ރާއްޖޭގައި ޒަމާނުއްސުރެ އޮންނަ ބަދަލު ހިފުމާއި ޒާތީވުން ނިމުމަކަށް ގެނެސް އެންމެން ގުޅިގެން މަސައްކަތް ކުރެވޭނެ ގޮތްތައް ހޯދަންޖެހޭ ކަމަށާއި އެ މަނިކުފާނުގެ ސަރުކާރު ހިންގާނީ އެ ގޮތަށް ކަމަށް ކުރިއަށް އޮތް ފަސް އަހަރަށް ރާއްޖޭގެ ވެރިކަމަށް އައްޔަން ކުރަން ރައްޔިތުން އިންތިހާބުކުރި ޑރ. މުހައްމަދު މުއިއްޒު ވިދާޅުވެއްޖެ އެވެ.
ޕީއެންސީގެ ރައީސްކަމަށް އިއްޔެ އައްޔަންކުރި އިންތިހާބީ ރައީސް މުއިއްޒު އެހެން ވިދާޅުވީ "މިހާރު" އަށް މިދިޔަ އަންގާރަ ދުވަހު ދެއްވި ހާއްސަ އިންޓަވިއުއެއްގަ އެވެ.
ބަދަލު ހިފުމާއި އަނިޔާވެރިވުމާއި ޒާތީވުމާ ދެކޮޅު ވިސްނުން މުއިއްޒު ގެންގުޅުއްވި ނަމަވެސް މިދިޔަ ހޮނިހިރު ދުވަހު ބޭއްވި ރިޔާސީ އިންޔިހާބު އެ މަނިކުފާނު ކާމިޔާބު ކުރެއްވުމަށް ފަހު ކުރެއްވި ޓުވީޓެއްގައި ކުރީގެ ރައީސް އަބްދުﷲ ޔާމީންގެ ގާނޫނީ ޓީމުގެ އިސް ވަކީލް ޑރ. މުހައްމަދު ޖަމީލް އަހުމަދު ވަނީ ވެރިކަން ބަދަލުކުރުމުގެ މަރުހަލާގެ ތެރޭގައި މި ސަރުކާރުގެ ބައެއް ކުންފުނިތަކުގެ ވެރިން ފުރުން މަނާކުރުމަށް ގޮވާލައްވައިފަ އެވެ.
އެކަމާ ގުޅޭ ގޮތުން ސުވާލު ކުރުމުން އިންތިހާބީ ރައީސް މުއިއްޒު ވިދާޅުވީ، ވަކި މީހަކު ކުރިން ވަކި ގޮތެއް ހެދީމާ އޭގެ ބަދަލުގައި ޒާތީވުމާއި ބަދަލު ހިފުމުގެ ބޭނުމުގައި ކަންކަން ނުކުރައްވާނެ ކަމަށެވެ.
"ނުކުރާނަން އެކަމެއް،" މުއިއްޒު ވިދާޅުވި އެވެ.
އެ މަނިކުފާނު ވިދާޅުވި ގޮތުގައި އެއްވެސް މީހެއްގެ ޕާސްޕޯޓް ހިފަހައްޓާނީ ރަސްމީ އިދާރާއަކުން އަމުރެއް ނެރެގެންނެވެ.
"އެއީ އެ ބޭފުޅުންގެ [މިނިވަން މުއައްސަސާއެއްގެ] ކަމެއް. އަޅުގަނޑު އިސްވެ އަންގައިގެން އަދި އަޅުގަނޑުގެ ފަރާތުން އަޅުގަނޑުމެންގެ ސަރުކާރުގެ ޓީމުގައި ހިމެނޭ އެއްވެސް ބޭފުޅަކު އެ ކަހަލަ ކަމެއް [އުސޫލުން ބޭރުން ކަންކަން ކުރުން] ކުރަން އުޅުނަސް އެ އަކަށް އަޅުގަނޑު ޖާގައެއް ނުދޭނަން،" އިންތިހާބީ ރައީސް ވިދާޅުވި އެވެ.
މުއިއްޒު ވިދާޅުވީ، އެ މަނިކުފާނު އަންގަވައިގެން ކަމެއް ސަރުކާރުން ކަމެއް ކުރާ ނަމަ އެ ކަމެއް ލިޔެކިޔުމުން ފެންނަން އޮންނާނެ ކަމަށެވެ. ވިދާޅުވީ، މުއައްސަސާއަކުން ވަކި ކަމެއް ކުރަން ވެސް އެ މަނިކުފާނު ނާންގަވާނެ ކަމަށެވެ.
މުއިއްޒު ތަކުރާރުކޮށް ވިދާޅުވީ، މި ސަރުކާރުގެ އިސްބޭފުޅުންގެ ޕާސްޕޯޓް ހިފަހައްޓައި ފުރިޔަ ނުދިނުން ފަދަ ކަންކަން "ޒާތީ ގޮތުން ބަދަލު ހިފަންށޭ ކިޔާފައި ނުކުރާނަން" ކަމަށެވެ.
"އެހެނެއް ނޫން ޑިއު ޕްރޮސެސްގެ ތެރެއިން ބަލާ ކަމެއް ބަލާފައި ވަކި ބޭފުޅެއްގެ ޕާސްޕޯޓް ހިފަހައްޓަން ވެއްޖެ ނަމަ އެ ކަން ކުރާ މުއައްސަސާއަކުން ކުރާނެ. އެ އޮންނަ އުސޫލުން ދާނީ. ޕްރޮސީޖާ އިން ބޭރުން، ނިޒާމުން ބޭރުން މީހުންނާ ދޭތެރޭ ކަންކަން ކޮށް، ބިރުވެރިކަން ކުރިމަތި ކުރުވައި އަނިޔާވެރިކަން ނިމުމަކަށް ގެންނާނަން ހަގީގަތުގައި ވެސް،" އެ މަނިކުފާނު ވިދާޅުވި އެވެ.
މުއިއްޒު ވިދާޅުވީ، "ރައީސް އޮފީހުން އަތްބާނައިގެން" އެ މަނިކުފާނުގެ ސަރުކާރުގައި އެއްވެސް ކަމެއް ނުކުރައްވާނެ މިނިވަން މުއައްސަސާތައް ހިންގާނީ މިނިވަންކޮށް ކަމަށެވެ. އަދި މިނިވަން މުއައްސަސާއަކަށް ވަކި ބޭފުޅެއްގެ ނުފޫޒު އޮތް ކަމުގެ ޝަކުވާ ލިބިވަޑައިގެންފި ނަމަ އެކަން ވެސް ބައްލަވާނެ ކަމަށް މުއިއްޒު ވިދާޅުވި އެވެ.
މުއިއްޒު ކެމްޕެއިންގައި އެންމެ ބޮޑަށް "ވިއްކި" އެއްކަމަކީ ވެސް އަނިޔާވެރިވުމާއި ބަދަލު ހިފުމާ ދެކޮޅު ވާހަކަތަކެވެ.