ވޯލްޑް ކަޕެއްގައި އެންމެ މޮޅު ކުޅުމެއް ދެއްކީ ކޮން ކުޅުންތެރިއެއް؟

ވޯލްޑް ކަޕުގެ ތާރީހު ދުށް އެންމެ މޮޅު ކުޅުންތެރިޔަކީ ކޮން ކުޅުންތެރިއެއް ހެއްޔެވެ؟ މިއީ ވަރަށް ގިނަ ފުޓްބޯޅަ ސަޕޯޓަރުންގެ ހިތުގައި އުފެދިފައި އޮންނަ ސުވާލެކެވެ. އެއީ ބްރެޒިލްގެ ޕެލޭ ހެއްޔެވެ؟ އާޖެންޓީނާގެ ޑިއެގޯ މަރަޑޯނާ ހެއްޔެވެ؟ ނުވަތަ ފްރާންސްގެ ޒައިނުއްދީން ޒިދާން ހެއްޔެވެ؟

ސުވާލެއް ނެތް ގޮތެއްގައި ވޯލްޑް ކަޕުގެ އެންމެ ކާމިޔާބު ކުޅުންތެރިޔަކީ މުބާރާތް ތިން ފަހަރު ކާމިޔާބުކުރި ޕެލޭ އެވެ. އޭނާ ވަނީ 1958، 1962 އަދި 1970 ވަނަ އަހަރު މުބާރާތް ކާމިޔާބުކޮށްފަ އެވެ. އެ އަދަދަށް އެހެން ކުޅުންތެރިޔަކަށް މުބާރާތް ކާމިޔާބުކުރެވިފައެއް ނުވެ އެވެ. މީގެ ތެރެއިން 1958 އަދި 1970 ގައި ބްރެޒިލް ހޯދި ކާމިޔާބީގައި ޕެލޭގެ ހިއްސާ ވަރަށް ބޮޑެވެ.

އެކަމަކު އެންމެ ކާމިޔާބު ކުޅުންތެރިޔަކަށް ވުމީ އެންމެ މޮޅު ކުޅުންތެރިޔާއަށް ވުން ލާޒިމް ކަމެއް ނޫނެވެ. ޕެލޭ އަށް ވުރެ މަދުން މުބާރާތުގެ ތަށި ހޯދި ކުޅުންތެރިންގެ ތެރޭގައި، އޭނާ އަށް ވުރެ ނުފޫޒު ގަދަ ކުޅުމެއް ދައްކައިގެން ތަށި ހޯދި ކުޅުންތެރިން ހިމެނެ އެވެ.

އޭގެ ތެރެއިން އެއް ކުޅުންތެރިޔަކީ އިޓަލީއާ އެކު 1982 ވަނަ އަހަރު މުބާރާތް ކާމިޔާބުކުރި ޕައޮލޯ ރޮސީ އެވެ. އެ މުބާރާތުގައި ވާދަކުރި އިޓަލީގެ ސްކޮޑަށް ރޮސީ ނެގީ ސަސްޕެންޝަނުގެ ސަބަބުން ނުކުޅެ ގިނަ ދުވަހު ހުރުމަށް ފަހު އެވެ. އެއާ އެކު އިޓަލީ ކޯޗަށް ފާޑުކިއުން އަމާޒުވި އެވެ. އެ ފާޑުކިއުން ބޮޑުވީ ގްރޫޕް ސްޓޭޖުގެ ތިން މެޗުގައި ވެސް އޭނާ އަށް ގޯލެއް ނުޖެހުމުންނެވެ. އެވަރުން ވެސް ކޯޗު އެންޒޯ ބިއާޒޮޓް އޭނާ އަށް އިތުބާރުކުރި އެވެ.

ރޮސީގެ މޮޅު ކުޅުން ފެނުނީ ގްރޫޕް ސްޓޭޖުގެ ދެ ވަނަ ބުރުގައި ބްރެޒިލް އަތުން އިޓަލީ 3-2 އިން މޮޅުވި މެޗުގަ އެވެ. އެ މެޗުގައި އޭނާ ހެޓްރިކެއް ހެދި އެވެ. ގަދަފަދަ އާޖެންޓީނާ އާއި ބްރެޒިލް ހިމެނުނު ގްރޫޕުން އިޓަލީ ސަލާމަތްވުމުގެ ކްރެޑިޓް ގިނަ ބަޔަކު ދެނީ ރޮސީ އަށެވެ.

