ފުރަތަމަ ފަހަރަށް ބޭއްވި މޯލްޑިވްސް އިންޓަނޭޝަނަލް މެރެތަންގެ ވާދަވެރި ހަތަރު އިވެންޓް 1600 އަށް ވުރެ ގިނަ ބައިވެރިންނާ އެކު މިއަދު ހުޅުމާލޭގައި ކާމިޔާބުކަމާ އެކު ނިންމާލައިފި އެވެ.
ރޭ މެންދަމު 2 ޖެހިއިރު ފެށި ފުލް މެރެތަންގައި، ރޭހުގެ އެމްބެސެޑަރު އިންޑިއާގެ މިލިންދު ސޯމަންއާ އެކު 23 ދުވުންތެރިން ވާދަކުރި އެވެ. ހުޅުމާލޭގެ އިތުރުން މާލޭގައި ވެސް ދުވަން ޖެހުނު އެ ރޭހަކީ، މި ދެ ރަށަށް ހިމެނޭ ރޫޓެއް ކަނޑައެޅުނު ރާއްޖޭގެ ފުރަތަމަ ވާދަވެރި ރޭހެވެ.
ހެނދުނު 5:30 ގައި ފެށި ހާފް މެރެތަންގައި 100 ދުވުންތެރިން ދުވިއިރު އޭގެ ގަޑިއިރެއްގެ ފަހުން ފެށި 10 ކިލޯމީޓަރު ދުވުމުގައި 300 ދުވުންތެރިން ބައިވެރިވި އެވެ. އެންމެ ފަހަށް އޮތް ފަސް ކިލޯމީޓަރުގެ ރޭހުގައި މިއަދު ހަވީރު 1200 ދުވުންތެރިން ވާދަކުރި އެވެ.
އާއްމު ރޭސްތަކާ ހިލާފަށް ފަސް ކިލޯމީޓަރު ދުވުން އެހެން ގަޑިއެއްގައި އޮތުމުން، ދިގު ރާސްތާ އަނެއް ތިން އިވެންޓުގެ ބައެއް ބައިވެރިންނަށް ވެސް، އާއިލާ އާއި ރަށްޓެހިންނާ އެކު "ފަން ރަން" އެއްގެ ގޮތުގައި ފަސް ކިލޯމީޓަރު ދުވުމުގައި ވާދަކުރުމުގެ ފުރުސަތު ލިބުނެވެ.
"މިއީ ތަފާތު، ސަޅި ބަދަލެއް. ފަތިހު ހާފް މެރެތަން ދުވެލާފައި ވޯމްޑައުންއަކަށާ އެއްކޮށް، މަޖާކޮށްލަން ހަވީރު މި ދުވެލީ އަނެއްކާ،" ދެ މެޑަލް ހިފައިގެން ހުރި ބައިވެރިޔަކު ބުންޏެވެ.
މި އިވެންޓުގެ އެންމެ ހާއްސަ ބައިވެރިޔަކީ އިންޑިއާގެ މަޝްހޫރު ފިލްމީ ތަރި އަދި މިހާރު އެ ގައުމުގައި ދުވުން ޕްރޮމޯޓްކުރަމުން އަންނަ އުމުރުން 53 އަހަރުގެ މިލިންދު ސޯމަން އެވެ. އަންހެނުން، އަންކީތާ ކޮންވާރްއާ އެކު އޭނާ މިއަދު ދުވީ، "ބެއާފުޓް" ޕްރޮމޯޓްކުރުމުގެ ގޮތުން ފައިވާނެއްގަ އެވެ. އޭނާ އަކީ ގުދުރަތީ ގޮތުގައި، ހުސްފައިގައި ދުވުމަށް ވަރަށް ބޮޑަށް ބާރުއަޅާ މީހެކެވެ. ވަކި ޓައިމިން އަކަށް ނިންމުމުގެ ބަދަލުގައި، އޭނާ ދުވަމުން ދިޔައީ ވަރަށް ހަމަޖެހިލައިގެންނެވެ. އޭނާގެ އެންމެ ބޮޑު ބޭނުމަކީ މިއީ ކޮންމެ މީހަކަށް ވެސް ވާނެ ކަމެއްކަން އަންގައިދިނުމެވެ.
"އަހަރެން ވެސް ސީދާ ދުވުމުގެ ތެރެއަށް ވަނީ އުމުރުން ތަންކޮޅެއް މަތިވީ ފަހުން. އަހަންނާ ދިމާލަށް ނުވާނެޔޭ ބުނި އެތައް ބަޔަކު. އެކަމަކު ފުރަތަމަ ވެސް ހާފް މެރެތަން ރޭހެއް ޖަހައި އިތުބާރު ހޯދައި މިއަދު އެހެން ހަރުފަތަކަށް އެރިއްޖެ،" ތިން ދުވަހުގެ ތެރޭ 520 ކިލޯމީޓަރު ކަޑައްތުކުރަން ޖެހޭ ދުވުމާއި ބައިސިކަލް ދުއްވުމުގެ ރޭހެއް ހުސްފައިގައި ފުރިހަމަކޮށްފައިވާ ސޯމަން ބުންޏެވެ.
