އަލީ އައްބާސް ޒަފަރު ޑައިރެކްޓްކުރާ "މިސްޓަ އިންޑިއާ" ޓްރިލޮޖީގެ ފުރަތަމަ ބައިގައި ފިލްމުގެ ވިލަން މޮގެމްބޯގެ ރޯލް ކުޅެން ޝާހްރުކް ޚާނަށް ހުށަހަޅާފައިވާ ކަމަށް ރިޕޯޓްތައް ބުނެފި އެވެ.
މީގެ 33 އަހަރު ކުރިން ޝޭކަރް ކަޕޫރް ޑައިރެޓްކޮށް، އަނިލް ކަޕޫރް ޓައިޓްލް ރޯލް ކުޅުނު "މިސްޓަ އިންޑިއާ" އައި މޮގެމްބޯގެ ރޯލް ކުޅުނީ މަރުވެފައިވާ ކުރީގެ މަޝްހޫރު އެކްޓަރު އަމްރިޝް ޕޫރީ އެވެ. އަދި އެ ރޯލަކީ ހިންދީ ސިނަމާގެ އައިކޮނިކް ވިލަންގެ ތެރެއިން އެންމެ މަގުބޫލު އެެއް ކެރެކްޓާ އެވެ.
ބޮލީވުޑް ހަންގާމާ އިން ބުނިގޮތުގައި "މިސްޓަ އިންޑިއާ 2" ގެ މޮގެމްބޯލްގެ ރޯލް ހުށަހެޅުމުން ޝާހްރުކް ވަނީ އެ ފިލްމަށް އެއްބަސްވާން ނިންމައިފަ އެވެ. މީޑިއާތަކުން ކުރިން ބުނެފައިވާ ގޮތުގައި މި ފަހަރު މިސްޓަ އިންޑިއާގެ ކެރެކްޓާ ކުޅޭނީ ރަންވީރު ސިންގެވެ.
އަދި މި ދެ މީހުންނާ އެކު ޝާހްރުކްގެ ފިލްމު ކުންފުނި ރެޑް ޗިލީޒް އެންޓަޓައިންމަންޓްގައި ވަރަށް ގިނަ އަދަދެއްގެ ވީއެފްއެކްސްއާ އެކު "މިސްޓަ އިންޑިއާ 2" ގެ ލުކް ޓެސްޓް ހަދައި، ޕްރޮމޯއެއް ޝޫޓްކުރަން ހަމަޖެހިފައިވެ އެވެ. ޝާހްރުކް މިހާތަނަށް އަދި އަލީއާ އެކު ފިލްމެއްގެ މަސައްކަތްކޮށްފައި ނުވާތީ، މި ފިލްމާ ބެހޭ ގޮތުން ދެކެވޭ ވާހަކަތައް ތެދަކަށްވެއްޖެ ނަމަ މިއީ އެ ދެ މީހުން އެކީގައި މަސައްކަތްކުރާ ފުރަތަމަ ފަހަރަށް ވާނެ އެވެ.
ނަމަވެސް މިކަމާ ބެހޭ ގޮތުން އަލީ އާއި ޓްރިލޮޖީ ޕްރޮޑިއުސްކުރާ ޒީ ސްޓޫޑިއޯސް އިން އެއްވެސް އެއްޗެއް ނުބުނެ އެވެ. އަލީ މި މަހުގެ 17 ވަނަ ދުވަހު ކުރި ޓްވީޓެއްގައި ބުނީ ޓްރިލޮޖީ އޮތީ ސްކްރިޕްޓިން މަރުހަލާގައި ކަމަށާއި އެ ނިމުމުން ފިލްމަށް ކާސްޓުން ނެގުމުގެ މަސައްކަތް ފަށާނެ ކަމަށެވެ.
"މިސްޓަ އިންޑިއާ 2" ސިނަމާތަކަށް ގެންނަން އަމާޒު ހިފާފައި ވަނީ 2022 ގަ އެވެ.
އަލީ އެންމެ ފަހުން ގެނެސްދިން ފިލްމަކީ މިދިޔަ އަހަރު ރިލީޒްކުރި ސަލްމާނާއި ކެޓްރީނާ ކެއިފްގެ "ބާރަތު" އެވެ.