މޯލްޑިވްސް އިންޓަނޭޝަނަލް މެރެތަންގެ ނަމުގައި މުޅިން އާ ބައިނަލްއަގްވާމީ ދުވުމުގެ އިވެންޓެއް އަންނަ މާޗު މަހުގެ 8 ވަނަ ދުވަހު ހުޅުމާލޭގައި ބާއްވަން ރާވައި ބައިވެރިވުމުގެ ފުރުސަތު މާދަމާ ހުޅުވާލާ ގޮތަށް ހަމަޖައްސައިފި އެވެ.
މިއީ މަޝްހޫރު ރަނިން ކްލަބް އައި-ރަނާސް އާއި އޮބްޖެކްޓް އަދި ޔުނިކްސް ސްޕޯޓިން ގުޅިގެން ބާއްވާ އަދި އެތުލެޓިކްސް އެސޯސިއޭޝަން މޯލްޑިވްސް އާއި މިނިސްޓްރީ އޮފް ޓޫރިޒަމުން އެޕްރޫވްކޮށްފައިވާ އިވެންޓެކެވެ.
މި އިވެންޓުގައި ހިމެނޭ މެރެތަން، ހާފް މެރެތަން އަދި 10 ކިލޯމީޓަރުގެ ދުވުން އޮންނާނީ މާޗު 8 ވަނަ ދުވަހު އެވެ. އެގޮތުން މެންދަމު 2 ޖަހާއިރު މެރެތަން ފަށާއިރު ހާފް މެރެރަން ފަށާނީ ފަތިހު 5:30 ގަ އެވެ. އެއަށް 6:30 ގައި 10 ކިލޯމީޓަރު ދުވުން އޮންނާނެ އެވެ. ފަސް ކިލޯމީޓަރުގެ ދުވުން ފަށާނީ އެ ދުވަހުގެ ހަވީރު 4:30 ގަ އެވެ.
އަދި މާޗު 9 ވަނަ ދުވަހު އާއިލީ ތިން އިވެންޓަކާއި ނިމުމުގެ ރަސްމިއްޔާތު އޮންނާނެ އެވެ. އެގޮތުން ސީނިއާސް ޕަވާ ވޯކްގެ ނަމުގައި އުމުރުން ދުވަސްވީ މީހުންގެ ހިނގުމާއި ކުޑަކުދިންނަށް ހާއްސަކޮށްގެމް ކިޑްސްމައިލް 3.2 ކިލޯމީޓަރު، 1.6 ކިލޯމީޓަރު އަދި 800 މީޓަރު ދުވުމެއް އޮންނާނެ އެވެ. އެއަށް ފަހު ފިނިޝާ ޕާޓީ އާއި އެވޯޑިން ރަސްމިއްޔާ ފަށާނީ އެ ދުވަހު ހަވީރު 5 ޖަހާއިރެވެ.
މި މެރެތަންގައި ބައިވެރިވުމުގެ ފުރަތަމަ ފުރުސަތު މާދަމާ ހަވީރު ހުޅުވާލާނެ އެވެ. އޮންލައިން ރަޖިސްޓްރޭޝަން ލިންކް އިވެންޓުގެ ފޭސްބުކް ޕޭޖުން ފެންނާނެ އެވެ.
ރޭސް ޑިރެކްޓަރު ހުސެއިން ޝުޖާއު ބުނީ ރާއްޖޭގައި ސްޕޯޓްސް ޓޫރިޒަމް ކުރިއެރުވުމުގެ ގޮތުންނާއި ރާއްޖޭގައި ދިގު ރާސްތާ ދުވުމުގެ އިވެންޓްތައް މުޅިން އެހެން ހަރުފަތަކަށް ގެންދިއުމުގެ މަގުސަދުގައި ބާއްވާ މި މެރެތަންގައި ރާއްޖޭން ބޭރުން ގިނަ އަދަދަކަށް ދުވުންތެރިން ބައިވެރިވާނެ ކަމަށެވެ.
"ވަރަށް ހާއްސަ މެހެމާނުން ވެސް އަންނާނެ. މި މެރެތަން ވެގެންދާނީ ވަރަށް ތަފާތު އަދި މުޅިން އާ ކޮންސެޕްޓްތަކެއް ވެސް ހިމެނޭނެ އިވެންޓަކަށް. އަޅުގަނޑުމެން ތަފްސީލްތައް ހިއްސާކުރަމުން ދާނަން،" ޝުޖާ ބުންޏެވެ.
ރިކްރިއޭޝަނަލް ދުވުންތެރިން ތަމްރީންކުރުމުގައި ފާހަގަކުރެވޭ އައި-ރަނާސް އިން އަންނަނީ އައްޑޫ ސިޓީ އާއި ލ. އަތޮޅުގައި ވެސް ދުވުމުގެ އިވެންޓްތައް ބާއްވަމުންނެވެ.