ހުފިލިލަނޑާ ނަގައި، މަސްވެރިކަމަށް ގޮސް އުޅުނު ސޮފްއާން ވަޖުދީ އަށް އާދައިގެ ދުވަހެއްގައި އައި ފޯނު ކޯލެކެވެ. އެއީ އޭނާ މަސްވެރިކަމަށް ނުކުމެ އުޅޭ ޑިންގީ ޖެޓީ ދަށަށް ލައްވެފައި އޮތް ކަން އަންގަން އައި ކޯލެކެވެ. ފޯނު ބޭއްވުމަށް ފަހު އަވަސްއަވަހަށް ބަނދަރު މައްޗަށް ސޮފްއާން ދިޔައީ މާބޮޑު ހިޔާލެއް ފިކުރެއް ނެތި އެވެ. އެކަމަކު، ސޮފްއާން އަށް ނޭނގި އޮތް ކަމަކީ، އެއީ އޭނާ ދެފައިން ހިނގާފައި ދާނެ އެންމެ ފަހު ވަގުތުކޮޅު ކަމެކެވެ.
ރ. މަޑުއްވަރީ އަށް އުފަން ސޮފްއާނަކީ އާދައިގެ އެހެނަސް ވަރަށް އުފާވެރި، ހަރަކާތްތެރި ދިރިއުޅުމެއް އުޅެމުން އައި ޒުވާނެކެވެ. އަންހެނުން އައިމިނައްތަ އާއި ދަރިންނާ އެކު ކުޑަތަންކޮޅެއްގައި އުޅެމުން ދިޔަސް އެއީ ހަމަޖެހޭ ދިރިއުޅުމެކެވެ. އެ ސާދާ ދިރިއުޅުން އެފުށްމިފުށަށް އެ ދުވަހު ޖަހާލީ އެއްވެސް އިންޒާރެއް ނެތި އެވެ.
ސޮފްއާން ބަނދަރު މައްޗަށް ދިޔުމާ އެކު، އިތުރު ތިން މީހުން ވެގެން ޑިންގީ ޖެޓީ ދަށުން ނަގަން މަސައްކަތް ފެށި އެވެ. ސޮފްއާން ހުރީ ޑިންގީގެ އެއްކޮޅުގައި އެ ނެގޭތޯ ބާރުލާށެވެ. ވަރަށް މަސައްކަތުން ވެސް ޑިންގީ ދަމައިގަނެވޭނެ ގޮތެއް ނުވުމުން ތޮށިގަނޑުގައި ބުރަކަށި ވިއްދާފައި ޑިންގީ އަށް ސޮފްއާން ބާރަށް ހިފާލި އެވެ. ކުއްލިއަކަށް ޑިންގީ ނެއްޓި، މައްޗަށް އެރި އެވެ. އެ ދެތިން ސިކުންތުގެ ތެރޭ ސޮފްއާން ތޮށިގަނޑާއި ޑިންގީއާ ދޭތެރޭ ފިތުނީ އެވެ.
"އަހަރެން އަވަހަށް ބުނެފިން ފިތިފައޭ އޮތީ. އަނެއްކާ އެ މީހުން އިތުރަށް ހިފައިގެން އެ މީހުން އަހަރެން އެ ތަނުން ނެރުނީ. މާގިނައިރެއް ނުވޭ. ކުޑަ ވަގުތުކޮޅެއް. ދެތިން މިނެޓް،" ސޮފްއާން، އެ ދުވަސް ކިޔައިދެވޭތޯ މަސައްކަތް ކުރި އެވެ.
"އެހާ ހިސާބުން ފެށިގެން އުނަގަނޑު ތިރި އޮތީ އެއްކޮށް ވާގިނެތިފައި."
އެމްބިއުލާންސްގައި ސޮފްއާން ސިއްހީ މަރުކަޒަށް ގެންގޮސް ބާއްވާފައި އޮތްއިރު ވެސް އޭނާގެ ދެފައިގެ އެއްވެސް އިހުސާސެއް ނެތެވެ. ސޮފްއާން ގެއިން ނުކުމެގެން ދިޔަތާ 15 ވަރަކަށް މިނެޓުގެ ތެރޭގައި ލިބުނު ޚަބަރާ އެކު އަންހެނުން އައިމިނަތު (އައިންތު) ދުވެފައި ސިއްހީ މަރުކަޒަށް ގޮސް ވަތްއިރު ވެސް ސޮފްއާން ބުނަމުންދަނީ އޭނާގެ ފައި އޮތް ކަން ވެސް ނޭނގޭ ކަމަށެވެ.
