މަރުގެ ދައުވާލިބޭ އާބިދު: އޭނާގެ ޝަރީއަތް ނިމުމަކާ ގާތަށް ގޮސް، އެ މައްސަލާގެ އެންމެ ފަހު އަޑުއެހުން ވަނީ ތާވަލް ކޮށްފައި
04 އޯގަސްޓް 2024 - 13:57
5 comments
ހުޅުމާލޭގެ ރެސްޓްރެންޓެއްގައި ބިދޭސީއަކަށް ހަމަލާދީ މަރާލި މައްސަލާގައި ދައުވާ ލިބޭ ޕާކިސްތާނުގެ ޝެފެއް ކަމަށްވާ މުހައްމަދު އާބިދުގެ ޝަރީއަތް ނިމުމަކާ ހަމައަށް ގޮސް، އެ މައްސަލާގެ އެންމެ ފަހު އަޑުއެހުން އަންނަ ހޮނިހިރު ދުވަހު ބާއްވަން ހަމަޖައްސައިފި އެވެ.
ހުޅުމާލޭގައި ހިންގާ ހާންޖީ ރެސްޓޯރެންޓްގައި 2022 ވަނަ އަހަރުގެ ރޯދަ މަހު ހިނގި ހަމަނުޖެހުމެއްގައި އެ ތަނުގައި މަސައްކަތްކުރި ބަންގްލަދޭޝްގެ މީހަކަށް ވަޅިން ހަމަލާދީ މަރާލި މައްސަލާގައި، ޕާކިސްތާނުގެ ޝެފެއް ކަމަށްވާ އާބިދުގެ މައްޗަށް ދައުވާކުރީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރިކަމުގެ ދައުވާ އެވެ.
ކްރިމިނަލް ކޯޓުގައި މިއަދު ބޭއްވީ އެ މައްސަލާގެ ހުލާސާ ބަޔާން ހުށަހަޅައި، އަޑުއެހުންތައް ނިންމާލުމަށެވެ. ނަމަވެސް ހުލާސާ ބަޔާން ހުށަހެޅުމުގެ ކުރިން ދައުލަތުން އެދުނީ އާބިދުގެ މައްޗަށް އެ ދައުވާ ސާބިތު ނުވިޔަސް އެހެން ކުށެއް ސާބިތުވާ ނަމަ އެގޮތަށް ނިންމައި ދިނުމަށެވެ.
ނަމަވެސް އާބިދުގެ ދިފާއީ ވަކީލް ވިދާޅުވީ މިއަދުގެ އަޑުއެހުމަކީ ހުލާސާ ބަޔާން ހުށަހަޅަން ތާވަލްކުރި އަޑުއެހުމެއް ކަމަށާއި އެހެން ކުށެއް ސާބިތު ކުރުމާ ގުޅޭ ވާހަކައެއް ދައުލަތުން ކުރިން ފާހަގަ ކޮށްފައިނުވާ ކަމަށެވެ. އެހެންވެ އެކަމަށް ޖަވާބުދާރީވުމަށް ވަގުތު ބޭނުންވާ ކަމަށް ވަކީލް ވިދާޅުވި އެވެ.
އެ މައްސަލަ ބައްލަވާ ގާޒީ އިސްމާއިލް ޝަފީއު ވިދާޅުވީ އެކަމާ ބެހޭގޮތުން ވާހަކަ ދެއްކުމާއި ހުލާސާ ބަޔާން ހުށަހެޅުމަށް އަންނަ ހޮނިހިރު ދުވަހު އަޑުއެހުމެއް ބާއްވާނެ ކަމަށެވެ.
ހުލާސާ ބަޔާނަށް ފަހު، އިތުރު ކަމެއް ސާފުކުރަން ނުޖެހޭ ނަމަ ދެން އޮންނާނީ ހުކުމް އިއްވުމެވެ.
