ވެލާނާ އިންޓަނޭޝަނަލް އެއާޕޯޓު (ވީއައިއޭ) ކައިރިން މޫދުގައި ޝޮޕިން ސެންޓެއް ހެދުމުގެ ވިސްނުން ގެންގުޅުއްވާ ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެ އެވެ.
އެއާޕޯޓުގައި ބޭރުގެ ހަތަރު ފްރެންޗައިސެއް ހުޅުވުމަށް ބޭއްވި ރަސްމިއްޔާތުގައި ސައީދު ވިދާޅުވީ ރައީސް އަބްދުﷲ ޔާމީން، އެއާޕޯޓު ތަރައްގީ ކުރުމަށް ގެންގުޅުއްވާ ތަސައްވުރުގައި "އޯވަ ވޯޓަ ޝޮޕިން ސެންޓަރެއް" ހެދުމުގެ މަސައްކަތް ކުރަމުން އަންނަ ކަމަށެވެ. ނަމަވެސް، މިނިސްޓަރުގެ ވާހަކައިގައި ވީއައިއޭގެ ކައިރިން މޫދުގައި ހަދާ ޝޮޕިން ސެންޓަރާ ގުޅޭ އިތުރު މައުލޫމާތެއް ނުދެއްވަ އެވެ.
ސައީދު، ފަހުން "މިހާރު" އަށް ވިދާޅުވި ގޮތުގައި ޝޮޕިން ސެންޓަރު ގާއިމު ކުރުމުގެ މަސައްކަތް ކުރާނީ އެއާޕޯޓުގައި ހަދަމުން އަންނަ އާ ޓާމިނަލް ހެދުމަށް ފަހު އެވެ. އެމްއޭސީއެލުން ކުރިން ބުނި ގޮތުގައި 7.5 މިލިއަން ޓޫރިސްޓުންނަށް ހިދުމަތް ދެވޭ ފެންވަރުގެ ޓާމިނަލް ނިންމުމަށް ދެތިން އަހަރު ނަގާނެ އެވެ.
މޫދު ތެރޭގައި ހަދާ ޝޮޕިން ސެންޓަރާ ގުޅޭ މައުލޫމާތު ފަހުން ހާމަކުރައްވާނެ ކަމަށް އޭނާ ވިދާޅުވި އެވެ.
"އެއާޕޯޓު ތަރައްގީ ކުރުމަށް ގެންގުޅޭ ތަސައްވަރުގައި ހުރިހާ މަސައްކަތެއް ނިންމަން ވަގުތުތަކެއް ނަގާނެ. އެހެންވެ، ފުރަތަމަ ވަކި މަޝްރޫއުތަކެއް ކުރިއަށް މި ގެންދަނީ،" ސައީދު ވިދާޅުވި އެވެ.
އެއާޕޯޓުގެ ވީއައިޕީ ޓާމިނަލް ހަދައި ނިމުމުން، މިހާރު ވީއައިޕީ ޓާމިނަލަށް ދިމާވާ ގޮންޖެހުންތައް ހައްލުކުރެވި ކޮމާޝަލް ކަންކަމަށް ބޮޑު ސަރަހައްދެއް އޮންނާނެ ކަމަށް އޭނާ ވިދާޅުވި އެވެ.
"އެތަނަށް (ވީއައިޕީ ޓާމިނަލް) އަންނަ ބައެއް ހައި ނެޓްވޯކް އިންޑިވިޖުއަލް ކަސްޓަމަރުންނަށް ފްލައި އޯވާއަކުން ސީދާ ޖެޓީއަށް މަގުމަތި ހުރަސްނުކޮށް ތިރިއަށް ލިފްޓަކުން ފޭބޭނެ އިންތިޒާމް ހަމަޖެހިފައި ހުންނާނެ. އެ މަސައްކަތް އިރާދަކުރެއްވިއްޔާ ވަރަށް އަވަަހަށް ނިމޭނެ،" ސައީދު ވިދާޅުވި އެވެ.
ސައީދު ވިދާޅުވި ގޮތުގައި، މި ހުރިހާ މަސައްކަތެއް، ވެލާނާ އެއާޕޯޓުގައި ނިމޭއިރު، މިއަށްވުރެ ރީތި، ހިތްގައިމު އެއާޕޯޓެއް މި ސަރަހައްދުގައި ވެސް ނޯންނާނެ އެވެ.
"އެ ޔަގީންކަން އަޅުގަނޑަށް ކެރޭ ދޭން. އެއަށް ތިބޭފުޅުން ވިދާޅުވާނީ ސިންގަޕޫރުތޯ ސްވިޒަލޭންޑްތޯ، އެއަށް ބަހުސްކޮށްލައްވާ ތިޔަބޭފުޅުން. އަޅުގަނޑަށް މައްސަލައެއް ނެތް. ނަމަވެސް، މި ރީތި ކަމެއް، ހިތްގައިމު ކަމެއް ދުނިޔޭގެ އެއްވެސް ތަނެއްގައި ނޯންނާނެ،" ސައީދު ވިދާޅުވި އެވެ.
އެއާޕޯޓުގައި ހިނގަމުންދާ ބައެއް ބޮޑެތި މަޝްރޫއުތަކުގެ ތެރޭގައި ހަތް މިލިއަން ފަސެންޖަރުންނަށް ހިދުމަތް ދިނުމަށް އާ ޓާމިނަލެއް އެޅުމާއި ތިން ފިއުލް ޓޭންކާ އެކު، އާ ފިއުލް ފާމެއް ހެދުމާއި އޮޓޮމޭޓަޑް ކާގޯ ޓާމިނަލެއް ހެދުމާއި އޭޕްރަން ބޮޑު ކުރުމާއި މުޅިން އާ ސީ ޕްލޭން ޓާމިނަލެއް ހެދުމާއި ފަސް ބުރީގެ ވީއައިޕީ ޓާމިނަލެއް ހެދުން ހިމެނެ އެވެ. އެއާޕޯޓު ތަރައްގީ ކުރުމަށް ހިންގާ އެއް ބިލިއަން ޑޮލަރުގެ މަޝްރޫއުގެ ދަށުން އިއްޔެ ވަނީ ދިގުމިނުގައި 3،400 މީޓަރު، ފުޅާމިނުގައި 60 މީޓަރު ހުންނަ ރަންވޭ ހުޅުވައިފަ އެވެ.