އަންނަ މަހު ބާއްވާ ރިޔާސީ އިންތިހާބުގައި ވާދަކުރައްވާ މޯލްޑިވްސް ނޭޝަނަލް ޕާޓީ (އެމްއެންޕީ) ގެ ރިޔާސީ ކެންޑިޑޭޓް މުހައްމަދު ނާޒިމް އައްޑޫ ތަރައްގީ ކުރައްވާނެ ގޮތުގެ ޕްލޭނެއް ހާމަކުރައްވައިފި އެވެ.
އައްޑޫ އާއި ފުވައްމުލަކަށް ކުރައްވާ ކެމްޕެއިން ދަތުރުގައި މިރޭ އައްޑޫ ރައްޔިތުންނާ ވަހަކަ ދައްކަވަމުން ނާޒިމް ވިދާޅުވީ އައްޑޫ އަށް ތަރައްގީ ގެންނާނީ ހިތަދޫން ފެށިގެން ހުޅުމީދޫއާ ހަމައަށް ބްރިޖަކުން ގުޅުވާލައިގެން ކަމަށެވެ.
އައްޑޫގެ ކޮންމެ ރަށެއް ވަކިން ތަރައްގީ ކުރައްވާނެ ގޮތުގެ ވީޑިއޯ ރިޕޯޓެއް މިރޭ ވަނީ ދައްކާފަ އެވެ.
ނާޒިމްގެ ވެރިކަމެއްގައި:
- 5،000 ކޮންޓެއިނަރުގެ ބައިނަލްއަގުވާމީ ބަނދަރެއް (ޕޯޓްއަކާއި ޑިއުޓީ ފްރީ ޒޯނަކާ އެކު) ތަރައްގީ ކުރުން
- މަސްވެރިން ބާނާ މަސް ގަނެ، ފިނިކޮށް، ރައްކާކޮށް އެކްޕޯޓުކުރުމަށާއި ދަޅުގައި ބަންދުކޮށް ރާއްޖޭން ބޭރަށް އެކްސްޕޯޓު ކުރުމަށް ކާރުހާނާއެއް އެޅުން
- ހުޅުދޫ މީދޫ އާއި ހިތަދޫ ބްރިޖަކުން ގުޅުވާލުން
- 20،000 އެނދުގެ ސިޓީ ހޮޓަލެއް އެޅުން
- ތީމް ޕާކެއް އެޅުން
- ޒަމާނީ ފެންވަރުގެ ޔޮޓް ޔާޑެއް ގާއިމް ކުރުން
- ހިތަދޫގައި ފަތުރުވެރިކަމަށް 3،000 އެނދާއެކު ޝޮޕިން މޯލަކާއި ސިނަމާއެއް ތަރައްގީ ކުރުން
- ކާރާއި ސައިކަލު ރޭސް ޖަހާނެ ޓްރެކެއް އެޅުން
- ކޮންވެންޝަން ސެންޓަރެއް އެޅުން
- ސްކޫލުތަކާއި ތަފާތު އެކި ހުނަރު ދަސްކޮށްދޭ މަރުކަޒެއް އެޅުން
- ބަލިމީހުންނާ އެކީ އަންނަ މީހުންނަށް ތިބެވޭނެ ތަނަކާ އެކު ހޮސްޕިޓަލެއް އެޅުން
- ހިތަދޫގައި އޮލިމްޕިކް ފެންވަރުގެ ކުޅިވަރުތައް ކުޅެވޭނެ ތަނެއް އެޅުން
- ގަން-ފޭދޫ ސަރަހައްދުގައި އިސްލާމީ ތައުލީމާއި ދީނީ ކަންކަން ފަތުރައިދޭނެ އިސްލާމީ މަރުކަޒެއް އެޅުން
- ގަމުގައި މި ޒަމާނުގެ ޔޮޓް މެރީނާއެއް، ކްރޫޒް ޓާމިނަލަކާ އެކު ތަރައްގީ ކުރުން.
- މަރަދޫގައި ރާއްޖެއިން ބޭރުން ކުދިން ކިޔަވަން އަންނަ ފެންވަރުގެ ޔުނިވާސިޓީއެއް އެޅުން
- ފަތުރުވެރިން ރާއްޖެ އައިސް ދާއިރު ގެންދާނެ "ސްވެނިއާ" ނުވަތަ ހަދިޔާ ތައްޔާރު ކުރާނެ ކާރުހާނާއެއް މަރަދޫގައި ގާއިމް ކުރުން.
- މަރަދޫފޭދޫގައި މި ޒަމާނުގެ ހުރިހާ ވަސީލަތްތަކާ އެކު އިޖުތިމާއީ މަރުކަޒަކާއި ދަތުގެ ފަރުވާދޭ މަރުކަޒެއް ގާއިމް ކުރުން
- ހުޅުދޫގައި ފަތުރުވެރިކަމުގެ ދާއިރާއިން ތައުލީމާއި ތަމްރީނު މަތީ ފެންވަރުގައި ކިޔަވައިދީ ބޭރުގެ ދަރިވަރުންނަށް ވެސް ފުރުސަތު ދެވޭނެ މަރުކަޒެއް އެޅުން
- ހުޅުދޫގައި 100 އެނދުގެ ހޮސްޕިޓަލެއް އެޅުން
- ޑިނގާ ދިރުވާ އާލާކޮށް ރާއްޖެ އާއި ރާއްޖެއިން ބޭރަށް އެކްސްޕޯޓު ކުރާނެ ކާރުހާނާއެއް ހުޅުދޫގައި ގާއިމް ކުރުން
- މީދޫގައި ދަނޑުވެރިކަން ތަރައްގީކޮށް މާކެޓަށް ނެރެވޭނެ މަގު ފަހިކޮށްދިނުން
- ދާރުލްއާސާރެއް ގާއިމް ކުރުން
- އަރަބި އިސްލާމް ތައުލީމުދޭ ދުނިޔޭގެ ފެންވަރުގެ މަރުކަޒެއް ގާއިމް ކުރުން
- މުޅި އަތޮޅުގައި ތިބި އުމުރުން ދުވަސްވީ މީހުން ބަލަހައްޓާނެ ނާސިން ހޯމެއް ގާއިމް ކުރުން
- ގަމުގައި ދެނުކުގެ އެއާލައިނެއެއް ގާއިމް ކުރުން
- ގަމުގައި ޕައިލެޓުން ތަމްރީނު ކުރާނެ މުއައްސަސާއެއް އެޅުމާއި ގަމުގެ އެކި ހިސާބުގައި ލަގްޒަރީ ވިލާ އެޅުން
ނާޒިމާއި އޭނާގެ ރަނިންމޭޓް ޑރ. އަހުމަދު އަދީލް ނަސީރު ވަނީ އިއްޔެ އާއި މިއަދު އައްޑޫގެ ގޭގެއަށް ޒިޔާރަތް ކުރައްވާފަ އެވެ.
ނާޒިމް ފުވައްމުލަކަށް ވަޑައިގަތުމަށް ހަމަޖެހިފައި ވަނީ މާދަމާ އެވެ. އެ ރަށުގައި ބާއްވާ ކެމްޕެއިން ޖަލްސާގައި އެ ރަށަށް ނާޒިމް ކޮށްދެވާނެ ކަންކަމުގެ ޕްލޭނެއް ހާމަކުރައްވާނެ އެވެ.
