ދިވެހި ފުޓުބޯޅަ ދެކެ ލޯބިވާ މީހުންނާއި އެތައް އާންމުންނެއްގެ ހިތްތަކާ މިދިޔަ މަހެއްހާ ދުވަހު ކުޅެލީ އެ ދެ ކޯޗުންނެވެ. އަލުން އެނބުރި ދަނޑަށް މީހުން ވެއްދުމުގެ ޝަރަފު ޝާޒުލީ މުހައްމަދު (ޝާޒު) އާއި އޭނާގެ ކުރީގެ އެސިސްޓެންޓް ކޯޗު އަލީ ނިސްތާރު މުހައްމަދަށް ނޫން މީހަކަށް ލިބިގެން ނުވާނެ އެވެ. ދެ ކޯޗުންގެ ހިޔާލުގެ ސަބަބުން އަޑިއަޅާލާފައިވާ ރާއްޖޭގެ ފުޓުބޯޅައިގެ ފޯރި އަލުން ގެނެވޭނެ ގޮތުގެ ބަހުސެއް ފެށިއްޖެ އެވެ. ދިވެހިން އަދިވެސް އެ ކުޅިވަރު ދެކެ ލޯބިވާކަން ވެސް ޝާޒު އާއި ނިސްތާރުގެ މަސައްކަތުން އެނގިއްޖެ އެވެ.
ރާއްޖޭގެ ފުޓުބޯޅައިގެ ފޯރި ކެނޑިގެން އުޅޭތާ އެތައް ދުވަހެއް ފަހުން މުޅި ގައުމުގައި ގައުމުގައި ގޯލްޑް ކަޕް ފުޓުބޯޅަ މުބާރާތުގެ ވާހަކަ ނޫން އެހެން ވާހަކަތަކެއް ނީވުނީ ޝާޒު އާއި ނިސްތާރު އެކުލަވައިލި ޕްލޭނާ އެކު އެވެ. ގަލޮޅު ދަނޑު ފުރައިލުމަކީ ހަމައެކަނި ދަމާ ފޮތިގަނޑަކުން ކުރެވޭނެ ކަމެއް ނޫންކަން އެ ދެ ކޯޗުން ދައްކައިދިނީ ބައެއް މީހުންގެ ދެކޮޅު ހެދުންތަކާ ވެސް އެކު އެވެ.
ފައިނަލާ ހަމައަށް އައިރު މުޅި ރާއްޖެ އޮތީ އައްޑޫ ނުވަތަ އޭދަފުއްޓަށް ވެފަ އެވެ. އޮފީސްތަކުގައި ވެސް ދެ ބަޔަށް ބެހި އެއްބަޔަކު އެ މެޗުގައި ތާއީދު ކުރީ އޭދަފުއްޓަށެވެ. އަނެއް ބަޔަކު އައްޑު އަށެވެ. އެހާ ވެސް ފޯރިގަދަ އެވެ. ހާއްސަކޮށް ފައިނަލްގައި ގަލޮޅު ދަނޑުގައި ސަޕޯޓަރުންގެ ފަރާތުން ފެނުނު މަންޒަރުތައް ފެނިފައި ބައެއް މީހުންގެ ހަނދާތައް ގެންގޮސްދިނީ މީގެ އެތައް އަހަރެއް ކުރިއަށެވެ. އެއީ ދިވެހިން ފުޓުބޯޅައާ ހެދި މޮޔަވެފައި ތިބޭ ވަރެވެ. ފެނުނީ ހަގީގީ ސަޕޯޓެވެ.
