އިރުއެރީ އާދައިގެ ދުވަހަކަށެވެެ. މޫސުން ވެސް ވަރަށް ރީއްޗެވެ. އެ ހޭލިމޭލީގައި، ޔޫނުސް މުހައްމަދު އުޅުނީ އޭނާ މަސައްކަތްކުރަމުން ދިޔަ 70 ފޫޓު ދިގު ފުނަމާ ބޯޓަށް ގޭސް ބަރުކޮށް ވީ އެންމެ އަވަހަކަށް ރަށަށް ފުރާށެވެ. ރިޔާސީ އިންތިހާބުގައި ވޯޓުލާން އޭރު ކުޑަތަންވަނީ އެވެ.
ތިލަފުށި ބަނދަރުގައި އޮތް އެ ބޯޓު އެއް ޖެޓީން އަނެއް ޖެޓީއަށް ގޮސްގެން ވެސް އެ ކަމެއް އަވަހެއް ނުވި އެވެ. އެހެންވެ، ބޯޓުގެ ވެރިޔާ އަދި ކެޕްޓަނަކަށް އުޅުނު އަބްދުލް މުހުސިނާއެކު ބޯޓުން ފައިބައިގެން ޔޫނުސް ދިޔައީ ސައިބޯށެވެ. ހެނދުނުގެ ނާސްތާ ނިމޭއިރަށް ގޭހުގެ މަސައްކަތްތައް ނިމޭނެ ކަމަށް ބަލައިގެންނެވެ.
ޔޫނުސް، 57، ބުނީ ބޯޓަށް އަލުން އަރައި އޭނާއަށް ފުރަތަމަ ވެސް ބަލާލެވުނީ، ގޭސް ފުޅިތައް ބަހައްޓާފައި ހުރި ތަނާ ކައިރީގައި ހުރި އިންޖީނުގެ ކޮޓަރިއަށް ކަމަށެވެ. އިރުކޮޅަކާ އަޑުގަދަވެފައި މަޑުވެ އެވެ. މައްސަލައެއް އުޅޭ ކަމަށް ގަބޫލުކުރެވިގެން ޔޫނުސް އޭނާގެ އާއިލީ ގުޅުން އޮންނަ މުހުސިން ކައިރީގައި އެދުނީ ފަލްކާ މަތިން ދުރަށް ދިއުމަށެވެ.
އޭނާ ކައިރީގައި ޔޫނުސް އެގޮތަށް ދެ ފަހަރަށް ބުންޏެވެ. މާ ގިނަ ވަގުތެއް ނުވެ އެވެ. މުހުސިން ބަލާލި ވަގުތާ އެކު އިވުނީ ބާރުގަދަ އަޑެކެވެ. ދެން ފެނުނީ ދުންތައް ފެތުރިގަތް ތަނެވެ. އިންޖީނުރޫމާ ދިމާލަށް ބަރުކުރި ގޭސްފުޅިތަކުގެ ތެރެއިން ފުޅިއަކުން ގޭސް ލީކުވެ ބޮމެއްހެން ގޮވީ އެވެ.
އެކަމަކު އެވީ ގޮތެއް އޭރު ނޭނގި، އަދި ވާންވީ ގޮތެއް ވެސް ނޭނގި ޔޫނުސް ހުއްޓުން އެރި އެވެ.
އޭނާގެ މުޅި ގައިގައި އަލިފާން ހިފަން ސިކުންތުކޮޅެއް ވެސް ނުނަގަ އެވެ.
"ކުޑަކޮށް ބަލާލެވުނުއިރު އަތުގެ ހަންގަނޑު ނެތްކަން އެނގުނު،" ލ. ގަމުގައި ހުންނަ، ޔޫނުސްގެ ގޭގެ ގޯތިތެރޭގައި ހުރެ ވާހަކަދައްކަމުން ކިޔައިދިނެވެ.
އޭނާ ބުނީ ރޯވުމާއެކު ބޯޓުން ފައިބައިގެން ދުއްވައިގަނެވުނީ އެވެ. ފުރަތަމަ ފެނުނީ ޒުވާން ފިރިހެނެއް ކަމަށެވެ. އޭނާ ކައިރީގައި ޔޫނުސް އެދުނީ ރޯވެފައި ހުރި އޭނާގެ ޓީޝާޓު ބާލައިދީ އެހީވުމަށެވެ. އެކަމަކު ނޫކަށި އެ ޒުވާނާ ދިން ޖަވާބަށް ޔޫނުސުގެ ހިތަށް ވީ އުނދަގުލެވެ.
