އައްމާން (އެޕްރީލް 6) - ޖޯޑަންގެ ރަސްގެފާން އަބްދުﷲ އަށް ވަފާތެރިކަން މަތީ ދެމި ހުންނެވުމަށް ކުރީގެ ވަލީ އަހުދު ހަމްޒާ ބިން ހުސައިން އެއްބަސްވެވަޑައިގެންފައިވާ ކަމަށް ޝާހީ ގަނޑުވަރުން ބުނެފި އެވެ.
ޕްރިންސް ހަމްޒާއާ އެކު މަޝްވަރާ ކުރުމަށް މެދުވެރިއަކު ވެސް ރަސްގެފާން މިހާރު ވަނީ ހަމަޖައްސަވައިފަ އެވެ.
ބޭރުގެ އެކި ފަރާތްތަކާ ގުޅިގެން ގައުމު ހަލަބޮލިކޮށް ޝާހީ އާއިލާގެ ތެރޭގައި ބަޣާވާތެއް ކުރަން އުޅުނު ކަމަށް ތުހުމަތުކޮށް ޕްރިންސް ހަމްޒާ މިހާރު ހުންނެވީ ގޭ ބަންދުގަ އެވެ. ރަސްގެފާން އަބްދުﷲއާ އެއްބައްޕާފުޅު ހަމްޒާއާ އެކު އިތުރު 16 މީހަކު ހައްޔަރުކުރި އެވެ. ހަމްޒާ އަށް ވަނީ ބޭރުގެ ފަރާތްތަކާ މުއާމަލާތް ކުރުމާއި ސޯޝަލް މީޑިއާ ބޭނުން ކުރުން މަނާކޮށްފަ އެވެ. ހަމްޒާ ވިދާޅުވެފައި ވަނީ ސިފައިންގެ ވެރިޔާ ޖެނެރަލް ޔޫސުފް ހުނެއިޓީ ވަނީ އޭނާގެ ފޯނާއި އިންޓަނެޓް ކަނޑާލާފައި ކަމަށެވެ.
ހަމްޒާ ކުރިން ވިދާޅުވެފައި ވަނީ އެ އަމުރުތަކަށް އޭނާ ތަބާނުވާނެ ކަމަށެވެ. ނަމަވެސް ގަނޑުވަރުގެ ހަމަނުޖެހުމަށް ފިނިކަމެއް ގެނައުމުގެ ގޮތުން، އުމުރުން 41 އަހަރުގެ ހަމްޒާ މިހާރު ވަނީ ރަސްގެފާނަށް އެއްބާރުލުން ދެއްވަން އެއްބަސްވެވަޑައިގެންފަ އެވެ.
"އަޅުގަނޑުގެ ކާބަފައިންގެ ފިޔަވަޅުތައް މަތީ، ސާބިތުކަމާ އެކު ދެމިހުންނާން. ރަސްގެފާނާއި ވަލީ އަހުދަށް އެއްބާރުލުން ދިނުމުގައި އަބަދުވެސް ތައްޔާރަށް ހުންނާނަން،" ހަމްޒާ ސޮއިކުރައްވާ ގަނޑުވަރަށް ފޮނުވި ސިޓީގައި ވިދާޅުވެފައިވެ އެވެ.
ހަމްޒާގެ ސިޓީ އާއްމުކޮށްފައި ވަނީ މައްސަލަ ހައްލު ކުރުމުގައި ރަސްގެފާން މެދުވެރިއަކު ހަމަޖެއްސެވިކަން އިއުލާން ކުރުމާ އެކުގަ އެވެ. މެދުވެރިއެއްގެ ރޯލު އަދާކުރުމަށް ހަވާލުކޮށްފައި ވަނީ ރަސްގެފާނަށް ބޮޑުބޭބެ ވިދާޅުވާ ޕްރިންސް ހަސަން އަށެވެ.
ވަލީ އަހުދުކަން 2004 ވަނަ އަހަރު އަތުލި ހަމްޒާ ވަނީ ޝާހީ އާއިލާ އަށް ފާޅުގައި ފާޑުވިދާޅުވެފަ އެވެ. ރަސްގެފާން އަބްދުﷲ ،59، ހަމްޒާ އަށް ވަލީ އަހުދުކަން ދެއްވީ 1999 ގަ އެވެ. އެއީ ބައްޕާފުޅުގެ ވަސިއްޔަތާ އެއްގޮތަށެވެ. ނަމަވެސް ފަހުން 2004 ގައި ވަނީ ޕްރިންސް ހަމްޒާގެ އަތުން ވަލީ އަހުދުކަން ނަގައި ރަސްގެފާންގެ ދަރިކަލުންނަށް ވަލީ އަހުދުކަން ދެއްވައިފަ އެވެ.