ވިކްޓަރީ އާއި ބީޖީގައި ޝާޒު ހެޑް ކޯޗެއްގެ ގޮތުގައި މަސައްކަތް ކުރި އިރު އޭނާގެ އިސް އެހީތެރިޔަކީ އެސިސްޓެންޓް ކޯޗު ނިސްތާރެވެ. ފަހުން ދެ ކޯޗުން ވެސް ވަކިން މަސައްކަތް ކުރަން ފަށައި ހެޑް ކޯޗެއްގެ ގޮތުގައި ނިސްތާރު ވެސް ޝާޒުއާ ދެކޮޅަށް ވެސް ނުކުތެވެ. އެކަމަކު، އެއީ ދެ މެޗަކަށް އުފެދޭ ވާދަވެރިކަމެކެވެ. މެޗު ނިންމާފައި އެ ވާދަވެރިކަން ނިމެނީ އެވެ. ދެން އެ ގުޅުން ބަދަލުވަނީ އެއްބާރުލުން ދިނުމުގެ ޕްރޮޖެކްޓަކަށެވެ. އެކުގައި މަސައްކަތް ކުރާނެ ޕްލެޓްފޯމެއް ވެސް އެ ދެ މީހުން އުފެއްދި އެވެ. އެއީ "ނައިންޓީ ޕްލަސް" އެވެ.
އެންމެ ފުރަތަމަ ރަޖިސްޓަރީ ކުރީ ނައިންޓީ މިނެޓްސްގެ ނަމުގަ އެވެ. އެއީ ވެސް ފުޓްބޯޅައާ ގުޅުވައިލުމަށެވެ. ފުޓްބޯޅަކީ 90 މިނެޓްގެ ގޭމެކެވެ. ގިނަ ފަހަރަށް 90 އަށް ވުރެ އިތުރެވެ. އެހެންވެ ފަހުން އެ ނަން ރީ ބްރޭންޑްކޮށް "ނައިންޓީ ޕްލަސް" އަށް ބަދަލު ކުރީ އެވެ.
ގޯލްޑް ކަޕަކީ ނައިންޓީ ޕްލަސްގެ ކުޑައިގެ ދަށުން ބޭއްވި ދެވަނަ އިވެންޓެވެ. އެއީ މުޅި ރާއްޖެ އަށް އެނގޭ ވަރުގެ އިވެންޓަކަށް ވީ އެވެ. އެފްއޭއެމްގެ ކޯޗިން އެޑިއުކޭޝަން ޑިޕާޓްމެންޓްގެ ކުރީގެ ހެޑް ޝާޒު އަށް ފެންނަން ފެށީ ފުޓްބޯޅައިގެ މަގުބޫލުކަން ދައްވަމުން ދިޔަ ތަނެވެ. ފުޓްބޯޅަ އަށް ވުރެ އެހެން ކުޅިވަރުތައް މަގުބޫލުވަމުން ދިޔަ ތަނެވެ. އެހެން ޕްލެޓްފޯމުތަކުގައި އެ ކުޅިވަރުތައް ޕްރޮމޯޓްވެ، މަގަބޫލު ވަމުން އަންނަ މަންޒަރު އޭނާ އަށް ފެނުނެވެ.
އެކަމަކު ފުޓްބޯޅައިގެ މަގުބޫލުކަން އޮތީ ދަށް ވެފަ އެވެ. ފުޓްބޯޅަ މާކެޓް ކުރުމަށް އެއްވެސް ކަމެއް ނުކުރެވެ އެވެ. ދިވެހިންގެ މެދުގައި އެންމެ މަގޫބޫލު ކުޅިވަރަށް ދިވެހިންގެ ވެލިއުއެއް ނެތެވެ. ވަގުތު ހުސްކޮށްގެން ބަލަންދާ ވަރުގެ އެއްޗެއްގެ ގޮތުގައި ފުޓްބޯޅަ ވެފައި ނެތް މަންޒަރު ވެސް ޝާޒު އަށް ފެނުނެވެ.
