ދުވުމުގެ ތެރެއިން އަންހެނުން ބާރުވެރިކުރުމުގެ މަގުސަދުގައި އިންޑިއާގައި ބާއްވަމުން އަންނަ މަޝްހޫރު ދުވުމުގެ ހަރަކާތް "ޕިންކެތަން" މި އަހަރު ރާއްޖޭގައި ބާއްވަން އައި-ރަނާސް އިން ތައްޔާރުވެއްޖެ އެވެ.
ފަސް ކިލޯމީޓަރުގެ ދުވުމުގެ މި ރޭސް އޮންނާނީ އަންނަ އޮކްޓޯބަރު 19 ވަނަ ދުވަހު މާލޭގަ އެވެ. އަންހެނުންނަށް ހާއްސަ ރޭހެއް ނަމަވެސް، ސަޕޯޓްދިނުމުގެ ގޮތުން ފިރިހެންނަށް ވެސް ދުވެވިދާނެ އެވެ. ބައިވެރިވުމުގެ ފުރުސަތު ޕިންކެތަން ވެބްސައިޓުގައި އަންނަ ހޮނިހިރު ދުވަހާ ހަމަޔަށް ވަނީ ހުޅުވާލައިފަ އެވެ. ކޮންމެ ބައިވެރިޔަކު 15 ޑޮލަރުގެ ފީއެއް ދައްކަން ޖެހޭއިރު، ޓީޝާޓަކާއި ޑިޖިޓަލް ސެޓްފިކެޓެއް ލިބޭނެ އެވެ.
މި އިވެންޓް ރާއްޖޭގައި އިމްތިޒާކުރާ ރަނާސް ކްލަބް އައި-ރަނާސް އިން ވަނީ އިވެންޓް ޕްރޮމޯޓްކުރުމަށް ތަފާތު ހަރަކާތްތަކެއް ކުރިއަށްގެންދަން ރާވައިފަ އެވެ. އަދި އެ ކްލަބުން އުއްމީދުކުރަނީ މި އިވެންޓް ސިލްސިލާކޮށް ކޮންމެ އަހަރަކު ރާއްޖޭގައި ބާއްވައި އަންހެނުން ބާރުވެރިކުރުމުގައި ބާރުއެޅުމެވެ.
މި އިވެންޓަކީ ދުވުމަށް ހާއްސަ ލޯތްބެއް ޖެހިފައިވާ އިންޑިއާގެ ސުޕަ މޮޑެލް އަދި ފިލްމީ ތަރި މިލިންދު ސޯމަން 2012 ވަނަ އަހަރު ފެށި ހަރަކާތެކެވެ. ބޭނުމަކީ އުރަމަތީގެ ކެންސަރުގެ ހޭލުންތެރިކަން އިތުރުކުރުމާއި އަންހެނުންގެ މެދުގައި ދުޅަހެޔޮ ސިއްހަތު ޕްރޮމޯޓްކުރުމެވެ. އެކަމަކު މި އިވެންޓް ފުޅާވެ މިހާރު މިއީ އަންހެނުން ބާރުވެރިކޮށް އާއިލާތަކާއި މުޖުތަމައު އަދި ގައުމަށް އަންހެނުންނަކީ މިހާ މުހިއްމު ބަޔެއްކަން އަންގައިދީ ވިސްނައިދިނުމުގެ ބޮޑު ހަރަކާތެކެވެ. މީގެ ތެރެއިން ކޮމިއުނިޓީ ރަނާސް ގްރޫޕްތަކެއް އުފެދި އިންޑިއާގެ އެކިކަންކޮޅުތަކުގެ އެތައް ހާސް އަންހެނުންތަކެއްގެ ދިރިއުޅުމަށް ޕޮޒިޓިވް ބަދަލުތަކެއް މި ހަރަކާތުގެ ތެރެއިން ވަނީ ގެނެސްފަ އެވެ. ޕިންކެތަންގެ އެމްބެސެޑަރުންގެ ގޮތުގައި އިންޑިއާގެ މަޝްހޫރު ފިލްމީ ތަރިން ހަރަކާތްތެރިވެ އިވެންޓް ޕްރޮމޯޓްކޮށްދެ އެވެ.
ޕިންކެތަން އިވެންޓް މި އަހަރު މަދުވެގެން ފަސް ގައުމެއްގެ ފަސް ސިޓީގައި ބާއްވާއިރު ފަސްހާހެއްހާ އަންހެނުން ބައިވެރިވާނެ އެވެ. ރާއްޖެ އާއި މެދުއިރުމަތީގެ ގައުމުތަކުގައި ހަފުތާ ބަންދާ ދިމާކުރުމުގެ ގޮތުން އޮކްޓޯބަރު 19 ގައި ބޭއްވި ނަމަވެސް އެހެން ގައުމުތަކުގައި އޮންނާނީ އޮކްޓޫބަރު 21 ގަ އެވެ. އިންޑިއާގެ އެކި ސިޓީތަކުގައި އަހަރުގެ އެކި ހިސާބުތަކުގައި އަންނަނީ ބާއްވަމުންނެވެ.