މާލެ ސަރަހައްދުގައި ކޮވިޑް-19ގެ ކޭސްތައް ގިނަވެ، ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އެޅި ފިޔަވަޅުތަކުގެ ތެރެއިން ދިރާގު ދިވެހި ޕްރިމިއާ ލީގު މެދުކަނޑާލަންޖެހުމުން ކްލަބްތަކަށް ލިބޭ ގެއްލުމަކީ އަމިއްލަ ހައިސިއްޔަތުން ވެސް ކަންބޮޑުވާ ކަމެއް ކަމަށް ސްޕޯޓްސް މިނިސްޓަރު އަހުމަދު މަހުލޫފް ވިދާޅުވެއްޖެ އެވެ.
މިދިޔަ ހަފްތާގެ ބުދަ ދުވަހު ލީގު ހުއްޓާލީ އޭގެ އެއް ދުވަސް ކުރިން އެޗްޕީއޭ އިން 14 ދުވަހަށް ކުޅިވަރު ހަރަކާތްތައް ހުއްޓާލުމަށް އެންގި އެންގުމަށް ތަބާވުމުގެ ގޮތުންނެވެ. ކްލަބްތަކުން އެންމެ ފުރަތަމަ ލީގު އަލުން ފެށުމާ މެދު ކަމާބެހޭ ފަރާތްތަކުން މިހާތަނަށް އެކަށީގެންވާ ޖަވާބެއް ނުދޭތީ ކަންބޮޑުވުން ފާޅުކޮށް ނޫސްބަޔާން ނެރުނެވެ. އިއްޔެ ވަނީ ފުރަތަމަ ޑިވިޝަނުގެ އަށް ކްލަބްގެ އިސް މެނޭޖްމަންޓުން ނޫސްވެރިންގެ ބައްދަލުވުމެއް ބާއްވައި މިކަމުގެ ހައްލެއް ހޯދައިދޭން ސަރުކާރުގެ ކިބައިން އެދިފަ އެވެ.
މިނިސްޓަރު މަހުލޫފް މިއަދު ކުރެއްވި ޓްވީޓެއްގައި ވިދާޅުވީ ކްލަބްތަކުން ކަންބޮޑުވާ ފަދައިން އޭނާ ވެސް ކަންބޮޑުވާ ކަމަށެވެ.
"މި ކަމަށް ހައްލެއް ހޯދައިދޭން މިނިސްޓްރީ އިން ކުރަންޖެހޭ މަސައްކަތް މިދަނީ ކުރަމުން. ލީގު ހުއްޓިފައި އޮތުމަކީ އެކި ގޮތްގޮތުން ބޮޑެތި ގެއްލުންތަކެއް. ކްލަބްތަކަށް އަދި ކުޅުންތެރިންނަށް ލިބޭ ކަމެއް،" މިނިސްޓަރު ކުރެއްވި ޓްވީޓްގައިވެ އެވެ.
ރާއްޖެޓީވީ "ކުޅިވަރު ފައިލް" ޕްރޮގްރާމްގައި އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ އެޗްޕީއޭއާ އެކު އެފްއޭއެމުން މަޝްވަރާކުރެވުނު ގައިޑްލައިނުގެ ތެރެއިން ހާއްސަ ހުއްދައެއް ހޯދައިގެން ފުޓްބޯޅަ ސީޒަން ފެށިއިރު، މި ހުއްޓާލަން ކުއްލިއަކަށް ނިންމީ އެއްވެސް މަޝްވަރާއެއް ކުރުމެއް ނެތި ކަމަށެވެ. ބައްސާމް ވަނީ މިކަމުގައި އެޗްޕީއޭ އިން މިނިސްޓަރު މަހުލޫފްގެ ލަފާ ހޯދި ކަމަށް ވެސް ނުބެލެވޭ ކަމަށް ވިދާޅުވެފަ އެވެ.
ފުޓްބޯޅަ ލީގު މެދުކެނޑިފައި އޮތުމަކީ 500 އެއް ހާ އާއިލާގެ އާމްދަނީ ބަރޯސާވެފައި އޮތް އިންޑަސްޓްރީއެއް ހުއްޓުން ކަމަށް ކްލަބްތަކުން ފާހަގަކުރެ އެވެ. އަދި އެތައް ބައެއްގެ ހައްގު ހިމެނޭ ގޮތަށް އޮތް ދާއިރާއަކާ މެދު ގޮތެއް ނިންމާއިރު ލިބޭ ގެއްލުމަށް ވެސް ބަލަންޖެހޭނެ ކަމަށް ކްލަބްތަކުން ގަބޫލުކުރެ އެވެ.
ކްލަބްތަކުން ވަނީ ފުޓްބޯޅަ އަލުން ފެށުމަށް ހައްލުތަކެއް ހޯދައިދޭން އެފްއޭއެމްގެ ރައީސް ބައްސާމް އާއި ސްޕޯޓްސް މިނިސްޓަރު މަހުލޫފް އަދި ހެލްތު މިނިސްޓަރު އަހްމަދު ނަސީމް ކުރައްވަމުން އަންނަ މަސައްކަތަށް ޝުކުރު އަދާކޮށްފަ އެވެ.
ކްލަބްތަކުން ވަނީ އެޗްޕީއޭ ރުހޭ ކޮންމެ ގޮތަކަށް އާ ގައިޑްލައިންތަކެއް ހެދި ކަމުގައި ވިޔަސް ކްލަބްތަކުން އޮތީ އެ ގޮތަކަށް އަމަލުކޮށްގެން އަވަހަށް ޕްރެކްޓިހާއި މެޗުތައް ފަށަން ކުރަންޖެހުނު ކޮންމެ ކަމެއް ކުރާގޮތަށް ކަމަށް ޓީމުތަކުގެ މެނޭޖްމަންޓުން ވަނީ ބުނެފަ އެވެ.