އޭއެފްސީ ކޯޗިންގެ އެންމެ މަތީ ފާސް ޕްރޯ ލައިސަންސް ހާސިލު ކުރި ރާއްޖޭގެ ފުރަތަމަ ކޯޗު ޝާޒު، ކޯޗެއްގައި ގޮތުގައި ކުރި މަސައްކަތާއި ކޯޗިން ކޯސްތަކުގައި ކިޔަވައި ދިނުމަށް ހޭދަ ކުރި ވަގުތާއި އެފްއޭއެމްގެ އެތެރޭގައި ފުޓްބޯޅައިގެ މޫވްމެންޓް ހުރި ގޮތް ގާތުން ފެނުނު މީހެއްގެ ހައިސިއްޔަތުން އޭނާ އަށް ވިސްނުނީ ފުޓްބޯޅަ އަށް ބޮޑު ބަދަލެއް ބޭނުންވާ ކަމެވެ.
"ފުޓްބޯޅަ މާކެޓް ކުރެވި އެ އަށް ވެލިއުއެއް ހޯދި ދާނެތޯ؟ އަލުން ދަނޑަށް ސަޕޯޓަރުން ވެއްދޭނެ އެއްޗަކަށް ފުޓްބޯޅަ އަދިވެސް ހެދިދާނެ ތޯ؟ ޓިކެޓް ގަތުން ވޯތު އެއްޗަކަށް ވެދާނެތޯ؟ އެއީ އަޅުގަނޑު ވިސްނި އެއްޗަކީ. ފުޓްބޯޅަ ވެއްޖިއްޔާ މި ސިފަތައް ހުންނަން ޖެހޭނެ،" ގޯލްޑް ކަޕް ހިޔާލުގެ އެއް ފައުންޑަރު ޝާޒު ބުންޏެވެ.
އެހެންވެ، ރާއްޖޭގައި ފުޓުބޯޅައިގެ ފޯރި އަލުން ގަދަކުރެވޭނެ ހުރިހާ ފޯމިއުލާއެއް އޭނާ ހޯދި އެވެ. ކުރަން ޖެހުނު ހަރަދަކަށް ނުބަލައި އިސްކަންދިނީ ކަން ކުރެވޭނެ ގޮތެއް ހޯދާށެވެ. ޝާޒު ނެރެން ބޭނުންވީ ނަތީޖާ އެވެ.
"ފުޓްބޯޅަ މާކެޓް ކުރަން އާންމުކޮށް ބޭނުން ނުކުރާ ޕްލެޓްފޯމްތައް އަހަރެމެން ބޭނުން ކުރިން. މިޔުޒިކް ޝޯ ބޭއްވިން. މާކަނާ ޝޯ އަށް އެ ވާހަކަ ގެންދިޔައިން. ޓިކްޓޮކް ސެލްބްރިޓީން މެދުވެރިކޮށް މި ވާހަކަ ދެއްކިން. މީހުންނަށް ފަސޭހައިން ހާލަތު ދެނެގަނެވޭ ވަރުގެ ސްލޯގަންއެއް ހެދިން. ލަވަ ހެދި އިރު ވެސް މީހުންނަށް އަޅައިގަންނަ ގޮތަކަށް. ފުޓްބޯޅައިގެ މި ހާލަތު އެނގޭނެ ވަރަށް އެކަން ތިލަކުރެވޭ ވަރުގެ ލަވައެއް ހެދިން،" ޝާޒު ކިޔައިދިނެވެ.
މުބާރާތުގެ ސްލޯގަން އަކީ "އަލުން ދަނޑަށް" އެވެ. ކިޔާލަން ފަސޭހަ ފުޓްބޯޅައިގެ މިހާރުގެ ހާލަތު ސާފުވާނެ ވަރުގެ ކުރު ދެ އިބާރާތެވެ. ލަވައިގެ ޅެން ލިޔުނު މުހައްމަދު އަބްދުލް ޣަނީ (ތޭރަވާ) ކިބައިން ވެސް ޝާޒު އެދުނީ ފުޓްބޯޅައިގެ މިހާރުގެ ހާލަތު ސިފަކޮށް ދެވޭނެ ވަރުގެ ޅެމަކަށެވެ. ލަވައިގެ ރާގާއި މިޔުޒިކް ވެސް އަޅައިގަންނަ ވަރުގެ ބޭސްއެއްގައި ހުރުމަށް އެދުނެވެ. އެ ލަވައިގެ ޕްރޮޑަކްޝަން މަސައްކަތް ތޭރަވާ ފުރިހަމަ ކުރީ އެ ހުރިހާ ސިފައެއް ހަމަވާ ގޮތަށެވެ.