"...އަޅުގަނޑު ވެސް ގޮސް ފައިގަ އަތްލިން. އޭރު ވެސް ޑޮކްޓަރު ކައިރީގައި [ސޮފްއާން] ބުނޭ ނޭނގެއޭ ފައި އޮންނަ ކަމެއް ވެސް. ދެން ނުކުތީ އެ ތަނުން ރޮވޭތީ. އޭނާގެ ކުރިމަތީގައި ރޮއެފިއްޔާ މާ ދެރަވާނެތީ،" ގިސްލަމުން އައިންތު ކިޔައިދިނެވެ.
އެ ހާދިސާގައި ސޮފްއާންގެ މައިބަދައިގެ ތިން ބަދަ ވަނީ ގުޑައިފަ އެވެ. އައިޖީއެމްއެޗްގައި އޮޕަރޭޝަނެއް ވެސް ކުރި އެވެ. އެކަމަކު، އެ އިން އޭނާއަކަށް އެއްވެސް ލުޔެއް ނުލިބުނެވެ. އެނދުމަތިވެފައި އެއްވެސް ކޮޅަކަށް ފައި އަނބުރާ ވެސް ނުލެވި ޖެހުނީ އޮންނާށެވެ. އެ ތަނުގައި އޮންނަތާ 15 ވަރަކަށް ދުވަސް ފަހުން، ސޮފްއާން އިންޑިއާ އަށް ގެންގޮސް، ފިޒިއޮތެރެޕީ ދޭން ފެށި އެވެ. އެއާ އެކު، އޭނާ އަށް އަމިއްލަ އަށް އިށީނދެ އިނދެވޭވަރުވި އެވެ.
"އެ ހާލުގައި ފިރިމީހާ ފެނުނީމަ ވަރަށް ދެރަވި. ކުދިން ވެސް އަހާ ބައްޕަ އަށް އަދިވެސް ހިނގޭނެހޭ. ގުޅީމަ އެކަހަލަ އެއްޗެހި އަހަނީ،" އައިންތު އޭރު ހުރީ ރަށުގައި ކުދިން ބައިތިއްބާފައި ގޮސް ފިރިމީހާގެ ހިދުމަތުގަ އެވެ.
އެ ދުވަހަށް ފަހު ސޮފްއާންގެ ދިރިއުޅުން އެއްކޮށް ބަދަލުވީ އެވެ. އުފާވެރި ހަޔާތް އެންމެ ފަސްމިނިޓެއްހާއިރު ތެރޭގައި އެއްކޮށް ބަދަލުވެ، މާޔޫސްކަމުގެ ކަނޑެއްގެ ތެރެއަށް ގަންބާލި އެވެ.
އެކަމަކު، ހުރިހާ ކަމެއް ބަދަލުވިޔަސް، ބަދަލު ނުވެ އޮތީ އެންމެ ކަމެކެވެ. އެ ދެމަފިރިންގެ މެދުގައި އޮތް ލޯތްބާއި ކުލުނެވެ. ހާދިސާ އަށް ތިން އަހަރު ވެގެންދާއިރު ސޮފްއާންގެ އަތުން އައިންތު އެންމެ ފަހަރަކު ވެސް ދޫކޮށެއް ނުލަ އެވެ.
"ބޭނުމެއް ނޫން ފިރިމީހާ ދޫކޮށްލާފައި ދާކަށް. އެވަރު ކަމެއް ވީމަ ދޫކޮށްލާފައި ދިޔައީމާ ކިހާ ދެރަވާނެ. ވަރަށް ރަނގަޅު ފިރިއެއް ސޮފްއާނަކީ،" އައިންތުގެ ހިތުގައި ސޮފްއާނާ މެދު މުޅިން ވެސް އޮތީ ލޯތްބާއި ތައުރީފެވެ.