އޭނާ ބުނީ ދުވުމަކީ މީހާގެ ރޫހުއާކޮށްދޭ ކަމެއް ކަމަށާއި ދުވުމުގެ ސަބަބުން އަމިއްލަ ނަފުސަށް ޗެލެންޖްކުރި އަދި އެކަން ކާމިޔާބުކުރުމަށް ކުރާ މަސައްކަތުގެ ތެރެއިން ދިރިއުޅުމުގެ އެހެން ކަންކަމުގައި ވެސް ކާމިޔާބީއާ ހަމަޔަށް ވާސިލްވެވޭނެ ކަމަށެވެ. އޭނާ ވަނީ މައިންބަފައިން ވެސް ކުދިންނަށް ދުވުމުގެ ތެރެއިން މިސާލުދައްކަން އެދިފަ އެވެ.
މޯލްޑިވްސް އިންޓަނޭޝަނަލް މެރެތަމްގައި ދެން އޮތީ ވެސް އެފަދަ އިވެންޓެކެވެ. އެއީ މާދަމާ ހަވީރު ހުޅުމާލޭ ސެންޓްރަލް ޕާކުގައި ސީނިއާސް ޕަވާ ވޯކްގެ ނަމުގައި އުމުރުން ދުވަސްވީ މީހުންނަށް ބާއްވާ ހިނގުމުގެ އިވެންޓަކާއި ކުޑަކުދިންނަށް ހާއްސަކޮށްގެން ބާއްވާ ކިޑްސްމައިލް 3.2 ކިލޯމީޓަރު، 1.6 ކިލޯމީޓަރު އަދި 800 މީޓަރު ދުވުމެވެ. އެއަށް ފަހު ފިނިޝާ ޕާޓީ އާއި އެވޯޑިން ރަސްމިއްޔާ ހަވީރު 5 ޖަހާއިރު އޮންނާނެ އެވެ. ރޭހުގެ ކޮންމެ އިވެންޓެއްގެ، ދެ ޖިންސުން ގަދަ ތިނަކަށް އައިކެއާ އޮޕްޓިކަލްސްގެ ހާއްސަ ހަދިޔާއަކާއި ޓްރީޓޮޕްގެ މެޑިކަލް ޗެޕަކް ވައުޗާއެއް ދޭނެ އެވެ. ރޭސް ނިންމި ކޮންމެ ބައިވެރިޔަކަށް އިވެންޓް ނިމުމާ އެކު ވަނީ ހާއްސަ މެޑެއްޔެއް ދީފަ އެވެ.
އެ މެޑަލްގެ އިތުރުން މި އިވެންޓުގައި އެންމެ ގިނަ ބަޔެއްގެ ޝައުގުވެރިކަން ދަމައިގަތީ ރޭސް ޓީޝާޓަށެވެ. ރާއްޖޭ ސިފަކޮށްދޭ މި ޓީޝާޓުގެ ފަރުމާއަކީ ލޮނުފެން ސްޓޫޑިއޯގެ އަބްދުﷲ ތައުފީގް (ތައު) ގެ ކުރެހުމެކެވެ. މައިގަނޑު ފަރުމާއަކީ ރާއްޖެ އަށް ހާއްސަ ހިރިގަލުގެ ވަޑާމެވެ. މެދުން ފެނިގެންދާނީ ހިމާޔަތްކޮށްފައިވާ ކަނޑުގެ ދިރުންތަކާއި މުރަކަތަކުގެ މަންޒަރެކެވެ. ނޫއުޑު ދައްކުވައިދޭ މަންޒަރުގައި މެރެތަންގައި ލޯގޯ ޖަހާފައިވާއިރު އޭގެ މަތިން ފެންނާނީ އިރުގެ ރަން ދޯދިތައް އެޅިފައިވާ އުދަރެހަކާއި ދޫނިސޫފާސޫފި އުދުހެމުންދާ މަންޒަރެކެވެ.
އައި-ރަނާސް އާއި އޮބެކްޓް ގުޅިގެން ބޭއްވި އިވެންޓުގެ މުހިއްމު ބައިތައް މިއަދު ނިމިގެން ދިޔައީ އެފަދަ ހާއްސަ އެތައް ކަމަކާ އެކު އެވެ. މިއީ ރިކްރިއޭޝަނަލް ދުވުންތެރިން ތަމްރީންކުރުމުގައި ފާހަގަކުރެވޭ އައި-ރަނާސް އިން ބާއްވާ މޯލްޑިވްސް ރަން ސީރީސް އަށް އިތުރުވި މުހިއްމު ބޮޅެކެވެ. އައި-ރަނާސް އިން އައްޑޫ ސިޓީ އާއި ލ. އަތޮޅުގައި ވެސް ދުވުމުގެ އިވެންޓްތައް ބާއްވަ އެވެ.
އައި-ރަނާސްގެ އަމާޒަކީ ރާއްޖޭގައި ދިގު ރާސްތާ ދުވުންތައް އެހެން ހަރުފަތަކަށް ގެންދިއުމުގެ އިތުރުން ރާއްޖޭގައި ސްޕޯޓްސް ޓޫރިޒަމް ކުރިއެރުވުމުމެވެ. އެހެންވެ ކުރިއަށް އޮތްތަނުގައި ރާއްޖޭން ބޭރުގެ ދުވުންތެރިންނަށް މި އިވެންޓް ވަރަށް ބޮޑަށް މާކެޓްކުރެވިގެންދާނެ އެވެ. މިލިންދު ސޯމަންއާ އެކު މިއަދު ނިންމާލި ކާމިޔާބު އިވެންޓަކީ އެކަމުގެ ފުރަތަމަ ފިޔަވަޅެވެ.