"އެ ވަރަށް އަޅުގަނޑުމެން ވިސްނިން. މީތި ރަނގަޅަށް މާކެޓް ކުރަން ވަރަށް ކުދިކުދި ކަންކަން ވެސް ރަނގަޅަށް ގެންދަން އިސްކަން ދިނިން،" ޝާޒު ބުންޏެވެ.
"މީގައި އަޅުގަނޑުމެންނާ އެކު ބައިވެރިވި ކޮންމެ ބަޔަކު ވެސް މަސައްކަތް ކުރީ ފުޓްބޯޅައިގެ ހާލަތު އެނގި އެކަން ބަދަލު ކުރުމަށް."
ފުޓްބޯޅައިގެ ހާލަތު އޮތް ގޮތުންނާއި ނައިންޓީ ޕްލަސްއަކީ ކޮން ބައެއްކަން ވެސް ނޭނގޭތީ މުބާރާތް ސްޕޮންސާ ކުރާނެ ބޮޑު ބްރޭންޑެއް ހަމައެއް ނުޖެހުނެވެ. އެކަމަކު ވެސް ޝާޒު އާއި ނިސްތާރު އުއްމީދު ކަނޑައެއް ނުލި އެވެ. ދިވެހި ފުޓުބޯޅަ އަށް އާންމުންގެ އިތުބާރު ނެތްކަން އެ ދެ މީހުންނަށް ސާފުކޮށް އެނގެ އެވެ.
ޝާޒު ބުނީ ދަނޑުގައި އިޝްތިހާރު ބޯޑު ޖެހި ގިނަ ވިޔަފާރިތަކަކީ ފައިސާ އަށް ވުރެ ބޮޑަށް އެ ކުންފުންޏަކާ ގުޅިފައި ހުރި މަސައްކަތްތަކެއް މުބާރާތަށް ކޮށްދީގެން އިޝްތިހާރު ޖެހި ބްރޭންޑުތަކެއް ކަމަށެވެ.
"މިސާލަކަށް އޮބިއޮން އިން ހަދައިދިނީ ޓްރޮފީތައް. ޑަބްލިއު ސްޕޯޓްސް ރެފްރީންގެ ޖާޒީ. މި ކަހަލަ ކަންކަން ކޮށްދިން ގިނަ ޕާޓްނަރުން އަޅުގަނޑުމެންނާ އެކު ތިބީ،" ޝާޒް ބުންޏެވެ.
އެކަމަކު މުބާރާތް ނިމިގެން ދިޔަ އިރު ރާއްޖޭގެ ބޮޑެތި އެހެން ބްރޭންޑްތަކާ ހަމައަށް ވެސް މުބާރާތުގެ ފޯރީގެ ވާހަކަ ފޯރި އެވެ. ޝާޒު ބުނީ އަންނަ އަހަރުގެ މުބާރާތް ސްޕޮންސާ ކުރުމަށް ބޮޑެތި ކުންފުނިތަކުން ވެސް މިހާރު ޝައުގުވެރިކަން ފާޅުކޮށްފައިވާ ކަމަށެވެ.
"ދަނޑަށް މީހުން ވެސް ވަދެއްޖެ. ޓިކެޓް ގަނެގެން ދަނޑަށް ވަނުން އެއީ ވޯތު އެއްޗަކަށް ވެއްޖެ. ފުޓްބޯޅަ މާކެޓް ކޮށްފިއްޔާ ފޯރިގަދަ ވާނެކަން ވެސް އެނގިއްޖެ،" ވަރަށް ހިތްހަހަމަ ޖެހިފައި ހުރެ ޝާޒު ބުންޏެވެ.
