ފްރާންސްގައި މިދިޔަ މަހު ބޭއްވި ރައިޑާ ކަޕް ގޮލްފް މުބާރާތް ބަލަން ދިޔަ އަންހެނެއްގެ ލޯ މަތީގައި ބޯޅައަކުން ޖެހި އެއް ލޯ އަނދިރިވެއްޖެ އެވެ.
މި ހާދިސާ ހިނގީ މިދިޔަ މަހުގެ 28 ވަނަ ދުވަހު އޮތް މެޗެއްގައި ގޮލްފު ކުޅުންތެރިއެއް ކަމަށްވާ ބްރުކްސް ކޮއެޕްކާ ޖެހި ބޯޅަ ގޮސް، ކޮރިން ރެމަންޑޭ، 49، ގެ ކަނާތު ލޯ މަތީގައި ޖެހިގެންނެވެ. އޭނާގެ ލޯ މަތީގައި ބޯޅައިން ޖެހި، ބޯޅަ އިނީ ލޮލުގެ ތެރެއަށް ވަދެފައި ކަހަލަ ގޮތަކަށެވެ. އެ ހާދިސާ ހިނގުމާ އެކު، ކޮރިން ބިން މައްޗަށް ވެއްޓި ލޮލުން ލޭ ވެސް ފޭބި އެވެ. އަދި ވަގުތުން ފަރުވޭ ދޭން ހޮސްޕިޓަލަށް ގެންދިޔަ އެވެ.
މި ހިތްދަތި ހާދިސާގެ ތަޖުރިބާ "ޓުޑޭ" އަށް ކިޔައިދެމުން ކޮރިން ބުނީ ލޮލުގެ ތެރެއަށް ބޯޅަ އިތުރަށް ވަން ނަމަ ފުރާނަ އަށް ވެސް ނުރައްކާވީސް ކަމަށެވެ
ކޮރިން އާއި އޭނާގެ ފިރިމީހާ ރަފައޭލް މިހާރު ވަނީ ރައިޑާ ކަޕް އިންތިޒާމުކުރާ ޕްރޮފެޝަނަލް ގޮލްފާޒް އެސޯސިއޭޝަން އޮފް އެމެރިކާ (ޕީޖީއޭ) އާއި ރައިޑާ ކަޕް ޔޫރަޕަށް ދައުވާ ވެސް ކުރަން ނިންމައިފަ އެވެ. މި މުބާރާތަކީ އިނގިރޭސިވިލާތުގެ ކުރީގެ ގޮލްފް ތަރި ސެމްއެލް ރައިޑާގެ ނަމުގައި ބާއްވާ މުބާރާތެކެވެ.
ކޮރިން ބުނި ގޮތުގައި އޭނާ އަށް ލިބުނު ފޫބުނެއްދޭ ވަރުގެ އަނިޔާގެ ޒިންމާ ދެ ޖަމާއަތުން ނަގަން ޖެހޭނެ އެވެ. އަދި މިއީ މުބާރާތް ބަލަންދާ މީހުންގެ ސަލާމަތީ ކަންކަމާ ދޭތެރޭ އިހުމާލުވުމުގެ ސަބަބުން ދިމާވި ހާދިސާއެއް ކަމަށް ބުންޏެވެ.
"އަހަރެން އެއްގޮތަކަށް ވެސް ބްރުކްސް ކުށްވެރިކުރާކަށް ބޭނުމެއް ނޫން. މިއީ މުބާރާތް އިންތިޒާމުކުރާ ފަރާތްތަކުގެ ފަރުވާ ކުޑަކަމުން ދިމާވި ހާދިސާއެއް. ކުޅިބަލަންދާ މީހުންނަށް ރައްކާތެރިކަން ފޯރުކޮށް ދިނުމާއި އިރުޝާދުތައް ދިނުމަކީ މުބާރާތް އިންތިޒާމުކުރާ ބަޔަކު ކުރަން ޖެހޭނެ ކަމެއް،" ކޮރިން ބުންޏެވެ. "އެކަން އެ މީހުންކޮށްފައި ނެތީމަ މި ވަރުގެ ބޮޑު އަނިޔާއެއް އަހަންނަށް ލިބުނީ."
ކޮރިން ބުނި ގޮތުގައި މުބާރާތް އިންތިޒާމު ކުރާ ޖަމާއަތްތަކަށް ދައުވާކުރަން ނިންމި މައިގަނޑު ސަބަބަކީ މިފަދަ ހާދިސާއެއް ތަކުރާރުވެ، އެހެން މީހަކަށް މިވަރުގެ ހިތްދަތި ކަމެއް ކުރިމަތިވާން ބޭނުން ނުވާތީ އެވެ.
"އަދި އަހަރެން އެންމެ ދެރަވި ކަމަކީ މި ހާދިސާ ހިނގައިގެން އަހަރެން ފަރުވާ ހޯދަމުން ދިޔަ އިރު ރައިޑާ ކަޕްގެ އޮފިޝަލުން ހާލު ވެސް ބަލާފައި ނުވާތީ،" އޭނާ ބުންޏެވެ.