ލ. އަތޮޅުގައި ހަދަން ސަރުކާރުން ނިންމާފައިވާ ދެ ވަނަ އެއާޕޯޓް އެ އަތޮޅު މާވަށް ކައިރީގައި ހަދަން ގޮވާލާ ހަރަކާތެއް ފަށައިފި އެވެ.
ކައްދޫ އެއާޕޯޓުގެ އިތުރުން ލ. އަތޮޅުގެ އަނެއް ފަރާތުގައި އިތުރު އެއާޕޯޓެއް ހެދުމުގެ މަސައްކަތް އަންނަ ދައުރުގެ ތެރޭގައި ފައްޓަވާނެ ކަމަށް އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހު މި ރިޔާސީ އިންތިހާބުގެ ކެމްޕެއިންގައި ވަނީ ވައުދުވެވަައިގެންފަ އެވެ. އެ އަތޮޅުގައި އިތުރު އެއާޕޯޓެއް ހެދުމަކީ އިދިކޮޅު ޕީޕީއެމް/ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު ވެސް ވައުދެކެވެ.
ނަމަވެސް އެއާޕޯޓް ހަދާނެ ސީދާ ރަށެއް ދެ ކެންޑިޑޭޓުން ވެސް އަދި ވިދާޅެއް ނުވެ އެވެ.
މާވަށް ކައިރީގައި އާ އެއާޕޯޓް ހަދަން ގޮވާލާ ހަރަކާތުގައި އުޅުއްވާ މުސްއަބް އަބްދުﷲ "މިހާރު" އަށް ވިދާޅުވީ ދެ ވަނަ އެއާޕޯޓާ ގުޅޭ ހުށަހެޅުންތައް އެ ރަށުގެ މީހުންގެ ފަރާތުން ދެ ކެންޑިޑޭޓުންނަށް ވެސް ހުށަހަޅާފައިވާ ކަމަށެވެ.
ލ. އަތޮޅުގައި އިތުރު އެއާޕޯޓެއް ހަދާ ނަމަ އެންމެ ފީޒިބަލް އަދި ދިގުރާސްތާގައި އެންމެ ފައިދާ ހުރި ގޮތަކީ ވެސް މާވަށް ކައިރީގައި އެއާޕޯޓް ހެދުން ކަމަށް އޭނާ ވިދާޅުވި އެވެ.
އޭގެ ފުރަތަމަ ސަބަބަކީ މުސްއަބު ވިދާޅުވި ގޮތުގައި ލ. އަތޮޅުގައި ހަދާ ގިނަ ރިސޯޓުތައް މާވަށް ކައިރީގައި ހުރުމެވެ. ކަށި ގުރައިދޫ އާއި ކަށިދޫ އަދި މުންޏަފުށީގައި ރިސޯޓެއް ހަދަން ސަރުކާރުން އިއުލާން ކޮށްފައިވާ ކަމަށާއި ވަޑިނޮޅާގައި ރިސޯޓެއް ހެދުމުގެ އަމަލީ މަސައްކަތް މިހާރު ފަށައިގެން ކުރިޔަށް ދާ ކަމަށް އޭނާ ވިދާޅުވި އެވެ.
"އެ ހުރިހާ ރިސޯޓެއް އޮތީ އާބާދީގެ 50 ޕަސެންޓު ތަމްސީލް ކުރާ މާވަށް ކައިރީ. އެހެންވެ، އެ ރަށް ކައިރީ އެއާޕޯޓެއް އެޅުމަކީ އެންމެ ފީޒިބަލް އަދި ސަރުކާރަށް ވެސް ފައިދާ ވާނެ ގޮތް. ރަށުގެ ވަރަށް ގިނަ ރައްޔިތުން އަންނަނީ އެ ކަމަށް ވަކާލާތު ކުރަމުން،" މުސްއަބު ވިދާޅުވި އެވެ.