ރަށްތަކާއި ސިޓީތަކަށް މުބާރާތް ހާއްސަ ކުރީ ކީއްވެ؟
އެފްއޭމުން އަހަރުތަކެއް ކުރިން ބޭއްވި ޒޯން ޗެމްޕިއަންޝިޕް ފުޓްބޯޅަ މުބާރާތަށް ޝާޒުގެ ކޯޗުކަމުގެ ދަށުން ނ. ހޮޅުދޫ ކޮލިފައިކޮށް ދިނެވެ. އެކަމަކު އެ އަހަރުގެ މުބާރާތް އެފްއޭއެމުން ކެންސަލް ކުރީ އެވެ. ރަށްތަކާއި އަތޮޅުތަކުގެ ފުޓްބޯޅައާ ޖެހުމުން އެފްއޭއެމުން އަބަދުވެސް އޮންނަނީ ފަހަތު ފަޔަށް ބުރަ ވެފަ އެވެ. ޝާޒު އަށް ވުރެ ގިނައިން މި ތަޖުރިބާ ކުރީ ނިސްތާރެވެ.
ހެޑް ކޯޗެއްގެ ގޮތުގައި އޭނާ މަސައްކަތް ފެށީ މިނިވަން ޗެމްޕިއަންޝިޕްގައި ގއ. ކޮނޑޭއިންނެވެ. އޭގެ ފަހުން 2017 ގެ ދިވެހި ލީގުގައި އއ. މާޅޮސް ޓީމަށް ކޯޗުކޮށް ދިނެވެ. އެ އަށް ފަހު ށ. ފޯކައިދޫ ޓީމަށެވެ.
ނިސްތާރު ބުނިގޮތުގައި، ލީގުގައި އެ ދެ ރަށު ޓީމު ވާދަކުރި އިރު ވެސް އޭނާ އަށް ފާހަގަ ކުރެވުނީ އެފްއޭއެމްގެ އަހަމިއްޔަތުކަން ރަށްރަށުގެ ޓީމުތަކަށް ކުޑަ ކަމެވެ.
"މާލޭގެ މި ޓީމުތަކަށް ދޭ ވަރަށް ވުރެ މަދުން އެފްއޭމުން ރަށްރަށުގެ ޓީމުތަކަށް ފައިސާ ދެނީ ވެސް. އެކަމަކު ހަގީގީ ފުޓްބޯޅައިގެ ފޯރި މި އޮންނަނީ ރަށްރަށުގައި. އެކަން އަޅުގަނޑަށް އެނގުނު މާޅޮހާއި ފޯކައިދޫން ވެސް،" ނިސްތާރު ބުންޏެވެ.މ
އެފްއޭއެމުން 2018 ގެ ސީޒަން ފަށަން ކުޅުނު ޗެރިޓީ ޝީލްޑްގެ މެޗު ކުޅުނީ ހޯމް އެންޑް އަވޭ އުސޫލުން މާލެ އާއި ފޯކައިދޫގަ އެވެ. ޓީސީން ފޯކައިދު އަށް މެޗު ކުޅެން ދިޔައިރު އެ މެޗު ބަލަން ކައިރީގެ އެހެން ރަށްރަށު މީހުން ފޯކައިދު އަށް ދަތުރު ކުރި އެވެ.
ނިސްތާރު މި ފަހަރު ބޭނުންކުރީ އެ ތަޖުރިބާ އެވެ. ރަށްރަށުގައި ފުޓުބޯޅައިގެ ފޯރި އޮތް ވަރު އޭނާ އޮތީ ތަޖުރިބާ ކޮށްފަ އެވެ. ޓީމު ސަޕޯޓަށް ހާއްސަކޮށް އަމިއްލަ ރަށް ކުޅޭ ނަމަ ދިވެހިން ނުކައި ނުބޮއެ ތިބެ އެ ޓީމު މޮޅު ކޮށްދެވޭނެ ހުރިހާ ކަމެއް ކުރާނެ އެވެ.