އޭގެ ފަހުން އޭނާ ވަނީ ސެމީ ފައިނަލުން ޕޮލެންޑް އަތުން 2-0 އިން އިޓަލީ މޮޅުވި މެޗުގައި ދެ ގޯލް އަދި ފައިނަލުގައި ހުޅަނގު ޖަރުމަން އަތުން 3-1 އިން އިޓަލީ މޮޅުވި މެޗުގައި ގޯލް ޖަހައިފަ އެވެ. އެ މުބާރާތުގެ އެންމެ މޮޅު ކުޅުންތެރިޔާގެ މަގާމާއި އެންމެ ގިނަ ލަނޑު ޖެހި ކުޅުންތެރިޔާގެ މަގާމް ހޯދީ ރޮސީ އެވެ.

އާޖެންޓީނާގެ މަރަޑޯނާ އަކީ ވެސް ގާތްގަނޑަކަށް އޭނާގެ އެކަނި މަސައްކަތުން އެ ގައުމަށް ވޯލްޑް ކަޕެއް ކާމިޔާބުކޮށްދިން ކުޅުންތެރިއެކެވެ. ޒުވާން ކުޅުންތެރިއެއްގެ ގޮތުގައި 1982 ގެ ވޯލްޑް ކަޕުގައި ވިދާލި މަރަޑޯނާ އޭނާގެ އަސްލު ކުޅުން ދައްކާލީ 1986 ގެ ވޯލްޑް ކަޕް އާޖެންޓީނާ އަށް ކާމިޔާބުކޮށްދީގެންނެވެ. އެ މުބާރާތުގައި އޭނާގެ ފުރަތަމަ ގޯލް ފެނުނީ ގްރޫޕް ސްޓޭޖުގައި އިޓަލީއާ 1-1 އިން އެއްވަރުވި މެޗުގަ އެވެ. އެކަމަކު އޭނާގެ އެންމެ މޮޅު ކުޅުން ފެނުނީ ކުއާޓާ ފައިނަލުގައި އިންގްލެންޑް އަތުން 2-0 އިން އާޖެންޓީނާ މޮޅުވި މެޗުގަ އެވެ.

އެ މެޗުގައި އޭނާ ޖެހި ދެ ލަނޑަކީ ވޯލްޑް ކަޕުގެ ތާރީހު ދުށް އެންމެ މޮޅު ދެ ލަނޑެވެ. ފުރަތަމަ ލަނޑު އޭނާ ވައްދާލީ އަތުން ޖަހަ އެވެ. ބޮލުން ޖަހަން އަރައި އަތުން ބޯޅަ ގޯލުގެ ތެރެއަށް ވައްދާލި މަންޒަރު ރެފްރީއަށް ނުފެނެ އެވެ. އިންގްލެންޑް ކުޅުންތެރިން މައްސަލަ ޖެއްސި ނަމަވެސް ރެފްރީ ނިންމީ އެ ލަނޑު ބަލައިގަންނާށެވެ. އެ މެޗުގައި އޭނާ ޖެހި ދެ ވަނަ ލަނޑު ކާމިޔާބުކުރީ މެދުތެރެއިން ލިބުނު ބޯޅައެއް ހިފައިގެން އަރައި އިންގްލެންޑުގެ ފަސް ކުޅުންތެރިން ކައިރިން ދެމިގެންފަ އެވެ.

އޭގެ ފަހުން މަރަޑޯނާ ވަނީ ސެމީ ފައިނަލުން ބެލްޖިއަމް އަތުން 2-0 އިން އާޖެންޓީނާ މޮޅުވި މެޗުގައި ދެ ގޯލް ޖަހައިފަ އެވެ. ފައިނަލުގައި 3-2 އިން ހުޅަނގު ޖަރުމަން އަތުން އާޖެންޓީނާ މޮޅުވިއިރު ލަނޑެއް ނުޖެހުނަސް އޭނާ އެ މެޗުގައި ވެސް މޮޅު ކުޅުމެއް ދެއްކި އެވެ. ނަތީޖާއަކަށްވީ މުބާރާތުގެ އެންމެ މޮޅު ކުޅުންތެރިޔާގެ މަގާމް މަރަޑޯނާ އަށް ލިބުނެވެ. ގިނަ ބަޔަކު ދެކޭ ގޮތުގައި މަރަޑޯނާ އެ މުބާރާތުގައި ދެއްކީ މިހާތަނަށް ވޯލްޑް ކަޕެއްގައި ކުޅުންތެރިޔަކު ދެއްކި އެންމެ ތަފާތު ކުޅުމެވެ.

މަރަޑޯނާގެ މޮޅު ކުޅުމާ އެކު ޖެހިގެން އައި 1990 ގެ ވޯލްޑް ކަޕުގެ ފައިނަލަށް ވެސް އާޖެންޓީނާ ދަތުރުކުރި އެވެ. އެކަމަކު ފައިނަލުން ހުޅަނގު ޖަރުމަން އަތުން ބަލިވީ އެވެ.

