މާޝަލް އާޓްސްގެ ޓައެކްވޮންޑޯގެ ބްލެކް ބެލްޓް ހާސިލު ކުރި އުމުރުން އެންމެ ހަގު ދިވެހި އެތުލީޓްގެ ޝަރަފު ހޫދު ބިން މުހައްމަދު ގުރައިޝީ ހޯދައިފި އެވެ.
ގައުމީ މާޝަލް އާޓްސް ސެންޓަރުގައި މިރޭ ބެލްކް އިވެންޓްގައި ބެލްޓް ހޫދުއަށް ލިބުނު އިރު އޭނާ އުމުރަކީ ނުވަ އަހަރާއި ހަ މަހާއި 10 ދުވަހެވެ.
ފިންލެންޑް އިންޓަނޭޝަނަލް ސްކޫލްގައި ކިޔަވަމުން އަންނަ ހޫދު، ޓައެކްވޮންޑޯގައި ވާދަކުރަން ފެށީ އޮކްޓޯބަރު 2021 ގަ އެވެ.
މިރޭ ބްލެކް ބެލްޓް ހޯދުމުގެ އިތުރަށް އޭނާގެ އެންމެ ބޮޑު ކާމިޔާބީއަކީ ވާޗުއަލްކޮށް ބޭއްވި ކޭޓީއޭ އިންޓަނޭޝަނަލް މުބާރާތުން ހޫދު ވަނީ ރަން މެޑަލް ހޯދައިފަ އެވެ. އެ މުބާރަތަކީ ދުނިޔޭގެ ޓައެކްވޮންޑޯ ފެޑެރޭޝަނުން ބަލައިގެންފައިވާ މުބާރާތެކެވެ.
މިދިޔަ ޑިސެމްބަރު މަހު ލަންކާގައި ބޭއްވި އޭޝިއާ އިންޓަނޭޝަނަލް ޓައެކްވޮންޑޯ ޗެމްޕިއަންޝިޕް، އަދި ސައުތު އޭޝިއަން އޯޕަން ޓައެކްވޮންޑޯ ޗެމްޕިއަންޝިޕް އަދި ކޮލަމްބޯ ޖީސީއެސް އިންޓަނޭޝަނަލް އޯޕަން ޓައެކްވޮންޑޯ ޗެމްޕިއަންޝިޕުގައި ވާދަކޮށް ހޫދު ވަނީ ބޮޑު ކުރިއެރުންތަކެއް ހޯދައިފަ އެވެ.
ހޫދުގެ އެއްބަނޑުއެއްބަފާ ބޭބެ ޔޫނުސް ބިން މުހައްމަދު ގްރައިޝީ ވެސް ވަނީ އުމުރުން 11 ގައި މިރޭ ބްލެކް ބެލްޓް ހާސިލުކޮށްފަ އެވެ.
"ހޫދު އެންމެ ބޮޑަށް ޝުކުރުއަދާކުރަން ބޭނުން ވަނީ މަންމަ އާއި ބައްޕައަށް އަދި ބޭބެ ޔޫނުސް އަށް. ބޭބެއަކީ އެންމެ ބޮޑު މޯޓިވޭޝަން. ޓޯނަމެންޓްގައި ވެސް އެންމެ ސަޕޯޓްކުރާނީ ބޭބެ. ދެން ކިނާން ކޯޗު, މާސްޓަ އަޔޫބް، ސަބޫމް. ކިނާން ކޯޗު ވަރަށް ހެލްޕް ވޭ،" ބްލެކް ބެލްޓް ހާސިލު ކުރުމަށް ފަހު ހޫދު ބުންޏެވެ.