"ރަށްރަށުގެ ފުޓްބޯޅައިގެ ހަރަކާތް ވަރަށް ގަދަކަން އަޅުގަނޑަށް އެނގުނު އޭގެ ވަށައިގެން ހިނގާ ކަންތައްތަކުން. އެ މަންޒަރު އަޅުގަނޑަށް ފެނުނީ ރަށްރަށުގެ ފުޓްބޯޅައިން،" ނިސްތާރު ބުންޏެވެ.
އޭނާ ބުނީ އެ މަންޒަރު ރަށްރަށުގެ ފުޓްބޯޅައިން ފެނުމުން، ރާއްޖޭގެ ލީގަށް ވެސް ހަގީގީ ވާދަވެރިކަން ގެނެވޭނީ ރަށްރަށުގެ ޓީމުތައް ބައިވެރިކޮށްގެން ސާފުކޮށް އެނގޭ ކަމަށެވެ.
"ފުޓްބޯޅަ އަށް ބަދަލެއް ގެންނަންޏާ ރަށްރަށުގެ މި ކޮމިއުނިޓީތައް ބައިވެރި ކުރަން ޖެހޭނީ،" ނިސްތާރު ބުންޏެވެ.
އެހެންވެ، ޝާޒުގެ ވިސްނުމާ އެކު، ގޯލްޑް ކަޕް މުބާރާތް ބޭއްވީ ވެސް އެ ހުރިހާ ކަމެއް ސިކުނީގައި ބަހައްޓައިގެންނެވެ. ޝާޒު އާއި ނިސްތާރުގެ ރަށްރަށުގެ ތަޖުރިބާ މުޅި މުބާރާތުގައި ބޭނުންކުރީ އެވެ. މުޅި ރާއްޖެ އަށް އެނގޭ ވަރުގެ މުބާރާތެއް ނައިންޓީ ޕްލަސް އިން ބޭއްވުމުގެ ހިޔާލަކީ ޝާޒުގެ ހިޔާލެއް ކަމަށް ނިސްތާރު ބުންޏެވެ.
ގޯލްޑް ކަޕް ފުޓުބޯޅައާ އެކު ނައިންޓީ ޕްލަސް އަށް މި ފަހަރު ބޮޑު މަގުބޫލު ކަމެއް ލިބުނަސް ރާއްޖޭގެ ފުޓުބޯޅަ ކުރިއެރުވުމުގައި އެއީ ވަރުގަދަ ބްރޭންޑެކެވެ. އެކިއެކި މުބާރާތްތައް ބާއްވައިގެން ފުޓުބޯޅަ އަށް ދިރުން ގެނެވޭތޯ އެތައް މަސައްކަތެއް ކޮށްފި އެވެ.
ނައިންޓީ ޕްލަސް އިން ވަނީ މި އަހަރު ވަނީ އެކަޑަމީ މުބާރާތެއް ވެސް ބާއްވައުފަ އެވެ.
"އެކަޑަމީތަކުގެ މުބާރާތް ކޮންޓިނިއުކޮށް، ބާއްވާ ވާހަކަ އަޅުގަނޑު ޝާޒު ކައިރީ ދެއްކީމާ ޝާޒު ބުނެފި ތި ވިސްނަނީ މާ ކުޑަކޮށޭ. މުޅި ރާއްޖެ އަށް މުބާރާތެއް ބާއްވަން ހިނގާށޭ. އަޅުގަނޑު ހިތައް އެރި މިއީ އަޅުގަނޑުމެން ކަހަލަ ކުޑަކުޑަ ބަޔަކަށް ކުރެވިދާނެ ކަމެއް ބާއޭ،" ނިސްތާރު ބުންޏެވެ.