އައިންތުގެ އެ ލޯތްބާ މެދު ސޮފްއާން ވެސް ފަހުރުވެރިވެ އެވެ. އޭނާ ގަބޫލުކުރާ ގޮތުން އެ ވަރުގެ ރަނގަޅު އަނތްބެއް ނުލިބޭނެ އެވެ. ރޭޑިއޯ ޗެނަލް އެފްއެމްގެ ފޯރި އެންމެ ވަރުގަދައަށް ދިވެހިންގެ މެދުގައި އޮތް ދުވަސްވަތު، އޭގެ ތެރެއިން ބައްދަލުވެ، ލޯތްބަކަށް ބަދަލުވެ ދެމީހުން 2011 ވަނަ ޖެހި ކައިވެނީގެ ގޮތް އަދިވެސް ވަރުގަދަ އެވެ. އެ ލޯބީގެ ރަމުޒެއްގެ ގޮތުން 13 އަހަރާއި އުމުރުން އަށް އަހަރުގެ ދެ ދަރިން އެބަތިއްބެވެ.
"ހާދިސާގެ ކުރިން ވެސް ފަހުން ވެސް އަންހެނުންގެ އެހީތެރިކަން ލިބޭ. އެންމެ ބޭނުންވި ވަގުތު ހުރިހާ ކަމެއް ވެސް ކޮށްދޭ. ވަރަށް އުފާވޭ،" ސޮފްއާން ބުންޏެވެ.
އައިންތުއަކީ ވެސް ނުކުޅެދުންތެރިކަމެއް ތަހަމަލު ކުރަމުންދާ މީހެކެވެ. އުފަންވީއިރު ވެސް އޭނާގެ އެއް ލޮލަކަށް ނުފެނެ އެވެ.
އެ ހުރިހާ ކަމަކާ އެކު، ސޮފްއާނާއި އައިންތުގެ ދިރިއުޅުން މިހާރު އޮތީ އައިންތުގެ ރަށް ކަމަށްވާ ހދ. ނޮޅިވަރަމްގަ އެވެ. އަމިއްލަ ރަށުގައި ވިޔަސް ދެމަފިރިން އުޅެމުން ދަނީ ވަރަށް ދަތި ގޮތެއްގަ އެވެ. ދެމަފިރިން ނިދުމަށް ގެއަކުން ލިބުނީ އެންމެ ކޮޓަރިއެކެވެ. އެ މީހުން ހުރިހާ ކަމެއް އޮންނަނީ އެ ކޮޓަރި ތެރޭގަ އެވެ.
ދަރިން ނިދަނީ އެ ގެއާ މާ ދުރު ނޫން ހިސާބެއްގައި ހުރި އައިންތުގެ މައިންބަފައިންގެ ގޭގަ އެވެ. އެ ދެމަފިރިންނަށް ދަރިންނާ އެއް ގެއެއްގައި އުޅުމުގެ ނަސީބެއް އަދި ނެތެވެ.
"...މި ކޮޅުގައި އުޅެން ޖެހެނީ ދެ ތަނެއްގައި. މިތާ ކައްކާފައި އެ ތަނުގައި ނިދާފައި، ދަރިން ވެސް އުޅެނީ ދެ ތަނެއްގައި. ވަރަށް ދަތި. ކުޑަ އެއް ކޮޓަރި ތެރޭގައި، މަންމަމެން ގޭގައި ދެ ދަރިން ނިދަނީ. ފެންވަރަށް ދާނީ އެ ގެއަށް. ކުދިންގެ އެއްޗެއްހި ވެސް ހުންނާނީ އަހަރެމެންގެ ކޮޓަރީގައި،" ސޮފްއާން، އޭނާގެ މިހާރުގެ ދިރިއުޅުން ކިޔައިދިނެވެ.
އަމިއްލަ ރަށް ދޫކޮށް ނޮޅިވަރަމަށް ސޮފްއާން ދިރިއުޅުން ބަދަލުކުރީ ދެ ސަބަބެއް އޮވެގެންނެވެ. ނޮޅިވަރަމުން އައިންތު އަށް ގެވަޅެއް ލިބިފައި އޮތުމުންނާއި މަޑުއްވަރީގައި ކަސްރަތުކޮށް، ހަދަން މޫދަށް އެރި އުޅެވެން ނެތުމުންނެވެ. ނޮޅިވަރަމްގައި އެ ފުރުސަތު އެބައޮތެވެ.
އައިންތު އަށް ލިބިފައިވާ ގެވަޅު ހެދުމުގެ މަސައްކަތް މިހާރު ކުރިއަށް ގެންދެ އެވެ. އެ ފުރުސަތު އެ ދެމަފިރިންނަށް ހޯދައިދިނީ މަޑުއްވަރީގެ އެކުވެރިންތަކެކެވެ. އެ މީހުން ވަނީ ހިދުމަތް ޖަމިއްޔާއިން ހުޅުވާލި ފުރުސަތަކަށް ސޮފްއާންގެ ނަން ހުށަހަޅައިފަ އެވެ. އެ އިން ހޮވިގެން ހިދުމަތް ޖަމިއްޔާއިން ވަނީ ނޮޅިވަރަމްގައި މަސައްކަތް ފަށައިފަ އެވެ.
