27 ފެބުރުއަރީ 2022 - 11:01
9 comments
ބައިނަލްއަގްވާމީ މާލީ މުއާމަލާތްތައް ފަސޭހަކަމާއެކު ހިންގުމަށް ބޭނުންކުރާ ސްވިފްޓް ނިޒާމުން، ރަޝިއާގެ ބައެއް ބޭންކުތައް މި ވަގުތަށް ބޭރު ކުރުމަށް އެމެރިކާ އާއި އެމެރިކާގެ ބައިވެރިންގެ އިތުރުން ވިލާތުގެ ގައުމުތަކުން ނިންމައިފި އެވެ.
ސްވިފްޓް ނިޒާމުން ރަޝިއާގެ ބޭންކުތައް އެކަހެރި ކުރަން މި ނިންމީ، މިދިޔަ ބުރާސްފަތި ދުވަހުގެ ފަތިހު ރަޝިއާ ސިފައިން ޔޫކްރޭނަށް އަރައި، އެ ގައުމާ ދެކޮޅަށް ވަރުގަދަ ހަނގުރާމައެއް ފެށުމާ ގުޅިގެން، ރަޝިއާ އަށް ދަތިކުރުމުގެ ގޮތުންނެވެ.
ސްވިފްޓް (ސޮސައިޓީ ފޯ ވޯލްޑް ވައިޑް އިންޓަ ބޭންކް ފައިނޭންޝަލް ޓެލެކޮމިޔުނިކޭޝަން ސިސްޓަމް) އަކީ ދޭދޭ ގައުމުތަކުގެ މެދުގައި ފައިސާގެ މުއާމަލާތުތައް ހިންގުމަށާއި ބައިނަލްއަގްވާމީ ވިޔަފާރިތަކުގައި އެއް ގައުމުން އަނެއް ގައުމުގެ ބޭންކަށް ފައިސާ ފޮނުވުމުގައި ބޭނުންކުރުމަށް ބެލްޖިއަމްގައި ގާއިމުކޮށްފައިވާ ކޯޕަރޭޓިވް ސޮސައިޓީއެކެވެ.
ސްވިފްޓް ނިޒާމުން ރަޝިއާގެ ބައެއް ބޭންކުތައް އެކަހެރި ކުރަން ނިންމި ގައުމުތަކުގެ ތެރޭގައި ފަރަންސޭސި ވިލާތް، ޖަރުމަން ވިލާތް، އިޓަލީ ވިލާތް، އިނގިރޭސި ވިލާތާއި ކެނެޑާގެ އިތުރުން ޔޫރަޕިއަން ކޮމިޝަން ހިމެނެ އެވެ. މި ނިޒާމުން ރަޝިއާގެ ބޭންކުތައް އެކަހެރި ކުރުމުން، ނުވަތަ އެ ނިޒާމު ބޭނުން ނުކުރެވޭ ގޮތް ހެދުމުން، ރަޝިއާގެ ވަރަށް ގިނަ ވިޔަފާރި ކުންފުނިތަކަށް ގެއްލުން ލިބޭނެ އެވެ.
މީގެ އިތުރުން، ރަޝިއާ އަށް ދަތިކުރުމަށް އެޅި ފިޔަވަޅުތަކުގެ ތެރޭގައި، ވިލާތުގެ ގައުމުތަކުގައި ހުރި ރަޝިއާގެ މަރުކަޒީ ބޭންކުގެ ރިޒާވް ފައިސާތައް ހިފެހެއްޓުން ވެސް ހިމެނެ އެވެ. މި ފައިސާތައް ހިފެހެއްޓުމުން، ބައިނަލްއަގްވާމީ ވިޔަފާރީގައި ރަޝިއާގެ މަރުކަޒީ ބޭންކުން ހިންގާ މުއާމަލާތުތަކަށް ހުއްޓުން އަރާނެ އެވެ.