މާވަށް ކައިރީ އެއާޕޯޓް ހަދަން ގޮވާލަމުން އަންނަ އިރު މި ސަރުކާރުގެ ވިސްނުން ބޮޑަށް ހުރީ އެ އަތޮޅު ހިތަދޫ ކައިރީ އޮންނަ މެންދޫ ނަމަކަށް ކިޔާ ފަޅު ރަށެއްގައި އެއާޕޯޓް ހެދުމަށެވެ. ހިތަދޫ ކައުންސިލުން ވަނީ މެންދޫގައި އެއާޕޯޓު ހަދަން ދިރާސާތަކެއް ހެދުމަށް ފަހު، އެކަމާ ގުޅޭ ޕްރޮޕޯސަލް އެއް ސަރުކާރަށް ހުށަހަޅައިފަ އެވެ.
ނަމަވެސް މުސްއަބު ވިދާޅުވީ، ކައްދޫ އެއާޕޯޓާ އެއްފަސްކޮށްފައިވާ ފޮނަދު އާއި ހިތަދުއާ ދެމެދު އޮންނަނީ 13 ކިލޯމީޓަރުގެ ދުރުމިނެއް ކަމަށެވެ މުއިއްޒު ވައުދުވެފައިވާ ގޮތަށް ފޮނަދު އާއި ގާދޫ ގުޅާލައިފި ނަމަ އެ ދުރުމިން 8 ކިލޯމީޓަކަށް މަދު ވާނެ ކަމަށް އޭނާ ވިދާޅުވި އެވެ.
"އިންތިހާބުގެ ނަތީޖާ ނުކުންނަ ގޮތަކުން ގާދޫ އާއި ފޮނަދޫ ގުޅައިލުމަކީ ވެސް އެކަށީގެންވާ ކަމެއް. އޭރުން ހިތަދޫ އާއި ގާދޫ ދެމެދުގެ ދުރުމިނަކީ ހަތް ކިލޯ މީޓަރު. އެއީ އެއާޕޯޓް އޮތް ހިކިފަސްތަނަކަށް ސްޕީޑް ބޯޓްގައި ދަތުރު ކުރެވޭ އެންމެ 8 މިނިޓްގެ ރާސްތާއެ" އޭނާ ވިދާޅުވި އެވެ.
ކައްދު އާއި މާވަށް ދެމެދު 30 ކިލޯމީޓަރުގެ ދުރުމިނެއް ހުންނަ ކަމަށާއި ސަރުކާރުން މެންދޫގައި ދެ ވަނަ އެއާޕޯޓެއް ހެދިޔަސް 18 ކިލޯ މީޓަރުގެ ދުރުމިނެއް އެއާޕޯޓާ ހުންނާނެ ކަމަށް މުސްއަބު ވިދާޅުވި އެވެ.
"ދުރުރާސްތާ ތަރައްގީގެ އަމާޒު ތަކަށް ބެލިޔަސް އަދި ދަތުރު ފަތުރުގެ ފަސޭހަކަން ލިބިގެންދާނެ އާބާދީގެ ނިސްބަތަށް ބެލި ނަމަވެސް ހުރިހާ ގޮތަކުން ވެސް އެއަޕޯޓެއް އެޅުމަށް އެންމެ ފަހި ތަނަކީ މާވަށް،" އޭނާ ވިދާޅުވި އެވެ.
އާބާދީގައި 2،000 އަށް ވުރެ ގިނަ މީހުން ދިރިއުޅެމުން އަންނަ މާވަށު ކައުންސިލް ރައީސް އަހުމަދު މޫސާ ވިދާޅުވީ އެ ރަށުގެ މީހުން އެދެނީ މާވަށު ފަޅު ތެރޭގައި އެއާޕޯޓެއް ހެދުމަށް ކަމަށެވެ. އެއީ ރާއްޖޭގެ އެންމެ ބޮޑު އެއް ފަޅު ކަމަށާއި އަދި އެއީ ވަރަށް ތިލަފަޅެއް ކަމަށް އޭނާ ވިދާޅުވި އެވެ.
"ސަރުކާރުގެ ސިޔާސަތަކީ 30 މިނެޓުން ކޮންމެ ސަރަހައްދަކަށް ދެވޭ ގޮތަށް އެއާޕޯޓު އެޅުން. މާވަށާއި ކައްދޫއާ ދެމެދު އެންމެ ބާރަށް ދުއްވާފަ ދިޔަޔަސް 45 މިނެޓު ނަގާނެ،" އޭނާ ވިދާޅުވި އެވެ.