ގެ އިމާރާތް ކުރުމުގެ މަސައްކަތް ޖަމިއްޔާއިން ކުރަމުން އަންނައިރު، ކޮންމެ ދުވަހެއްގެ ހަވީރު ސޮފްއާން ފުރޮޅުލީ ގޮނޑީގައި ގޮސް އިންނަނީ އެ ތަނުގެ ކުރިމަތީގަ އެވެ. އެ ތަނުގައި ބަހައްޓާ ކޮންމެ ގަލަކާ ގުޅިފައިވަނީ ސޮފްއާންގެ އުއްމީދުތަކާއި ހުވަފެނެވެ.
"ވަރަށް އުއްމީދު ކުރަން، ކުދިންގެ އުއްމީދަކީ ވެސް އެއީ، ވަރަށް ބޮޑެތި ބަދަލުތައް އަންނާނެ ގެ ނިމުމުން. ދަރިންނާ އެއް ތަނެއްގަ ދިރިއުޅެން ލިބުނީމަ ވާ އުފާވެރިކަން އެވެސް ވަރަށް ބޮޑު ބަދަލަކަށް ވާނީ،" ސޮފްއާން ބުންޏެވެ.
އޭނާއާ އެކު ގެ ބަލާލަންދާ ކޮންމެ ފަހަރަކު ހަގު ދަރިފުޅުގެ ސުވާލަކަށް ވެސް ވެފައި އޮންނަނީ އެ ގެއަށް ބަދަލުވެވޭނީ ކޮން އިރަކުންތޯ އެވެ. އެ ސުވާލަށް ސޮފްއާންގެ ޖަވާބެއް ނެތެވެ. ގަބޫލު ކުރެވޭ ގޮތުން އޭނާގެ އެ އުއްމީދު ހާސިލުވާން އަދި ވަރަށް ދުވަސް ވެސް ނަަގައިފާނެ އެވެ.
ގޭގެ އިމާރާތުގެ މަސައްކަތް ނިމުނަސް އެއީ އަދި ފެނާއި ނަރުދަމާ ގުޅާާފަައިވާ ސަަރަހައްދެއް ނޫނެވެ. މީހުން އާބާދުވާން ނުފަށާ އޮތް އެ ސަރަހައްދުގެ މަގުތައް ވެސް ނުހަދަ އެވެ. އެކަމަށް ހޭދަވާނީ ކިހާ ދުވަހެއް ކަން އެނގޭ މީހަކާ ސޮފްއާނަކާ ދިމަލެއް ނުވި އެވެ.
"އިމާރާތް ކުރުން ރަސްމީކޮށް ފެށުނީ ނޮވެމްބަރު މަހު. ދެ ތިން މަސް ތެރޭ ނިމޭނެ ކަމަށް ބުނި، އެކަމަކު ކަރަންޓުގެ ކަންކަން ނިމުނީމާ ގެ ހަވާލު ކުރާނީ. އެކަން ވަރަށް ދަތިވާނެ ކަމަށް މި ބެލެވެނީ،" ސޮފްއާން ބުންޏެވެ.
އައިންތުގެ މިހާރުގެ އެންމެ ބޮޑު އުއްމީދަކީ ވެސް ގޭގެ މަސައްކަތް ނިމި، ވީ އެންމެ އަވަހަކަށް އެ ތަނަށް ދިރިއުޅުން ބަދަލުކުރުމެވެ.
"ކުދިންނާ އެއްގެއެއްގައި ދިރިއުޅެވޭނެ ދުވަހެއް އެންމެ އުއްމީދު ކުރެވެނީ. މިހާރު ކަރަންޓު ދާ ދުވަހެއްގައި ވެސް ހަމަ ހިތަށް އަރަނީ ހޭލައިގެން ރޮއެފާނެއޭ. ބައެއް ރޭރޭ އެހެންވެ އަންނަން ދަރިން ކައިރިއަށް މަންމަމެން ގެއަށް،" އައިންތު ބުންޏެވެ.