ރަޝިއާ އިން ދުނިޔޭގެ އެކި ގައުމުތަކާ އެކުގައި ކުރަމުން އަންނަ ތެލާއި ގޭހުގެ ވިޔަފާރީގައި ފައިސާގެ މުއާމަލާތުތައް ކުރަނީ މައިގަނޑު ގޮތެއްގައި ސްވިފްޓް ނިޒާމުގެ ތެރެއިންނެވެ. އެ ނިޒާމުން ރަޝިއާގެ ބައެއް ބޭންކުތައް އެކަހެރި ކުރުމާ ގުޅިގެން، ދެން އެ ބޭންކުތަކަށް ވިޔަފާރީގެ މުއާމަލާތުތައް ހިންގޭނީ ޓެލެފޯނާއި ފެކްސް މެޝިންގެ ޒަރީއާއިންނެވެ.
ރަޝިއާގެ އިގްތިސާދުގެ ބޮޑުމިނާއި ވިޔަފާރިތައް ފުޅާވެފައިވާ ވަރަށް ބަލާއިރު، ރަޝިއާ އަށް ދަތިކުރުމަށް މި އެޅި ފިޔަވަޅުތަކުގެ އެދެވޭ ނަތީޖާއެއް ފެންނަން ދުވަސްތަކެއް ނަގާނެ ކަމަށް ބައިނަލްއަގްވާމީ އިގްތިސާދީ އަދި މާލީ ތަޖުރިބާކާރުން ވިދާޅުވެ އެވެ.
ޔޫރަޕިއަން ކޮމިޝަންގެ ރައީސް އުރްސުލާ ވޮންޑާ ވިދާޅުވި ގޮތުގައި ރަޝިއާގެ މަރުކަޒީ ބޭންކްގެ މުދާތައް ހިފެހެއްޓުމުން، ރަޝިއާ އިން މިހާރު ކުޅެން ފަށާފައިވާ ހަނގުރާމައިގައި ކުޅިފަސް އަތުލުމަކީ ފަސޭހަ ކަމަކަށް ނުވާނެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ކުމްކުމްބަގީ
28 February 2022
އިރާދަކިރެއްވިއްޔާ މިހަނގުރާމާގަ ރަޝިޔާ ބަލިވާނެ
ދިވެހި ޕުތިން
27 February 2022
މިއީ ކްރިޕްޓޯ ކަރަންސީގެ ޒަމާން .. މުދަލާއި ހިދުމަތަށް އަގުނެގޭނެ ގޮއްގޮއް ތިޔަ ސްވިފްޓް ސިސްޓަމް ނޫނަސް އެބައޮތް..
އަފްރާސިޔާބު
27 February 2022
މި ހީވަނީ ރަޝިޔާ އަށް ސްވިފްޓް ސިސްޓަމުގެ ބޭނުން ނުހިފޭގޮތް ހެދުމުން ހަމަ އެކަނި ގެއްލުން ވާނީ ރަޝިޔާއަށޭ. ބަލަ ކަލޭމެން ކައިގެން ބޮއިގެން ތިއުޅެނީ އެކިގައުމުތަކުގެ ގުދުރަތީ މުއްސަނދިކަން އެކިގޮތްގޮތުން ފޭރިގަނެގެން. ޚާއްޞަކޮށް މެދުއިރުމަތީގެ ވެރިން އަތުން ދަމައިގަންނަ ލާރިކޮޅުންނާއި އެފްރިކާއިން ލޫޓުވާލާ މައުދަނާއި ރަންރިހީގެ ބާވަތުން. އީރާނު ތިބުނާ ހުރިހާ ސިސްޓަމަކުން ބޭރުކޮށްގެން އުޅޭތާ 40 އަހަރު. އެގައުމު އެދަނީ ދުވަހެއް ދުވަހަކަށް ބާރުގަދަ
ނަން..
