ރިލްވާން ލަތީފްގެ ޓުވީޓުގައި ކަންބޮޑުވުންފާޅުކުރި ގުދަން: އެތަން ބަދަލުކުރާނެ ކަމުގެ ޔަގީންކަން ލިބިފައިވާ ކަމަށް އެ ދާއިރާގެ މެމްބަރު މީކާއިލް ވިދާޅުވި.
21 ސެޕްޓެމްބަރ 2019 - 15:03
27 comments
މީހުން ދިރިއުޅޭ ސަރަހައްދުގައި ކެމިކަލް ގުދަންތައް ހުރުމުން ހިނގާފާނެ ނުރައްކާތެރި ހާދިސާއެއްގެ އިންޒާރު ދީ ރިލްވާން ލަތީފް ކުރި ޓުވީޓުގައި ފާހަގަކުރި ގުދަން އެހެން ސަރަހައްދަކަށް ބަދަލުކުރަން ނިންމައިފި އެވެ.
އަބަދަށްފެހި މަގުގައި ހުރި ކެމިކަލް ގުދަންތަކެއްގައި ރޯވެ، އެތައް ބައެއްގެ ދިރިއުޅުން އަޅިއަށް ވުމާ އެކު ސޯޝަލްމީޑިއާގައި ވައިރަލްވީ އެ ހާދިސާގެ ހިނގުމުގެ 10 މަސް ކުރިން ކަމާބެހޭ ފަރާތްތަކުގެ ސަމާލުކަމަށް އެފަދަ ގުދަންތަކުގެ މައްސަލަ ގެންނަން ރިލްވާން ކުރި ޓުވީޓެވެ.
ކަމާ ބެހޭ އިދާރާތަކުގެ ސަމާލުކަމަށް ރިލްވާން ލަތީފް، ގެނައީ ރޭ ރޯވި ގުދަންތަކުގެ ވާހަކައެއް ނޫނެވެ.
މިދިޔަ ޑިސެމްބަރު، 21، 2018 ގައި އޭނާ ކުރި ޓުވީޓެއްގައި ކަމާބެހޭ އިދާރާތަކާއި އާއްމުންގެ ސަމާލުކަމަށް ގެނައީ، ގ. ފެހިމާގޭގައި، ފައިބަގްލާސްގެ މަސައްކަތަށް ބޭނުންވާ ކެމިކަލް ތާނގީތަކުން ފުރާލާފައި ހުރި ގުދަނުގެ ވާހަކަ އެވެ. ހާދިސާއެއް ހިނގަންދެން ފިޔަވަޅު ނާޅައި ބަލަން ތިބެންވީތޯ ސުވާލުކޮށްފައިވެ އެވެ.
ތޮއްޖެހުން ބޮޑު ސަރަހައްދުގައި ހިނގާފާނެ ނުރައްކަލެއްގެ އިންޒާރު ދީ އޭނާގެ ޓުވީޓުގައި ކަމާބެހޭ އިދާރާތައް ވެސް ޓެގުކޮށްފައިވެ އެވެ.
Guarantee Fiberglass Godown at G. Fehimaage. Storage for barrels of highly flammable chemicals.@MickailNaseem @etna295 @MNDF_Official @MariyaDidi https://t.co/Loyinpjklp
— Rilwan Latheef - Relay (@RilwanLatheef_) September 20, 2019
ރިލްވާން ލަތީފްގެ ޓުވީޓް.
ރެއާ ހަމައަށް ފިޔަވަޅު ނާޅައި އޮތް އެ ގުދަނުގެ މައްސަލަ ބަލާނެ ކަމުގެ ޔަގީންކަން ރޭ ހާދިސާ އަށް ފަހު ކަމާބެހޭ އިދާރާތަކުން މިވަނީ ދީފަ އެވެ.
ގަލޮޅު ދެކުނު ދާއިރާގެ މެމްބަރު މީކާއިލް އަހްމަދު ނަސީމް ކުރެއްވި ޓުވީޓެއްގައި ވިދާޅުވީ ރިލްވާން ލަތީފްގެ ޓުވީޓުގައި ފާހަގަކުރި ގުދަނުގެ މައްސަލަ ކަމާބެހޭ އިދާރާތަކަށް ރަސްމީކޮށް ހުށަހަޅުއްވާފައިވާ ކަމަށެވެ. އަދި ވަގުތުން ފިޔަވަޅު އަޅާނެ ކަމުގެ ޔަގީންކަން ވެސް އޭނާ އަށް ދީފައިވާ ކަމަށް ވިދާޅުވި އެވެ.
Thank you @RilwanLatheef_ for bringing this case in Galolhu Dhekunu to my attention. Have spoken with @NDMAmv and they have assured me that they will take swift action. I understand the tenant company has also now agreed to remove the chemicals; it needs to be done immediately. https://t.co/6zgW5TqmyI
— Mickail Naseem 🎈 (@MickailNaseem) September 21, 2019
މީކާއިލްގެ ޓުވީޓް.
