މި ފަހަރުގެ ރޯދަ ހަދިޔާގެ ގޮތުގައި ސަރުކާރުން ބަހާ މަސްދަޅު ކޭސްތައް، ރަށްރަށަށް ފޮނުވަން އިއްޔެ ފަށައިފި އެވެ.
ލޯކަލް ގަވަމެންޓް މިނިސްޓްރީން 'ސަރުކާރު ޚަބަރު'ގައި އާއްމުކުރި ލިޔުމުގައި މިއަދު ބުނީ ރަށްރަށަށް މަސްދަޅު ކޭސް ބަހަނީ އެސްޓީއޯ މެދުވެރިކޮށް ކަމަށެވެ.
ދިވެހިރާއްޖޭގެ އަޑުގެ ޕްރޮގްރާމެއްގައި ސްޓޭޓް މިނިސްޓަރު ޔޫސުފް އަބްދުލްޣަފޫރު ވިދާޅުވީ އިއްޔެ އާއި މިއަދު ވެސް މަސްކޭސްތައް ރަށްރަށަށް ފޮނުވަމުން އަންނަ ކަމަށެވެ. އަދި މާދަމާއިން ފެށިގެން އެ މަސައްކަތް ފުލްކޮށް ގެންދެވޭނެ ކަމަށް އޭނާ ވިދާޅުވި އެވެ.
ރަށްރަށުގައި މަސްދަޅު ކޭސް ބަހާނީ އެ ރަށެއްގެ ކައުންސިލުންނެވެ.
މާލެ ސަރަހައްދުގައި ވެސް މިދިޔަ ހޮނިހިރު ދުވަހުން ފެށިގެން އަންނަނީ މަސްދަޅު ކޭސް ބަހަމުންނެވެ.
މިނިސްޓްރީން ބުނީ މާލެ ސަރަހައްދުގައި އަންނަ މަހުގެ 11 ވަނަ ދުވަހުގެ ކުރިން ހުރިހާ ގޭބިސީތަކަށް މަސްދަޅު ދޫކޮށް ނިންމާނެ ކަމަށެވެ. އެ މަސައްކަތްކުރުމަށް roadhahadhiya.mv އިން ޓޯކަން ނެގޭނެ އެވެ.
މިދިޔަ އަހަރުގެ ރޯދަ މަހު ޖުމްލަ 118،673 މަސްދަޅު ކޭސް ސަރުކާރުން ހަދިޔާކޮށްފައިވެ އެވެ. އެއީ މާލޭގެ ގޭބިސީތަކަށް ހަދިޔާ ކުރި 56،918 މަސްދަޅު ކޭހާއި ރަށްރަށުގެ ގޭބިސީތަކަށް ހަދިޔާކުރި 60،755 މަސްދަޅު ކޭހެވެ.