މަދީނާ ޔުނިވާސިޓީގެ ޝަރަފުވެރި އެވޯޑެއް، ރާއްޖޭގެ ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދަށް ރޭ ދީފި އެވެ.
އެ ޔުނިވާސިޓީގައި ބޭއްވި ހާއްސަ ހަފުލާއެއްގައި "ޖާއިޒަތުލްހިއްރީޖިނައްރުއްވާދު" އެވޯޑް، ޝަހީމާ، ހަވާލު ކޮށްދެއްވީ ސަލްމާން ރަސްގެފާނުގެ ދަރިކަލުން މަދީނާގެ އަމީރު ފައިސަލްބިން ސަލްމާނެވެ.
އެއީ، މަދީނާ ޔުނިވާސިޓީގެ އިސް ދަރިވަރުންނަށް ހާއްސަކޮށް ދޭ އެންމެ ޝަރަފުވެރި އެވޯޑެކެވެ. މި އަހަރު އަލަށް ދޭން ފެށި އެ އެވޯޑް، ޝަހީމާއެކު މެލޭޝިއާ އަދި ސެނެގަލްގެ ބޭފުޅަކަށް ލިބިވަޑައިގަތެވެ.
އެވޯޑާއެކު ޝަހީމަށް 50،000 ރިޔާލް (204،665ރ.) ވެސް ލިބިވަޑައިގަތެވެ.
އިސްލާމިކް ޔުނިވާސިޓީގެ ވައިސް ޗާންސެލަރުކަމާއި ޗާންސެލަރުކަން ވެސް ކުރެއްވި މަދީނާ ޔުނިވާސިޓީން ޝަރީއާގެ ފުރަތަމަ ޑިގްރީ އަށް ކިޔަވައި ވިދާޅުވާން ފެއްޓެވީ 2001 ވަނަ އަހަރު އެވެ. އޭގެ ފަހުން މެލޭޝިއާގެ އިންޓަނޭޝަނަލް އިސްލާމިކް ޔުނިވާސިޓީން މާސްޓާސް އަދި ޕީއެޗްޑީ ހާސިލްކުރެއްވި އެވެ.
އޭނާ ޕީއެޗްޑީ ތީސިސް ލިޔުއްވީ ރާއްޖޭގައި ޒަކާތުގެ ހަރުދަނާ މާލީ ނިޒާމެއް ގާއިމުކުރުމާ ބެހޭ ގޮތުންނެވެ
މެލޭޝިއާ އިންޓަނޭޝަނަލް ޔުނިވާސިޓީ އެލަމްނައި ލީޑަޝިލް އެވޯޑް ވެސް ޝަހީމަށް އެ ޔުނިވާސިޓީން ވަނީ ދީފަ އެވެ. އެއީ ޔުނިވާސިޓީގެ އެލަމްނައިގެ ތެރެއިން ގައުމީ އަދި ބައިނަލްއަގުވާމީ ފެންވަރުގެ ހިދުމަތާއި ލީޑަޝިޕްގެ މަސައްކަތުގައި ފާހަގަކޮށްލެވޭ ބޭފުޅުންގެ އަގުވަޒަން ކުރުމުގެ ގޮތުން ދޭ އެވޯޑެކެވެ. ދުނިޔޭގެ އެންމެ ނުފޫޒު ގަދަ 500 މުސްލިމު ލީޑަރުންގެ ލިސްޓުގައި އިދާރީ ލީޑަރުންގެ ބައިގައި ވެސް ޝަހީމްގެ ނަން ހިމަނާފައިވެ އެވެ.
މީގެ 61 އަހަރު ކުރިން ބިނާކުރި އިސްލާމިކް ޔުނިވާސިޓީގައި 22،000 ދަރިވަރުން އަންނަނީ ކިޔަވަމުންނެވެ.