ސްޓްރާސްބޯގް (އޭޕްރީލް 30) - އަންނަ ސީޒަނުގައި ފްރާންސްގެ ޕީއެސްޖީ ގައި ކޯޗު މައުރީސިއޯ ޕޮޗެޓީނޯ އާއި ފޯވާޑް ކިލިއަން އެމްބާޕޭ ޓީމުގައި ތިބޭނެ ކަމުގެ ޔަގީންކަން ދިންކަން ޕޮޗެޓީނޯ ދޮގު ކޮށްފި އެވެ.
ފްރާންސް ލީގުގައި ސްޓްރާސްބޯގާ ދެކޮޅަށް ކުޅުމުގެ ކުރިން ބޭއްވި ޕްރެސް ކޮންފަރެންސްގައި، އޭނާ އާއި އެމްބާޕޭ ކްލަބުގައި ހުރުމުގެ ފުރުސަތު އޮތީ ކިހާވަރަކަށް ތޯ އެހުމުން އޭނާ ވަނީ 100 ޕަސެންޓު ޔަގީންކަން ދޭކަމަށް ބުނެފަ އެވެ.
އެމްބާޕޭ މި ސީޒަން ނިމުމުން ޕީއެސްޖީ އާއެކު ކޮންޓްރެކްޓް އާ ނުކުރާނެ ކަމަށް ބުނެފައިވާއިރު، ސީޒަން ނިމުމަށް ފަހު ސްޕެއިންގެ ރެއާލް މެޑްރިޑާ ގުޅެން އެއްބަސްވެފައި ވާކަމަށް މީޑިއާ ރިޕޯޓްތައް ހާމަ ކުރެ އެވެ. މިދިޔަ ހަފްތާގައި ފްރާންސް ލީގުގެ ޗެމްޕިއަންކަން ހޯދި ނަމަވެސް ސަޕޯޓަރުންގެ ހިތްހަމަ ނުޖެހުންތަކާ އެކު ޕޮޗެޓީނޯ އަށް ވަނީ މަގާމުގެ ޕްރެޝަރު ބޮޑުވެފައެވެ.
ޕީއެސްޖީގެ ކޯޗު ޕޮޗެޓީނޯ އޭނާގެ ވާހަކަތައް ސާފުކޮށްދެމުން ބުނީ އެނާ އާއި އެމްބާޕޭ ވެސް މިވަގުތު ތިބީ ކުލަބަށް ވަފާތެރިކަމާ އެކުގައި ކަމަށާއި ނަމަވެސް ކުލަބުގެ އެންމެ ފަހުގެ ނިންމުމަށް އެ ދެ ފަރާތަށް ވެސް ބާރު ފޯރުވެން ނެތް ކަމަށެވެ.
"އަހަރެން އެހެނެއް ނުބުނަން. އެއީ އެއް ނޫން އަހަރެން ދޭން ބޭނުންވި މެސެޖަކީ،" ހިތްހަމަ ނުޖެހިފައި ހުރެ ޕޮޗެޓީނޯ ބުންޏެވެ.
"އަހަރެން ހާމަކުރީ މިއަދުގެ ހާލަތު އޮތް ގޮތް، އަންނަ ސީޒަނުގެ އެއް ނޫން. ސުވާލާއި ޖަވާބު ރަނގަޅަށް އަޑު އެހުމަށް ފަހު އަހަރެން ބުނާ އެއްޗެއްގެ މާނަ އޮޅޭހެން ހެޑިންތައް ނުއުފައްދަން އެދެން. ސުވާލަކަށް ވީ، 'މިއަދު ކިތައް ޕަސެންޓު ޔަގީންކަން އެބަ އޮތްތޯ އަންނަ ސީޒަނުގައި ކުލަބުގައި ހުންނާނެކަން؟' އަހަރެން ޖަވާބު ދިނީ، 'މިއަދު، އަހަރެންނާއި ކިލިއަން (އެމްބާޕޭ) އަށް ވެސް ހަމަ 100 ޕަސެންޓް' އޭ."
