ފްރީލާންސަރުންނަށާއި އލަށް ވިޔަފާރި ފަށާ މީހުންނަށް މަސައްކަތް ކުރާނެ މާހައުލެއް ހޯދައި ދިނުމަށް ބިޒްނަސް ސެންޓާ ކޯޕަރޭޝަން (ބީސީސީ) އިން ކޯ-ވޯކް ސްޕޭސްއެއް އިއްޔެ ހުޅުވައިފި އެވެ.
"ސީޑް ބައި ބީސީސީ"ގެ ނަމުގައި މި ވޯކް ސްޕޭސް ހުޅުވައިދެއްވީ އިކޮނޮމިކް މިނިސްޓަރު ފައްޔާޒު އިސްމާއިލެވެ. މި ރަސްމިއްޔާތުގައި ޔޫއެންޑީޕީން ރާއްޖެ އަށް ކަނޑައަޅުއްވާފައި ހުންނަވާ ރެސިޑެންޓް ރެޕްރެޒެންޓޭޓިވް ވެރާ ހަކީމް އާއި ޖަޕާން އެމްބަސީގެ އިކޮނޮމިކް ކޯޕަރޭޝަން ހެޑް، ނައޯކޯ ޔުޒާވާ ބައިވެރިވެވަޑައިގެންނެވި އެވެ.
މި ވޯކް ސްޕޭސަކީ އިކޮނޮމިކް މިނިސްޓްރީގެ އިސްނެގުމާ އެކު ޔޫއެންޑީޕީ އާއި ޖަޕާނު ސަރުކާރުގެ އެހީގައި ހުޅުވި ތަނެކެވެ. މިތަން ހުންނާނީ އޯކިޑު މަގުގައި ހުންނަ ބީސީސީގެ "އޯތެންޓިކް މޯލްޑިވްސް" ފިހާރަ ހުންނަ އިމާރާތުގަ އެވެ.
ބީސީސީން މި ވޯކް ސްޕޭސް ފަރުމާކޮށްފައި ވަނީ ތަފާތު މަސައްކަތްކުރާ މީހުންނަށް ބޭނުންވާ ވަސީލަތްތަކާ އެކު އެކުވެރި މާހައުލެއްގައި މަސައްކަތްކުރެވޭނެ ގޮތަކަށެވެ. އެ ތަނުގައި އެއް ފަހަރާ 30 މީހުންނަށް މަސައްކަތް ކުރެވޭނެ އެވެ. އަދި ވިޔަފާރި ބައްދަލުވުންތަކަށް ހާއްސަ މީޓިން ރޫމެއް ވެސް އެ ތަނުގައި ހުންނާނެ އެވެ.
އެ ތަނުގައި މަސައްކަތްކުރަން ބޭނުންވާ މީހުންނަށް ގަޑިއިރަކަށް ނުވަތަ ހަފްތާއަކަށް ނުވަތަ މަހުފީ ދައްކައިގެންވެސް ބުކިން ހެއްދޭނެ އެވެ. ބުކިން ހައްދަން ޖެހޭނީ ބީސީސީގެ ވެބްސައިޓް މެދުވެރިކޮށެވެ. މިތަން ދޫކުރަނީ ވަރަށް ހެޔޮޮ އަގުތަކެއްގައި ކަމަށް ބީސީސީން ބުންޏެވެ.
ބީސީސީގެ މި ވޯކް ސްޕޭސްގައި ޕްރިންޓިން އާއި ސްކޭނިން އާއި ފޮޓޯ ކޮޕީގެ ހިދުމަތުގެ އިތުރުން ވައިފައި ވެސް ހުންނާނެ އެވެ.
