ކޮވިޑް-19: ރާއްޖެ އިން އިތުރު ދެ މީހަކު ޕޮޒިޓިވް ވެއްޖެ

ރާއްޖެ އިން އިތުރު ދެ މީހަކު ކޮވިޑް-19 އަށް ޕޮޒިޓިވް ވެއްޖެ ކަމަށް ސަރުކާރުން ދެންމެ އިއުލާންކޮށްފި އެވެ.

ދަރުބާރުގޭގައި މިހާރު ކުރިއަށް ގެންދާ ޕްރެސް ބްރީފިންގައި ރައީސް އޮފީހުގެ އަންޑާ ސެކްރެޓަރީ މަބްރޫކް އަބްދުލްއަޒީޒް ވިދާޅުވީ، ކޮވިޑް-19 އަށް އަލަށް ޕޮޒިޓިވް ވީ ވެސް ކުރެއްދޫ އައިލެންޑް ރިސޯޓުގެ ދެ މީހަކު ކަމަށެވެ.

ހެލްތު ޕްރޮޓެކްޝަން އެޖެންސީ ކުރި ޓުވީޓެއްގައި ބުނީ އެ ރިސޯޓުން މި ފަހަރު ވެސް ކޮވިޑް-19 އަށް ޕޮޒިޓިވް ވީ ދެ ބިދޭސީއަކު ކަމަށެވެ. އެހެންކަމުން، އެ ބަލި ޖެހިފައިވާ ހަ މީހަކު ރާއްޖެ އިން މިހާތަަނަށް ފެނުނުއިރު، އޭގެ ތެރެއިން ހަތަރު މީހުންނަކީ ކުރެއްދޫ ރިސޯޓުގެ މީހުންނެވެ. ބާކީ ދެ މީހުންނަކީ ބަތަލާ އައިލެން ރިސޯޓުގެ މީހުންނެވެ. މި އެންމެންނަކީ ވެސް ބިދޭސީންނެވެ.

ކޮވިޑް-19 ޖެހިފައިވާ އެއްވެސް ދިވެއްސަކު އަދިއެއް ނުފެނެ އެވެ.

ރާއްޖެ އިން ކޮވިޑް-19 ފެނުނުކަން ސަރުކާރުން އިއުލާންކުރީ މިދިޔަ ހޮނިހިރު ދުވަހުގެ ރޭގަ އެވެ. އޭގެ ފަހުން ޖައްސަޖައްސައިގެން މިދިޔަ ދެ ދުވަހު ވެސް އެ ބަލި ޖެހިފައިވާ ހަތަރު މީހަކު ފެނިފައިވާކަން އެޗްޕީއޭ އިން މިވަނީ އިއުލާންކޮށްފަ އެވެ.

މަބްރޫކް މިރޭ ވިދާޅުވީ، ކުރެއްދޫ ކޭސްތަކާ ގުޅިގެން 90 މީހަކު އެކަހެރި ކޮށްފައިވާ ކަމަށާއި އޭގެ ތެރެއިން 69 މީހަކު އެކަހެރި ކޮށްފައި ވަނީ އެ ރިސޯޓުގައި ކަމަށެވެ.

ކުރެއްދޫ އިން ކޮވިޑް-19 ޖެހިފައިވާ މީހުންގެ އަދަދު އިތުރުވަމުން ދާއިރު، އެ ރިސޯޓުގެ މައްސަލަ ފެންމަތިވީ، ކުރެއްދޫގައި ޗުއްޓީ ހޭދަކުރި އިޓަލީގެ ޓޫރިސްޓަކު އެނބުރި ގައުމަށް ދިއުމަށް ފަހު، އޭނާ އެ ބައްޔަށް ޕޮޒިޓިވް ވި ކަން އެންގި ހިސާބުންނެވެ. އެ ވަގުތުން ވެސް ސަރުކާރުގެ ކަމާ ގުޅޭ އިދާރާތަކުން ކުރެއްދޫ ރިސޯޓު ކަރަންޓީނުކޮށް، އެ ރަށުގެ މީހުން އެކަހެރިކޮށް، ޓެސްޓުތައް ހަދަން ފެށީ އެވެ.