އަމިއްލަ ގައުމުގައި 1998 ވަނަ އަހަރު އޮތް ވޯލްޑް ކަޕަށް ފްރާންސް ނުކުތްއިރު އެއީ ކާމިޔާބަށް ބަލާއިރު ދުނިޔޭގެ ފުޓްބޯޅައިގެ ގަދަބާރެއް ނޫނެވެ. އެ ގައުމަށް އޭރު ވޯލްޑް ކަޕެއް ހޯދިފައެއް ނުވެ އެވެ. އެކަމަކު ދުނިޔެ ހައިރާންކޮށްލުމަށް ފްރާންސުން އެ މުބާރާތް ކާމިޔާބުކުރިއިރު އެ ކާމިޔާބީގައި އެންމެ ބޮޑު ހިއްސާއެއްވީ ޒިދާނެވެ.

އަލްޖީރިއާގެ މުސްލިމް އާއިލާއަކަށް ނިސްބަތްވި ޒިދާން ވަނީ އެ މުބާރާތުގެ ފައިނަލުގައި އޭރުގެ ގަދަބާރު ބްރެޒިލް އަތުން 3-0 އިން މޮޅުވި މެޗުގައި ދެ ގޯލް ޖަހައިފަ އެވެ. އޭގެ ކުރީ މުބާރާތުގެ ތަށި ހޯދި އަދި މުބާރާތުގެ ފޭވަރިޓުންގެ ގޮތުގައި އޮތް ބްރެޒިލްގެ މައްޗަށް ފްރާންސަށް ކުރި ހޯދައިދެވުމުގެ އެންމެ ބޮޑު ސިއްރަކީ ޒިދާންގެ މޮޅު ކުޅުން ކަމަށް ގިނަ ބަޔަކު ދެކެ އެވެ. އަދި އެ މުބާރާތާ އެކު ޒިދާނަށް ސުޕަސްޓާރަކަށް ބަދަލުވި އެވެ.

ޒިދާންގެ ހުނަރުވެރިކަން އެންމެ ބޮޑަށް ފެނުނީ 2006 ގެ ވޯލްޑް ކަޕުގަ އެވެ. ކުއާޓާ ފައިނަލުން ފްރާންސުން ބްރެޒިލް ކަޓުވާލީ 100 ޕަސެންޓް ޒިދާންގެ މޮޅު ކުޅުމާ އެކު އެވެ. އަދި ފައިނަލުގައި އޭނާ އިޓަލީ ކޮޅަށް ލަނޑު ޖަހައި ފްރާންސަށް ލީޑު ނަގައިދިނެވެ. އެކަމަކު ފަހުން އިޓަލީން އެއްވަރުކުރީ އެވެ. ފްރާންސަށް މައްސަލަ ދިމާވީ އިތުރު ވަގުތުގެ ތެރޭގައި ޒިދާނަށް ރަތްކާޑު ދެއްކުމުންނެވެ. ނަތީޖާއަކަށްވީ ޕެނަލްޓީ ޖަހައިގެން ފްރާންސް ބަލިވުމެވެ. ޒިދާން އެ މުބާރާތުގައި ދެއްކި މޮޅު ކުޅުމުގެ ނަތީޖާއަކަށްވީ ފައިނަލުން ބަލިވި ނަމަވެސް އޭނާ އަށް މުބާރާތުގެ މޮޅު ކުޅުންތެރިޔާގެ މަގާމް ލިބުމެވެ.

މީގެ އިތުރުން 1974 ވަނަ އަހަރުގެ މުބާރާތުގައި ޗެމްޕިއަން ހުޅަނގު ޖަރުމަނުގެ ކެޕްޓަން ފްރެންޒް ބެކެންބާ ދެއްކި ކުޅުމާއި އެ މުބާރާތުގެ ރަނަރަޕް ނެދަލެންޑްސްގެ ޔޮހާން ކްރައިފް ދެއްކި މޮޅު ކުޅުމަށް ވެސް ވޯލްޑް ކަޕުގެ ތާރީހުން ޖާގަ ލިބެ އެވެ. އަދި 2002 ގެ ވޯލްޑް ކަޕުގައި ޗެމްޕިއަން ބްރެޒިލްގެ ރޮނާލްޑޯ ދެއްކި ކުޅުމާއި 2006 ގެ މުބާރާތުގައި ޗެމްޕިއަން އިޓަލީގެ ފަބިއޯ ކަނަވާރޯ ދެއްކި މޮޅު ކުޅުން ވެސް ގިނަ ބައެއްގެ ހަނދާނުގައި ހަރުލާފައިވެ އެވެ.

އެކަމަކު ގިނަ ބަޔަކު ދެކޭ ގޮތުގައި މި ހުރިހާ ކުޅުންތެރިންގެ ތެރެއިން ވެސް ވޯލްޑް ކަޕެއްގައި އެންމެ މޮޅު ކުޅުމެއް ދެއްކީ 1986 ވަނަ އަހަރު މަރަޑޯނާ އެވެ.