ޓުވީޓަކުން ރިލްވާން ލަތީފް ފާޅުކުރި ކަންބޮޑުވުމަކީ އަހަރުތަކެއް ވަންދެން ހައްލު ނުވެފައި އޮތް މައްސަލަ އެކެވެ. މާލޭގައި މީހުން ދިރިއުޅޭ ތަންތަނުގައި ކެމިކަލް ގުދަންތަކާއި ގަރާޖުތަކާއި ވޯކްޝޮޕްތަކުގެ އިތުރުން ލަކުޑި ގުދަންތައް ހުރުމުގެ މައްސަލަ ހައްލުކުރަން ހުރިހާ ސަރުކާރުތަކުން ވެސް ޕްލޭންތައް ހެދި އެވެ.
މާލޭގައި ރޭ ހިނގި އަލިފާނުގެ ހާދިސާގައި ގެތަކުގައި ރޯވެފައި: އަލިފާން ކޮންޓްރޯލް ނުވެ ގިނަ އިރުތަކެއް ވަންދެން ފެތުރުނީ ގިނަ އަދަދެއްގެ ކެމިކަލް ރައްކާކޮށްފައި ހުރި ގުދަންތަކެއްގައި ރޯވުމުން. --ފޮޓޯ: ހުސެއިން ވަހީދު/މިހާރު
އެކަމަކުގެ ނުރައްކާ އޮތް މިންވަރު އެނގި ތިބެ ހައްލު ހޯދަން މަސައްކަތްތަކެއް ވެސް ކުރި އެވެ. ކުރީގެ ސަރުކާރުގެ ޕްލޭނަކީ އިންޑަސްޓްރިއަލް މަސައްކަތަށް ވަކި ސަރަހައްދެއް ކަނޑައަޅައި މާލެ ތެރެއިން އެފަދަ ތަންތަން ބޭރުކުރުމެވެ. އެތަންތަނުގައި އިމާރާތްތައް އަޅަން ވެސް ސަރުކާރުގެ ކުންފުނިތަކަކާ ހަވާލުކުރި އެވެ. ހިއްކައިގެން އިންޑަސްޓްރިއަލް ވިލެޖެއް ހަދައި ގުދަންތައް ބަދަލުކުރަން ތާރީޚްތަކެއް ވެސް ކަނޑައެޅި އެވެ.
ފިޔަވަޅު އަޅާނެ ކަމުގެ ޔަގީންކަން!
މާލޭގައި މިހާތަނަށް ހިނގި އެންމެ ބޮޑު އަލިފާނުގެ ހާދިސާއާ ގުޅިގެން ބޭއްވި ޕްރެސް ކޮންފަރެންސްގައި ޑިފެންސް މިނިސްޓަރު މާރިޔާ އަހްމަދު ދީދީ ވިދާޅުވީ މި ސަރުކާރު ވެރިކަމާ ހަވާލުވުމާ އެކު އެފަދަ ގުދަންތައް ބަލައި ހައްލު ހޯދޭތޯ މަސައްކަތް ފަށާފައިވާ ކަމަށެވެ. މިދިޔަ ޖެނުއަރީ މަހުގެ ތެރޭގައި ސިފައިން ގިނަ އަދަދެއްގެ ގުދަންތައް ޗެކްކުރި ކަން ވެސް މިނިސްޓަރު ފާހަގަކުރެއްވި އެވެ. އެގޮތުން 126 ގުދަން ޗެކްކުރި އިރު 82 ގުދަން ހުންނަނީ މީހުން ދިރިއުޅޭ ސަރަހައްދުގައި ކަމަށް ވިދާޅުވި އެވެ.
"ކަންކަން ހުރީ ރަނގަޅަށްތޯ ބައްލަވައި ރަނގަޅު ކުރަން ހުރި ކަންކަން ވަނީ [ގުދަނުގެ ވެރިފަރާތްތަކަށް] އަންގަވާފައި،" މިނިސްޓަރު ވިދާޅުވި އެވެ.
މާލެ ތެރޭގައި ހުންނަ ގުދަންތަކަށް ހުއްދަ ދެނީ ވަކި ޝަރުތުތަކަކާ އެކުގައި ނަމަވެސް ބައެއް ފަހަރަށް ހުއްދައާ އެއްގޮތަށް އަމަލުނުކުރާ ކަން ނުވަތަ ގުދަންކުރަން ހުއްދަ ދޭ އެއްޗެހި ނޫން ބާވަތްތައް ބަހައްޓާކަމުގެ ކަންބޮޑުވުން މިނިސްޓަރު ފާޅުކުރެއްވި އެވެ.