ގާޒީ ޝަފީއު ވިދާޅުވީ މިއީ ކްރިމިނަލް ކޯޓުން ބެލި މަރުގެ މައްސަލަތަކުގެ ތެރެއިން އެންމެ އަވަހަށް ހެކިބަސް ނަގައި ނިންމި މައްސަލަ ކަމަށެވެ. އަދި ކޯޓުގައި އިމާރާތުގެ ދަތިތަކާއި ވަކީލުން އެދިގެން އަޑުއެހުން ކެންސަލް ކުރިއިރު ވެސް އެ މައްސަލަ އަވަހަށް ކުރިއަށް ގެންދެވުނު ކަމަށް ގާޒީ ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ދިރާސ
04 August 2024
މި ބާވަތުގެ މުޅިން ބިދޭސީން ހިމެނޭ މައްސަލަތަކަކީ ރާއްޖޭގެ ކޯޓުތަކުގައި ހިންގަން ޖެހޭ ޝަރިއަތް ތަކެއްތޯ..؟މި ޝަރިޔަތް ހިންގަން ދިވެހި ފަނޑިޔާރުންގެ ވަގުތާއި ދިވެހި ދައުލަތުގެ ފައިސާ އާއި ވަސީލަތް ބޭނުން ކޮށްގެން މި ޝަރިޔަތް ކޮށް ހުކުމްކޮށް ދިވެހި ރާއްޖޭގެ ޖަލުގައި ތިޔަ ޕާކިސްތާނުގެ މީހާ ކާންދީގެން ، އެކޮމޮޑޭޝަން ދީގެން ޖަލުގައި ގެންގުޅުމަކީ ދައުލަތަށް ފައިސާގެ ބުރައަކަށް ވުން ފިޔަވައި ، އޭނާ ރިހެބިލިޓޭޓު ވެގެން ގައުމަށް ކޮންފައިދާއެއްތޯ ބާނީ..؟
ދޮންދީދީ
06 August 2024
އެޤައުމެއްގައި އެތެރޭގައި ޤާނޫނީ ބާރު ހިންގާނީ އެޤަައުމަކުން. ކުށެއް ކުރިމީހާ ނުވަތަ މިހާކަށް ގެއްލުން ލިބުނު މިހާ ނިސްބަތްވާ ޤައުމަކުން ނޫން. ބަންގްލަދޭޝް މިހާ މަސައްކަތައް މިޤައުމަށް އައުމުން މިބިމުގައި އޭނަ މަރާލުމުން އޭނައަށް އިންސާފުހޯދަން އަހަރުމެންގެ ފައިސާ ބޭނުންކުރަންޖެހޭ. މިތަނުން އޭނައަށް އަމާންކަމެއް ނުލިބުމުން އޭގެ ޒިންމާ އަހަރުމެން ނަގަން ބޭނުން ނުވިޔަސް އޭނަށް ލިބެންޖޭ އިންސާފު ޔަޤީންކުރުމަކީ އަހަރުމެންގެ ކަމެއް.
ހަސަނުބޭ200
06 August 2024
އޭނައަށް ހަމަލަދިނީ އެމެރިކާމީހެއްތޯ ނޫނީ ޖަޕާން މިހެއްތޯ ބަލާކަށް ނުޖެހޭ. ތިބުނާ ގޮތުން ރާައްޖެއަށް އައިސް ގަވާއިދާ ހިލާފަށް އުޅޭ އެންމެންގެ ކަންކަމާއި ހަވާލުވާންވީ އެމީހުންގެ ޤައުމުތަކުން. ތިއީ ތާކުންތާކު ނުޖެހޭ ވިސްނުމެއް.
އަބްޑޫޅް +
04 August 2024
ދިވެހި ބަހުގައި 'ހުކުން" މި ބަހަކީ "ނިޔާ". ވީމާ، މިތަނުގަ އޮންނަން ޖެހޭނީ، "ހުލާސާ ބަޔާނަށް ފަހު، އިތުރު ކަމެއް ސާފުކުރަން ނުޖެހޭ ނަމަ ދެން އޮންނާނީ ނިޔާ އިއްވުމެވެ." އަރަބީންނަށް އަޅުވެތި ވުމުގެ ގޮތުން ދިވެހި ބަހުގެ ބަދަލުގަ އަރަބި ބަސްތައް ބޭނުން ކުރުން އެދެވިގެންނެއް ނުވޭ. ކަލޭމެން އަރަބީންނަށް ބޫތުގެންފައި ތިޔަ ތިބީ ވަކި މިންވަރަކަށް ނޫން. އަމިއްލަ ބަހަށް، ކަލޭމެން، ތިޔަހާ ބޮޑަށް ހަތުރުވެރި ވަނީ ކީއްވެގެންތަ؟
މަންޠިޤް
04 August 2024
އިނގިރޭސީ ލަފުޒު ބޭނުންކުރިޔަސް ތިހެން ނުބުނަމެއްނު؟ ޢަރަބިބަހުގެ ލަފުޒުތައް ދިވެހިބަހުގައި ބޭނުންކުރަނީ، އެއްގޮތަކަށްވެސް ޢަރަބީންނަށް އަޅުވެތިވާކަށް ނޫން. ވަރަށް ބައިވަރު ސަބަބުތަކަށްޓަކައި. ދިވެހިބަހުގެ ވަޒަން އެއްގޮތްވާތީއާއި ޝަރުޢީ އިޞްޠިލާޙުތައް ފަހުންވުމަށް ފަސޭހަވުމާއި، ޝަރުޢީ މަސްދަރުތައް ޢަރަބިބަހުން ހުރުންފަދަ އެތައްކަމެއް. އަހަރެމެންނަށް މުހިއްމީ ޢަރަބީންނެއްނޫން، ޢަރަބި ބަސް. ނަމަށް ބަލާލީމަވެސް އެނގޭ ވެގެން މިއުޅޭގޮތް.