ސޮފްއާނާއި އައިންތުގެ ދިރިއުޅުން އެފުށްމިފުށަށް ޖެހިފައި އޮތަސް، ދެ ފަރާތުގެ އާއިލާ އިން ވެސް އެ ދެ މީހުންނަށް ވަރަށް ބަލަ އެވެ. ސޮފްއާންގެ އެކުވެރިން ވެސް އޭނާއަށް އެހާ ހެޔޮކޮށް ހިތަ އެވެ.
"ވަރަށް ގިނަ ރައްޓެހިން ގުޅާނެ، ހާލު ބަލަން ގުޅާނެ، ކަމެއް އޮތިއްޔާ ބުނާށޭ ބުނާނެ. އެކަމަކު ކޮންމެ ފަހަރަކު ނުކެރޭނެ ކަމެއް އޮތަސް ބުނާކަށް. ކޮންމެ މީހަކު ވެސް ބުނާނެ ދަތިވާ ކަމެއް އޮތިއްޔާ ބުނާށޭ. އެކަމަކު ދަތިވާހާ ކޮންމެ ކަމެއްގެ ވާހަކަ ހިއްސާއެއް ނުކުރޭނެ،" ސޮފްއާން ބުންޏެވެ.
"އާއިލާ އިން ވެސް ވެދޭ އޭހިތެރިކަމާއި ރަށުގެ ރައްޔިތުންގެ ފޯރުކޮށްދޭ އެހީ އަދި ސަރުކާރުން ދޭ އެލަވެންސް އިން ދިރިއުޅުމުގެ ކަންކަން މި ހަމަޖައްސަނީ."
ވަރަށް ހަރަކާތްތެރިކޮށް، ގައަށް ފުޓްބޯޅަ ކުޅެ އުޅުނު ސޮފްއާނަށް މިހާރުގެ ދިރިއުޅުން ކިތަމެހާ ވެސް ފޫއްސެވެ. އާމްދަނީ ހޯދަން ކުރާނެ ކަމެއް، ކުރެވޭނެ ކަމެއް އޭނާއަކަށް ނެތެވެ. އެކަމަކު ވެސް އުއްމީދަކީ އެފަދަ މަސައްކަތަކަށް އަދިވެސް ނުކުމެވޭނެ ދުވަހެކެވެ. ހާއްސަކޮށް ވިޔަފާރީގައި އުޅުމުގެ އުއްމީދެއް ސޮފްއާންގެ އެބަ އޮތެވެ.
ދިރިއުޅުން ބަދަލުކޮށްލި ހާދިސާއަށް ފަހު، ފުރޮޅުލީ ގޮނޑިއެއްގައި ސޮފްއާންގެ ދުވަސްތައް ހޭދަކުރާއިރު، އެ ހާލަތުން އޭނާ އަށް މިންޖުވެވިދާނެ ކަމަށް ޑޮކްޓަރުން ދޭ އުއްމީދު ވަރަށް ކުޑަ އެވެ. އެހެންވެ، ސޮފްއާން މިހާރު ގަބޫލުކޮށްގެން ހުރީ އެއީ އޭނާގެ މުސްތަގުބަލު ވެސް ކަމެވެ. ދިރިއުޅުމުގެ ހުރިހާ ކަމެއް ވެސް ބިނާކުރަން ޖެހޭނީ އެ ހަގީގަތުގެ މައްޗަށް ކަމެވެ. އެ ހަގީގަތުގެ މަތީގައި ސޮފްއާންގެ އޮތީ އަޒުމެކެވެ.
"އުއްމީދު ކަނޑާނުލާށޭ. ކޮންމެ ކަމެއްގަ ވެސް ކެތްތެރިކަމާ އެކު ކުރިމަތިލާށޭ. ނާއުއްމީދު ނުވެ އަބަދުވެސް ކުރިއަށް ދެވޭނެ ކަމުގެ އުއްމީދުގަ ހިތްވަރު އެލުވާނުލާ. ބަލި މީހެއް ކަމަށް ނުދެކި، އެ ހިތްވަރު ގެއްލުވާނުލާށޭ،" އަމިއްލަ ނަފުސަށް ސޮފްއާން ދޭ ހިތްވަރަކީ މިއީ އެވެ.
އެ ހިތްވަރު އޭނާ އަށް ލިބެނީ އަންހެނުން އައިންތަކީ ވެސް ފިރިމީހަ އަށް ހެޔޮ، ރަނގަޅު އަންބަކަށް ވުމުންނެވެ. އެ ލޯތްބެއް ހަމަ ހަގީގަތުގައި ވެސް ބަދަލެއް ނުވި އެވެ.