"މިއަދު، 100 ޕަސެންޓް. މިއަދު އަހަރެންނާއި ކިލިއަން މިތިބީ ކުލަބަށް 100 ޕަސެންޓް ކޮމިޓްމަންޓް ދީގެން، ދެން ކުރިޔަށް އޮތް ތަނުގައި ވާ ގޮތެއް ބަލަން ޖެހޭނީ، އެއީ ގޮތް ނިންމުމަކީ އަދި ވަކި ކަމެއް. އެކަމަކު އަހަރެން މި ބުނަނީ މިއަދުގެ ވާހަކަ."
އޭނާ މިހެން ބުނީ ލީގުގައި މިރޭ ރަށުން ބޭރުގައި ސްޓްރާސްބޯގާ ދެކޮޅަށް ކުޅެ 3-3 އިން އެއްވަރުވި މެޗަށް ފަހު ވާހަކަ ދައްކަމުންނެވެ.
މިދިޔަ ހަފްތާ އެޓީމުން ލީގު ޗެމްޕިއަންކަން ކަށަވަރު ކުރީ ވެސް އަމިއްލަ ދަނޑުގައި ކުޅުނު މެޗު އެއްވަރު ކޮށްލައިގެންނެވެ. މިރޭގެ މެޗުގައި އެމްބާޕޭ ވަނީ ދެ ލަނޑު ޖަހައިދީފަ އެވެ. މިއާ އެކު އޭނާ ވަނީ މިހާތަނަށް ލީގުގައި 24 ލަނޑު ޖަހައިފަ އެވެ.
ލިއޮނެލް މެސީ އާއި އެމްބާޕޭ އަދި ނޭމާ ވެސް ކުޅުނު މި މެޗުގެ ދެވަނަ މިނިޓުގައި އަމިއްލަ ދަނޑުގައ ސްޓްރާސްބޯގަށް ލީޑު ނަގައިދިނީ ކުރިން ޕީއެސްޖީ އާއި ސްޕެއިންގެ އެތުލެޓިކޯ މެޑްރިޑާއި ސެވިއްޔާ އަދި ވެލެންސިއާ އަށް ވެސް ކުޅުނު މިޑްފީލްޑަރު ކެވިން ގަމެއިރޯ އެވެ. އިރުކޮޅެއް ފަހުން އެޓީމު ދެވަނަ ލަނޑެއް ޖެހި ނަމަވެސް ވީއޭއާރު ބަލައި އެ ގޯލު ބަލައެއް ނުގަތެވެ.
ނޭމާގެ އެހީތެރި ކަމާ އެކު އެމްބާޕޭ ޕީއެސްޖީ އަށް އެއްވަރު ކޮށްދިނީ 23 ވަނަ މިނިޓުގަ އެވެ. އެމްބާޕޭގެ ޕާހަކުން މެޗުގެ 64 ވަނަ މިނިޓުގައި ޕީއެސްޖީ އަށް ލީޑު ނަގައިދިނީ އަޝްރަފް ހަކީމީ އެވެ. އަދި ހަތަރު މިނިޓު ފަހުން އެމްބާޕޭ ވަނީ އިތުރު ލަނޑެއް ޖަހައި ލީޑު ފުޅާ ކޮށްދީފަ އެވެ. މިއީ ޕީއެސްޖީން މި ސީޒަނުގައި ޖެހި 101 ވަނަ ލަނޑެވެ.
ޕީއެސްޖީގެ ތިންވަނަ ލަނޑަށް ފަހު ސްޓްރާސްބޯގުން އެއްފަހަރާ ގެނައި ތިން ބަދަލާ އެކު، 75 ވަނަ މިނިޓުގައި ޕީއެސްޖީގެ ލީޑު ކުޑަވީ މާކޯ ވެރާޓީ އަތުން ބައިކޮޅަށް ވަން ލަނޑުންނެވެ. މި ލަނޑު ވަނީ ކޯނަރަކުން ލިބުނު ބޯޅަ، ބަދަލު ކުޅުންތެރިއެއް ގޮތުގައި އެރި ފޯވާޑް ހަބީބް ޑިއާލޯ ބޮލުން ފޮނުވާލި ބޯޅަ ވެރާޓީ ގައިގައި ޖެހިފަ އެވެ. އަދި އެޓީމުން އެއްވަރުކުރި ލަނޑު މެޗުގެ އިތުރު ވަގުތުގައި ޖަހައިދިނީ، 82 ވަނަ މިނިޓުގައި ކުޅެން ނުކުތް ޑިފެންޑަރު އެންތޮނީ ކަސީ އެވެ.