ރާއްޖޭގައި ފިލްމުތައް ޝޫޓްކުރަން ބޮލީވުޑަށް ރައީސްގެ ހާއްސަ ދައުވަތެއް!

ރާއްޖޭގައި ބޮލީވުޑް ފިލްމުތައް ޝޫޓް ކުރުމަށް ރައީސް ޑރ. މުހައްމަދު މުއިއްޒު އިންޑިއާގެ ފިލްމީ އިންޑަސްޓްރީ އަށް މިއަދު ހާއްސަ ދައުވަތެއް ދެއްވައިފި އެވެ.

އިންޑިއާ އަށް ކުރައްވަމުން ގެންދަވާ ފުރަމާނަ ދަތުރުފުޅުގައި މިއަދު ހެނދުނު މުމްބާއީ އަށް ވަޑައިގެން، ރާއްޖޭގެ ޓޫރިޒަމާއި ވިޔަފާރި ޕްރޮމޯޓް ކުރުމަށް ބޭއްވި ހާއްސަ ހަފުލާގައި ރައީސް ވިދާޅުވީ، ރާއްޖޭގެ ގުދުރަތީ ރީތިކަން ހިމަނައިގެން ބޮލީވުޑް ފިލްމުތައް ރާއްޖޭގައި ޝޫޓް ކުރެވިދާނެ ކަމަށެވެ.

"އެހެންވީމާ ބޮލީވުޑް އިންޑަސްޓްރީގެ ފިލްމު ޓޫރިޒަމް މަންޒިލަކަށް ރާއްޖެ ހެދުމަށް އަޅުގަނޑު މަރުހަބާ ކިޔަން،" މުމްބާއީގައި ރައީސް ހުންނަވާ ދަ ތާޖު މަހަލް ޕެލަސްގައި ބޭއްވި ހަފުލާގައި އެ މަނިކުފާނު ވިދާޅުވި އެވެ.

ރައީސް ވިދާޅުވީ، މި އަހަރުގެ މިހާތަނަށް އެކަނިވެސް އިންޑިއާ އިން އެއްލައްކައާ ގާތްކުރާ އަދަދަކަށް ޓޫރިސްޓުން ރާއްޖެ އަށް ޒިޔާރަތް ކޮށްފައިވާ ކަމަށާއި އޭގެ ސަބަބުން ދެ ގައުމުގެ ގުޅުން ވަރަށް ބޮޑަށް ބަދަހިވަމުން އަންނަ ކަމަށެވެ. ރާއްޖެ އަށް އެންމެ ގިނައިން ޓޫރިސްޓުން އަންނަ 10 ގައުމުގެ ތެރޭގައި މިހާރު ވެސް އިންޑިއާ ހިމެނޭ ކަމަށާއި ދެ ގައުމުގެ ގުޅުން އިތުރަށް ވަރުގަދަކޮށް އިތުރު ފުރުސަތުތައް ހޯދުމުގެ ޖާގަ އަދިވެސް ވަރަށް ފުޅާ ކަމަށެވެ.

މުމްބާއީގައި ބޭއްވި ބިޒްނަސް ފޯރަމަށް ދިޔަ ބައެއް މީހުން.

ރާއްޖެއަކީ ދުނިޔޭގެ އެންމެ މަގުބޫލު ޓޫރިސްޓް މަންޒިލްގެ ލަގަބު ޖެހިޖެހިގެން ރާއްޖެ އިން ދަމަހައްޓާތާ ހަތަރު އަހަރު ވެފައިވާކަން ފާހަގަކުރައްވައި ރައީސް ވިދާޅުވީ، އެއީ ޓޫރިސްޓުންގެ އިތުބާރާއި ޔަގީންކަމުގެ ނަތީޖާ ކަމަށެވެ.

ރާއްޖޭގެ ސާފު، ރީތި މޫދާއި ލަގްޒަރީ ރިސޯޓުތަކާއި މެހުމާންދާރީއަކީ ވެސް އޭގެ ސަބަބެއް ކަމަށާއި ދިވެހިންނަށް މި ކުރިއެރުން ހޯދުމުގައި އިންޑިއާގެ ހިއްސާ ވަރަށް ބޮޑު ކަމަށް ރައީސް މުއިއްޒު ވިދާޅުވި އެވެ.

މިއަދުގެ އިވެންޓުގައި އެންމެންގެ ސަމާލުކަން ޝިލްޕާ އަށް ހުއްޓިފައި.---ފޮޓޯ: އަހުމަދު ހަމްދޫން| މިހާރު

"އިންޑިއާގެ ޓޫރިސްޓުން ރާއްޖެ ދެކެނީ ހަމައެކަނި މަންޒިލެއްގެ ގޮތަކުން ނޫން. ރާއްޖެ އަކީ އެ މީހުންގެ ހަނދާތައް ރައްކާ ކުރެވިފައިވާ ސުވަރުގެއެއް ފަދަ ތަނެއްގެ ގޮތުގައި ދެކެނީ،" ރައީސް ވިދާޅުވި އެވެ.

އެ މަނިކުފާނު ވިދާޅުވީ، އިންޑިއާގެ ޓޫރިސްޓުން ބޭނުންވާ ވަސީލަތްތަކާ އެކު، އެ މީހުންގެ ބޭނުންތަކަށް ބަލައިގެން ރާއްޖޭގެ ޓޫރިޒަމް ބައްޓަން ކުރަން ވެސް ރާއްޖެ އޮތީ ތައްޔާރަށް ކަމަށެވެ. އޭގެ ތެރޭގައި އިކޯ ޓޫރިޒަމާއި ކޮންވެންޝަންތަކާއި ބައްދަލުވުންތަކާއި ވެލްނަސް ޓޫރިޒަމާއި މައުރަޒުތައް ބޭއްވުން ހިމެނޭ ކަމަށް ރައީސް ވިދާޅުވި އެވެ.

ރައީސްގެ ދެކަނބަލުންނާއި ޓޫރިޒަމް މިނިސްޓަރު ފައިސަލް ބޮލީވުޑްގެ ބައެއް ތަރިންނާ އެކު މިއަދު ފޮޓޯއެއް ނަންގަވަނީ.---ފޮޓޯ: އަހުމަދު ހަމްދޫން

ރައީސް މުއިއްޒު މިއަދު ވަނީ ބޮލީވުޑްގެ ބައެއް ތަރިންނާ އެކު ވެސް ރާއްޖޭގެ ޓޫރިޒަމް ޕްރޮމޯޓް ކުރުމުގެ ހަރަކާތެއް ވެސް މުމްބާއީގައި ބާއްވައިފަ އެވެ. މިއަދުގެ އިވެންޓަށް އައި ތަރިންގެ ތެރޭގައި ޝިލްޕާ ޝެޓީ އާއި އަރްބާޒް ހާން އާއި އޭނާގެ އަންހެނުން އަދި މޭކަޕް އާޓިސްޓް ޝުރާ ހާން އާއި ސަނީ ކައުޝަލް އާއި ސޮނާކްޝީ ސިންހާ އާއި އޭނާގެ ފިރިމީހާ އަދި އެކްޓަރު ޒަހީރް އިގްބާލް އަދި ކަރިޝްމާ ކަޕޫރް ވެސް ހިމެނެ އެވެ.