ބީނޯޒް އޭރީޒް (ނޮބެމްބަރު 22) – އާޖެންޓީނާގެ ފުރަތަމަ ޑިވިޝަން ޓީމެއް ކަމަށްވާ ޖިމްނާސިއާގެ ކޯޗުކަމުން ޑިއޭގޯ މަރަޑޯނާ ވަކިވުމުން އެ ޓީމުގެ ސަޕޯޓަރުން ހަޅުތާލުކުރަން ފެށުމާ އެކު އޭނާ އަލުން އެ ޓީމުގެ ކޯޗުކަމާ ހަވާލުވާން ނިންމައިފި އެވެ.
ސެޕްޓެމްބަރު މަހު މަރަޑޯނާ ޖިމްނާސިއާގެ ކޯޗުކަމާ ހަވާލުވިއިރު، ކުއްލިގޮތަކަށް މިދިޔަ އަންގާރަ ދުވަހު އޭނާ އެ ޓީމުގެ ކޯޗެއްގެ ގޮތުގައި ނުހުންނާނެކަން އިއުލާންކުރެއްވީ އެ ކްލަބްގެ ރައީސް ގަބްރިއެލް ޕެލެގްރީނޯ އެވެ. އެ ގޮތަށް އިއުލާނުކުރުމާ އެކު އެ ޓީމުގެ ސަޕޯޓަރުން ވަނީ ކްލަބްގެ ހެޑްކުއާޓަރު ބޭރުގައި ހަޅުތާލުކުރަން ފަށައިފަ އެވެ. މަގާމުން ވަކިވިތާ ދެ ދުވަސް ފަހުން އަލުން ޓީމާ ހަވާލުވާނެކަމަށް މަރަޑޯނާ އިއުލާނުކުރީ އިއްޔެ އެވެ.
މަރަޑޯނާ އެ ޓީމުގެ ކޯޗެއްގެ ގޮތުގައި ކުރިއަށްނުދާން ނިންމީ އޭނާ އެ ޓީމަށް ގެނައި ކްލަބްގެ ރައީސް ޕެލެގްރީނޯ މާދަމާ އޮންނަ އެ ކްލަބްގެ އިންތިހާބުން ނަން އަނބުރައި ނެގުމުންނެވެ. މަރަޑޯނާ އަލުން ހަވާލުވީ އުފެދުނު ހިޔާލުތަފާތުވުންތަކަށް ހައްލެއް ލިބުމުންނެވެ.
"އަހަރެން ވަރަށް އުފަލާ އެކު މި އިއުލާނުކުރަނީ ޖިމްނާސިއާ ކޯޗެއްގެ ގޮތުގައި އަހަރެން ކުރިއަށްދާން މި ހުރީ. އުފެދުނު ސިޔާސީ ހިޔާލު ތަފާތުވުންތަކަށް ހައްލެއް ލިބިއްޖެ،" މަރަޑޯނާ ބުންޏެވެ.
އުމުރުން 59 އަހަރުގެ މަރަޑޯނާ ބުނީ ކްލަބާ ދެން ހަވާލުވާ ރައީސަކު ވެސް އޭނާ އަށް ބޭނުންވާނެ ކަންތައްތައް ފުރިހަމަކޮށްދޭނަމަ ރަނގަޅުވާނެ ކަމަށާއި ބޭނުންވަނީ މި ކްލަބް ކުރިއަށްދިއުން ކަމަށެވެ.
ޖިމްނާސިއާގެ ކޯޗުކަމާ މަރަޑޯނާ ހަވާލުވި ފަހުން އެ ޓީމު ކުޅުނު އަށް މެޗުގެ ތެރެއިން ތިން މެޗުން ވަނީ މޮޅުވެފަ އެވެ. އެއީ މުޅިން ރަށުން ބޭރުގައި ކުޅުނު މެޗުތަކުންނެވެ. އަމިއްލަ ދަނޑުގައި ކުޅުނު ފަސް މެޗުގެ ތެރެއިން ހަތަރު މެޗުން ބަލިވިއިރު، އަނެއް މެޗު ނިމުނީ އެއްވަރުވެގެންނެވެ.
އާޖެންޓީނާ އަށް 1986 ވަނަ އަހަރުގެ ފީފާ ވޯލްޑް ކަޕް ކާމިޔާބު ކޮށްދިން ކެޕްޓަން މަރަޑޯނާ އަކީ ފީފާއިން ހޮވި 20 ވަނަ ގަރުނުގެ އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނޭ ފުޓްބޯޅަ ލެޖެންޑެކެވެ. ކާމިޔާބު ފުޓްބޯޅަ ކެރިއަރެއް ނިންމާލާފައިވީ ނަމަވެސް މަރަޑޯނާގެ ކޯޗިން އަދި އެންމެ ފުރިހަމައެއް ނޫނެވެ. އޭނާ ވަނީ އާޖެންޓީނާ ގައުމީ ޓީމަށް 2010 ވަނަ އަހަރުގެ ވޯލްޑް ކަޕްގައި ކޯޗުކޮށްދީފަ އެވެ.