"އޭނާ ބުނީ އެހީވާނީ ފުލުހުންނޭ،"
"ޕޮލިހުން ކޮބާހޭ ކިޔާފައި އަހަރެން އަނެއްކާ ނައްޓާލީމަ ބޯޓުގައި އުޅުނު ބަކުރު ކިޔާ މީހަކު އޭނަ އަހަރެންގެ ޓީޝާޓު ދަމައިގަތީ. ދެން އަހަރެން ދުއްވައިގަތީމަ އޭނަ ބުނެފި ބިންމަތީގައި ނޯށޯންނާށޭ. ބުނީމަ އަހަރެން ހަޅޭއްލަވަނިކޮށް އެ ތަނުން ގެއަކުން ފެނުނު ދެ މީހުން، އެއީ ކޮން ބައެއް ކަމެއް ވެސް ނޭނގެ. ވަރަށް ބޭނުން ވެސް ވޭ އެ މީހުން ހޯދާލަން، އެ ދެ މީހުން ބުނެފި ބޭބެ އަންނާށޭ، ކިޔާފައި ގޮސް ގޮނޑިއެއްގައި ބައިންދާފައި ތާނގީގައި ހުރި އިސްކުރުން، ދެ ބާލިދީއަކަށް އަޅާފައި...ނަމްބަރު ކިޔާށޭ. ބުނީމަ، ދަރިފުޅުގެ ނަމްބަރު ކިޔައިފިން. ކީމަ، އޭނާ ގުޅާފައި ބުނީ ބައްޕަ ވަރަށް ބޮޑަށް ފިހިގެން އުޅޭއޭ،" ޔޫނުސް ކިޔައިދިނެވެ.
އަލިފާން ނިވުމުން ތިލަފުށީ ބަނދަރުގައި އޮތް ލޯންޗަކަށް ޔޫނުސް ގެންދިޔައީ ސައިކަލުގަ އެވެ. މުހުސިން ފެނުނީ އެ ހިސާބުންނެވެ. ގައިގެ އެތަންމިތަނަށް ލިބުނު ޒަހަމްތަކާ ހެދި ލޯންޗުގެ ކާޕެޓު މަތީގައި އޭނާ ބާއްވާފައި އޮތެވެ.
ޔޫނުސް ބުނީ މާލޭގެ ޓީ-ޖެޓީއަށް ލޯންޗު ކައިރިކުރިއިރު ވެސް މީހުން ފެނި، ވާނުވާ ނަގައިގަނެވުނު ކަމަށެވެ.
އައިޖީއެމްއެޗަށް ގެންދަން އެމްބިއުލާންސް ބަލާ އައިކަން އެނގުނެވެ. އަދި ހޮސްޕިޓަލުގެ ތެރޭގައި އެކި މީހުން ދެއްކި ވާހަކަތައް ވެސް އިވުނެވެ.
އެކަމަކު، އެ ހިސާބުން ދެން ހަބަރު ހުއްޓުނީ އެވެ.
ފަސް ކުދިންގެ ބައްޕަ ބުނީ 10 ވަރަކަށް ގަޑިއިރު ފަހުން ހޭ އެރިއިރު އޭނާ އޮތީ ފިނިކޮޓަރިއަކަށް ބަދަލުކޮށްފައި ކަމަށެވެ. ވާނުވާ އެނގުނަސް، އެއްވެސް މީހަކު ވެސް އަދި ތަނެއް ވެސް ނުފެނެ އެވެ.
އޭނާ ބުނީ އޮކްޓޯބަރު 27، 2013 ގައި ހިނގި އަލިފާނުގެ ހާދިސާގައި ލިބުނު ގެއްލުންތައް އަމިއްލަ ލޮލުން ފުރަތަމަ ވެސް ފެނުނީ އޭގެ ފަސް ދުވަސް ފަހުން ކަމަށެވެ.
"ފާހަނާއަށް ގޮސް ލޯގަނޑު ބަލާލިއިރު އަހަރެން ބޯ ވޭ މި ވަރު. އަހަރެން ބުނިން އަންހެނުން ކައިރި އަހަރެން ދެން ރަނގަޅެއް ނުވާނެއޭ. އޭނަ ބުނީ، ނޫނެކޭ، ރަނގަޅުވާނެއޭ،" ހަޔާތުގައި ދިމާވި އެންމެ ހިތާމަވެރި ހާދިސާގެ ތަފްސީލު ދެމުން ކިޔައިދިނެވެ.
އެ ހާދިސާގައި ޔޫނުސް އާއި މުހުސިންގެ ހަށިގަނޑުގެ 75 ޕަސެންޓު ފިހުނެވެ. މުހްސިންގެ އެތެރެހައްޓަށް ލިބުނު ޒަހަމްތަކަށް އިންޑިއާގައި ފަރުވާ ދެމުން އަންނަނިކޮށް ޖެހިގެން އައި މަހުގެ 5 ވަނަ ދުވަހު ވަނީ މަރުވެފަ އެވެ.
ހޮސްޕިޓަލުން ރަށަށް، ދިރިއުޅުން ހަމައެކަށް ނޭޅުނު
އައިޖީއެމްއެޗްގައި އެއް މަސް ދުވަސްވަންދެން ފަރުވާ ދީ، ހާލު ރަނގަޅުވާން ފަށައި ހޮސްޕިޓަލުން ދޫކޮށްލުމުން ޔޫނުސް އައީ ރަށަށެވެ.
