ބެލްޖިއަމްގެ މީޑިއާއިން މަސައްކަތް ކުރަނީ ޓީމު ހަލާކުކުރަން: މާޓިނޭޒް

ދޯހާ (ޑިސެމްބަރު 1) - ބެލްޖިއަމްގެ ޓީމު ބައިބައިކުރަން އެ ގައުމުގެ މީޑީއާތަކުން މަސައްކަތް ކުރާ ކަމަށް އެ ޓީމުގެ ކޯޗު ރޮބާޓޯ މާޓިނޭޒް ތުހުމަތު ކޮށްފި އެވެ.

އެންމެ ފަހުގެ ވޯލްޑް ކަޕުގެ ތިންވަނަ ހޯދި އަދި ދުނިޔޭގެ ރޭންކިންގެ ދެވަނަގައިގައި އޮތް ބެލްޖިއަމް އަށް މިފަހަރުގެ ވޯލްޑް ކަޕްގައި ވަނީ ގޮންޖެހުންތަކެއް ކުރިމަތި ވެފަ އެވެ. މޮރޮކޯ އާ ދެކޮޅަށް އެންމެ ފަހުން ކުޅުނު މެޗުން ބަލިވުމުން، ބެލްޖިއަމްގެ ޓީމުގެ ތެރޭގައި މައްސަލަ އުފެދިފައިވާ ކަމަށް މީޑިއާތަކުން ވަނީ ބުނެފަ އެވެ.

އެކަމަކު މީޑީއާ ފަތުރާ އެ ވާހަކަތައް މާޓިނޭޒް ދޮގި ކުރެ އެވެ.

"ބެލްޖިއަމްގެ މީޑީއާއިން ދަނީ ފޭކް ޚަބަރު ފަތުރަމުން،" މާޓިނޭޒް ބުންޏެވެ.

"ބެލްޖިއަމްގެ ބައެއް ނޫސްތަކަކީ ފޭކް ޚަބަރުތަކަކަށް ވަރަށް އަވަހަށް ފުންމާލާ ބައެއް. އެއީ އެ މީހުންނަށް ލިބޭ ވަރަށް ބޮޑު އުފަލަކަށް ވަނީ. ގައުމު އެކުވެރި ކުރުމަށް ވުރެ މި ޓީމުގައި ހުރި ނެގެޓިވް ޚަބަރުތައް ހޯދައިގެން ފެތުރުމަކީ އެ މީހުންނަށް މާ ރަނގަޅު ކަމެއް."

މާޓީނޭޒް ބުނި ގޮތުގައި މީޑީއާއިން ފަތުރާ ވާހަކަތަކުން ގައުމީ ޓީމަށް އެކަން ވާނީ ލިބޭ ހިތްވަރަށެވެ. އޭނާ ބުނީ މީޑިއާއިން ފަތުރާ ވާހަކަތަކުން ޓީމު ބައްޔެއް ނުކުރެވޭނެ ކަމަށެވެ.

މިރޭ ބެލްޖިއަމް ނުކުންނާނީ ކްރޮއޭޝިއާ އާ ދެކޮޅަށެވެ. ދެވަނަ ބުރަށް ދާނަމަ މެޗުން މޮޅުވުން ނޫން ގޮތެއް ބެލްޖިއަމް އަށް ނެތެވެ. މެޗު އެއްވަރުކޮށްލައިގެން ވެސް ކްރޮއޭޝިއާ އަށް އަނެއް ބުރަށް ދެވޭނެ އެވެ މެޗު ފަށާނީ ރާއްޖޭ ގަޑިން 8 ޖަހާއިރު އެވެ.