އަންނަ މާޗު 8 ވަނަ ދުވަހު ހުޅުމާލޭގައި ބާއްވަން ރާވާފައިވަނީ މޯލްޑިވްސް އިންޓަނޭޝަނަލް މެރެތަންގެ މަގުސަދަކީ ރާއްޖޭގައި ސްޕޯޓްސް ޓޫރިޒަމް ކުރިއެރުވުމާއި ދިގު ރާސްތާ ދުވުމުގެ އިވެންޓްތައް މުޅިން އެހެން ހަރުފަތަކަށް ގެންދިއުމެވެ. މެރެތަންގެ ފިނިޝާ މެޑަލާއި ރޭސް ޓީޝާޓުން ވެސް ދައްކުވައިދެނީ އެ ތަފާތެވެ.
އައި-ރަނާސް އާއި އޮބްޖެކްޓް އަދި ޔުނިކްސް ސްޕޯޓިން ގުޅިގެން ބާއްވާ މި މެރެތަންގައި ހިމެނޭ މެރެތަން ރޭހާއި ހާފް މެރެތަން ރޭސް އަދި 10 ކިލޯމީޓަރު ރޭސް ނިންމާ ބައިވެރިންނަށްދޭ މެޑަލުން ސިފަވެގެންދާނީ ރާއްޖޭގެ ގުދުރަތީ ވެށްޓެވެ.
މެޑަލް ހަދާފައިވަނީ ހުންގާނެއްގެ ބައްޓަމަށެވެ. އޭގެން ރަމްޒުކޮށްދެނީ ރާއްޖޭގެ ކަނޑުދަތުރުފަރެވެ. ހުންގާނުގެ ވަށައިގެން ފެންނަން ހުންނާނީ ރާއްޖޭގައި ހިމާޔަތްކޮށްފައިވާ ކަނޑުގެ ދިރުންތަކާއި މުރަކަތެކެވެ.
ރޭސް ޓީޝާޓް ވެސް އެހާ ތަފާތެވެ. މައިގަނޑު ފަރުމާއަކީ ރާއްޖެ އަށް ހާއްސަ ހިރިގަލުގެ ވަޑާމެވެ. މެދުން ފެނިގެންދާނީ ހިމާޔަތްކޮށްފައިވާ ކަނޑުގެ ދިރުންތަކާއި މުރަކަތަކުގެ މަންޒަރެކެވެ. ނޫއުޑު ދައްކުވައިދޭ މަންޒަރުގައި މެރެތަންގައި ލޯގޯ ޖަހާފައިވާއިރު އޭގެ މަތިން ފެންނާނީ އިރުގެ ރަން ދޯދިތައް އެޅިފައިވާ އުދަރެހަކާއި ދޫނިސޫފާސޫފި އުދުހެމުންދާ މަންޒަރެކެވެ.
މިއީ ލޮނުފެން ސްޓޫޑިއޯގެ އަބްދުﷲ ތައުފީގް (ތައު) ގެ ކުރެހުމެއްގެ ނަކަލެކެވެ. އޭނާ މި ކުރެހުން ކުރަހާފައިވަނީ، ފެމިލީ ރޫމް ބައި ކޮފީ ލެބުގައި ބޭއްވި މެރެތަންގެ ޕްރޮމޯޝަނަލް ހަރަކާތެއްގައި ލައިވްކޮށެވެ.
މޯލްޑިވްސް އިންޓަނޭޝަނަލް މެރެތަން އަކީ ޓޫރިޒަމް މިނިސްޓްރީން އެންޑޯސްކޮށްފައިވާ ޓްރެވަލް މެރެތަންސް އޮފް މޯލްޑިވްސް ސީރީސްގައި ހިމެނޭ އިވެންޓެކެވެ. ދެން އޮންނާނީ ލ. އަތޮޅާއި އައްޑޫ ސިޓީ އާއި ފުވައްމުލަކުގައި ބާއްވާ އިވެންޓްތަކެވެ.
ރޭހުގައި ބައިވެރިވުމުގެ ފުރުސަތު މި މަހުގެ 10 ވަނަ ދުވަހުގެ ނިޔަލަށް ވަނީ ހުޅުވާލައިފަ އެވެ. މާޗު 8 ވަނަ ދުވަހުގެ މެންދަމު 2 ޖަހާއިރު މެރެތަން ފަށާއިރު ހާފް މެރެރަން ފަށާނީ ފަތިހު 5:30 ގަ އެވެ. އެއަށް 6:30 ގައި 10 ކިލޯމީޓަރު ދުވުން އޮންނާނެ އެވެ. ފަސް ކިލޯމީޓަރުގެ ދުވުން ފަށާނީ އެ ދުވަހުގެ ހަވީރު 4:30 ގަ އެވެ.
އަދި މާޗު 9 ވަނަ ދުވަހު އާއިލީ ތިން އިވެންޓަކާއި ނިމުމުގެ ރަސްމިއްޔާތު އޮންނާނެ އެވެ. އެގޮތުން ސީނިއާސް ޕަވާ ވޯކްގެ ނަމުގައި އުމުރުން ދުވަސްވީ މީހުންގެ ހިނގުމާއި ކުޑަކުދިންނަށް ހާއްސަކޮށްގެމް ކިޑްސްމައިލް 3.2 ކިލޯމީޓަރު، 1.6 ކިލޯމީޓަރު އަދި 800 މީޓަރު ދުވުމެއް އޮންނާނެ އެވެ. އެއަށް ފަހު ފިނިޝާ ޕާޓީ އާއި އެވޯޑިން ރަސްމިއްޔާ ފަށާނީ އެ ދުވަހު ހަވީރު 5 ޖަހާއިރެވެ.
ރޭސް ޑިރެކްޓަރު ހުސެއިން ޝުޖާއު ބުނީ ރާއްޖޭގައި ސްޕޯޓްސް ޓޫރިޒަމް ކުރިއެރުވުމުގެ ގޮތުންނާއި ރާއްޖޭގައި ދިގު ރާސްތާ ދުވުމުގެ އިވެންޓްތައް މުޅިން އެހެން ހަރުފަތަކަށް ގެންދިއުމުގެ މަގުސަދުގައި ބާއްވާ މި މެރެތަންގައި ރާއްޖޭން ބޭރުން ގިނަ އަދަދަކަށް ދުވުންތެރިން ބައިވެރިވާނެ ކަމަށެވެ. "ވަރަށް ހާއްސަ މެހެމާނުން ވެސް އަންނާނެ. މި މެރެތަން ވެގެންދާނީ ވަރަށް ތަފާތު އަދި މުޅިން އާ ކޮންސެޕްޓްތަކެއް ވެސް ހިމެނޭނެ އިވެންޓަކަށް. އަޅުގަނޑުމެން ތަފްސީލްތައް ހިއްސާކުރަމުން ދާނަން،" ޝުޖާ ބުންޏެވެ. ރިކްރިއޭޝަނަލް ދުވުންތެރިން ތަމްރީންކުރުމުގައި ފާހަގަކުރެވޭ އައި-ރަނާސް އިން އަންނަނީ އައްޑޫ ސިޓީ އާއި ލ. އަތޮޅުގައި ވެސް ދުވުމުގެ އިވެންޓްތައް ބާއްވަމުންނެވެ.