މާލެ ތެރޭގައި ހުރި ކެމިކަލް ގުދަންތައް ބަދަލުކުރަން ޕްލޭނެއް އެކުލަވާލަން ވަޒީރުންގެ މަޖިލީހުން ވެސް ރޭ ވަނީ މަޝްވަރާކޮށްފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ގަޑުބަޑު
22 September 2019
ގަޑުބަޑުވެފައޮތްތަނެއްގެތެރޭގައި ގަޑުބަޑުނުވެ އެއްވެސްއެއްޗަކަށް ނުއޮވެވޭނެއެވެ. މިރާއްޖެމިއޮތީ ގަޑުބަޑުން ގަނބަގިރިފައެވެ. މިއީ އަދަކު އިއްޔެއަކުއްސުރެ ފެށިގެންއައިކަމެއްނޫނެވެ. އެވޭލާދުވަސްވަރުއްސުރެ ރާއްޖޭގައި އެކިކަންތަކާއި އެކިމީހުން ވަނީ އެކިވަރަށް ގަޑުބަޑުވެފައެވެ. ބޮލާފޮށާއަޅާއިގެން އުޅުނުއިރު އެކަން މައްސަލައަކަށްނުވިވެސް ދިޔައެވެ. ދަރިފަސްކޮޅު ގަޑުބަޑުވިޔަސް މައްސަލައަކަށް ނުވިއިރު މައްސަލައަކަށްވާނީ ކޮންފަދަގަޑުބަޑެއް ވެގެންތޯއެވެ!
ޙިނި
22 September 2019
ސުވާލަކީ މާލެޔައް ސިޓީ ކައުންސިލެއް ބޭނުންވޭތޯ؟ މިމީހުނައް އެއްވެސް ކަމެއް ކުރެވޭ ތަނެއް ނުފެނޭ
ބޮޑުމީހާ
22 September 2019
މިގައުމުގައި ކަމެއް އިސްލާހުކުރަންޏާ ޓްވީޓްކުރަންވީ. ރައީސް އޮފީހަށް ސިޓީ ލީ މީހާއަށް އަދިވެސް ޖަވާބެއް ނުލިބޭ
ޑިމޮކްރަސީ
22 September 2019
މާލޭ ސިޓީ ކައުންސިލްއަކީ ހުސްއަގަތަޅާތަނެއް އެއްވެސް ކަމެއްކުރެވޭތަނެއްނޫން/ނމިގެންދިޔަވެރިކަމުގަ ގޮވީ ފައިސާއެއްނެތޭ ބަރެއްނެތޭ މިހާރު ބާރާ ފައިސާއާއި ދިނީމި ވީ ކޮންކަމެއް މީޑިޔާ އަށް އަރާ ހުސްއަގަތެޅުންނޫންކަމެއްކުރޭތަ
ކާސިމު
22 September 2019
"މާލެ ތެރޭގައި ހުރި ކެމިކަލް ގުދަންތައް ބަދަލުކުރަން ޕްލޭނެއް އެކުލަވާލަން ވަޒީރުންގެ މަޖިލީހުން ވެސް ރޭ ވަނީ މަޝްވަރާކޮށްފަ އެވެ"... މިނޫން ވަރެއް ސަރުކާރު ތަކަކަށް ނުވާނެތަ.. ހަމަ މިހާރުން މިހާރަށް ބޭރުކުރޭ...
ރާއްޖެ
21 September 2019
އަލިފާނުގެ ހާދިސާ އާއި ގުޅިގެން ވަރަށް ގިނަ ކަންކަން މި ހަފްތާގައި ކޮށް "ނިން މާނެ" ދެ ހަފްތާ ފަހުން އެކަކުވެސް އެއްވެސް ކަ މެއް ހަނދާން ނުހުންނާނެ. މިއީ ދިވެހިން.
ދިވެހިހިތް
21 September 2019
ބޮއްސުންލާފައިވާ މި ޤައުމު ހަމައަކަށް އެޅުވުމުގެ ހިކުމަތާއި ތައުފީގު ރައީސް ސޯލިހަށް ދެއްވާންދޭވެ. އާމީން
ހާމާނު
21 September 2019
ތިޔަތަނުގަ ގުދަންކުރަންފެށީ 2018 އަކުނޫން، އޭގެ މާކުރިން 29 އޮގަސްޓް 2015 ދުވަހު ހަވީރު 4:07 މިނެޓުގަ ތިޔަބެރެލްތައްބާލަނިކޮއް ލޮރީއާއެކު ފޮޓޯނަގާފަ ވަނީ ޕޮލިސް އަދި ރާއްގެޓީވީ، އޭރުގެ ހަވީރު އައް ޓްވީޓްއަކުން ރިޕޯޓްކުރެވިފަ.
ޢަލި ފ
21 September 2019
ފަޔަރ އަދި އިމަރޖެންސީ އެވެކުއޭޝަން އިމާރާތުގެ ކިރެހުން ފާސްކުރާއިރު މުހިއްމު. މިކަމަށް ހުއްދަ ހޯދަންޖެހޭ ގޮތަށް މިހާރު ހަދަންވެއްޖެ
ގެރެންޓީ....
21 September 2019
މަބުނާނީ، ގެރެންޓީ ފައިބަރ ކޮ މްޕެނީގެ އޯނަރުންނަކީ ނަޞީބުގަދަ ބައެކެވެ. ހިތާ މަވެރި އިތުރު ޙާދިސާއެއް ނުހިނގަނިސް ތި ގުދަން އެހެންތަނަކަށް ބަދަލު ކުރު މުގެ ވިސްނުން އައިސް އެކަން ކުރެވެމ މުން ދަނީ، އެ މީހުންނަށް ﷲ ލެއްވެވި ރަޙު މަތެކެވެ.