"އަޅުގަނޑަށް ފާހަގަ ކުރެވުނީ ޝާޒުއާ އެކު މަސައްކަތް ކުރާއިރު ކިތަންމެ ބޮޑު ކަމެއް ވެސް އެއީ ނުވާނެ ކަމެކޭ ބުނެ، އޭނާ ނުހުންނާނެ އެ ރިސްކް ނަގަން ނުކެރިފައެއް. ކުރެވޭތޯ ބަލަން އޭނަ ރިސްކު ނަގައިގެން މަސައްކަތް ފަށާނެ."
އެއީ މި ފަހަރުގެ ގޯލްޑްކަޕް މުބާރާތުގެ ފެށުމެވެ. ދެ މީހުންގެ ދެމެދުގައި ދެއްކެވުނު އާދައިގެ ވާހަކައެއް ބޮޑު ސިންގާ މުބާރާތަކަށް ބަދަލުވީ އެވެ. މުޅި ރާއްޖެ އަށް ގޯލްޑް ކަޕްގެ އަޑު ފަތުރާލީ އެވެ.
ޝާޒުގެ ހިޔާލު ކަރުދާހަށް ތިރިކޮށް އޭނާ އާއި ނިސްތާރު ބައްދަލުކުރީ ސްޕޯޓްސް މިނިސްޓަރު އަބްދުﷲ ރާފިއުއާ އެވެ. މި ހިޔާލަކީ ފުޓްބޯޅައިގެ ފޯރި އަލުން ގެނެވިދާނެ މުބާރާތެއް ކަމަށް ރާފިއު އަށް ފެނިވަޑައިގަތެވެ. އެ މުބާރާތް ކުރިއަށް ގެންދިއުމަށް ރާފިއު ބާރު އަޅުއްވައި މިނިސްޓްރީން ދެވެން ހުރި ހުރިހާ އެއްބާރުލުމެއް ދެއްވާނެ ކަމުގެ ޔަގީންކަން ދެއްވި އެވެ. މުބާރާތުގެ ސޮފްޓް ލޯންޗިން ބޭއްވީ ވެސް ސްޕޯޓްސް މިނިސްޓްރީގައި ބޭއްވި ކުޑަކުޑަ ހަފުލާއެއްގަ އެވެ.
"މިނިސްޓަރު ރާއްޕެ އަށް މިކަން ކޮންވިންސް ވީމާ މަސައްކަތް ކުރިއަށް ގެންދަން ބޮޑު ހިތްވަރަކަށް ވީ ވެސް،" ނިސްތާރު ބުންޏެވެ.
މިނިސްޓަރުގެ ރާފިއުގެ ސިކުނޑިއަށް މިކަމުގެ ބޮޑުކަން ޝާޒު އާއި ނިސްތާރަށް ވައްދައި ނުދެވުނު ނަމަ ފެއިލްވީހެވެ. އެކަމަކު، އެ ދެ މީހުން އެ އަށް ވުރެ ވިސްނުން ރަނގަޅެވެ. މުބާރާތުގެ ނަތީޖާ ރަނގަޅު ކުރުމަށް ރޭވީ މާ ވަރުގަދަ ޕްލޭންތަކެކެވެ.
މުބާރާތުގެ ފޯރިގަދަ ކަމަކީ މުބާރާތުގެ ފައިނަލު މެޗާ ހަމައަށް އައިރު ގިނަ ބަޔަކަށް ޓިކެޓް ނުލިބުމުގެ ޝަކުވާ ބޮޑުވި އެވެ. ދަނޑުގެ ސިޑިބަރީގެ އެއްބައި ހަލާކު ވެފައިވުމުން ގިނަ ބަޔަކު ބޭނުކުރަން ރައްކާތެރި ކަމަކަށް ނުވާތީ އެ ތަންތަން ބޭނުން ނުކުރެވުނެވެ. ޓިކެޓް ވިއްކަން ޖެހުނީ ކޮންޓްރޯލް އަދަދަކަށެވެ.
