"ނޫރު" ގެ މިއަދުގެ އެޕިސޯޑުގައި ޝައިހު އިބްރާހިމް ޒަކަރިއްޔާ މޫސާ އަހަރެމެންނަށް ވިދާޅުވެދެއްވީ ކީރިތި ރަސޫލާ އުޑާ ދިމާލަށް ބައްލަވާ ކޮންމެ ފަހަރަކު ކުރައްވާ ދުއާ އެވެ.
ރަސޫލާ އެންމެ ލޯބިފުޅުވާ އަނބިކަނބަލުންގެ ތެރޭގައި ހިމެނިވަޑައިގަންނަވާ އާއިޝަތުގެފާނުގެ އަރިހުން ރިވާވެގެންވާ ހަދީސަކާ ހަވާލާ ދެއްވައި ޝައިހު ވިދާޅުވީ، ރަސޫލާ އުޑާ ދިމާލަށް ބައްލަވާ ކޮންމެ ފަހަރަކު އެ ދުއާ ކުރައްވަވާ ކަމަށެވެ.
އެ ދުއާގެ މާނައިގައި ވަނީ "އޭ ހިތްތައް އެކި ހާލަތްތަކަށް ބަދަލުކުރައްވާ އިލާހު، މި އަޅާގެ ހިތް އިބަ ﷲ އަށް ކިޔަމަންގަތުމުގެ މަގުގައި ސާބިތު ކޮށްދެއްވާނދޭވެ،" މިހެންނެވެ.
ކީރިތި ރަސޫލާއަކީ އެންމެހައި ނަބީޔުންނާއި ރަސޫލުން އަދި އިންސާނުންގެ ތެރެއިން ވެސް އެންމެ މާތް ސާހިބާ ކަމަށް ވާއިރު، އެކަލޭގެފާނު އުޑާ ދިމާލަށް ބައްލަވާ ކޮންމެ ފަހަރަކު ހާއްސަ ދުއާއެއް ތަކުރާރު ކުރެއްވުމަކީ އިބުރަތެކެވެ. އަހަރެމެންނަކީ ފާފައިގެ މާހައުލުގައި އުޅޭ ބަޔަކަށް ވާއިރު އެއީ ކުރުން ވަރަށް މުހިންމު ދުއާއެއް ކަމަށް ޝައިހު ޒަކަރިއްޔާ ވިދާޅުވި އެވެ.
"ހިދާޔަތުގެ މަތީގަައި ސާބިތުވެ ހުރުމަށްޓަކައި ވަރަށް ވަރުގަދަ އަޒުމެއް އެބަ ބޭނުންވޭ. އެ އަޒުމް އާވެގެންދާ ކަމެއް އެއީ ﷲ ގަ ހަޟްރަތުގައި ތަކުރާރުކޮށް ހިތް އީމާންކަންމަތީގައި ﷲ އަށް ކިޔަމަންތެރިކަން މަތީގައި ސާބިތުކަން ދެއްވެވުމަށް ދުއާ ކުރަމުން ގެންދިއުމަށް،" ޝައިހު ވިދާޅުވި އެވެ.