ރާއްޖެ އިން ކޮވިޑް-19 ފެނުނުކަން ސަރުކާރުން އިއުލާންކުރީ މިދިޔަ ހޮނިހިރު ދުވަހުގެ ރޭގަ އެވެ. އޭގެ ފަހުން ޖައްސަޖައްސައިގެން މިދިޔަ ދެ ދުވަހު ވެސް އެ ބަލި ޖެހިފައިވާ އާ ހަތަރު މީހަކު ފެނިފައިވާކަން އެޗްޕީއޭ އިން މިވަނީ އިއުލާންކޮށްފަ އެވެ.

ކުރެއްދޫ އަކީ، ރާއްޖޭގައި އެންމެ ފުޅާ ދާއިރާއެއްގައި ޓޫރިޒަމްގެ ވިޔަފާރި ހިންގާ ކްރައުން އެންޑް ޗަމްޕާ ރިސޯޓްސްގެ ރަށެކެވެ. އެ ރިސޯޓު މިހާރު އޮތީ 1،300 އަށް ވުރެ ގިނަ މީހުންނާ އެކު ކަރަންޓީންކޮށްފަ އެވެ. އޭގެ ތެރޭގައި 699 ޓޫރިސްޓުން ހިމެނެ އެވެ. ދެން އުޅެނީ 270 ދިވެހި މުވައްޒަފުންނާއި، އިމާރާތްކުރުމުގެ މަސައްކަތަށް ގޮސް ތިބި އެހެން ކުންފުންޏެއްގެ ބިދޭސީންނާ އެކު 420 ބިދޭސީ މުވައްޒަފުންނެވެ.

ކުރެއްދޫގައި ޗުއްޓީ ހޭދަކުރުމަށް ފަހު، އެނބުރި ގައުމަށް ދިޔަ ފަހުން ކޮވިޑް-19 އަށް ޕޮޒިޓިވް ވިކަން އެންގި އިޓަލީ މީހާ ފުރުމުގެ ކުރިން މާލޭގައި ދެ ދުވަސް ވަންދެން އުޅެފައިވާ ކަމަށް ސަރުކާރުން މިއަދު ވަނީ ބުނެގފަ އެވެ. އެހެންވެ، މި މަހު 1، 2 ގައި އެ މީހާއާ އެކި ގޮތްގޮތުން ކޮންޓެކްޓް ވި 16 މީހަކު މިހާރު ވަނީ އެކަހެރި ކޮށްފަ އެވެ. އެއީ އެ ޓޫރިސްޓު މީހާ އެ ދެ ދުވަހު ހުރި މާގިރީ ހޮޓަލުގެ 15 މުވައްޒަފަކާއި ޔުނިވާސަލް އެންޓަޕްރައިސަސްގެ ޓިކެޓިން އޮފީހެއްގެ މުވައްޒަފެކެވެ.

އެ ޓޫރިސްޓް މީހާ ފުރުވައިލުމުގައި އެއްވެސް ބައެއެއްގެ އިހުމާލެއް އޮތްތޯ ބެލުމަށް ޖިނާއީ ތަހުގީގެއް ހިންގަން ޕްރޮސެކިއުޓާ ޖެނެރަލް ހުސައިން ޝަމީމް މިރޭ ވަނީ ފުލުހުންނަށް އަމުރު ކުރައްވައިފަ އެވެ.

ޕީޖީ އޮފީހުން މިރޭ ބުނީ، ކުރެއްދޫ ރިސޯޓުގައި ކޮވިޑް-19 އަށް ޝައްކު ކުރެވުނު އިޓަލީ މީހާގެ މައުލޫމާތު ސަރުކާރުގެ ކަމާބެހޭ އިދާރާތަކަށް ހާމަނުކުރި ކަމަށް ތުހުމަތު ކުރެވޭ މައްސަލަ އާއި އެ މައްސަލައިގެ ވަށައިގެންވާ ކަންކަމުގައި ޖިނާއީ އެއްވެސް ކުށެއް ހިމެނޭތޯ ނުވަތަ ނޫންތޯ ބެލުމަށް ޖިނާއީ ތަހުގީގެއް ހިންގަން، ގާނޫނުއަސާސީގެ 223 ވަނަ މާއްދާގެ ޅ. އިން ޕީޖީ އަށް ލިބިދޭ ބާރުގެ ދަށުން ފުލުހުންނަށް އަމުރު ކުރައްވާފައިވާ ކަމަށެވެ.