ގައުމީ ޔުނިވަސިޓީ އާއި އައްޑޫ ސިޓީ ކައުންސިލް ގުޅިގެން ހިތަދޫގައި ހަދާފައިވާ "ސިޓީ ބާޒާރު" ގެ ފިހާރަތައް ކުއްޔަށް ނަގަން ބޭނުންވާ ފަރާތްތަކަށް ފުރުސަތު ހުޅުވާލައިފިި އެވެ.
ހިތަދޫގައި އަލަށް ހެދި ކުޑަކުދިންގެ ޕާކާ ދިމާލުގައި ގާއިމުކުރާ "ސިޓީ ބާޒާރު" ގައި ހިމެނޭ 30 ފިހާރައިގެ ތެރެއިން މަސައްކަތް ފުރަތަމަ ނިންމާލި 10 ފިހާރަ ކުއްޔަށް ނަގަން ބޭނުންވާ ފަރާތްތަކުން ޕްރޮޕޯސަލް ހުށަހެޅުމުގެ ފުރުސަތު އަންނަ މަހުގެ ދެ ވަނަ ދުވަހާ ހަމައަށް ވަނީ ހުޅުވާލައިފަ އެވެ.
އެތަންތަނުގެ މަހު ކުއްޔަކީ 500ރ. އެވެ. އަދި ސެކިއުރިޓީ ޑިޕޮޒިޓްގެ ގޮތުގައި 5،000ރ. ދައްކަން ޖެހެ އެވެ. މި ޑިޕޮސިޓް ފައިސާ 10 މަހަށް ބަހާލައިގެން ދެއްކޭ ގޮތަށް ވަނީ ހަމަޖައްސައިފަ އެވެ.
ސިޓީ ބާޒާރު ކުއްޔަށް ދީގެން ލިބޭ އާމްދަނީ ކައުންސިލާއި ޔުނިވަސިޓީގެ ހިތަދޫ ކެމްޕަހާ ދެމެދު ހިއްސާކުރާ ގޮތަށް ވަނީ ހަމަޖެހިފަ އެވެ. މިކަމާ ގުޅޭ ގޮތުން ކައުންްސިލާއި ހިތަދޫ ކެމްޕަހުގެ އިސްވެރިން ވަނީ މިދިޔަ މަހު ބައްދަލުކޮށް މަޝްވަރާ ވެސް ކޮށްފަ އެވެ.
އެގޮތުން ސިޓީ ބާޒާރުން ލިބޭ އާމްދަނީ ހަރަދު ކުރަން ހަމަޖެހިފައި ވަނީ އައްޑޫގެ ތައުލީމަށެވެ. އާމްދަނީން އެކަމަށް ހާއްސަ ފަންޑެއް ހުޅުވަން ވަނީ ނިންމައިފަ އެވެ.
ސިޓީ ބާޒާރުގެ އިތުރުން ހިތަދޫ ކެމްޕަސް އެކަކާ ދިމާލު ލިންކް ރޯޑުން ޔުނިވަސިޓީ އަށް ދީފައި އޮތް ބިމުގައި "ސިޓީ ބުސްތާން" އެއް ގާއިމުކުރަން ވެސް ވަނީ ނިންމައިފަ އެވެ. އެތަން ހާއްސަކޮށްފައި ވަނީ ކުޑަ ޖާގައެއްގައި އެލޮޓްމަންޓް ގާޑަންއަށެވެ.
ކައުންސިލުން ބުނީ އެކަމަށް ޝައުގުވެރިވާ ފަރާތްތަކަށް ވަރަށް އަވަހަށް ފުރުސަތު ހުޅުވާލާނެ ކަމަށެވެ. އަދި ސިޓީ ބާޒާރުގައި ހިމެނޭ އަނެއް 20 ފިހާރައިގެ މަސައްކަތް މި އަހަރުތެރޭ ފަށަން ވަނީ ނިންމައިފަ އެވެ.
އައްޑޫ މޭޔަރު އަބްދުﷲ ސޯދިގް (ސޯބެ) ވިދާޅުވީ ސިޓީ ބާޒާރާއި ސިޓީ ބުސްތާންގެ މައިގަނޑު މަގުސަދަކީ އައްޑޫގެ ތަރައްގީގައި ޔުނިވަސިޓީ ވެސް ބައިވެރިވުމާ އެކު، އައްޑޫގެ ތައުލީމީ ދާއިރާ ކުރިއަށް ގެންދަން ބޭނުންވާ ފަންޑް ހޯދުން ކަމަށެވެ.
"އެހެންވީމާ މިކަމުން ލިބޭ އާމްދަނީން ކުދިންނަށް ކިޔަވައި ދޭން ހަރަދު ކުރެވޭނެ،" އޭނާ ވިދާޅުވި އެވެ.
ސޯބެ ވަނީ ކައުންސިލާ ގުޅިގެން މިފަދަ ކަމެއް ކުރަން ޔުނިވިސިޓީން މިދިޔަ އަހަރު ނިންމާފައިވާތީ އޭރުގެ ޗާންސެލަރު ޑރ. މުހައްމަދު ޒާހިރު ހުސައިނަށާއި ވައިސް ޗާންސެލަރު ހަސަން ހަމީދަށް ވަރަށް ބޮޑަށް ޝުކުރު ވެސް އަދާކުރައްވައިފަ އެވެ.
ސިޓީ ބާޒާރާއި ސިޓީ ބުސްތާން ގާއިމު ކުރުމުގެ އެއްބަސްވުމުގައި ކައުންސިލާއި ޔުނިވަސިޓީއާ ދެމެދު ސޮއިކުރީ އެޕްރީލް 16، 2015 ގަ އެވެ.