27 February 2022
ރާއްޖޭގެ ޓުއަރިޒަމަށް/އިގްތިސާދަށް ބޮޑު އަސަރެއް ކުރާނެ. ކޮވިޑްގެ ކުރިން އެންމެ ބޮޑު މާކެޓަކީ ޗައިނާ. ކޮވިޑްގެ ފަހުން އެންމެ ބޮޑު މާކެޓަކީ ރަޝިޔާ. ޔުކްރެއިންއަކީ ވެސް ޓޮޕް ޓެން ތެރޭ ހިމެނޭ މާކެޓެއް. ސްވިފްޓް ކަނޑާލީމަ ދެން ފައިސާހުރި ރަޝިޔާ ބަޔަކަށްވެސް އެއްގައުމުން އަނެއް ގައުމަށް ކުރާ ފައިސާގެ މުއާމަލާތް ނުކުރެވޭނެ. އަނެއްކާ ޔޫރަޕުގެ އަދި ދުނިޔޭގެ ތެލުގެ އަގުވެސް އުފުލި ޔޫރަޕުން ވައިގެ ދަތުރުތައްވެސް ބޮޑަށް މަދުވާނެ.
އޮނަރަބަރު
27 February 2022
ސްވިފްޓް ޕޭމަންޓް ސިސްޓަމްއިން ރަޝިޔާ އެކަހެރި ކުރިޔަސް އެކަމުން ރަޝިއާއަށް ވާނީ ވަގުތީ ގެއްލުމެއް. ސަބަބަކީ ހުޅަނގުން އެކަން އެގޮތަށް ކުރާނެކަން އެގޭތީ ރަޝިޔާއިންވަނީ އެމީހުންގެ އަމިއްލަ ޕޭމަންޓް ސިސްޓަމެއް ކުރިޔާލައި ގާއިމް ކޮށްފަ. ޗައިނާއިންވެސް ވަނީ ހަމަ އެފަދަ ނިޒާމެއް ގާއިމްކޮށްފަ. އެނިޒާމަށް އެގައުމުތަކުގެ ވިޔަފާރިތައް ހޭނިލީމަ ސްވިފްޓް ނިޒާމްގެ މާބޮޑު ބޭނުމެއްނެތް. ރަޝިޔާއަށް ދަތިކުރާ ގައުމުތަކަށް ވާނީގެއްލުމަކަށް.
މޫސާފަތުޚީ
27 February 2022
އަލްހަމްދުﷲ ވަރަށް އުފާވެއްޖެ. ރަޝިޔާގެ މައްޗަށް ހިތްވަރުގަދަ ޔުކުރޭން ގަދަވާ މަންޒަރު ދެކެންބޭނުންވަނީ
އަބުބަކުރުބެ
27 February 2022
ރަޝިޔާހިތަށްނާރާނެ ކެހެރުވަކެކޭވެސް.
ލެއްގިކޮމިޝަނަރް
27 February 2022
ތިޔެއްއިގޭނެ ދުވަސްކޮޅެއްވެލީމަ. ރަސިޔާއާއި ޗައިނާ އެކަނި ވަކި ސިސްޓަމަކުން މުއާމަލާތް ކުރުމަކުން އެމީހުނަ ލިބޭނެމޮޅެއް ނެތޭ
ރަދީފްއޮފިޝިއަލް
27 February 2022
ރަޝިޔާއަށް މިކަމުން އެހާ ބޮޑު ގެއްލުމެއް ނުވާނެ.2014 ވަނަ އަހަރު ރަޝިޔާއިން ވަނީ އެމީހުންގެ އަމިއްލަ ސިސްޓަމެއް ކަމުގައިވާ (Sistema Peredachi Finansovykh Soobscheniy (SPFS ގާއިމްކޮށްފަ.2014 ވަނަ އަހަރު އެމެރިކާއިން ރަޝިޔާއަށް އިންޒާރުދީ ސްވިޓުން ބޭރުކުރާނެކަމަށް އެމެރިކާއިން ބުނުމާއިއެކީ އެމީހުން މިސިސްޓަމް ގާއިމްކުރި.ޗައިނާ އަދި ރަޝިޔާއިން ސްވިފްޓަށް އެހާ ބޮޑަށް ޑިޕެންޑް ނުވޭ.ވ.ވ.ވެދުން