ފުޓްބޯޅަ މާކެޓް ކުރަން އާންމުކޮށް ބޭނުން ނުކުރާ ޕްލެޓްފޯމްތައް އަހަރެމެން ބޭނުން ކުރިން. މިޔުޒިކް ޝޯ ބޭއްވިން. މާކަނާ ޝޯ އަށް އެ ވާހަކަ ގެންދިޔައިން. ޓިކްޓޮކް ސެލްބްރިޓީން މެދުވެރިކޮށް މި ވާހަކަ ދެއްކިން. މީހުންނަށް ފަސޭހައިން ހާލަތު ދެނެގަނެވޭ ވަރުގެ ސްލޯގަންއެއް ހެދިން. ލަވަ ހެދި އިރު ވެސް މީހުންނަށް އަޅައިގަންނަ ގޮތަކަށް. ފުޓްބޯޅައިގެ މި ހާލަތު އެނގޭނެ ވަރަށް އެކަން ތިލަކުރެވޭ ވަރުގެ ލަވައެއް ހެދިން،"--- ޝާޒު
ފައިނަލް މެޗުގެ ޓިކެޓް ގަންނަން ގޮސް ހުރި މީހަކު ބުނީ، ދަނޑުގެ ސިޑިބަރިތައް ހަލާކުނުވެ، މުޅި ދަނޑު ފުރޭވަރަށް ޓިކެޓް ވިއްކި ނަމަވެސް އޮބި ނޯންނާނެ ކަމަށެވެ.
"އެހާ ވެސް ވަރަށް މިކަމުގެ ތެރެއަށް އަހަރެމެން ވައްދައިފި ފައިނަލާ ހަމައަށް އާދެވުނުއިރު. ކޮންމެ ގޮތަކަށް ޓިކެޓް ހޯދައިގެން ވެސް މި މެޗަށް ވަންނާނެ މީހުން ވާނެ. މި ތިބީ މޮޔަވެފައި،" އޭނާ ބުންޏެވެ.
އެކަމަކު، އެއީ ފައިނަލްގައި ކުޅުނު އައްޑު އާއި އޭދަފުށީގެ ސަޕޯޓަރެއް ވެސް ނޫނެވެ. އުތުރުގެ ރަށަކަށް ނިސްބަތްވާ އެ މީހާ ބުނިގޮތުގައި އޭނާ މި ފަހަރު ބޮޑަށް ބޭނުންވީ ސަޕޯޓަރުންގެ ހިތްގައިމު މަންޒަރުތައް ބަލައި އެ ފޯރި ތަޖުރިބާ ކޮށްލާށެވެ.
"ވަރަށް ދުވަސް ފަހުން އަޅުގަނޑުގެ ލޭ މި ކައްކާލީ ފުޓުބޯޅައިގެ ތެރެއިން،" އެ މީހުންޏެވެ.
ގިނަ ބަޔަކަށް ދަނޑުން ޖާގަ ނުލިބުމުން މައްސަލަ ބޮޑުވި އެވެ. ގަލޮޅު ދަނޑަށް ވެސް ބޮޑު މަރާމާތެއް ބޭނުންވާކަމުގެ މުހިންމުކަން ގޯލްޑް ކަޕުން ސަރުކާރަށް ދައްކައި ދީފި އެވެ
އެކަމަކު، އަދިވެސް އޮތް ސުވާލަކީ ފުޓްބޯޅަ އަށް ބަދަލެއް ގެންނަން ޖެހޭކަން އެފްއޭއެމަށް ގަބޫލު ކުރެވުނު ތޯ އެވެ. އެފްއޭއެމްގެ ނިންމުމާއި ވިސްނުމެއް އަދި ނޭނގެ އެވެ. އެކަމަކު އެއް ކަމެއް ވަރަށް ސާފެވެ. އާންމުންގެ ވިސްނުން ފުޓްބޯޅައާ މެދު ބަދަލު ވެއްޖެ އެވެ. ޝާޒު އާއި ނިސްތާރުގެ ކުޅަދާނަކަން އަހަރެމެން އެންމެންނަށް ދައްކައިދީފި އެވެ.