އޭނާ ބުނީ ރަށަށް އައި އިރު ވެސް ހާލު ރަނގަޅު ކަމަށެވެ. އެކަމަކު، ދެ ތިން ދުވަސް ފަހުން އިނގިލީގެ ހަރަކާތްތައް ހުއްޓުނުކަމުގެ އިހުސާސްވުމުން، އިތުރަށް ފިކުރު ބޮޑުވި އެވެ. އާމްދަނީ ލިބޭނެ މަގު ހުއްޓި، ގޮތް ހުސްވި އެވެ.
ޔޫނުސް ބުނީ އޭނާގެ އެ ކަންބޮޑުވުންތަކުގައި ހިފައިދިނީ މި ރަށު ޔޫސޭ ނަމަކަށް ކިޔާ މީހެއް ކަމަށެވެ. މާލޭގައި ހުރިއިރު އަދި އޭގެ ފަހުން ލަންކާއަށް ގެންގޮސް، އަތުގެ ހަރަކާތްތައް ނުކުރާތީ ޑޮކްޓަރަކަށް ދައްކައިދިނެވެ. ނުވަ އިންޖެކްޝަން ޖަހަން ޖެހުނަސް، ތިން އިންޖެކްޝަން ޖެހި ފަހުން އަނބުރާ އެ ފަރުވާއަކަށް ނުދެވުނެވެ.
މަސައްކަތެއް ނުކުރެވި، ލިބުނު އަނިޔާތަކާ ގުޅިގެން ނުކުޅެދުނު ހާލުގައި ޔޫނުސް ދެން ބެލީ ސަރުކާރުގެ އެހީއެއް ލިބޭތޯ އެވެ. އެހެންވެ، ކައުންސިލާ ބައްދަލުކޮށް، އެ މީހުން އެދުނު ގޮތަށް ސިޓީއެއް ހުށަހެޅި އެވެ.
"ސިޓީއެއް ލީމަ އޭގެ ޖަވާބެއް ނާދޭ. އޭގެ ފަހުން 13-14 އަހަރު ވަނީ،" އޭނާ ބުންޏެވެ.
ހަށިގަނޑުގެ ބޮޑުބައެއް ފިހި، އަދި ހާލުގައި ޒަމާންތަކެއް ވަންދެން އުޅުމަށް ފަހު ޔޫނުސަށް ރަނގަޅު މަސައްކަތެއް ލިބުނުތާ އަދި މިވީ އަހަރެކެވެ. އާއިލާ ބައެއްގެ ކައިރީގައި މަސް ކެއްކުމުގައި އެހީތެރިވެގެން އާމްދަނީ ހޯދަ އެވެ.
މިވީ މުއްދަތުގައި ދިރިއުޅުމުގެ ކަންކަން ހަމަޖެއްސީ މީހުންނަށް އެކި މަސައްކަތްކޮށްދީގެންނެވެ. އެހެން ނޫން ނަމަ އެހީއެއް ވަނީ އާއިލާ އާއި ރައްޓެހިންނެވެ.
ދިރިއުޅުން އާރާސްތުކުރުމުގެ ފިޔަވަޅުތައް އެޅިއަސް، މީގެ 12 އަހަރުކުރިން ލިބުނު ޒަހަމްތައް ޔޫނުސްގެ ހަށިގަނޑުން ނުފިލަ އެވެ.
އޭނާ ބުނީ ވާރޭފެން ޖެހުމުން މިހާރު ވެސް ހަންގަނޑު ހިރުވައި އުނދަގޫވާ ކަމަށެވެ. އެއަށްވުރެ ބޮޑަށް ނަފްސާނީގޮތުން ކުރިމަތިވާ އުނދަގޫތައް ބޮޑެވެ.
ގޭސް އުނދުނެއް ކައިރީގައި ހުންނައިރު މިހާރު ވެސް ހިތްތެޅެ އެވެ.
"ބާރު އަޑެއް އިވުނަސް ސިއްސައިގެން ދޭ، ބިރުގަނޭ. ޒަމާންގަނޑެއް ވަންދެން ނިދާފައި އޮންނަ ގަޑީގައި ވެސް، އަންހެނުން ބުނޭ [އަހަރެން] ސިއްސަސިއްސައިގެން ދެއޭ،"
"ލޮލަށް ފެންނަ ކަހަލަ ހަމަ. އަލިފާންގަނޑު އަނދާ، ހިޔާލަށް އާދޭ. ހީވޭ އޭރު އުޅުނު މުހުސިނު ވެސް ފެނިދާނެހެން."
އޭނާ ގަބޫލުކުރާ ގޮތުގައި ބޯޓުތަކުގައި އެފަދަ ހާދިސާތައް ހިނގަނީ ފަރުވާ ކުޑަވެގެންނެވެ. މި ގޮތަށް އުޅޭއިރު ތަނެއްގައި ރޯވެގެން އުޅޭ ހަބަރެއް ލިބުނަސް، ޔޫނުސްގެ ހިޔާލަށް އަންނަނީ އެ ދުވަހު އުޅުނު ހާލެވެ. އެޅި ވޭނެވެ. ހަމަ ޔަގީނުން ވެސް، އެ ދުވަހު އޮއްސުނު އިރެއް ދެން އެ ހަޔާތަކަށް ނޭޅި އެވެ.