޔާން ހުރީ އާސަހަރާގައެވެ. ވާރޭ ހުއްޓާލައި، އިރުގެ ރަން ދޯދިތައް ބިންމައްޗަށް އެޅިފައިވީ ނަމަވެސް، ޝިޔާންގެ ހިތުގައި ވަނީ ކަޅު އަނދިރިކަމެވެ. އޭނާ ހުރީ ތާޒާކޮށް ފެންނަން ހުރި މަހާނައެއްގެ ކައިރީގައެވެ. އެއީ ޝިފްނާގެ މަހާނައެވެ. މަހާނައިގެ ވެލިގަނޑު އަދިވެސް ވަނީ ތެތްކޮށެވެ. ޝިޔާން މަހާނަ ކައިރީގައި ކަކޫޖަހާލައިގެން އިށީނދެލިއެވެ. އަތުގައި އޮތީ ރަތް ފިނިފެންމަލެކެވެ. ލައިގެން ހުރީ އޭނާގެ ޕައިލެޓް ޔުނިފޯމެވެ. ޝިފްނާ ދެކެން ބޭނުންވި ގޮތަށެވެ.
"ޝިފްނާ..." ޝިޔާންގެ އަޑު ކުރަކިވިއެވެ. ކަރުނަތައް ކޯތާފަތް މައްޗަށް ފައިބަމުން ދިޔައެވެ. "އަހަރެން މިއައީ. ޝިފްނާގެ ކެޕްޓަން މިއައީ. އެކަމަކު ޝިފްނާ ކޮބާ؟ ކީއްވެ އަހަރެންނަށް އިންތިޒާރު ނުކުރީ؟ އަހަރެންގެ މުޅި ކާމިޔާބީގެ ފަހަތުގައި ވަނީ ހުސްކަން. ޝިފްނާ ނެތް ދުނިޔެއެއްގައި، އުޑުމަތީގައި އުދުހުނަސް އަހަރެންނަށް އުފަލެއް ނެތް. މިއަދު އަހަރެންނަށް މި އެނގުނީ، ލޯތްބަކީ ހަމައެކަނި ހާސިލުވުން ނޫންކަން. ލޯތްބަކީ އެމީހަކަށްޓަކައި މަރުވުން."
ވައިރޯޅިއަކާ އެކު ގަސްތަކުގެ ފަތްތައް ހެލިލިއެވެ. ހީވީ ޝިފްނާ އޭނާއަށް ޖަވާބު ދިން ހެންނެވެ. ޝިޔާންގެ ހިތަށް ފިނިކަމެއް އިހުސާސްވިއެވެ. ހީވީ ޝިފްނާގެ ރޫހު އޭނާގެ ކައިރީގައި ވާހެންނެވެ.
ޝިޔާން މާ ބޮނޑި މަހާނަ މަތީގައި ބޭއްވިއެވެ. އޭނާގެ ހިތުގައި ވަރުގަދަ އަޒުމެއް ކަނޑައެޅިއެވެ. ޝިފްނާގެ ގުރުބާނީ ބޭކާރުވިޔަ ނުދޭނަމެވެ. އޭނާ ވާނީ ޝިފްނާ ފަޚުރުވެރިވާ ފަދަ، އިންސާނިއްޔަތަށް ޚިދުމަތްކުރާ މޮޅު ކެޕްޓަނަކަށެވެ. އެކަމަކު، ދެން އޭނާގެ ހަޔާތަށް އިތުރު ލޯތްބެއް ނާންނާނެއެވެ. އޭނާގެ ހިތް ވަނީ ޝިފްނާއާ އެކު ވަޅުލެވިފައެވެ.
ޝިޔާން މަޑުމަޑުން ހިނގައިގަތެވެ. އޭނާގެ ފިޔަވަޅުތައް ބަރު ނަމަވެސް، ހިތަށް ކޮންމެވެސް ވަރެއްގެ ހަމަޖެހުމެއް ލިބުނެވެ. މިހާރު އޭނާއަށް ހަގީގަތް އެނގިއްޖެއެވެ. ޝިފްނާ އޭނާ ދެކެ ލޯބިވިއެވެ. ފަހު ނޭވާއާ ޖެހެންދެން ވެސް ލޯބިވިއެވެ. އެ ލޯތްބަކީ ކަފުން ނުކުރެވުނު، އަބަދަށް ދިރިހުންނާނެ ލޯތްބެކެވެ. މުސްތަހީލު ލޯތްބަކީ، ދެމީހުން ވަކިވުމުން އުފެދޭ ލޯތްބެއް ނޫނެވެ. އެއީ މަރުވުމަށްފަހު ވެސް ދެމިއޮންނަ ލޯތްބެވެ.
ޝިޔާން ސަހަރާއިން ނުކުތްއިރު، ވެލާނާ އެއާޕޯޓުން މަތިންދާބޯޓެއް އުދުހިފައިދާ އަޑު އިވުނެވެ. ބޯޓު ވިލާތައް ފޫއަޅުވާލާފައި މައްޗަށް އަރައިގެން ދިޔަ މަންޒަރު ބަލަން ޝިޔާން ހުއްޓެވެ. އޭނާގެ ތުންފަތަށް ލުއި ހިނިތުންވުމެއް ވެރިވިއެވެ. އޭނާ އުޑާ ދިމާއަށް ބަލާލަމުން ހިތާހިތުން ބުނެލިއެވެ.
"އިންތިޒާރު ކުރާނަން... އަހަރެމެން ސުވަރުގޭން ބައްދަލުވާނެ ދުވަހަކަށް. ވަދާޢު، އަހަރެންގެ ލޯބި." (ނިމުނީ)
ނޯޓް: މިއީ މި ރޯދަ މަހު "މިހާރު" އިން ބާއްވާ ކުރުވާހަކަ މުބާރާތަށް ހޮވިފައިވާ ވާހަކައެކެވެ.