އައިކެއާގެ ވޯލްޑް ސައިޓް ޑޭގެ އިވެންޓް މާދަމާ، ހިލޭ ލޯ ޓެސްޓުކުރުމާއެކު ގިނަ ހަރަކާތްތަކެއް

އައިކެއާއިން މީގެ ކުރިން ވޯލްޑް ސައިޓް ޑޭ ފާހަގަކުރަން ބޭއްވި ހަރަކާތެއްގައި ލޯ ޓެސްޓްކުރަނީ: މިއަހަރުގެ އެ ހަރަކާތް މާދަމާ ހަވީރު ބާއްވަން ވަނީ ހަމަޖައްސާފައި --- ފޮޓޯ/އައިކެއާ

އައިޝަތު ޖަޒްލީ، މިހާރު

30 އޮކްޓޯބަރ 2025 - 12:37

މި އަހަރުގެ ވޯލްޑް ސައިޓް ޑޭ ފާހަގަކުރަން އައިކެއާގެ ކުލަގަދަ ހަރަކާތެއް މާދަމާ ސޯޝަލް ސެންޓަރުގައި ބާއްވަން ނިންމައިފި އެވެ.

އެ ހަރަކާތުގައި ހިލޭ ލޯ ޓެސްޓް ކުރުމާއި އެކި އޮފާތަކާއި ހަދިޔާތައް ވެސް ލިބޭނެ އެވެ. އައިކެއާއިން ބުނީ އެ ހަރަކާތުގައި އައިކެއާއިން ކުރިން ބޭއްވި ދަރިވަރުންގެ އާޓް މުބާރާތުގެ ކުރެހުންތައް ދައްކާލުމާއި އައިކެއާގެ ޑޮކްޓަރުންނާ ބައްދަލު ކުރުމުގެ ފުރުސަތާއި ކުޑަކުދިންނަށް ހާއްސަ ހަރަކާތްތައް ވެސް ބޭއްވުމަށް ހަމަޖެހިފައިވާ ކަމަށެވެ. އަދި ރޭގަނޑު ލައިވް މިއުޒިކުގެ ހަރަކާތްތައް އޮންނާނެ ކަމަށާއި އެކި ވައްތަރުގެ ކާބޯތަކެއްޗަށް ހާއްސަ ފުޑް ސްޓޯލްތައް ހުންނާނެ ކަމަށް ވެސް އައިކެއާއިން ބުންޏެވެ.

އައިކެއާއިން މީގެ ކުރިން ވޯލްޑް ސައިޓް ޑޭ ފާހަގަކުރަން ބޭއްވި ހަރަކާތެއްގައި --- ފޮޓޯ/އައިކެއާ

އެ އިވެންޓުގައި އައިކެއާއިން ޑައިބެޓިކް ސޮސައިޓީ އޮފް މޯލްޑިވްސްއާ ގުޅިގެން ހަކުރު ބައްޔަށް މީހުން ހޭލުންތެރި ކުރުވުމުގެ ހަރަކާތްތަކެއް ވެސް ކުރިއަށް ގެންދާނެ ކަމަށް އައިކެއާއިން ބުންޏެވެ.

އައިކެއާއިން ބުނީ އެ ހަރަކާތަކީ އާއިލާތަކާ އެކު ހިތްއުފާކޮށްލެވޭ ގޮތަށް ކުރިއަށް ގެންދާ ހަރަކާތެއް ކަމަށެވެ. އެ ހަރަކާތް އޮންނާނީ ހަވީރު 4 އިން ފެށިގެން ރޭގަނޑު 10 އަށް ސޯޝަލް ސެންޓަރުގައި ކަމަށް އައިކެއާއިން ބުންޏެވެ.

ދުނިޔޭގެ ލޮލުގެ ފެނުމުގެ ދުވަސް ފާހަގަކުރަން އައިކެއާއިން ކޮންމެ އަހަރަކު ވެސް ގިނަ ހަރަކާތްތަކެއް ބާއްވާ، އެކި އޮފާތަކާއި ހަދިޔާތައް ދެ އެވެ. އަދި ކޮންމެ އަހަރަކު ވެސް އައިކެއާއިން ބާއްވާ އެ ހަރަކާތަށް ގިނަ ބައެއްގެ ބޮޑު ތަރުހީބެއް ލިބެ އެވެ.